我係一個驅魔師，專幫人驅散妖魔鬼怪

追咗幾日 留個名

用方程或黎解釋分別
即刻明咗

快d出文

我趁呢個機會，拎出一張刻滿符文陣圖嘅白色符紙，貼落阿禮額頭上。

阿禮係邊位

打錯 係浩然

其實係次方嚟 google drive出到次方 copy過嚟收咗咁無為意

多謝留名

說好的加更呢

今晚先出？

一陣 食埋飯抖下先

出埋文先可以食飯休息

普通人嘅雙眼係感知唔到一般鬼魂，但怨靈係例外。

怨靈吸收大量能量演化而成，佢哋擁有嘅能量程度強大到連普通人都可以望到。

眼前嘅阿伯就係課室見到嗰個吊頸阿伯，亦係所有事件嘅原兇。

佢頸上有條紫黑色嘅勒痕，同隔籬嗰對男女一樣。唔知係咪吊頸死關係，佢條頸椎好似伸唔直，個頭歪埋一邊。

「點解……」阿伯將嘴巴張到非常大，發出沙啞嘅聲音，「點解你哋連一啲生路都唔畀我……」

……你哋？

我啱啱先發現白寧唔知幾時企咗喺我隔籬。

「你做咩跟埋嚟？」

「我跟住你入嚟㗎，都係個道士，當然有義務去消除惡鬼！」

「果然你哋係嚟殺我……我唔會俾你哋得逞，我要將你哋全部殺死！」

阿伯突然大叫一聲，一陣黑霧從佢口中散出向我哋湧過嚟，遮蔽眼前視線。

就喺呢個時侯，Shelly同嗰對男女向我哋衝過嚟！

「小心！佢哋都俾嗰隻怨靈附咗身！」

我跑到白寧面前，舉起電筒再啪動上面其中一粒掣！

一道非常刺眼嘅白光從電筒發出，佢哋三個一見白光就即刻停低腳步，面露懼色節節後退。

「嗚嗚嗚嗚……呢啲係咩嚟……」校工阿伯俾白光照到痛苦慘叫。

鬼係能量體，雖然物理手段無法觸及佢哋，但利用能量嘅話一樣會影響到佢哋，就算佢哋附身喺其他人體內。

有種講法係鬼魂唔會日間行動，因為佢哋懼怕太陽。

其實佢哋唔係真係驚陽光，而係驚陽光當中肉眼見唔到嘅光線，而呢個電筒可以射出模擬太陽燈嘅射線，有效阻擋鬼魂行動。

「幫我拎住。」我將電筒交畀白寧，然後拎出一張符紙，向Shelly衝過去。

附身Shelly嘅校工阿伯察覺到我嘅意圖，馬上舉起雙手格擋！

「嗚嗚嗚啊啊啊啊啊啊啊啊！」

Shelly舉起力氣異常大嘅手捉住我拎住符紙隻手，我即刻用另一隻手拎起符紙，但佢隨即就將我另一隻手都捉住！

「仲未完！」

我用嘴巴咬起張符紙，然後向佢個額頭嘴過去。為咗張符紙可以黐實Shelly額頭，我用條脷舐咗啲口水落去。

「快啲從我朋友身體躝出去。」

「嘎嘎嘎啊啊啊啊啊……我要殺晒你哋，我要殺晒你哋……」

黑霧從Shelly身體湧出，Shelly表情慢慢放鬆落嚟，暈喺我身上。

「嗚嗚嗚嗚……唔使指擬走！」

校工阿伯強行抵擋白光，指使嗰對男女向我衝過嚟！

我一手抱住Shelly嘅身軀，然後先將男嗰個一腳踢開，但另外嗰個女仔已經跑到我眼前，張牙舞爪向我咬過嚟。

「嘿啊！」

就喺呢個時侯，白寧將嗰個女仔推開咗！

做得好！

我公主抱起Shelly，然後邊向禮堂大門跑去邊向白寧大叫：「快啲走！」

「邊個……都唔可以走！」

一團黑霧瞬間聚集喺我眼前，化成校工阿伯個樣，然後伸出紫黑色嘅手，一手向我條頸捏過嚟！

死火，白寧啱啱轉咗身無照到校工阿伯，俾佢有機可乘！

千均一發之際，一陣白煙從我褸袋湧出，擋住咗校工阿伯隻手！

白煙漸漸成形，映出若兒嘅模樣。

「區區小鬼，唔係我對手！」

校工阿伯揮動佢隻手，若兒頓時發出一聲慘叫！

「若兒！」

我放低Shelly，從褲袋拎出一把電槍向校工阿伯捅過去！

一陣藍白電光喺校工阿伯身上不停竄動，校工阿伯身軀不停抽搐，黑霧漸漸消散！

「快啲！」我叫喚白寧。

我將若兒嘅魂魄收返入嚟，然後推開禮堂大門，抱起Shelly逃出禮堂！

