【天腦】《病港ＩＩ》（８１）

會唔會係港豬

董倫？

左輪加西裝
應該係

推

就算現階段無法接近天腦，都要盡可能削減衪在地面上影響力。

「我哋需要大量嘅屏蔽措施。」我說。

「例如？」

「如果要第日要整疫苗，至少要有間全屏蔽嘅研究室，重要人士要著屏蔽服，防止被腦控。」

「最大麻煩係點樣瓦解信奉天腦嘅教會，如果係港島區自己地頭都易搞，但依到係大學，唔到我哋話事，而且我哋好被動，佢哋一日唔現身，我哋都好難搵到。」

「依樣我哋再研究，搞掂眼前工作先，劉吉你繼續整棺材。」我站起來，準備去休息：「蕭梵你聽日休息。」

第二天，我四出打聽昨晚出手相救的人。

因為直覺告訴我，他也知些事。

大學說大不大，說小不小。

想要跟人搭話打探情報，去康樂室是最簡單直接。

我跟一位叫曹楷棋的人玩了兩局桌球，他對西裝人略有所聞。

「著西裝嘅人？」：「莫非你講緊西裝客……」

「西裝客？」名字讓我想起港島區的勢力。

「西裝客其實算係中大一個傳聞。」曹楷棋捏著尖尖的下巴：「無幾個人真係見過佢。」

「佢身上有咩傳聞？」

「聽講佢會喺某啲人發生危險嗰陣出手，但從來無人知佢真實身份，類似……正義怪盜咁！」

「我好幾次差啲死喺大學都唔見西裝客出手……」我心裡不禁揶揄。

眾志堂後方的草地，有一對年輕的情侶躺在上面談情說愛，我從他們身上也獲得了關於西裝客的情報。

「我朋友個朋友遇過呀！」女生說。

「咁你朋友嘅朋友咩情況下遇過佢？」我蹲在兩人的頭頂上，低頭俯視著兩人。

「佢以前識咗個中醫師，個中醫成日煲嘢俾佢飲話滋補養生，有次佢飲完覺得成個人好暈，個中醫生居然諗住帶佢去房，好彩係西裝客救咗佢。」

「你講緊霍興啊？」男生倏地插嘴。

「我無講邊個啊。」女生抿住嘴。

之後我打聽到的情報都差無幾，無非是西裝客救人後隱藏功與名，沒人知曉他住在哪或背景是什麼，跟鬼一樣。

沒有任何關鍵情報下，我只能放棄尋找這位人兄。

我要聯絡的人仍有許多，我分別探訪了兩幢工程學大樓打算咨詢一下，結果裡面門可羅雀，只得各種金屬、機械和零件，非常冷清。

好不容易我總算找到個活人，可以問問：「哥仔，其他人去咗食飯？」

「其他人？工程無乜人嫁喇，都走哂去北部都會區。」對方答。

「你係邊個系？」

「物理啊……」對方有點頹廢。

「如果我想搵工程部嘅人製作屏蔽物料同器材，我可以搵邊個？」

「應該無咩人幫到你，依到嘅電子工程系、材料科學工程系、化學系、電機工程系同信息工程系都走咗好多菁英。」

「真係一個都無？」

對方冷笑一聲：「部門主管級嘅都走哂，剩低我依啲廢人咋。」

「好……」可惡，諸事不順。

大清早忙碌完，我終於可以返回到病獵學會，其時那名被捕獲的俘虜亦都醒來，但沒有任何求饒或叫囂行為，只是眼神空洞地望著前方，而他的前方只是一幅牆。

應該能從嘴巴中，挖掘出一點情報吧。

我打開籠牢的門，行至天腦信徒面前。

當他的眼睛聚焦我身上瞬間，我出拳擊打其腹部，接著把他推向牆壁，雙手朝頸喉捏去，雙臂再高高往上一舉。

「嗄呀……」天腦信徒雙腳離地，懸於半空。

維持個五六秒後，我才鬆手讓他跌倒地上，再多補幾腳。

遭受毒打的天腦信徒痛苦地咳嗽，原來也是一個有血有肉的人。

我握住他的臉頰，迫使他擰向我：「有冇嘢要同我講？」

「你唔放我走……」天腦信徒神色驚懼，不敢直視我雙眼：「發生喺嗰個人身上嘅事咳咳，都會發生喺你身上……」

「嚟。」我舉手清脆摑他一巴掌：「俾我睇下。」

「好快會嚟……」

「啪」我再摑他一巴掌。

我第二次問：「你知唔知自己信緊咩？」

