你真係好理性
同埋應該好幸福,未試過有身邊人突然出事嘅情況
我係一個大男人,廿零歲時候
老豆末期肺癌住咗半年醫院
屋企人有晒心理準備
隨時收到醫院嘅 last call…
但係那一天我收到果個電話時
真係成個人空白晒
除咗通知其他屋企人,自己真係唔知做乜好⋯
因為咁,我先覺得編劇呢幕寫得好
若葉亦都演得好好好
三瓶呢一刻唔係一個近天才腦科醫(小雅先係天才)
而係一個失去咗至愛嘅普通男人
所以我先會話佢慌到唔知點好
我設想自己係編劇
响呢場戲之前
已經埋咗一啲伏筆
1 三瓶日練夜練,都無辦法做到兩分鐘內完成手術,之前好cool嘅情緒開始升溫。
2 小雅由昏迷中(上一集醫院入面暈低嘅一次)醒返,三瓶捉住小雅隻手,除咗講自己係三瓶之外,仲第一次毫無顧忌咁同小雅講,我係你未婚夫啊。呢度係編劇開始發功將三瓶由醫生變返普通人嘅第一步。
3 當護士長同三瓶講「你仲練?點解唔去盡量陪小雅多一啲?」編劇又出手扯走三瓶嘅醫生袍⋯
4 三瓶跟住去問小雅,佢想留响醫院定返自己屋企靜養?(呢一段又係編劇想觀眾連返之前畫家同老婆返屋企果段鋪排)而三瓶決定請假同小雅一齊住,一來係貼身照顧小雅,但同時都係响手術成功機會唔高嘅考慮下,盡量响小雅仲有意識前,兩個人好好過一段時光。呢一段,編劇係想話三瓶都係一個普通人(同之前女演員同經理人、綾野爸媽咁多對戀人嘅故事,或多或少為剝咗三瓶嘅腦科醫外殻鋪路)
5 三瓶响小雅屋企練施針無進展,想攞營養飲品裹腹,結果小雅就好似老婆咁幫自己煮飯,食到忍唔住流淚。第二朝三瓶煮早餐,記得小雅話一定要食yogurt,呢一場三瓶已經除低咗件醫生袍,變成小雅嘅男人。(編劇好嘢。)
6 三瓶發現小雅叫極唔醒後,打開小雅個書包本來想拎佢嘅保健卡(小雅之前交帶過嘅事),但係就發現小雅留俾自己嘅素描同幾句攞命嘅說話,令到三瓶完全「崩潰」變成一個普通人,一個覺得自己啱啱失去至愛嘅普通人,所以佢會忽略咗小雅嘅低溫病徵,而只係想盡量响救護車來到前,記低/回味同小雅嘅種種回憶—食yogurt,睇日記⋯
7 護士妹一句「無心(編劇刻意)」之言「小雅個身咁涼嘅」,重新喚醒咗三瓶嘅醫生魂,由不知所措嘅普通人變返理性嘅腦科醫,由一個小小嘅低溫徵狀,判斷小雅可能無完全腦梗,仲有救返嘅機會⋯
以上只係我用一個講故佬嘅心,猜度編劇嘅諗法,唔代表一定啱。當然,編劇高手唔會好似我咁寫到露晒骨。
除咗編劇高質,必須讚結局呢集,若葉/三瓶演得非常非常好,恰到好處。