我係一個驅魔師，專幫人驅散妖魔鬼怪

「點解你會喺度？」我詫異咁望住眼前人。

「你話十點學校小巴站對出等啊嘛！」

眼前呢個女仔，就係累我張支票跌落坑渠罅，打扮奇裝怪異嘅道袍少女……好似叫白寧。

「又係你叫我鍾意就嚟嘅。」

又好似講句呢句話，又幫自己立咗flag。

當初呢句話係基於裡面只係普通鬧鬼事件，而家知裡面有怨靈，情況就唔同。

「我嗰陣講下笑，裡面好危險，你都係唔好入去。」

「點解啊？我係個道士，當然要嚟驅除惡鬼啦！」

「你……」

我懶得同佢爭拗住，因為我發現已經過咗十點，但仲未見到Shelly佢哋。

我拎出電話，原來Shelly半個鐘前whatsapp過我。

「我地早左到 你泥吾泥牙 唔泥我地就入去先」

「浩然話想入去先咼 我地入左去拉 你到左就心比我地拉😂」

大鑊……原來佢哋已經入咗去！

我即刻打畀Shelly。

嘟——嘟——

嘟——嘟——

無人聽。

嘟——嘟——

「喂？」

「Shelly！我到咗學校門口，你哋喺邊？」

「我哋喺……沙沙……」

「咩話？我聽唔清！」

「沙沙……你講咩……我話……喺……沙沙……」

「喂！你聽唔聽到我講咩？」

「沙沙沙沙……我……啊啊啊！」

「喂！你哋發生咩事？我依家即刻過嚟！」

「沙沙……見到……沙沙……」

咔嚓——

「喂！喂！應下我！喂！Shelly！」

一片寂靜。

我再打多次畀Shelly，但只有「暫時未能接通」語音。

唔通……佢哋出咗事？

「你朋友……發生咩事呀？」

「我依家要入去。」

校門被緊緊鎖上，我爬上佈滿雜草枯枝嘅欄柵，入到學校裡面。

「喂！等埋我……」白寧笨手笨腳咁爬上校欄。

校舍大門大開，但裡頭只有陰森詭異嘅感覺。

我跑入校舍，霎時感到一片寒冷，周圍空氣彷彿被凝固。

裡面黑到乜嘢都睇唔到咁制，於是我拎出電筒照住前面三四米左右位置，沿住極微弱嘅光線前行。

「小凌。」

一縷白煙頓時冒出，喺我耳邊徘徊。

「呢度嘅陰氣比一般地方重好多，你要小心。」

換句話，呢度嘅怨靈非常強大，足以影響成間學校。

一般而言，普通人係睇唔到靈體，因為眼睛感知唔到嗰道頻率嘅能量。

所謂「陰陽眼」，並非抹一抹牛眼淚就會開到，而係基因突變嘅結果。

舉個例，人類嘅視錐細胞只能感知紅綠藍三色，望唔到紅外線同紫外線以外嘅能量，但鳥類可以感知埋紫外線，所以鳥類比人類望到更多映像。

某部分人視錐細胞基因突變，可以感知更廣泛頻率嘅能量，因而擁有望到靈體嘅能力。

而我戴緊嘅隱形眼鏡，就係改變光線折射，令我睇到更廣泛頻率嘅能量，繼而望到靈體。

不過有一種例外——

「喂！等埋我！」白寧上氣唔接下氣走到我身邊。

「殊，細聲啲。」

校舍內部非常殘舊，天花牆身剝落大半，牆角築起唔少蜘蛛網，欄杆燈膽舖滿晒塵。

