雖然丹麥防線被擊破，但係佢同英國一樣，冇嘢多，就係多海峽，丹麥憑著佢龐大既海軍，使到陸軍可以安心退守艾思島（Als），對仲係日德蘭半島既普奧聯軍造成威脅。普軍決定渡過海峽，成功攻取艾思島。戰鬥過程充滿主角光環，話說丹麥戰艦好快就趕到現場封鎖海峽，仲過緊海既普軍嚇到走都走唔切，但係個海軍司令唔知痴咗邊條筋，收錯指令掉頭走人，結果俾普軍平安渡海，打贏最後一仗。
慘敗既丹麥只好簽訂維也納條約（成日都喺維也納簽和約），北面既石勒蘇益格歸普魯士管，而南面既荷爾斯泰因就割讓俾奧地利，普魯士喺德意志人民心目中既威望，又加咗十分。戰後威廉一世論功行賞，俾斯麥受封伯爵，而普魯士總參謀長毛奇（Helmuth von Moltke）憑著出色既戰鬥部署，得以榮升中將。依位毛奇，就係德國統一「鐵三角」最後一員。
為咗同佢姪仔一戰德軍參謀部長小毛奇作區分，依個毛奇又叫做老毛奇（Moltke the Elder）。毛奇出生喺丹麥統治既神羅邦國梅克倫堡－舒維因（Mecklenburg－Schwerin），所以佢年輕個陣係投身丹麥軍隊。但係由於丹麥軍隊晉升前途麻麻，佢於是過檔去普魯士軍隊。起初佢喺普魯士軍隊嘅表現平平無奇，1835年，佢被派往鄂圖曼土耳其擔任顧問，參與鄂圖曼軍隊既現代化計劃，回國之後佢寫咗本書，詳細分析鄂圖曼國情同戰略形勢，喺軍事界大受歡迎，嶄露頭角。1855年，佢被當時仲係親王既威廉一世，任命為世子既軍事老師。威廉一世登基後，將毛奇提拔為總參謀長。
唔好睇總參謀長聽落去好似好威咁，查實當時普魯士既總參謀長只係一個書僮，最多都係負責畫下地圖，編下戰史咁，地位低過陸軍總長。真正令總參謀部成為最高軍事機構嘅人，就係毛奇。佢意識到，隨著軍事科技嘅進步，戰場上嘅變化只會更加複雜同迅速，將領嘅指揮唔足以應付戰場上嘅形勢變化。依個時候就需要總參謀部處理同分析大量信息，有系統地進行作戰部署。毛奇因此致力擴充總參謀部既規模，廣納戰略專才，令總參謀部成為歐洲最可怕嘅軍事組織。
戰略大師毛奇
年輕的毛奇（左）與鄂圖曼軍官
去到依度，普魯士統一德國所需嘅班底已經集齊，包括：唔識做嘢，性格軟弱，但偏偏一切要佢拍板既威廉一世；國家機器既大腦，外交能力卓越，但係極度唔想當兵，正一軍事白痴既俾斯麥；學識淵博，擅長管理軍隊同改革軍隊體制，但從未落過場打仗既隆恩伯爵；同埋身為戰略大師，喺戰場上運籌帷幄，但係對政治外交一竅不通嘅總參謀長毛奇。依四大天王各有長短，互補不足。雖然除咗49歲既俾斯麥之外，其他都臨近退休年齡，然而薑都係老嘅辣，德意志既統一，就係靠依班老友記完成。
奧地利，係時候讓座啦！
)既命令,全軍放棄要塞,所以就輸左。
