
普魯士禁衛軍於法國大使館前示威

備受國民愛戴的路易絲王后
之但係腓特烈。威廉好快就發現,拿破崙之後改變主意,諗住將俾法軍佔領既漢諾威歸還英國,作為英法和約既條件。點解係歸還呢?原來當時既英國王室其實係嚟自漢諾威家族,所以英國同漢諾威係處於共主邦聯(Personal Union),由同一個君主統治。
講返普魯士,腓特烈。威廉個心當然係拿住拿住啦。更令人激氣既係,拿破崙喺佢個萊恩聯邦入面,將成員國符騰堡(Württemberg)同巴伐利亞升為王國,即刻搞到王國依個名唔馨香。另外,拿破崙仲喺德國地頭,處決咗一個德國民族主義者,依件事成為壓喺駱駝背上既最後一條稻草,腓特烈。威廉終於要爆發啦,拉埋俄羅斯同薩克森,無視法軍仲喺德意志境內,普魯士邊境附近既狀況,毅然向法國宣戰,同時英國故態復萌,加入戰場,展開第四次反法同盟戰爭。
普魯士軍隊由腓特烈.威廉坐陣,荷亨洛恩親王(Frederick of Hohenlohe),老將布卓爾元帥(Gebhard Leberecht von Blücher)、同之前出過場既費迪南親王做統帥,普軍迅速西進,諗住先發制人。拿破崙一見普魯士向佢宣戰,心諗:同朕鬥?未死過呀?!即刻帶住佢支大陸軍(Grande Armée),向東進發,兩軍展開耶拿-奧爾斯塔特會戰(Battle of Jena-Auerstedt)。