[極限挑戰第二季]用8日喪遊半個日本 (北部九州 ~~> 名古屋)

別府地獄巡禮之六 - 鬼山地獄


𥚃面有個蒸氣量同海地獄有得揮既池
長期都係煲滾水既狀態，行近啲人都溶




呢度既特色就係有幾個養左好多鱷魚既池塘
正常日本位處溫帶地區，冬天既戶外會凍死啲熱帶動物
但因為有溫泉溝熱啲水，所以四季都養到
部分時間仲有餵食睇，不過今次就撞唔啱時間



呢兩隻赤鬼青鬼感覺非常猥瑣


別府地獄巡禮之七 - 白池地獄


呢個池既池水含有硼酸成份，遇到空氣就會變青白色


除左池之外仲有一個資料館同水族館
有啲似嘉道理農場既Feel，麻麻地

本來我諗住時間啱啱好到巴士站，點知就係差1個燈位
搞到我眼白白望住兩班車係面前走左
結果下一班車等左10分鐘先到



結果巴士同去程一樣又係Delay 5分鐘先到站
我再用快過Google Map寫既速度衝去車站Locker攞袋
最終係JR開出前2分鐘成功抵達月台，Safe



別府去熊本方向我選擇搭特急ソニック轉新幹線
因為係車上預計唔夠時間去售票機攞車飛
所以當時已經去全國Pass官網退左張Green Seat
好在平日指定席都大把位坐

地獄蒸焼プリン <300yen>
講到地獄蒸布甸，最出名應該係岡本屋売店
不過我冇去自然動物公園，唔會順路去到嗰邊
但海地獄都有得賣，咁就買番個試下
口感似蒸水蛋，嫩滑得黎有啲奶香，但蛋味唔明顯
最底既焦糖醬唔甜而且偏苦，唔太好味



無論係883系定885系，每卡之間既空間都好似展覽廳
例如有景點海報同埋九州各地既手工製品，幾有心思







搭左半個鐘車就會到宇佐，係宇佐神宮所在地
創建於725年，同時係日本八幡信仰既總本宮
係古代神道教既地位同神社之源伊勢神宮齊名
不過到左現代，佢既知名度遠遠不及英文 - USA
所以係車站標誌定歡迎字句都明顯想同美國扯上關係
https://goo.gl/maps/R12bdFKZCxSqQ7HC6

去到小倉轉新幹線得6分鐘轉乘時間
所以都係坐自由席，搭1個站去博多




首先要去サイバック博多駅前店攞番寄存既大喼
之後諗住同上次極限挑戰一樣塞哂啲手信入喼
再係博多站搵Locker寄存，但今次居然全部爆滿
附近貼左QR Code可以查到使用情況，大既全部都X
呢個情況都係我預計範圍之內，攞埋去熊本都得
但大家要記住如果坐東海道、山陽或者九州新幹線
攜帶3邊合計超過160cm既行李必須預訂特大行李指定席
否則俾車長發現係有機會罰款兼調離座位
好彩我個26寸喼冇超到，坐邊都得


係眾多新幹線路線當中，九州新幹線相對冇咁複雜
行經博多 ~ 鹿兒島中央就只有3款列車
みずほ最快，さくら其次，つばめ站站停
揸全國Pass唔搭得みずほ，所以我只可以揀さくら
非繁忙時間每個鐘得2-3班車，大把時間劃番張Green Car



係月台又見到700系ひかりレールスター
今年3.18ダイヤ改正，取消哂所有博多開出既山陽新幹線運用
而家係九州就得番博多南線或者臨時列車見到

明明さくら得24個Green Seat
臨上車前15分鐘都仲劃到窗邊位，睇黎都幾少人搭




張凳最盡可以斜到135度，而且有腳托
因為座墊夠厚，訓上去好似床咁樣非常舒適
當然係最尾嗰行或者後面冇人坐先好咁做


新幹線有免費Wi-Fi用，都叫做上到網既
一入隧道就斷線，出番又要連過，但好過冇


去熊本車程只係38分鐘，去完廁所周圍望下就到

事隔6年又見番因為多手同痴漢罪被斬首既熊本熊


上次黎既時候仲用緊水哥設計既白色舊站樓
而家已經變左安藤忠雄參照熊本城而設計既黑色新站樓
站裡面有手信街，出面又多左個商場連酒店
但附近都係比較荒蕪，我冇揀呢度黎住




熊本真正既市區係熊本城前面既新市街同上通下通
東口站前廣場有市電站搭過去，全線劃一收費180yen




15分鐘車程就到辛島町，隔離就係新市街商店街
仲駁住上通下通，多野行得黎落雨都唔駛擔遮

沿商店街直行3分鐘就到呢晚住既酒店
相鐵GRAND FRESA 熊本，2022年12月開業
當時做緊優惠，係Expedia訂都只係200蚊
用呢個價錢係市中心住到新酒店，超值