但奇怪嘅係見唔到有蜘蛛喺度，荒廢咁耐亦無雜草喺度叢生。

而且呢度異常寧靜，就算放輕腳步行都聽到自己腳步聲回音。

「好黑，咩都睇唔到咁唔唔——」

我撳住白寧把口，認真向佢講：「你跟住我無問題，但依家開始唔准亂咁出聲，唔准亂咁郁，聽到未？」

白寧睜大眼睛，乖巧咁點頭，我先放開手。

噠——噠——噠——

一陣非常緩慢嘅腳步聲從上面傳來。

噠——噠——噠——

唔通係Shelly佢哋？

但腳步聲仲非常緩慢，而且聽落好似只有一個人嘅腳步聲。

我沿住走廊向前行，而腳步聲則愈嚟愈接近。

噠——噠——噠——

前面係樓梯，我沿住樓梯行上一層，再照向走廊時發現一道背影。

「Shelly？」

眼前呢道背影係一道女仔嘅背影，身高體型同Shelly差唔多。

佢緩緩轉過頭嚟，映入眼前係一副陌生嘅臉孔，並非我所認識嘅人。

只不過……

眼前少女面色蒼白，雙眼泛黑，嘴唇泛藍，臉上有兩條黑色淚痕，頸上仲有一條黑紅色嘅瘀痕。

而且佢個頭係一百八十度轉過嚟。

吊頸死

加速

番工無野睇

個頭轉完未
360°都嚟緊

推啊

會甩

我同佢互相對望。

「嗚嗚嗚嗚嗚啊啊啊啊啊！」

少女發出低沉嘅叫聲，然後突然向我哋衝過嚟。

「哇哇哇！佢衝緊過嚟啊！」

少女嘅目標係白寧，我為咗救白寧將佢推開，但唔小心俾少女撲咗落地下，手上電筒更掉落地下，眼前頓時一片漆黑！

漆黑之中我同佢雙手互相角力，但佢力氣異常地大，捏到我手腕骨非常痛。

「啊啊啊啊啊——」

少女嘅臉孔同我只有幾寸之差，佢張開嘴巴，伸出一條墨綠色嘅腐爛舌頭，舐落我塊臉度。

臉上一陣濕滑嘅觸感，仲有陣腐臭氣味傳入鼻中！

「凌先生！你喺邊度啊！」白寧嘅叫聲唔知從邊度傳嚟。

「我喺度……」

突然，少女收返起條脷，邊低嗚邊用泛黑嘅雙目望住我。

「嗚嗚嗚嗚嗚……啊啊啊啊啊！」

佢張開嘴巴向我條頸咬過嚟！

「屌！」

我大喝一聲，用雙腳鉗住佢再扭轉腰身將佢撻落地，頓時被捉住嘅雙手鬆開。

咦……人呢？

本來我應該將佢壓住咗，但我摸落去只有冷冰冰嘅地板……

我摸黑執返起電筒，然後照向前面——

「嗚啊啊啊啊啊啊啊啊啊啊啊！」

後面！

纖柔嘅手臂從後勒住我條頸，展現出超乎常人嘅力氣！

我感覺到膊頭有陣熱氣，轉頭一望發現佢準備咬落我膊頭。好彩我今次反應夠快，我先將佢壓埋牆，再不停批肘落佢個肚。

少女發出乾嘔聲，我趁機掙脫佢束縛，再用電筒照住佢以防佢又唔知閃去邊。

「凌先生，你無事啊嘛？」白寧唔知由邊度出返嚟，「等我出馬，我依家拎棵蔥出嚟……」

「等等。」

我緊緊盯實少女，只見佢痛苦撳住個肚，墨綠色黏液從佢嘴巴不停嘔出嚟，極度核突。

我手插褸袋，準備拎銀刀出嚟。

「嗚啊啊啊！」

佢怒吼一聲，突然轉身逃跑，眨下眼就唔見咗蹤影。

