我係一個驅魔師,專幫人驅散妖魔鬼怪

1001 回覆
268 Like 12 Dislike
2018-12-23 01:31:06
咁我都決定聖誕瘋狂追文
好L正
2018-12-23 02:08:06
以我所知,影視業呢行有唔少人會為咗搏出位而做出一啲唔應該做嘅事,結果惹鬼上身。

「無,我哋從來唔觸犯呢啲嘢,但有時為咗效果逼真,可能都會做啲比較踩界嘅事,例如直接喺死人嘅地方拍shot,或者扮做一啲召鬼儀式,所以先要咁拜神信佛……」

Derek講講下,忽然靈機一觸。

「如果……誤闖山墳,仲唔小心踢跌咗香爐,算唔算係唔尊敬死人?」Derek睜大雙眼,好認真咁望住我。

「你試下食食下飯俾人踢跌個飯碗落地下會點樣?」

「依家諗返起,我拍呢個shot好似係個半月前嘅事……唔通我係咁發噩夢嘅原因就係因為咁?」

「當時嘅情景係點?」

「嗰陣我哋上到山,諗住搵個陰暗啲嘅位拍shot,但因為太暗,條路又唔清晰,我哋唔小心闖咗去人哋個山墳。就喺嗰陣,我條team其中一個人唔小心踢跌咗個香爐。」

Derek邊苦惱回想,邊講述事情。

「我有即刻幫手執返個香爐,因為踢到嗰個人係肥仔,香爐俾佢一腳踢爆咗。」

「你就由得人哋個飯碗咁樣爛咗?」

「大佬嗰陣又黑,又拎住咁多器材,又趕住嗱嗱臨拍埋場戲走人,邊有理咁多呀……」Derek突然拍檯,「係喎!踢嗰個人都唔係我,點解係我舐嘢?」

「你last touch梗係你出界啦,你無打過籃球咩?」

「有無搞錯!嗰個死肥仔!」Derek又懊惱咁拍咗下檯。

其實講道理唔應該係Derek舐嘢,但我忍唔住想寸佢兩句。
2018-12-23 02:08:31
「咁我依家應該點做好?我俾個噩夢搞到日日瞓唔好,連拍戲都無精神拍。」

