我係一個驅魔師，專幫人驅散妖魔鬼怪

我係一個驅魔師，專幫人驅散妖魔鬼怪。

或者好多人唔相信，呢個世界係存在住妖魔鬼怪。

我係無神論者，唔存在宗教信仰，無論係基督教、佛教、道教，定近代新興嘅new age都好，我都一概都唔相信。

因為妖魔鬼怪本身唔係迷信，而係確實存在——

一種同人類唔同形式嘅存在。

就好似呢個世界有貓狗豬牛嘅道理一樣，佢哋亦只不過係呢個世上另一種嘅存在，就係咁簡單。

佢哋大概可以分為四類：非人之物嘅「妖」、超自然存在嘅「魔」、死後靈體嘅「鬼」、異於常理嘅「怪」。

一定會有人問我：「咁點解無人證實到佢哋存在？」

答案好簡單。

「因為暗地裡有班驅魔師將佢哋驅散消滅。」

我所指嘅驅魔師並唔係一般道士、神父之流，佢哋只會專精於某一方面嘅驅魔儀式。

同唔願意接受現代醫學嘅中醫一樣，極其量只係三流之輩。

驅魔師唔單止熟讀各地神秘學知識外，更會運用到科學進行驅魔，例如用E = mc²計算能量轉換，運用唔同化學元素驅魔，又或者透過磁場反應搵出靈體等等。

當然實有人challenge我哋係偽科學，不過我哋本身又唔係宗教，唔會特意去令人信服。

正所謂真的假不了，假的不得了。

我哋職責係幫普通人驅散妖魔鬼怪，但通常都盡量低調行動，以免過份張揚身分。

如果你哋覺得撞邪或者俾嘢纏嘅話，可以留個tg畀我，我會盡快覆你。

不過我哋唔係咩委託都會接受，因為白撞嘅人實在太多喇，就好似上個禮拜嘅黃師奶——

「大師，我個女睇完Annabelle之後瞓覺不停發噩夢，大師求你幫幫手趕走隻Annabelle！」

「首先我唔係大師，其次我係驅魔師唔係心理醫生，你個女睇鬼片睇到發噩夢我都幫唔到你。」

「咁我個女點算啊……」

「下次畀海棉寶寶佢睇算啦。」

仲有前日嘅陳小姐——

「我間房每晚都會有冷氣滴水聲，嚇到我晚晚提心吊膽，瞓唔著覺啊！求下你幫下我大師！」

「你叫你樓上整返好部冷氣機先喇。」

「但係……我住喺最頂㗎喎……」

「仆街！咁得人驚？」

原來佢自己部冷氣機滴水滴落樓下，仲俾樓下投訴返轉頭。

我遇見過嘅白撞無奇不有，當然亦都真係有好多人嚟搵我驅魔啦。

被鬼尋仇、探險玩出禍、離奇失蹤、發夢撞到欣宜……講得出嘅靈異事件我大部分都處理過。

不過就算係真都未必會接受委託，驅魔師都係人，唔會下下搵命搏。

我哋亦會視乎情況，收返相應嘅報酬。

「呢刻開始有關委託嘅所有嘢都要保密，千祈唔可以洩露畀任何人知。」

呢句話係對我哋嘅保障，雖然同「未滿18歲請勿進入」一樣都係咁無用。

面前呢位客人好乖巧點咗下頭，於是我拎出錄音筆，開始錄音。

「你可以開始。」

佢緩緩吐出一口氣，眼神浮離，神色緊張咁開始講。

「我好似撞咗嘢……」

呢句話已經聽過好多次，通常十個有八個都係咁講。

坐喺我對面個女仔叫做Heidi，二十出頭嘅後生女，一頭金色及肩短髮，皮膚白晢，臉容姣好，靚得嚟又無俗氣嘅感覺。

兼且睇落又真係有少少似李靜儀，個樣十分嚟講都有八分。

不過上帝造人係公平，靚女心口總會多咗條第三條跑道——

即係飛機場。

我哋坐喺café某個角落，準備進行驅魔嘅交涉。

可能又會有人問：「驅魔講到咁神秘，點解要喺呢啲咁顯眼嘅地方交涉？」

俗語有云，最危險嘅地方先係最安全。

正因為夠晒顯眼，無人會留意到我哋進行緊驅魔交涉，頂盡都只係會俾人當做偷呃拐騙嘅神棍。

不過我又真係試過俾人當係性交轉運，報警拉咗我。

記得嗰日俾警察扣留咗四十八個小時，算係我人生一段非常唔好嘅回憶。

返到正題，Heidi開始講述佢嘅事情。

「最近呢兩個月，唔知點解成日無咩精神，四肢乏力，做嘢完全集中唔到。我之前一直身體都好健康，未試過呢種情況。」