「上帝一定會救我離開於苦難，請求你施展大能……」天腦信徒說。

我對天腦信徒施以酷刑，打算借此瓦解其信仰。

可是他的信仰比我想像中堅定，整個毆打虐待過程中，他口中不停默唸著廢話，請求自己的神降下神蹟，救活自己。

我一直折磨到天腦信徒下體失禁，養著傷的蕭梵都被叫聲吸引過來。

「有收穫？」

「無，把口好密。」

「咁殺咗佢。」蕭梵表現得輕描淡寫：「唔好浪費自己時間。」

「依到大學範圍，殺佢有啲過火。」眼前這人雖然是天腦信徒，但他也可能是被偽裝的宗教蒙騙。

「道德，佢就係利用依點，等我哋唔敢落手。一兩個信徒喺隔離可能無咩威脅，但俾一班信徒圍住嗰陣，佢哋就係識行走嘅放射性武器。」

我無意間想起艾匡，她受到了天腦的「賜福」，無形間會產生出依賴和信任，難道有天我又要手刃艾匡嗎？

「只要知佢哋係危險嘅存在就得。」蕭梵走入牢籠，右手伸入口袋：「留依個人喺到，等於留個鏡頭俾佢監視。」

「你真係要……」我嘴上想阻止他，行動上卻沒實行。

這次，天腦信徒發自內心害怕起來，因為他真的看見想要殺死自己的人。

蕭梵摸出一枝石墨筆，俐落刺進對方的大動脈。

石墨筆抽出，血液如小水柱噴出。

蕭梵
婦人之仁嘅老M遲早又柒多鑊

推

都病港十幾年 一日一殺都三千幾四千人
竟然呢啲會留手

廢老M

Lm

「噫。」天腦信徒按住噴血的頸動脈。

蕭梵強行移開他的手，對著傷口再深深一刺並加以攪動，像使用刨筆機。

天腦信徒抵抗越來越弱，最後閉眼死去。

「以後見到佢哋嘅信徒，都只有依一種處理方法。」蕭梵拔出石墨筆，潑掉手上濺到的血液：「唔好打算感化或者拷問佢哋，囚禁仲危險，佢哋個腦凝聚起嚟就係一件武器。」

「你打算點處理？」我插著腰望著屍體。

「肢解、強酸。」

「你搵個地方整。」我讓個位給蕭梵拖走屍體：「咁大個地方，會有個位俾你搞依啲嘢。」

蕭梵單手扯住屍體的頭髮，拉出牢籠外處理。

也許，我自己還是未夠狠心。

想要削弱天腦影響力，第一步得要摧毀剛搬入時就發現的「主腦」。

主腦就是巨型的腦組織，我們不知它的來歷如何和用什麼構成，但可以肯定是病者產物，甚至是天腦信徒們用來連接自己主子的媒介。

我拿著鎚子把牆壁粉碎後，主腦重新出現眼前，比起圍封前來看它萎縮了不少，外表沒有以前新鮮。

我手握鎚子往主腦組織砸落，將這東西徹底摧毀。本來大腦般的外表，轉眼間變成被碎爛的豆腐花，結尾拿根火把燒掉組織渣滓。

比起如何研究獵殺病者，病獵更多時候是在清潔，為了防止病毒傳播，常常要包辦清潔工作。

主腦留下的殘渣與污垢，我需要用力去擦走，因為它停留原位太久，幾乎都與地面融合了。

「嗄。」等我清潔完畢後，居然會感覺到一點點吃力。

我腦中不禁產生出疑問，流失的生命力真的有那麼多嗎？

男人到了某個歲數，總會有著相同的感慨，回憶著年輕的自己，就如女人回憶自己失去的膠原蛋白。

算了，去吃個下午茶。

我終究是個人，不是部機器，不可能早午晚都執行任務，疑神疑鬼地調查一切事物。

蝦蝦蝦餐廳平時只做晚市，但今天富林比比居然招待了一位客人進座。

那位客人外表明顯與常人不同，他的樣子看上去有點憨厚，身材比較……

算了，我就直說了，客人是位唐氏綜合症。

那位唐人看見我後，對我微笑揮手。

我很擅長第一眼去分析別人，這位唐人的衛衣乾淨，沒半點破損的痕跡，令我相當意外。

能穿得這麼體面的人，都是不愁吃喝的傢伙。

我走入廚房，見到了焦頭爛額的富林比比。

「出面嗰個你朋友？」

「佢係嚟自外地嘅食材供應商。」

「食材……供應商？」我不是歧視，但患有唐氏綜合症的人智力都比較低下，如何做到供應商，說不定撿顆石頭都能騙到他是糖果。

