[極限挑戰第二季]用8日喪遊半個日本 (北部九州 ~~> 名古屋)

依家諗住都係名古屋市區hea幾日 再去郊區又hea幾日

嚟緊會去九洲 未去過名古屋
你鐘意名古屋定九州多d?

我鍾意大城市，所以一定係名古屋
九州（博多以外）對我黎講太靜，早左返酒店冇野做，附近又少野行
名古屋你想行幾夜都得，交通又方便可以四圍去
食方面更加唔駛講，乜都有

睇黎名古屋似係chill住黎玩既大城市

諗住食晒樓主個3間鰻魚飯 有太多時間係名古屋

踩場賣廣告先
行程一樣係8日去九州但機場都無雷公咁遠

[偽鐵膠佛誕出遊] 長氣多圖 白銀袖湊進擊九州之旅
https://lihkg.com/thread/3433939/page/1

巴打關西北陸個post好好睇

次次見親你都唔同名

跳板一流，東有靜岡南有伊勢，西有琵琶湖北有北陸
鰻魚飯真心唔錯，今次我又有食

係 其實幾岩舒服咁chill住去

交通又方便 始終係大城市

太多時間留係名古屋 有3日+4晚係名古屋 有好多時間排隊食鰻魚飯

請問你呢個指定席係現場先book?

搭單問如果我jr 北九3日pass
會去長崎 熊本 下関
係咪就咁到車站劃位就ok?

係就係現場book，不過我揸全國Pass係可以用手機上網訂完再攞飛

JR北九Pass要留意有指定席數量限制
不過你去啲地方如果唔係繁忙時間或者GW既話，博多出發既自由席都大把位
如果想劃位就入張Pass去JR九州既售票機禁禁禁

食完飯就啟程去熊本城，首先要買入場券
我去城彩苑既わくわく座度買，貪呢度少人
售票處有冷氣嘆之餘仲有靚女職員招呼
如果有時間可以買共通券參觀呢度同熊本博物館
不過個城都差唔多閂門，冇時間去



唔想儲實體票既話上官網用信用卡買都得
反正都係用QR Code檢票


わくわく座隔離就係上熊本城既路，沿途極多樓梯同斜路
告示都講到明唔俾拎住大型行李行熊本城
所以要放係城彩苑或者車站Locker




行左5分鐘見到一條架空步道就係南口
出示QR Code俾工作人員掃描就入得


地震之後當局優先修復天守閣，前年先開番
但周圍仲係溶溶爛爛，行原有路線上去太危險
所以係內城以南起左條高架特別見學通道
景觀更加好之餘又唔會阻住復修人員做野

行上黎就見到数寄屋丸二階御広間
地震既時候震散左中間既石垣
到而家都未整番好，咁多年都仲係吊吊揈狀態



通道下面可以見到原先遊客行上黎既路
好多石牆都震爛左，而家都係用塊防水布冚住先
但係要砌番以前個樣都唔易，起碼要搞多幾年



熊本城既防衛規格放眼全國都係數一數二頂尖
除左上天守閣既路設計到曲折難行之外
內城既石垣都超過10m高，斜到冇人可以爬到上去
所以特別見學通道仲要再升高多一級先過到去



呢度要穿過本丸御殿既地下通道先去到天守閣
通道中間有個十字路口，兩邊通去御殿
冇燈既時候非常黑，可以作為最後防線埋伏敵人





行出地下通道見到既呢棵銀杏樹來頭唔細
已經陪伴左呢個城超過400年

終於有updates

作為日本傳統美學同建築典範之一
熊本城黑白分明既外觀顯得非常莊嚴而低調
同全白既姫路城相比各有特色
不過木造既熊本城係百幾年前已經被毁同拆除
而家望到既係60年代用鋼材重建既外觀復元天守
因為歷史意義重大，仍被列為全國63個特別史跡之一


右邊既小天守本來靠石垣承重，強震後出現嚴重沉降
所以復修既時候索性更改結構，外面睇唔出分別



天守閣入口會見到掌管熊本城兩個家族既家紋
右邊係加藤家，左邊就係細川家


呢邊既石垣情況都係慘不忍睹


同大阪城一樣，天守閣裡面部𨋢只限傷殘人士使用
有個阿伯想搭都俾工作人員請走，要行樓梯


熊本城所有展板都係全日文，所以要下載定官方App
每個展板標題正下方都會有個QR Code
掃描之後有中文翻譯，唔怕睇唔明

2016年4月中，熊本發生強度達7.3級既地震
熊本城雖然損毁嚴重，但天守閣仍然屹立不倒
呢度有一條係震後冇耐拍攝既熊本城片段，都幾震撼
縣政府預計成個城完全修復起碼要多15年
所以條特別見學通道起碼仲有好多年玩



頂樓就係觀景台，可以睇到熊本市區全景




隔離既小天守係藩主夫人既居室，不過今次黎就冇開放


呢啲滴水瓦就係朝鮮帶番黎，係熊本城獨有


天守閣既耐震工事做得好足



係熊本城磨足2個鐘，行到有廣播趕人走
於是冇行到北面通道就原路離開


上次黎既時候馬具櫓已經搖搖欲墮
今次黎到仲拆埋

辛島町對出有個超級靚既大商場
除左有街行有野食之外，仲係熊本最大既高速巴士總站
如果買左SUNQ Pass黎熊本，住附近都係唔錯既選擇




熊本ラーメン 黒亭 下通店 [Tabelog評分：3.34]
行完下通又到食飯時間，諗唔到食乜
結果就去左好多人追捧既黑亭拉麵
6點幾黎到都唔駛排隊我就知間野有啲古怪
現場所見全部客都係講廣東話，感覺好親切



玉子入りラーメン (半熟味玉) <1050yen>
我第一次黎熊本黎呢度食過，味道係正常既
但今次黎食番同一碗麵就覺得質素差左好多
湯底既唔濃厚又冇豚骨味，只有微苦既黑蒜味
我懷疑係烚芽菜同木耳既時候冇瀝乾水，所以溝淡左
就算拉麵叉燒同味玉味道正常，都覺得碗麵好難食

熊本既夜晚冇乜野好行，好早就返酒店Hea
住新酒店有樣野著數，就係電視質素會比較好
除左夠大之外，仲可以睇唔同類型既串流平台



網速一流


咁啱轉台睇到有鐵道SP番組介紹東武鐵路
搵左石原三兄弟去車廠試揸列車
係車箱放左個測試器判定剎車力度，都幾新奇
東武既首席運轉士癲到唔望鐘都做到行車時間分秒不差




SL大樹上次去關東搭過，想知多啲可以睇番我遊記：

[窮遊豪食逍遙遊]用8日暢遊關東 (東京‧河口湖‧日光‧湘南)
https://lih.kg/zpikzFX

同一個節目仲有得睇盛岡站はやぶさ同こまち連結




仲有E5系新幹線最新U47編成Debut
順便宣傳埋佢隻吉祥物





Day 3完

羨慕又去旅行重溫緊你嘅舊PO，望梅止渴。