「啱啱嗰個女仔……」白寧呆滯望住前面。

「係人類。」

「但點解佢會變到咁……？」

「鬼上身。」

強大嘅靈體擁有附身能力，就好似魅魔咁，當然怨靈亦唔例外。

而且肢體扭曲比魅魔附身Heidi更嚴重，恐怕……

「凌先生，點解你會識呢啲嘢嘅……？」白寧訝異咁望住我。

我無回答佢，繼續向前行。

無論係點，我都唔會插隻手落去。只要搵返Shelly、阿瞳同浩然，帶返佢哋出去就可以完咗件事。

「等等……等埋我！」

我拎住電筒逐間課室照入去睇，檯凳排列得整齊，地板非常乾淨，同出面完全唔同。

就好似打掃過一樣。

嘭——

「哇啊！」白寧嚇到叫咗聲。

廁所傳嚟一聲巨響。

我慢慢行入廁所，但鞋底有種濕滑嘅感覺，照過一望，地下一大灘黑色嘅水，隔籬有個打瀉咗嘅水桶同地拖。

「凌……凌先生……」白寧呆若木雞指住廁所鏡。

鏡上面寫住三隻紅色大字——

殺……無……赦……

「凌先生，佢要殺死我哋……點算！」

「你咁驚青點做道士呀……話說你拎住棵蔥做咩？」

「蔥係可以用嚟驅鬼㗎嘛！」

「你不如轉行做蔥道士。」

真係好想將棵蔥插落佢鼻窿，如果驅到鬼我切畀佢睇都得。

離開廁所之後，我哋就行上二樓。

經過第一間課室時，發現裡面有道黑影竄動，但眨眼間又唔見咗。

我行到門前，將電筒照過去——

照過去之後呢

佢未擰返轉個身就衝過嚟
女鬼：「好難跑啊，DLGH」

又拉闊

What is 拉闊

What is live

「唔好搞我，唔關我事㗎！」

燈光底下嘅人係舉高雙手，一臉驚青樣嘅浩然。

「浩然。」

「……小凌？你係小凌？」

「嗯。」

「你……真係小凌？」

「你幾時見過鬼識拎電筒照人？」

浩然露出猶豫嘅眼神，再三確認之後先鬆口氣。

「嗄……真係嚇死我……」浩然一副心有餘悸嘅樣，「啊！依家唔係講呢啲嘢時侯，呢間學校……真係有鬼喺度！」

我並未有太震驚，反而更緊張其他人嘅安危。

「Shelly同阿瞳呢？點解得你一個？」

「佢哋……」浩然臉色有口難言咁，「阿瞳俾鬼上咗身……」

「發生咩事？」我緊張咁問。

「我哋……一開始行咗無耐，阿瞳就已經話想走，但Shelly就想繼續行，跟住兩個就拗交。就喺佢哋拗交嘅時侯，條走廊……突然有個阿伯企咗喺度，條頸仲掛住條麻繩……」

浩然邊講邊周圍望，睇嚟真係好驚咁。

「我哋嗰下嚇到即刻轉頭跑，但跑跑下阿瞳無啦啦停低係咁尖叫，我哋返轉頭睇佢嘅時侯，佢就突然好大力咁捏住我條頸，個樣就好似想捏死我咁！」

浩然指住佢條頸，的確係有兩條紅色手印，甚至有俾指甲割傷嘅傷痕。

「好彩Shelly幫手抆開咗阿瞳，但轉過身阿瞳就唔見咗人，阿伯都唔見咗，得返我哋兩個。咁嗰陣我建議不如離開呢度報警先，但Shelly堅持要搵返阿瞳，自己一個上咗去……」