好平常嘅徵狀，無咩特別。

「我試過去睇醫生，但檢查唔到我身體有咩問題。我以為自己操勞過度，向老細請咗幾日假唞，但無用不特止，情況反而愈嚟愈差，結果仲俾老細鬧。」

「你係做邊行？」

「Sales。」

「要追數嗰啲？」

「係。」

「成日都夜瞓？」

「咁又唔係，我每晚十一點就上床瞓覺。」

「無用身體開單嗎？」

「梗係無！」

Heidi用佢對鬼死咁大嘅熊貓眼睥住我，我諗佢臉上唯一缺陷就係嗰對黑眼圈，簡直大到要扮盈盈樂樂都無問題。

「講起瞓覺，仲有一樣嘢……」Heidi突然靈機一觸，「我每日都瞓起碼八個鐘，但唔知點解呢排每朝起身都好攰，好似瞓完同無瞓過無分別……」

Heidi講嘅都係大多數人有嘅都市徵狀，非常普通，甚至同「靈異」呢兩個字沾唔上邊。

如果係以前嘅我應該會屌咗走佢。

好多人以為要好似鬼片咁反晒白眼，臉容扭曲，四肢痙攣，甚至發晒癲周圍襲擊人，咁先叫做舐咗嘢。

其實唔係，更多時反而只有一啲好普通嘅跡象，例如身體虛弱、精神不振、性情大變。

所謂「靈異」，並唔係指超自然現象，而係妖魔鬼怪所造成嘅現象，或者粒子運動。

不過太過普通嘅徵狀，反而會令人無從判斷。

「反而呢……有兩三晚因為追數所以無咩瞓，但第二朝仲精神過前一晚。」

我稍微好奇咗下，無瞓反而好過瞓。

「呢兩個月發生嘅事太過離奇，就連搵醫生求救都無用，所以我直覺……懷疑自己舐咗嘢……」

Heidi望住我嘅眼神非常浮離，彷彿自己都唔肯定自己嘅諗法。

為咗畀啲信心Heidi，我點住頭向佢講：「如果你直覺認為自己舐咗嘢，咁你就應該係舐咗嘢。」

「凌先生你知道我有咩問題…？」Heidi露出驚愕又疑惑嘅表情。

我攤開雙手，直截講：「鬼知。」

就如前言，而家驅魔都跟上潮流，要講科學實證，唔係毫無責任嘅盲目鳩噏。

我又無寫輪眼，點可以一眼睇穿晒所有嘢。

所以既然睇唔出病人患咗咩病，自然就要對病源地方進行觀察取證。

於是乎，我上咗去Heidi屋企參觀。

wooooo

細過媽媽話唔可以隨便進入女生閏房，而我則經常因工作需要又出又入。

唔好咁多幻想，通常佢哋嘅房亂過堆填區，亦無所謂嘅女兒香。

「到喇。」

Heidi推開大門，映入眼前嘅係黑白簡約設計嘅大廳。

一眼望落裝修非常精致，風格統一連貫，睇得出係悉心整過。

「你一個人住？」

「係呀……依家係呀。」

「犀利，咁後生就有自己嘅屋企。」

「多謝……你隨便啦。」

我行入屋，驟眼一望無咩奇異事物。

不過，好多時妖魔鬼怪呢啲嘢並唔係一眼望到。

Heidi好奇望住我問：「凌先生你有近視㗎？」

「無……」我邊戴隱形眼鏡邊答，「呢個係純粹方便我觀察。」

妖魔鬼怪中有唔少都係以靈體形式存在，特別以鬼居多。

除咗少數擁有俗稱「陰陽眼」嘅人，一般人用肉眼係望唔到佢哋。

呢個時侯，就需要特製嘅工具去輔助。

Heidi無再多問，而我沿住大廳行咗一轉，仔細咁觀察每一樣有可能有問題嘅嘢，包括盆栽、雕像同埋壁畫。

大概唯一令我在意嘅係一尊黑貓雕像，據Heidi所講係某位識風水嘅朋友建議佢擺。

「佢話如果呢個方位擺個木雕，可以提升財運，財源滾滾來喎。」

「如果擺個雕像喺度就可以旺財嘅話，呢個世上應該無窮人。」

行完一輪大廳，並無異常，不過我無意中留意到電視櫃上嘅兩個相架——

一張係一個細路女同一對中年男女嘅合照，另一張係Heidi同另一個男仔嘅合照。

無咩特別。

之後我睇埋廚房同廁所，亦無發現任何異常，未睇嘅剩低Heidi嘅睡房。

「Heidi，依家方唔方便入你間房？」

「喔……你等我一陣！」

Heidi馬上入去睡房，過咗一陣就聽到佢嘅呼喚聲。

「入得……嚟喇……」

我輕輕將手放落門柄上，唔知點解呢啲情景有啲似曾相識……

