【酒色財氣（甜呢？）都市獵奇大冒險】《誤上了黑幫老大的情婦，我只好躲在中環的職場胡混》- 第二季：龍雀篇

火一般的卡西 2019-08-20 09:09:53

嗰兩條女卡西都好想食架

抗戰義士 2019-08-20 09:15:33

凍啦

火一般的卡西 2019-08-20 11:40:40

第五十八話：真正高手

我躲在厠格裡並沒有「柯尿」，卻不停地抽煙。

我在想，一會兒，當我出到去再輸掉最後一鋪，我會怎樣。

我要抛低 Rionna 逃跑嗎？狠心地抛低一個為我哭過的女人而逃命？

但太子安這班人是黑社會，我可以那麼容易逃脫到嗎？

想不到淫片事件的「計時炸彈」未爆，我卻先給阿紫的「大對對．連爆」炸死！

突然，有人敲門道：「太子哥問你駛唔駛柯咁耐喎？」

是福伯。

我隨手拉下沖水，再走出來邊洗手邊嘮叨著：「催催催．．．．催 what？輸唔切咩．．．．」

「你知你係唔可能贏。」福伯淡淡然地道。

「我知呀，咁又點喎？唔駛你嚟提我喎，你喺度打雜架咋，扮咩冷靜啫，講親嘢都懶鎮定咁！」我發爛的道。

「咁．．．．你想唔想贏？」福伯道，我一直也沒有望著他，這時卻留意到他擠出了一個古怪的笑容。

「你．．．．你可以幫到我贏？」我瞪大雙眼的反問。

「你只要答我，你，想唔想贏？」福伯再問。

「想！」我斬釘截鐵的答。

「我可以幫你，不過我幫咗你之後，你要幫返我。」福伯道。

「你要我幫你咩？」我追問。

「我要你幫我咩之後我會同你講，總之唔係叫你殺人放火，你而家只需要答我，你要唔要我幫。」福伯再道。

我再沒有多想便答道：「你幫我贏，我一定會盡力幫返你！」

福伯突然從後褲袋拿了一份文件出來，然後道：「口講無憑，有心想我幫你，就喺呢份嘢上面簽個名先。」

我呆了一呆，心知這份文件肯定不是好東西，但現在的我根本沒有選擇，便匆匆簽了。

「好，非常好。」福伯怪異地笑道。

「咁我要做啲咩？」我問道。

「你一陣間出去，搵個藉口熄咗出面嗰幾把掛牆風扇，之後返埋位繼續打牌就得。」福伯答道。

「熄風扇同贏牌有咩關係？」我不解的問。

「你頭先一定好奇怪，點解嗰兩姊妹無打任何眼色同動作，但係都可以清楚知道對方要咩牌，然後跟住就打出畀對方碰？」福伯反問著。

我大力的點頭。

「大家都以為佢哋係心靈感應，其實係因為把掛牆扇。」福伯續道。

「吓，點解會關把掛牆扇事？」我吃驚地問。

「你有無留意，佢哋每次都會等掛牆扇轉到最盡時至摸牌，然後將風扇轉向幅度嘅半圓分成四份代表『筒、索、萬、番』，用牌敲枱面話畀對方聽自己要咩章，再等風扇逆向轉動時再分成九份代表點數、或者分七份代表『東、南、西、北、中、發、白』，最後，喺打牌之前用牌敲多次枱面，咁對方咪知嗰隻係咩牌，呢個就係佢哋可以隔空溝通嘅秘密。」福伯頓了一頓，再加強語氣，道：「『五靈千術』分『火、風、雷、土、水』，呢種就係當中嘅『御風術』！」

「紫霞」要靠風才能吹動，「寧波紫霞」可以不斷碰牌的秘密原來就是「風」！

我恍然大悟，難怪她們無論在摸牌後和打牌前都用牌敲枱面，原來就是為了打暗號給對方，讓對方知道自己想要甚麼牌。

兩個人打一份牌，當然能夠比其他要造牌的人更快食糊。

而我卻只留意著那兩對巨乳跳動的動作，輸得一敗塗地也是活該的。

忽然間，我再仔細打量眼前這個叫「福伯」的老頭，其實他不是真的那麼老，亦不是那麼的醜，令人覺得他面容不堪入目的，是因為他臉上的數道疤痕，這時望真一點，發覺原來他的雙目如鷹，隱隱閃出像刀一樣鋒銳的凌厲光芒，現在毁了容，又故意裝成一副不修邊幅的潦倒模樣，似乎在隱藏著自己真正的身分。