原來係咁。

「嗰陣我驚過頭，無跟住Shelly自己一個匿埋咗……我本來諗住報警，但點知呢度收唔到電話……」

唔怪得之Shelly傾傾下電話會斷咗線。

我安慰浩然：「咁都無計，正常人見到都會驚。」

至少而家搵返浩然，但我擔心嘅唔單止係阿瞳，我驚連Shelly都出埋事。

睇嚟呢隻鬼好危險。

「睇嚟呢隻鬼好危險，要盡快消滅佢先得！」白寧忽然插話。

「小凌，佢係……」浩然疑惑咁望住白寧。

「唔怕話畀你知，其實我係個道士，識斬妖除魔！」似曾相識嘅話從白寧口中出現。

「喔，道士。」浩然反應好平淡，「估唔到小凌你連道士都帶埋過嚟。」

「我同佢依家去搵Shelly佢哋先，浩然你諗住留喺度定點？」

「梗係一齊去，一個人喺度……好恐怖！」

得到浩然嘅線索，我哋繼續向上方樓層搜索。

沿途我哋靠到非常近咁行，一方面避免失散，另一方面……其實周圍真係幾恐怖……

走廊漆黑一片，視野只有三米範圍，周圍寒風陣陣，氣氛死寂，寧靜到呼吸聲都一清二楚……

雖然做得驅魔師遇過唔少妖魔鬼怪，遇到唔少恐怖情況，但都會驚。

並唔係本身細膽，而係無法控制嘅心理反應，就好似見到小丑、蜘蛛、長髮女鬼會反射性害怕一樣，係大腦嘅本能反應。

「點解……好似愈嚟愈黑咁？」白寧行行下無啦啦問。

「三個人一個電筒，梗係黑。」我答。

「但我覺得……好似有陣黑霧喺周圍……」

黑霧……

「哇哇哇哇哇哇哇哇哇哇哇哇！」

浩然突然指住前面間課室大嗌，嗌到我耳膜就穿。

「鬼……鬼啊！」

我沿住浩然指嘅方向照過去，見到課室內有道黑影懸吊半空——

一個面色發紫，雙眼暴突嘅阿伯雙手無力咁吊喺風扇下面。

PUSH

「嘻嘻嘻嘻嘻嘻嘻嘻嘻嘻嘻嘻……」

佢張開彷似合唔埋嘅嘴巴，伸出舌頭，雙眼詭異望實我哋。

唔知係咪因為吊頸關係，佢條頸被拉扯得非常長，頭顱同頸骨彷彿扯開咗兩半咁。

「佢……佢就係嗰個吊頸阿伯！」浩然嚇到屁股住落地下。

我對佢互相對望，而佢依然發出詭異嘅笑聲。

「嘻嘻嘻嘻嘻嘻嘻嘻嘻……」

我將手插入褸袋，踩住檯凳瞬間跳到佢面前，但眨眼間佢喺我眼前憑空消失，留下笑聲喺課室徘徊。

「佢消失咗。」我緩緩咁講。

「你消滅咗佢……？」白寧疑問。

「佢自己唔見咗，唔關我事……我好似聽到腳步聲！」

噠噠——噠噠噠噠——噠噠噠——

雖然十分微弱，但我的確聽到。

「會唔會喺禮堂傳出嚟，上面好似係禮堂嚟。」浩然冷靜咁話。

「可能係Shelly同阿瞳，我哋快啲上去！」

我哋沿住腳步聲急快向樓梯跑去，一上到去就見到有道熟悉嘅身影喺眼前。

「阿瞳？」

阿瞳面無表情企喺原地，呆滯咁望住我哋。

「小……凌……？」

阿瞳雖然睇落正正常常，但眼神毫無焦點。

「睇住啊小凌，佢俾鬼上咗身！」浩然好慌張咁匿喺我身後。

阿瞳神情恍惚，斷斷續續咁講：「小凌……快啲過嚟……」

「快啲過嚟……？」我不解反問。

「啱啱……我哋三個喺走廊撞鬼，諗住轉身跑嘅時侯浩然忽然襲擊我哋，個樣好似變到第二個人咁！」阿瞳惶恐咁指住浩然。

事情出現兩個版本。

「等等小凌，阿瞳佢俾鬼上身，唔好信佢講嘅嘢。」浩然指住佢頸上嘅紅痕，「呢個就係最好嘅證據。」

「小凌……！」阿瞳邊講邊向我哋行過嚟，「信我啊！嗰個人已經唔係浩然！」

兩者之中，其中一個係鬼。

好正 繼續！