268 Like
12 Dislike
唔L記得咗
2019-01-03 13:42:27
有小黑幫手,仲有最重要嗰棵蔥
花開堪折
2019-01-03 15:36:50
棵蔥可能係伏筆
記憶中找你
2019-01-03 18:59:32
行山男=丁利華?
夏舞
2019-01-03 21:53:22
非人之物嘅「妖」、超自然存在嘅「魔」、死後靈體嘅「鬼」、異於常理嘅「怪」。
集齊四樣災厄嘅不祥之地。
「如果單純係磁場異常,西貢一帶山區亦有好多。」若兒繼續解釋,「但鎖羅盆村入面,似乎有更危險嘅嘢潛伏。」
「……接受得委託,我就會去。」
「嗰個委託根本無效……其實你知㗎?」
「無效?咩意思呀?」白寧不解咁問。
「無咩意思,嗰個委託係有效,我會幫嗰個男人搵返佢個女,就係咁簡單。」
若兒合上嘴巴,平淡咁望住我雙眼。
「唉,真係無你收……」若兒撳住額頭,「咁就俾我陪住你同小白寧一齊行,至少我可以幫到你哋忙。」
「……對唔住若兒。」
「唔使,我會相信小凌嘅決定。」
我同若兒商議完之後,就繼續前行。
白寧愣望住我哋二人對話,但無多口追問,默默帶住小黑跟喺我哋身後。
「係喇,穆樞機係邊個嚟㗎?」話口未完白寧又問三道四。
「唔關你事,行路啦你。」我簡單回答。
一路上前行,磁場反應愈嚟愈強烈,磁場探測器反應由原先嘅黃色變到最嚴重嘅紅色。
「咁強烈嘅磁場反應,可能性只有一個。」若兒望住部探測器。
——結界。
夏舞
2019-01-03 21:53:52
由強烈而紊亂嘅磁場而形成嘅空間結界。
結界可以分為三類:符結界——喺周圍貼上刻有法陣嘅符紙以形成邊界嘅結界、膜結界——以某樣嘢作為核心而形成嘅結界。
魅魔嘅黑霧,就係以自身作為核心嘅膜結界例子。
除咗靈體本身,亦可以用法陣、符石等工具作為核心。
最後一種係無形結界,既無核心亦無邊界,由地球紊亂嘅磁場自然形成,形狀扭曲。
無形結界喺大自然好常見,近至西貢,遠至百慕達三角,連馬航MH730離奇失蹤事件都係由無形結界引起。
妖魔鬼怪嘅「怪」,並非指某種特定存在,而係所有異於常理嘅自然怪異景象,無形結界就係其中一種「怪」。
「唔……好辛苦……」若兒神情痛苦,身體閃爍不停。
「若兒小姐……發生咩事?」白寧疑問。
「若兒,你返入去先。」我命令若兒。
若兒化成一縷白煙,返到我褸袋入面。
我向白寧解釋:「鬼係由能量形成,會受強烈嘅磁場干擾。」
嘟嘟嘟嘟嘟嘟——
磁場探測器響起警報聲,前方磁場反應達到最高點,而且喺最高點嘅位置之中有個探測唔到任何磁場反應嘅缺口。
「睇嚟嗰度就係結界入口,我哋要把握時間入去。」
「……結界?」白寧疑問。
「你記唔記得我用白紙比喻過唔同空間?」我向白寧解釋,「但實際上白紙唔一定係平滑,皺咗或者爛咗嘅地方,就係結界。」
「即係……扭曲咗嘅空間?」白寧罕有地大腦開竅。
「你今次幾醒下。」
夏舞
2019-01-03 21:55:33
鎖羅盆結界情況極度嚴重,中年男人個女好可能係誤闖結界而失蹤。
如果個女仔係跌咗落山,消防拯救隊會仲有用過我。
但係如果佢係誤闖結界,咁就會係我職責範圍之內。
我哋沿住缺口行去,不過缺口並唔係山徑上,而係側邊被密林遮蔽嘅位置。
撥開樹枝越過密林後,卻去到懸崖邊。
望落去唔係好高,大約十米左右,至少頭唔落地唔會死人。
「我哋……」白寧口震震咁指住下面,「要喺咁高跳落去?」
「嗯。」
磁場探測器顯示缺口就喺懸崖正下方。
「但係……但係……」
「你好麻煩。」我一腳伸落白寧嘅屁股。
一陣尖叫聲響遍山頭,然後我抱起小黑一齊跳落懸崖。
天旋地轉,磁場探測器停止響鳴。
我哋並無預期般高空墜落,喺跌落嘅一瞬間眼前畫面一轉,安全落咗喺一條陌生嘅山徑上。
「哇啊啊啊!師父正衰人!我真係以為會跌死!師父,你……咦?點解……」
「呢度……」
我哋愣望住眼前情景——
因為,太陽正高掛天空之上。
夏舞
2019-01-03 21:55:52
神伏筆
夏舞
2019-01-03 21:56:36
巴打識野 不過丁利華係行西貢
但鎖羅盆行山事件係真有其事
唔L記得咗
2019-01-03 22:07:19
入咗亞空間
磨牙
好__大壓力丫
2019-01-04 00:38:56
泡泡泡泡
2019-01-04 01:00:29
好好睇!加油啊樓主
病態怒屌慕尼黑
2019-01-04 13:03:05
Post繼續推
2019-01-04 17:08:09
凌仔真係零仔
夏舞
2019-01-04 18:17:09
從何得知
Post繼續推
2019-01-04 18:40:03
唔係若兒講嘅咩?