「你．．．．你點會．．．．知得咁清楚嘅？」我茫然地問道。

「呢啲鵰蟲小技嚟啫，又點出得大場面賺到真正大錢呀？」福伯「哼」了一下，又徐徐地道：「其實賭錢最緊要係『氣勢』，『氣勢』包含『運氣』同『聲勢』，所有練賭術嘅人終極目標都係想增強自己嘅『氣勢』，因為要有絕頂嘅『氣勢』至可以令你逢賭必勝，不過人有三衰六旺，賭錢時總會遇到自己『氣勢』比對手弱嘅情況發生，喺呢個時候就要用千術嚟偷返個『氣勢』返嚟。一般嚟講，『寧波紫霞』嘅『御風術』已經可以令佢哋賺取足夠嘅『氣勢』去贏任何嘅牌局，只可惜而家佢遇到嘅對手係我。」

福伯陰森地笑了一笑，再道：「我嘅『氣勢』，會將佢哋嘅『氣勢』全部都吞噬過嚟！」

離開廁所走回大廳的時候，我故意邊大聲打噴嚏，邊道：「喂，太子哥，唔怪之得成晚都唔聚財，原來我傷風，你知呢排啲流感幾勁，大家都唔想畀我傳染架啦？一係我去睇咗醫生先，下一局再約過打啦？」

「你條友咪扮晒嘢搵藉口閃走呀，你輸剩一鋪之嘛，打完我親自陪你去睇醫生又點話？」太子安道。

我拿起張紙巾往鼻子用力一擤，滿紙當堂沾上鼻涕，再攤開給太子安，道：「你睇，堅傷風架。」

我再走到之前打牌坐的位置，指著幾把掛牆扇，嚷著：「唔怪之得啦，成晚畀幾把風扇係咁吹住，唔吹病就有鬼啦！」

太子安即時吩咐手下，道：「咪畀條友多多事實，同我熄鬼晒啲風扇佢！」

太子安是一個惡人，可惜就是太單純，我略施小計以退為進，他就真的想也沒多想就熄掉在場所有風扇。

我還留意到，「寧波紫霞」的臉色隨即變得相當難看，因為我關掉了風扇，她們就無法施展「御風術」去打暗號給對方。

我要做的已做好了，現在就看福伯怎將敗局扭轉！

我返回座位繼續打牌。

洗牌、配牌過後，一開牌，嚇我一跳。

三隻「紅中」、三隻「五索」、三隻「七索」、三隻「九索」、一隻「一索」！

這是天聽單吊「一索」的牌型！！

福伯肯定是一個堆牌高手，但一般的堆牌都要自己做莊的時候，能控制打骰的點數才可確保堆的牌可以送往自己或別人手中。

但福伯不需要做莊也能達至這個效果。

這個福伯，深不可測。

「本座最憎呢隻牌。」阿紫說罷，竟真的打出了「一索」！

「今晚之後，你會更憎呢隻牌！」我翻起牌，再高聲叫道：「地胡，四暗坎，紅一色！」

Rionna 高興得跳起來，歡呼了一聲。

「師．．．．師姐．．．．『紅一色』呀！」阿霞抖震的叫道。

「無．．．．無可能．．．．佢無可能識彤師叔嘅絕技．．．．」阿紫臉無血色，盯著我翻出來的牌，呢喃著：「一定係撞彩．．．．一定係撞彩．．．．」

半晌，阿紫定一定神後，再推牌道：「再打！你無可能再食到糊！」

終於輪到我做莊，我當然不懂堆牌，但我知道福伯一定會把最強的牌型送去我手上。

果然，我把牌翻開一看，儘管我已有上鋪的經驗，我還是覺得非常震憾。

三隻「發財」、三隻「二索」、三隻「三索」、三隻「四索」、二隻「六索」！

我深呼吸一下，再翻牌道：「天糊，四暗坎，綠一色！」

Rionna 和伯母都一起跳起來，呼叫著：「Yeah！好勁呀！！」

「師．．．．師姐．．．．今次連．．．．師傅嘅『綠一色』都．．．．仲要係『天糊』．．．．呢招係師傅不傳嘅奧義．．．．」阿霞吃驚地道。

這次，阿紫卻冷靜的站起來，道：「本座認輸，失陪。」

說罷，便帶著師妹阿霞離開。

本來「氣勢」如虹的「寧波紫霞」，在福伯面前竟然如此不堪一擊，只是兩鋪牌便可借我的手把她們打得落荒而逃，証明福伯的實力完全是強得超乎想像！

「喂，你呢兩條八婆又話唔會輸嘅？」太子安這時發爛，嚷道：「而家就咁走咗去，算點呀？」

我走過去，拍著太子安的肩膀，笑道：「賭錢邊有話實贏架，既然『寧波紫霞』認輸，牌局就我贏啦喎，咁我外母掙你嗰百五萬就咁算數架啦，你喺江湖咁有名望，唔會講過唔算數啩，係咪呀？」

「哼，你好嘢，我唔會就咁算數架！」太子安指著我道，然後便拂袖而去，他的門生見狀也跟著離開了麻雀館。

就是這樣，一場 $300 萬賭注的牌局就此結束了。

（待續）

蝦毛太郎 2019-08-20 11:46:38

推呀。順便賀你甩p