二十五
「我地剩返一張皇牌…」Jason落court之後,我同佢響佢既辦事處開會:「保安哥哥。」
我嘆左一口氣,道:「你睇鍾官條冚家富貴,有十個保安哥哥黎都冇用…」
Jason哈哈一笑:「第一次聽劉uncle你講粗口。」
我愁眉苦臉,一啲都笑唔出:「我地就輸喇…難為你仲笑得出…」
「劉Uncle,唔好咁悲觀喇!你人生經驗豐富過我咁多,應該知道呢啲時候咁灰心都冇用。」Jason拍拍我膊頭。
我對住佢只好苦笑道:「第時你生左小朋友,然後你個小朋友出左事你就知架喇…」
而家比人告果個係我親生仔,仲要我地好肯定佢係比人冤枉,係屈打成招既,點可能唔擔心…
「有賭未為輸。」Jason例牌有自信咁笑一笑。
我都笑。
只不過係比啱啱更加苦既苦笑。
「你有冇睇過一套叫○權大狀既戲?」Jason話鋒一轉,竟然講起電影來。
我搖頭。
其實我冇心情講呢啲,但可能Jason都係想鼓勵下我,我就無謂對住佢發作喇。
Jason講得啱,我都成五十歲人,應該要冷靜。
「入面既情節去到最尾同我地而家好似。」Jason突然收起笑容,一臉正經地道。
「哦?」我開始有啲興趣。
「套戲係真實事件改篇而成。套戲入面,一樣係有一班年青人因為莫須有既罪名被屈打成招,主角宋律師一樣係面對住完全唔公平既審訊。」Jason續道:「但去到審訊最尾,佢手上面仲有一張皇牌,去證明班年青人係被班秘密警察屈打成招既。」
「唔係咁啱又係有個保安哥哥下嘛?」我苦笑地道。
哈,估唔到呢個時候我都仲識開玩笑。
「唔係。」Jason搖一搖頭:「有個睇唔過眼既軍醫出黎做證,而呢個軍醫當時係有份醫治果班被虐打既學生。」
「驗傷報告已經有…」我道:「只係鍾官唔接受啫。」
「呢啲其實都唔係重點,只係背景資料。」Jason道。
「哦?」咁重點係乜?
「○權大狀入面既法官同鍾官都一樣,係個仆街人渣黎,宋律師佢地完全得唔到公平既審訊。」Jason道。
「我都知鍾官係個仆街…」顯而易見既事實…
「你聽埋先…為左比壓力呢個仆街,宋律師佢地搵左一大班外國既傳媒去睇呢單官司,將一件韓國發生既案件,煲大到成為國際事件,而因為在場既國際傳媒既監察,令到個法官都唔夠膽亂黎!」Jason將戲入面既情節講出黎。
「唔…雖然有參考價值,但係鍾官已經下令響審訊完結之前,所有既傳媒唔可以報導任何有關於呢件案既新聞。」我嘆一口氣:「咁即係我地做唔到戲入面既效果…」
「有冇諗過玩大佢?」Jason自信地笑一笑。
「哦?」
「唔係搵外國傳媒,而係直接搵外國官員,或者至少係搵外國大使館既大使!」Jason回答。
「你認真架?」
「你覺得我似講笑?」Jason收起笑容,一臉認真地道:「佢唔比傳媒報導,我地就搵外國官員、議員直接入黎睇,究竟香港既制度崩壞到乜野地步!」
唔…
諗深一層,好似幾有道理…
但係香港只係一個彈丸之地,外國官員得唔得閒理你呀?
「真係會work?」我將疑問表達出黎:「班外國官員會咁得閒理我地?」
「劉Uncle,你都唔好將香港睇得太細…」Jason拍拍我膊頭:「得閒你可以睇多啲沈○暉沈教授既文章,擴闊下國際視野,咁你就知道香港其實係一個好有國際特殊戰略地位既地方。」
「係咩…」我仲係唔係幾信…
「連英國、美國咁多議員都響Twitter出聲表達對香港時局既關注,你唔信我都信下佢地喇!」Jason話:「唔好理佢地既出發點係乜野,如果佢地親身黎法庭觀察既話,鍾官都應該唔夠膽亂黎。」
「唔…」又好似…幾有道理…
「如果佢咁都仲亂黎既話,外國大條道理唔再相信香港既司法獨立同制度,到時隨時引起連鎖反應,一大班外資撤資,限制對香港既出入口同埋中轉到中國既轉口,咁就真係攬炒。某經濟強國都一定唔想為左搵十幾個小朋友祭旗而玩咁大!」
「如果係咁既話…就做喇!」我用力點頭!
為左救返阿禮,我做乜都得!
「嘿嘿…特手成日話外國勢力介入…呢鋪我就搵佢地介入比你睇!」Jason難得地露出一個奸笑樣,然後輕輕地哼道:「Sir, this way, sir!」
我都即刻拎起個電話,叫然仔同Emily幫手儘量聯絡外國使館同外國議員。
一切…終於都黎到最後既決戰時刻!
(待續)