Post繼續推
2019-01-04 21:06:29
咁若兒真正嘅身分可能係女裝1仔
夏舞
2019-01-04 21:49:41
「依家……唔係應該夜晚咩?」白寧拎出電話,屏幕顯示而家係凌晨兩點,「點解會喺日頭?」
「我都唔知。」
「因為時空彎曲。」
若兒再次從我褸袋冒出。
「閔可夫斯基時空將空間同時間詮釋為相連,喺基於三條空間軸之上,仲有一條代表時間嘅虛數軸……」
「等等若兒,簡單,腦細胞缺失。」我指住白寧個頭講。
「喔……」若兒微微點頭,「簡單啲講,結界裡面嘅時間流逝速度同現實唔同,可能現實過咗一日,呢度先過咗一個鐘,又或者調返轉都唔奇。」
原來係咁。
「喔,我明白喇!」白寧恍然大悟,「即係出面過咗一日,呢度先過咗一個鐘!」
「你明條鬼,複讀一次唔等於叫明白。」
就連我都第一次遇到時空彎曲,而家眼前情況只可以靠若兒去解釋。
如果係前者都仲好啲,但如果係後者,恐怕……
「小凌,我感知到呢度有好多怪異氣息,但並非靈體……」
氣息怪異但又非靈體……只得一樣。
「喵……!」
小黑警戒地望住前方山徑低吼,似乎感知到某啲事物。
夏舞
2019-01-04 21:50:48
之所以帶埋小黑嚟,係因為貓妖可以感應到大家感應唔到嘅嘢。
天色變光,清晰望到眼前山路。我熄咗電筒,跟住小黑嘅步伐前行。
周圍磁場反應完全消失,所以若兒先可以出返嚟。
指南針亦能夠再次定位,但電話依然收唔到訊號。
由於結界令本身座標出現偏差,就算睇地圖都確認唔到現時位置,只可以一步一步向前行。
「師父。」
「做咩?」
「聞唔聞到好大陣味,好似腐臭味咁!」
「一早聞到。」
入咗結界,發霉芝士味並無消散,反而愈嚟愈濃烈。
行行下,白寧忽然嗌咗聲,跟住有塊嘢飛過嚟我腳邊。
「又做咩?」
「我唔小心踢到舊石,好痛!」
「踢到舊石?」
我望一望我腳邊,卻發現異狀——
啱啱白寧踢到嘅唔似係石頭,我踎低執起塊嘢仔細一望,赫然發現——
呢塊係一塊已經發黃腐爛嘅骨頭……!
我起身繼續向前行,發現路上愈嚟愈多骨骸,長短不一,有大有小,當中有啲類似人骨嘅骨頭。
行到轉彎位,樹下有個完整嘅人類頭顱骨。
夏舞
2019-01-04 21:56:48
「唔通呢啲骨頭就係嗰個女仔……!」白寧撳住嘴巴,睜大雙眼惶恐地望住。
「你睇真啲。」我拎起其中一塊骨頭,「骨頭腐化好嚴重,佢嘅主人應該已經死咗幾十年。」
當然亦有現實一日,結界幾十年嘅情況,但我好肯定呢啲骨骸唔係嗰個女仔——
因為呢度唔係止一個人嘅屍骸,而係……好多個人嘅屍骸!
「我哋繼續行。」我放低骨頭。
一路前行,我開始掌握到自己位置,沿住地圖路線向鎖羅盆村進發。
但愈接近鎖羅盆村,前方就泛起愈濃嘅白霧。
「喂,小心——」
正當我想叫白寧嘅時侯,發現佢唔喺我隔籬。
我四圍一望,唔止白寧,連小黑同若兒都消失咗,得返我自己一個!
「喂!若兒!白癡妹!衰貓!」
無人回應。
我拔出銀色匕首,萬分警戒咁向前行。
突然,有隻手拍落我膊頭。
我即刻轉身,將銀刀指向後方。
但眼前出現嘅人,令我驚愕得講唔出任何說話——
「小凌,做咩呀?」
「若兒……?」
出現喺我眼前嘅人就係若兒,只不過唔係鬼魂姿態嘅若兒——
而係活生生嘅若兒……
唔L記得咗
2019-01-04 22:51:23
「怪」可以疑態