10am，Day 1 上堂時，講師要求學生同組長Day 2, 3要傾電話，但要約好指定時間，今日係組長打比我，聽日我要打比組長，佢問我琴晚學到咩？不斷提琴日既洗腦重點。而我就試探一下佢，就問佢守則其中一條唔可以遲到，如果遲到會點？係唔係會犯左承諾？佢就堅持話：你一定做到唔會遲到，因為守過承諾。最後冇正面答我問題，咁應該有問題。
今日6:30pm上堂，講師第一句就問學生記唔記得守則唔可以遲到？因為琴晚承諾左所以必須要遵守做到呢個選擇。不斷強調呢個係自己既選擇。
5分鐘後，講師叫遲到同學入課室企係自己個位，之後就開始問學生點解遲到，解釋完就話佢哋係藉口，講大話。
有一位讀大學三年級女學生因為要返學上堂做功課，已經飛的到中心，結果遲到，被講師不斷用壓力形式追問15分鐘，然後話因為你選擇左遵守承諾所以你唔可以遲到，最後學生被迫到情緒失控不斷狂喊，但冇一個職員 / 組長主動遞紙巾，而因為我係佢隔離，忍唔住叫職員比紙巾佢。睇得出過程中講師同職員專登用壓力控制學生情緒。
另一位遲到學生第二次上基本課程，已經知道講師目的所以用駁嘴形式同講師對話，結果竟然令講師呈現另一面目，發晒火不斷用粗口鬧學生，人生攻擊詆毀學生，全場氣氛極度緊張，最後鬧足15分鐘。
心諗呢個講師功力好深厚，轉數極快，唔可以同佢硬碰，因為已經感覺到講師就係老闆，佢可以有任何決定權，如果比佢知你唔係佢控制範圍或反抗，一定死得好慘，所以我知所有事要低調地進行先係明智。
曾經想救果個女仔，但因為佢有參與同投入課程，可能都已經被洗腦，為左自己安全，雖然佢好慘但我都唔會同佢講任何野。
整個遲到部份用左1個鐘鬧人，感覺到想令學生都好驚，要學生服從整個課程所有指示。
進入今日第一個遊戲環節：2人1組，眼望眼，但唔可以出聲，然後聽講師指示做，好明顯呢個係催眠。由第1日開始，講師強調要學生100%投入，唔可以講大話，目的係容易控制大家思想。
而呢個催眠法，講師會一步步令人跌入佢講既世界，首先係熱身，講師叫對方扮鬼臉引對方笑，成功後叫大家合埋眼，講師不斷講兒時唔好既經歷同回憶，之後重點就黎，講師指示雙方一定要眼望眼，其中一方先諗起自己父親兒時點樣對自己？係好惡？成日比佢打？唔理自己？諗到後就要向Partner 用10倍或100倍誇張地模仿父親，全班同學真係跟足指示做，最多人模仿打人動作，非常投入，非常恐怖。
然後講師指示另一方要諗起母親點樣對自己？好溫柔？陪你玩？好錫你？已經年老走左？諗完又係向Partner模仿，呢個時候基本上全場喊，全場情緒比講師控制住，當然除左我同Partner啦。
分享時間，學生都好積極舉手分享自己童年唔開心經歷比所有人知。
呢兩晚我留意到學生分享時講師會攻擊分享者自信自尊，然後引導你講課程入面既洗腦字眼，當你講中字眼，講師就會堅定咁講Yes 黎肯定你，將焦點帶入佢課程，令大家覺得課程既野幫到佢，課程理論先係正確。
然後第二個遊戲係關於生活情況，講師會引導學生覺得生活會遇到好多負面情緒，叫大家做句子，例子：我必須早起身，早起身要返工，返工要搵錢，搵錢要比家用，最後我感到絕望。成個句子感覺到要你一步步感到人生越來越痛苦，然後絕望。講師會問全班學生最後有咩感覺，9成人都係絕望，我相信呢個就係講師最想要既答案。
然後解釋人生好多選擇其實唔係必須，係因為你咁選擇導致呢個負面結果。
又係好多人認同舉手分享，好詳細講自己過去好多被迫要做既事令自己唔開心。
感覺到成個課程要令所有學生先要覺得過去同而家都過得唔好而充滿負面情緒，而呢個係你既選擇導致咁樣，然後因為你選擇透過課程搵到一個新既自己，搵返人生目標，係呢個課程令你變得更好。
9：30pm上半場完
10pm下半場繼續課程，標題 - 受害者。
2人1組講一個故事關於自己係受害者角色比對方聽。一開始叫左一個學生講真實例子做分享：
因為有個朋友A要借錢，而我同另一個朋友B就做左擔保人，最後因為朋友A還唔到錢，搵佢又唔理人，搞到我同朋友B要揹起370萬，仲累我地比人告要還1400萬，因為佢搞到我要搵辦法減少還款但最終都要還120萬所以成為受害者。
當大家分享完，講師就話大家唔應該做受害者，要學識負責任，用返之前受害者角色但要負責任既方法去演繹一次。
朋友A借錢，其實我應該要阻止佢，但因為我有義氣所以我，朋友B挻身而出做擔保人，雖然朋友A還唔到錢，我應該用更多方法幫佢搵佢，最後我捱義氣去幫佢搵銀行處理，最後成功由1400萬，減到只需還120萬所以我好成功。
聽完簡直係前所未有既衝擊，完全係歪理！超級恐怖，好似乜都係因為自己而要去負責任，我就明點解有人會幫手比學費：因為果個係你朋友，佢人生唔如意，你要負責任為佢變好變進步所以要幫佢比學費讀課程！
最後分返小組，同組長組員分享受害者轉化成負責任，真係屌你老味乜都係因自己而起，唔怪得有人上完堂會抑鬱自殺。
今晚功課
，而經過今晚我相信聽晚冇人會遲到。
11:45pm 落堂