「解鈴還需繫鈴人,你去買返個香爐畀人,講返聲對唔住,咁就應該無事。」

「你唔係驅魔師咩?唔可以直接消滅隻鬼?」

「依家你得罪人,仲要我消滅返人轉頭,你真無人性。如果你係信佛,就要知積陰德呢個道理。」

我係驅魔師,但唔係獵鬼人。

如非必要情況,我係唔會隨意消滅對方。

當然如果對方係怨靈,而且非常具危險性嘅話,就另一種講法。

經我說服之後,我哋陪同Derek去五金舖買返個香爐,我仲千叮萬囑佢一定要買個最靚最貴嘅香爐。

「就算唔係佢本身個香爐,人哋見你個香爐咁靚,咩氣都消晒啦。」

「師父呀,你使唔使買返個?」白寧拎住個鑲金嘅香爐喺我面前揚嚟揚去。

「死開,買嚟拜你呀?」

買完之後,我哋就去返事發現場,即係當晚Derek拍戲嗰座山。

「應該喺呢度啦,我好記得呢個位。」Derek指住前面俾雜草遮住嘅小路。

我哋沿住小路行入去,無幾耐就行到一個凹位。

凹位正正係山墳所在之處,地下仲有幾塊香爐嘅碎片。

Derek戴住手套,小心翼翼咁將碎片放落膠袋,然後將新嘅香爐放喺山墳前,再點燃三支煙。

「對唔住,有怪莫怪,大人不記小人過……」

Derek跪喺山墳面前重覆咗三次,然後企返起身問我:「咁樣得未?」

「嗯。」

對方並非強大嘅怨靈,只係一道微弱嘅亡魂,連身為人嘅形態都無,可見能量非常微弱。

既然無演化成怨靈,對方至少仍保有理性,會聽人講嘢。
2018-12-23 02:08:54
就算點樣俾人踢爛飯兜,而家咁樣咩氣都消晒啦掛。

臨走之前,白寧仲扯一扯我衣角,指住山墳話:「啱啱佢講咗嘢,但唔知講咩。」

「係咩?」

我並無聽到嗰句話,特製隱形眼鏡只有觀察靈體嘅作用,我依然唔會聽到鬼魂講嘢。

之前喺醫院聽得明亡魂講嘢嘅原因係因為我為咗讀取佢哋嘅話而學過睇唇語,而陳伯係怨靈,同肉眼可見原理一樣,怨靈嘅能量強大到可以引起物理現象,透過空氣振動進行發音。

好多時我哋睇鬼片,啲鬼同惡魔嘅聲音都會四方八面傳嚟,感覺好似好恐怖咁,其實係咁樣一回事。

今次好輕鬆就完成呢單委託,算係不幸之中嘅大幸。

如果唔係咁易搵出原兇,呢單委託可能就會變到非常難搞。

落咗山,臨走之前,我叮囑Derek:「你呢幾晚睇下有無發噩夢,如果無嘅話我先會當係完成委託。」

「好,好!麻煩你呀,你搞得掂,下次請你去飲!我做嘢嗰邊大把女舐我鞋底,帶你識下啲女又點話!」

我無回答佢。

對我嚟講,真正愛嘅女人只有一個人,除此之外我並無感覺。

Derek走咗之後,剩返我同白寧兩個人。

「師父呀,咁樣就完成咗呢單委託㗎喇?」

「如果佢無向我講大話嘅話,咁就應該係……屌,點解我會應咗你?我先唔係你師父。」

「但你已經收咗我秩弟,帶我一齊去接委託啦?」

「係你死纏難打,仲難纏過臍帶,我先迫於無奈帶埋你過嚟。」

趕走白寧之後,今日告一段落。

如無意外,呢排應該暫時唔會有委託住。

但第二日,我收到Derek嘅電話。

「喂!你唔係話買返個香爐,講句sorry就OK啦咩?」

「發生咩事?」

「尋晚發夢,我又遇到白衣女鬼……」
2018-12-23 02:11:21
有文la
2018-12-23 02:18:10
逢100正評 話說FB就夠500讚
夠嘅話會加 不過呢幾日聖誕放下假 如果有加更就留到聖誕之後先開始
2018-12-23 02:18:40
多謝巴打 不過聖誕都要慶祝嘅
2018-12-23 13:54:48
多謝 其實個時有事後交代返 不過可能已經無人理
2018-12-23 16:04:58
推推
2018-12-23 18:15:10
新讀者live左留名pish
2018-12-23 18:17:47
當然唔會爛
2018-12-23 18:18:05
多謝支持
2018-12-23 20:33:14
今晚都係夜少少更
2018-12-24 00:35:20
Pish
2018-12-24 00:40:30
太夜傷身啊
2018-12-24 02:03:06
原本以為已經完成嘅委託,但卻發生意料之外嘅事情。

收到Derek嘅電話之後,我第一時間約咗Derek見面。

呢次Derek亦無再拘泥去咩高級會所,好順攤咁即日晏晝就去café赴約。

我自己一個坐喺café角落靜待,無幾耐戴住cap帽同黑超,著住運動服裝嘅Derek到達café,坐喺我對面。

佢坐低之後,馬上一副焦急嘅表情講:「點算!我尋晚都係夢到個白衣女鬼!」

「你等一等,我思考緊個原因。」

Derek已經專誠買返個香爐去道歉,但依然被噩夢纏繞。

除非……

「Derek,你有無見過白衣女鬼個樣?」

「無,佢個樣俾頭髮遮住咗。」

「咁你覺得白衣女鬼係後生女仔定阿婆?」

「後生女仔……阿婆?呢啲關個噩夢咩事?」

「你答咗我先,就算見唔到唔緊要,憑你直覺去推斷。」

「直覺……佢捏住我條頸時我望過佢對手,皮膚完全無皺紋,一啲都唔似老人家隻手。」

「明白。」我微微點頭。

Derek露出一副疑惑嘅眼神,非常不解咁問:「問呢啲有咩意義?」

「意義就係你做嘅事原來平息唔到對方怒火。」

「我已經買咗香爐向佢賠罪,點解佢都係唔肯放過我?」

「因為,你話白衣女鬼隻手一啲都唔似老人家,但係……我尋日見到墳前嘅車頭相係一個阿婆。」
2018-12-24 02:03:20
「……阿婆?」

「意思即係,喺夢中一直追殺你嘅人唔係嗰個山墳嘅主人。」

其實成件事聽落都覺得有啲奇怪,冤有頭債有主,香爐唔係Derek踢跌,點解要向Derek報復?