一出到去，就見阿瞳扶住已經醒返嘅浩然望住我哋。

「小凌、Shelly！」

「發生咩事……點解……」浩然一頭霧水望住我哋。

「無時間解釋，快啲走！」

「等等！」跟喺我身後嘅白寧突然叫停我，「嗰兩個人仲喺禮堂入面——」

「唔關我事！」

我係嚟救返我嘅朋友出嚟，唔係嚟驅除惡鬼，拯救平民——

「但係——」

喀啦——

禮堂大打打開，兩道搖搖欲墜嘅身影左搖右擺從禮堂行出嚟。

「你可能無發現到……」

明明係背住我哋，但個頭就望住我哋。

雖然Heidi俾魅魔附身時亦出現手腳扭曲情況，但同頭顱一百八十度轉動係兩回事。

「正常人係做唔到呢啲動作，佢哋已經死咗。」

「點……點會……！」

「所以唔好理佢哋，快啲走！」

「我講過……一個人都唔可以走！」

黑霧喺走廊另一端出現，肢體扭曲嘅男女慢慢向我哋行過嚟，我哋被兩面夾擊。

「抱住佢，我會幫你哋開路。」我將Shelly交俾白寧。

「咁你點算……仲有嗰兩個人呢？」

「嗰兩個人已經死咗，唔會救得返！」

「就算係咁都要救佢哋出嚟……如果連自己仔女死咗都唔知，做父母嘅會好傷心！」

傷心……？

「仲有如果唔喺度阻止惡鬼，只會有更多人受害！」白寧語氣非常堅硬，完全無平時嗰陣傻氣。

「就算係咁都唔關我事，我淨係嚟救我朋友出嚟。」

「點解……你明明有能力，點解唔去做？」

「因為我嘅原則係唔會處理委託以外嘅神怪之事。」

單係將怨靈從浩然同Shelly身上驅散已經觸及底線，所以我唔會再插手落去。

白寧緩緩垂低頭講：「我明白喇。」

「明白就快啲走，我會開路。」

正當我向校工阿伯衝過去時，白寧講咗一句：

「咁嘅話，我依家就委託你。」

我知你打錯但係阿禮係邊位

本身浩然叫阿禮 不過已經有阿瞳 兩個都阿阿聲驚易撈亂 所以就改叫做浩然

我冇問浩然係邊個
我問阿禮係邊個

算啦你都係寫文啦
膠多兩句轉頭比人屌
小心啲啦

我停低腳步，愣望白寧。

「我依家就委託你阻止呢隻惡鬼，將嗰兩個救出嚟！」

「……唔係講笑時侯。」

「我好認真！」

呢個眼神……唔係講緊笑。

點解冒住危險都要救嗰兩個死人出嚟？係盡道士嘅義務，定對佢哋於心不忍？

腦海裡浮現出一句話——

——因為我想用我嘅能力，去幫助有需要嘅人。

若兒曾經講過相同嘅話。

白寧同若兒嘅聲音，彷彿重疊一齊。

「委託係要有報酬，而且要我本人同意先成立，唔係你話係就係。」

「咁我……我無錢……」

「不過報酬可以事後再傾，所以——」

講講下，黑霧忽然化成人形，向我撲過嚟！

我從白寧手上拎過電筒，向校工阿伯射過去！

「嗚嗚嗚……！」

「委託接受，順帶一提呢刻開始見到聽到嘅所有嘢都要保密，唔可以同任何人講，如果有問題嘅話你就另謀高就。」

白寧呆咗呆，然後好開心咁講：「無問題！」

校工阿伯退後幾步，以帶殺意嘅兇狠眼神望住我。

雖然電筒嘅射線對鬼魂非常有效，但對方係怨念極深嘅怨靈，最多只能牽制住佢。

「阿伯，介唔介意話我知點稱呼你？」

校工阿伯依舊睥住我，良久先緩緩開口，以低沉沙啞嘅聲線講：

「……陳伯。」

「陳伯，你以前係呢度校工係咪？」

「……無錯。」

「而且仲喺課室吊頸自殺，我有無講錯？」

「……係又點？」

「既然你身為校工，又知呢度係小學生返學嘅地方，點解仲要做出啲咁嘅事？」

「你究竟想講咩！」陳伯勃然大怒，「唔好以為你問咁多，我就唔會殺你！」

「我聽過個傳聞，以前呢度有個校工犯咗戀童案，東窗事發之後就喺課室吊頸自殺，之後呢個校工嘅鬼魂不時會喺課室出現，嚇到班小學生唔敢返學，最後淪落到要殺校，變咗廢校。」

