「咁嗰隻貓依家……」
「佢喺度。」
喺我凳底下,一隻只有一條尾巴嘅黑貓好得戚咁行出嚟。
「就算你咁得戚都無用,我唔會當你係主子咁養。」
「喵!」
黑貓怒喵一聲,皮褸又有兩條新嘅爪痕。
既唔可以將佢置之不理,又唔可以交佢畀其他人養,所以暫時由我托管住呢隻黑貓。
黑貓喺café四圍跑動,但跑跑下忽然停低落嚟,眼神惶恐望住前面。
「小凌,點解小黑好似好驚我咁?」喺我隔籬唔知幾時出現嘅若兒講。
「唔知,可能你太面目可憎掛。」
「凌仔,你啱啱講咩話?」穆姑娘不解咁望住我。
「無嘢,我自言自語。」
「係喇,我要趕住去探張伯。」穆姑娘匆忙拎起手袋,向我鞠躬,「我走先喇!同埋,多謝你救返張伯!」
我望住穆姑娘漸漸遠去嘅身影。
每當完成一個委託,就會得到來自委託人嘅一個答謝——
但對我嚟講,只不過係一種折磨。
究竟幾時,先可以停止呢種無止境嘅折磨?