Nope
諗下你坐係到有機關鎗人地衝過黎 邊個死多D
再解釋下先.
一場戰役唔會每一分鐘都打緊仗, 大部分時間都係晌“準備打仗”之上做功夫. 撇除塹壕嘅因素先, 假設防守方需要防守十公里長嘅防線, 每公里最少需要一個建制單位嘅軍人, 十支機槍咁啦, 成段十公里佢就最少需要十個單位, 一百支機槍. 我作為進攻方, 只要安排兩個單位, 二十支機槍, 去進攻佢是旦一公里嘅防線, 都可以有壓倒性嘅火力同兵力優勢. 加上防守方係唔會十個單位嘅軍人一樣咁勁, 一定有強弱之分, 我作為進攻方, 可以判斷針對邊部份對手嘅強弱嚟決定進攻邊個位, 而防守方就要諗辦法一碗水端平, 唔好令防線有漏洞, 因為佢冇辦法估到我進攻邊度.
當然, 實際情況冇咁簡單, 但道理都差唔多, 晌戰場上, 進攻方係比防守方有主動權嘅優勢, 防守消耗嘅資源亦都大於進攻. 至於點解一戰會打到大家坐晌戰壕入面打, 就係當時嘅軍事科技唔能夠令進攻方晌有效嘅壓倒性兵力下可以消滅對方, 解決唔到塹壕嘅問題.
巴打講多d
學到野
我都係識皮毛唧, 不過見到都有少少想補充番嘅.
戰爭嘅目的, 就係消耗對方軍隊有生力量. 只要做到依點, 就係一個好戰術, 好似拿破崙時期俄羅斯嘅焦土政策, 就係一個好極端又好有效嘅例子. 晌大部分情況下, 戰術都係利用運動(即係隊兵走嚟走去)去分割包圍敵人, 做成局部嘅優勢兵力去消耗敵人, 畢竟, 人多蝦人少永遠係開片群毆最有效嘅辦法.
晌普魯士發圍初期, 歐洲仲係用緊前膛槍排槍互射戰術, 即係一班人一字排開, 阿頭落柯打就向對面開槍. 之所以有咁嘅戰術, 係因為當時嘅槍械仲未有膛線, 射擊準確度非常之低, 所以就要靠一字排開人海戰術, 確保有子彈射到過對面. 十飛先中三飛, 咁我搵一千人企晌度射, 點都應該射中三百人掛?
一路到後來, 有將領發覺咁樣互射法, 同踢波互射十二碼一樣都係將命運交俾天決定, 冇乜著數, 軍事戰術先有多啲變化, 例如大家晌依系列文章見到嘅斜線陣, 就係利用陣式形成局部兵力優勢, 一邊死頂, 靠另一邊人多打殘對方再番嚟幫拖. 又或者利用側翼騎兵去晌陣式側邊插入去衝散人, 你諗下, 你晌側面俾人打一巴第一件事要做嘅係咩? 唔係還拖, 而係轉身睇下咩料先. 軍隊都係一樣, 要叫幾百幾千人聚精會神望緊前面, 忽然要佢地齊齊轉身望下左邊, 一定會亂到九彩, 到時晌側邊衝入去嘅進攻方就發了.
至於德國參謀部後來有條友將斜線陣嘅“一邊死頂, 靠另一邊人多打殘對方再番嚟幫拖”精神發揚光大, 變咗做德國一戰嘅戰略計劃嘅精髓, 又係後話了.