LM
樓豬你終於返來啦

出住咁多先，有反應再更

如果你之前見個一個故名類似但秒速爛尾嘅故嘅話 不要問，請你忘記佢，呢個係一個全新嘅故

每日更新，為咗自己出得開心，每100正評會加下更

最後係Facebook專頁，支持就幫手順便畀個like
https://www.facebook.com/rooooseee/

紙言打包
https://www.shikoto.com/articles/173222.html

久等了 巴打次次都黎支持

LM

咁快手嘅

多謝支持

我愛樓主

其實之前都唔錯

由以前西鐵追到而家

好耐無見

多謝支持

認得你

「呢個……係咩嚟㗎……？」Heidi嘴巴顫抖咁講。

「就係導致你精神變差嘅元兇。」

人形逐漸變得清晰，化成一個全身赤裸，身型強壯，膚色慘白，背脊長有一雙修長翅膀嘅男人。

「點解……」

Heidi一臉茫然望住對方。

「點解阿孝會喺度……？」

唔單止Heidi，就連我都認得呢個男人——

佢就係相片中同Heidi合照嗰個男仔。

不過眼前呢隻男人雙眼全黑，並無眼白，呲牙咧嘴，伸出蛇舌，九十度側頭望過嚟，根本就稱唔上正常人類臉貌。

Heidi因為覺得自己舐咗嘢，但無渠道搵道士幫手，誤打誤撞之下透過網上委託咗我。

幸好佢搵嘅人係我，如果係一般道士、僧人，未必有能力對付眼前呢隻嘢。

——魅魔。

「嘻嘻嘻嘻嘻嘻嘻……」

低沉嘅笑聲彷似四方八面傳出，喺大廳交錯徘徊。

「阿孝……阿孝？」

「佢只係偽裝出嚟，唔係你所認識嘅人。」我拎出銀色匕首，「企喺我身後，千祈唔好亂咁郁。」

喺猶太教同基督教非常著名，源於西亞一帶，喺西亞以及歐洲十分活躍嘅邪魔。

佢哋會潛入人類夢中，化作對方理想中嘅異性形象，將對方誘惑，並透過性行為將對方嘅生命力吸乾殆盡，直到精盡人亡為止。

好多動漫同遊戲都會FF佢哋非常誘人，男嘅四十二吋胸肌女嘅瘦底大波兼大籮。

但實際上，佢哋嘅真面目可謂非常醜陋，如同畜牲一樣。

東亞嘅道士、僧人處理妖、鬼居多，未必識處理來自西方嘅魔，Heidi搵我嘅決定係無錯。

「嘻嘻嘻嘻嘻嘻嘻嘻嘻嘻嘻嘻！」

魅魔再次發出低沉笑聲，我趁佢唔為意，一嘢將銀刀向佢個頭掟過去！

嗖—！銀刀飛快劃破空氣，卻被魅魔側頭避開！

我即刻拔出另一把銀刀，向魅魔捅過去，但魅魔用兩指輕易地將銀刀夾住，另一手向我揮出帶有尖銳黑色指甲嘅利爪！

我俯身避開利爪，衝去魅魔身後，將插喺牆上嘅銀刀拔出，一刀將魅魔揮嚟嘅利爪連手臂斬落嚟。

斷肢跌落地下化作黑霧消散，魅魔手臂斷口如同火燒般通紅。

斷肢跌落地下化作黑霧消散，魅魔手臂斷口如同火燒般通紅。

「嘻嘻嘻嘻嘻嘻……」魅魔咧笑一聲，斷口生出一隻利爪。

並唔係違犯能量守恆定律，對方係靈體形式存在，簡單啲講係無物質依附嘅能量體。

無論你點斬斷火焰，火焰都唔會俾你愈斬愈少。

「嘻嘻嘻……去死喇，智障！」

「食屎啦你就智障屌你老母。」

正當我握緊銀刀，準備向魅魔衝過去時，一抹身影阻擋喺我哋兩個之間。

「等等！」

「Heidi！你做咩！」我驚愕望住突然插入嚟嘅Heidi。

「我記返起……佢係阿孝，佢真係阿孝！你唔可以殺佢！」Heidi張開雙手阻擋我。

「佢唔係阿孝，佢只係偽裝成阿孝嘅魅魔。」

「唔係……！」Heidi雙眼通紅望住我，「我記得返，佢每一晚都陪住我，從來無離開過我！」

「你講咩嘢……？」我不解咁問。

「嘻嘻嘻嘻嘻嘻……已經太遲喇！」

頓時，魅魔身體漸漸崩潰，再次化為一團混濁嘅黑霧。

唔通……

「停手！」

我大喝一聲，但已經太遲。

黑霧消散於空氣中，取而代之被黑霧纏繞嘅Heidi面目呆滯企喺我面前……

無咩人 聽日見