「你唔信去睇下！」

我走出廚房，行向唐人。

「你好。」我打聲招呼。

「你好！」他抱著手，身子坐得很低。

「我係依間餐廳嘅老闆，可以點叫你？」

他抿著嘴擺出一張鬼靈精表情：「我叫小皮。」

「收……小皮，聽講你有食材供應。」

小皮打開自己放到椅子下的背包，亮出一罐罐保存很好的罐頭。

舊社會的罐頭食品，已經賣少見少。

「你喺依到住嘅？」

「我喺外面住。」

「外面唔係好多病者？」

「我唔驚病者。」小皮換成狡詐的笑容。

「你邊到嚟？」

「呃……唐老大話唔可以講俾人聽。」

「唐老大？」

「唔。」小皮突然縮起脖子，緊閉自己的嘴巴：「我唔會講唐老大。」

我不知不覺間，又變成審犯性提問。

「長髮面具人，可唔可以入嚟廚房幫我手。」富林比比呼叫我。

我這就走入廚房：「咩事？仲有你可以直接叫我個名……」

「出面嗰位唐寶寶我都唔知整咩俾佢食先滿意，我其實整咗兩碟高級料理俾佢，但佢都係食一啖就無興趣！換轉係其他人一定連隻碟都舔乾淨。」

「或者口味唔洗太複雜，佢哋個腦思維好簡單，唔會識欣賞你對味道複雜嘅層次。」我代入他們的思維去猜測。

「越簡單平凡嘅嘢越好？」富林比比彷如受到新思想衝擊，腦袋的小宇宙大爆發：「啊！我總係一直諗點樣令菜色昇華，食材要點稀有都高級，但唔記得咗食物嘅本質都係眾生平等……就算係我視為嘅垃圾食物……」

說罷，富林比比把蕃薯切成條狀，預熱一下炸油，然後把薯條傾倒入去，炸成香脆後撈出加點點鹽巴，以圓碗捧著出去給予小皮。

小皮見到薯條，表情馬上樂起來：「哇，薯條啊。」

富林比比給普通到不能再普通的薯條，創作了奇奇怪怪的名字：「請享用，依道菜色名為──「新資本主義薯條」。」

小皮一條一條接著吃，滿嘴塞著又熱又脆的新鮮薯條。

「咩叫新資本主義薯條？」我無論如何都解讀不了菜色的名字。

「鵝肝點解貴、海膽點解貴、和牛點解貴！？一切都因為兩個字──資本！資本令佢哋成為昂貴食材，而備受好多人嘅追捧同喜愛，但係其實最廉價嘅薯條都係非常好味，但就因為資本嘅操弄，令佢唔可以好似以上食物咁，變成最上等嘅菜式，受人鄙視，最多淪為配菜。」富林比比忍住哽咽，淚水在眼眶打滾：「但其實食材係理應平等！每個人都有機會主角，所以依份薯條叫「新資本主義薯條」，今日就由佢做主角！唔再受傳統嘅觀念思維影響自己嘅味覺，掀起蕃薯界乃至食物界嘅新一輪革命！」

我：「……」

「啍。」富林比比得戚地揚嘴：「係咪俾我說服咗呢。」

我按住眉心搖頭：「我依世做過最後悔嘅一件事，就係企定定聽你講完依段嘢。」

回個帶：

「啊……會長！」突然，上方傳來某人的聲音。

我抬頭一望，他是那位有患有唐氏綜合症的清潔工，黎五寶。

黎五寶站於一塊僅僅能容納他雙腳的小石板上，這是他所在的樓層倖存的一角，周圍的地板經已全數斷裂，他只能緊貼著牆壁保持站直，確保自己不會跌下去。

「救我啊、你要救我啊！」黎五寶哭喊。

我張望黎五寶周圍的事物，發現能救活他的生路，只有較低的位置下向外延伸出的斷裂欄杆，只要他捉得住便可。

「你會唔會捉得到。」我指住那條欄杆，他們高度差距大約四五米。

「捉唔住！」黎五寶快向下方瞥了一眼：「一定捉唔住！」

「我都想救你，但依個情況得你救到自己……」

「會長……」黎五寶掙扎了幾秒：「我試下……」

「好，慢慢嚟……」

「跳落去之前我想同你講件事。」

「咩事？」

「如果……」黎五寶說話有些飲泣：「如果你喺出面，遇到同我一樣嘅人，千奇唔好信佢哋……」

唔通

唐仔有伏！

咁都記唔記得，好勁

詭人

唐仔線入迪迪尼

推