更何況事後有Derek即刻幫手清理,就算要害其他人都唔應該害Derek先啱。

「你話白衣女鬼唔係嗰個山墳裡面嘅人,咁究竟係邊個?」

「呢件事要問你自己先知。」

「我?」Derek愕然指住自己。

「你記唔記得我講過要問你兩條問題,但最後我只係問咗你一條問題。」

如果可以嘅話,當然希望第一條問題可以解決一切。

我唔介意Derek真係搗亂人哋山墳,亦唔擔心佢玩筆仙之類召靈遊戲玩出禍,但最怕嘅係對方隱瞞咗一啲非常可怕嘅事情。

「Derek,我要鄭重咁問你——」

或者係唔禮貌嘅提問,或者係嚴重嘅誹謗。

「你有無殺過人?」

如果正常人聽到呢條問題,應該會第一時間好大反應反駁。

但Derek無。

佢聽完之後,睜大眼睛吞咗啖口水,但並無回應。

「委託內容全部都會保密,絕對唔會同第三者講,就算係觸犯法律嘅事都一樣。」我重申一次我立場,「不過選擇權喺你手上,如果你唔想講亦無問題。」

「我會答。」

Derek除低佢副黑超,以平靜嘅目光同我對視。

「我……曾經殺死我女朋友。」
2018-12-24 02:42:39
一瞬間,Derek嘅答案令我感到非常震驚。

其實已經預計過會有呢個可能性,但真實聽到嗰下依然會好震驚。

「叫唔叫親手殺死我唔知,但佢嘅死的確係我一手造成。」

我仍未追問,Derek就開始將自己所有事和盤托出。

「佢叫做Karen,係大學時讀media嘅同學。因為我哋都係屬於嗰種好鍾意靈異嘢,專拍靈異片嘅人,臭味相投嘅關係我哋就一齊咗。」

我撳止心中嘅疑問,靜心聆聽Derek嘅故事。

「畢業之後,我哋一齊投身電影呢行。雖然最初入行淨係俾人點去沖茶遞水,又成日小小事俾人鬧,但我哋好開心,因為可以同一生最鍾意嘅人做一生最鍾意嘅事係非常難能可貴。」

Derek一邊講,嘴角一邊露出笑容。

「捱咗幾年之後,我因機緣巧合俾人賞識,得到執大旗機會,而Karen就做我副手。本來我希望可以唔分彼此同佢拍住上,但嗰陣我太年少氣盛,經常同Karen爭執,甚至用導演嘅身份無視佢講嘅嘢。終於七年前,我做出一個錯誤嘅決定——」

講到呢度,Derek嘅笑容開始變得黯淡。

「嗰陣嘅我喺其中一次嘈交,一時衝動講咗唔應該講嘅兩個字,Karen聽完之後粒聲唔出自己一個離開咗片場。當時作為導演嘅我無理會佢,以拍戲為優先事項。」

嗰兩個字,應該係「分手」。

「之後拍拍下戲,無啦啦有幾個隔籬team嘅人衝入片場,我先知——」

「Karen離開咗片場之後衝咗出馬路,結果俾個無睇清馬路嘅司機撞死咗。」

Derek抬起頭,望向天花。

「如果我當時無咁衝動,Karen就唔會死!」

原來係咁。

呢個就係Derek殺死Karen嘅真相。

而事情亦清晰明瞭。

Derek嘅女朋友Karen,為咗報復而化身白衣女鬼,令Derek受困噩夢之中。
2018-12-24 03:29:31
推一推支持樓主
雖然深夜睇呢d都幾…特別
2018-12-24 08:30:01
咁都知個司機冇睇馬路
點dup啊大佬
2018-12-24 11:30:49
邊咗交通意外po
司機撚準備全面進場
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