「係啊啊啊啊啊啊！既然你都知，你問嚟做咩啊啊啊啊啊啊啊！」

陳伯面目變得非常猙獰，化作一陣黑霧向我衝過嚟！

「但真相係，你係因為受到冤枉，所以先自殺。」

指尖抵到我頸上時停低，陳伯一臉愕然望住我。

果然，我嘅諗法無錯。

「冤枉……？小凌你講咩……」阿瞳愣問。

「犯下戀童案嘅人係校長，唔係你，係咪？」

「點解……你會知？」

為咗查清廢校真相，我嚟呢度前刻意上網查證過資料。

「我查過當時新聞，完全搵唔到相關資料，但我無意中發現另一單唔關事嘅新聞，係關於一單大陸小學發生嘅非禮案，而新聞嘅主角——就係校長。」

於是我得出一個猜測——

——嗰個校工係冤枉，戀童案嘅犯人係校長先啱。

「因為校長有權勢，佢為保名節將件事屈落你身上，臨老就退休嘅你被無辜冤枉，失去名聲同退休金，所以你就喺課室自殺，以死控訴校長。」

「……無錯，我從頭到尾都係俾人冤枉㗎！但係……」陳伯嘅聲音變得顫抖，「無人信我……無一個人肯相信我呀！」

「所以你就化成鬼魂嚇班小學生，嚇嚟呢度探險嘅人，甚至殺死嗰兩個人？」

「唔係，我只係想同佢哋講真相咋！我想話畀佢哋知我唔係犯人，無諗過要殺人！但係……但係佢哋連一句話都唔肯聽，仲係咁話我戀童犯！點解……」

陳伯嘅表情再次變得猙獰！

「點解啊啊啊啊啊啊啊啊啊啊！」

低沉嘅吼叫聲從陳伯口中發出，一雙紫黑色嘅利爪隨即向我襲來！

「嗚嗚嗚嗚嗚嗚嗚嗚啊啊啊啊啊啊啊啊！」

「我相信你。」

「凌先生！」「小凌！」

嗖—！

指尖啱啱好停喺我頸上。

如果我嘅猜測係錯，我就會毫不猶豫消滅呢隻怨靈。

但事實並非如此，所以我唔會殺死佢……

而係拯救佢。

「你……肯信我？」陳伯面露驚訝，聲線顫抖地問。

「嗯。」

「你真係願意相信我，聽我講？」

「無錯。」

「陳伯！我哋大家都會聽你講，所以你冷靜落嚟先啦！」白寧都加把口。

「小凌……你哋兩個……」

「阿瞳……」白寧懷中嘅Shelly緩緩張開雙眼，以微弱嘅聲線講：「如果件事係真……咁應該要還伯伯一個公道……」

「你哋……你哋……」

一點一滴嘅淚水從陳伯雙眼流下。

只不過，淚水早已被污染得只剩濁黑。

「你哋唔好再呃我啦！」

一陣非常強烈嘅黑霧如同爆風向四圍湧出，將我哋全部人好似紙片咁吹跌落地。

「所有人入嚟都係為咗嘲笑我，從來無人願意聽我講嘢！你哋都一樣，我唔會相信你哋！」

「陳伯！」白寧舉起雙手擋住黑霧，「陳伯發生咩事！」

「瘴氣已經將陳伯嘅理性侵蝕，喺我哋眼前嘅再唔係陳伯。」

一股絕望嘅感覺沿住黑霧進入我體內——

——係陳伯一直以嚟嘅感受。

只係想做個平凡嘅校工，笑騎騎對住每日返嚟嘅小學生，安安穩穩過埋人生最後嘅道路。

只要可以為小學生提供一個清潔整齊嘅學習環境，就已經心滿意足。

卑微嘅陳伯老態龍鍾企喺走廊一角，露出唔完整嘅牙齒笑住望班小學生。

「嘻嘻嘻，就好似望住自己啲仔女一樣。」陳伯老懷安慰咁真誠地笑，即使眼前呢班係同自己毫無關係嘅細路。

但係突如其來嘅指控，令陳伯蒙上不實之罪。

「我無……我無做過呀！你哋有無查清楚㗎？」

俾自己最鍾意嘅學生當係戀童狂魔，無論名聲、前途、退休金通通失去，連家人都離己而去。

無力面對強權，於是決定自殺，以死控訴。

但即使化作冤魂，亦無法改變任何事實，依然被所有人當係戀童犯。不但無人願意聽佢講任何一句話，仲俾嚟呢度嘅人冷嘲熱諷，如同小丑一樣被任由嘲笑。

呢一切係陳伯一直以嚟感受到嘅絕望。

——已經受夠……已經受夠啦！

含冤而死嘅執念太過重，最後一條維繫理性嘅絲線啪一聲脆弱地斷開。

——我只係想安穩平凡咁過埋人世，點解個天要咁對我啊！

已經無法返轉頭，事到如今已經拯救唔到陳伯。

唯一嘅辦法就係將陳伯徹底消滅，等佢可以從呢個痛苦輪迴中解脫。

我get唔到 總之就係俾我改咗名 兩個名都係同一角色嚟
btw派膠有助推po我唔介意

晏少少繼續 依家已經更咗平日兩倍份量