因為係新酒店，所有配套都係極度先進
除左零現金交易之外，Checkin都係用自助機
前台職員只會協助你用部機同埋幫你禁定𨋢
會員既話可以用Wallet解鎖房門，連房卡都唔駛攞
有冇人知可以去邊度入手相鐵隻吉祥物



相鐵全名相模鐵道，係全國16間大型私鐵業者之一
近年動作多多，例如今年3月18日正式通車既相鐵新橫濱線
正式實現關東地區7間鐵道公司總共14條鐵路線直通運轉
我地啲遊客係東京睇路線圖又麻煩左
雖然酒店業唔係佢本行，但我以後會記得佢個名
因為間房完全超出我想象，大到我呆左
今次旅行我住左6間唔同品牌既連鎖商務酒店
呢晚房價雖然係最平，但房面積就係第二大
究竟係鄉下酒店平定相鐵酒店一向平，定兩者都啱

勝烈亭 新市街本店 [Tabelog評分：3.69]
因為早左到熊本，所以有時間慢慢食飯
係酒店行2分鐘就會到連登仔推介餐廳之一 - 勝烈亭



呢度攞籌用平板禁就得，都幾適合外國人黎食
雖然2點半先到但都要等一陣先入到座
環境非常新淨，毒撚們都被安排係圍住柱既圓枱



日本搵食第一準則就係食Lunch平過食夜晚
除此之外，呢度同茶餐廳一樣每日抽個餐做是日精選
價錢比午市餐牌寫既再平多100yen以上
出面仲有免費咖啡可以飲，不過我麻麻



呢度對於調味料好講究，數量仲多過屋企廚房
左前個兜有辛子高菜，加落飯度食辣辣地好開胃
左上嗰堆就係用黎淋沙律菜，有柚子醋同法式沙津醬
右上嗰堆先係用黎點豬扒，仲分左和風醬同洋風醬



白色罐就係芝麻，自己磨完再加醬



前菜係蘿蔔蓉配金菇醬，味道不過不失


勝烈亭定食 <1705yen>
雖然睇台仔遊記極度吹捧六白黑豚
不過第一次食就想樣樣都試下，就叫左勝烈亭定食
有齊豬扒豬柳同炸蝦，一次過滿足哂3個願望


剩係睇豬扒豬柳既橫切面紋路就知炸得好
外皮唔會同肉分離，裡面充滿肉汁
咬落去先鬆脆後軟淋，食唔到油益味同豬臭味
豬柳雖然瘦但唔會咬唔郁，豬扒邊舊肥肉就好香
最重要係啖啖肉又冇筋，值得加分



蝦非常大隻，外皮唔會好似天婦羅咁發水
食得出係新鮮既海蝦，𡁻落係彈牙同冇腥味
如果要同松乃家比既話，呢個絕對好食好多
連鎖快餐店同炸豬扒百名店對比好似有啲失禮

想問博多Jr 劃位個度係只可以mark 一日嘅指定席？定係當日嘅指定席，睇佢張notice有d亂

理論上係其中一日
不過如果唔係劃即日票或者好多人一齊拎Pass既話
出去外面指定席售票機自己禁好過

相鐵啲酒店係幾好住
年頭去住同一間酒店9晚亂到仆街都仲有位行

Btw 發現每次plan去日本嗰陣巴打都更新緊啲post
到底係咁啱定樓主去得密

由細睇樓主d 旅行post大

本來以為Daiwa Roynet已經算係性價比高
原來相鐵仲正，今次學到野

疫情期間餓左一輪咪去多幾次，反正仲有大把里數同酒店積分未用

好搞笑上次自己獨遊關西又咁啱睇到你出緊關西post

嚟緊7月尾會帶屋企人去九洲又咁啱出九洲

但暑假應該多人到仆街 同埋落雨落到坐唔到由布院之森

其實最重要係乾衣機
去過啲有洗衣嘅都係要排乾衣機 機又少又乾得慢

香港人來來去去咪又係嗰啲地方，我唔揀旺季去姐

偷步問下樓主，名古屋值唔值得去
個個都話好悶
無記錯你之前好似都去過

悶可能因為景點比較少，主要都係行街
我幾鍾意名古屋，少遊客過東京大阪得黎又多野食
但冇必要專登去，除非會駁腳去白川鄉或立山黑部
一係就好似我咁有張Pass

去名古屋係咪chill+hea

叫做乜都有啲啦，選擇少變左容易諗去邊
雖然名古屋近京都大阪，但冇全國Pass搭新幹線都幾貴，近鐵平啲但車程要2個幾鐘
想好似東京咁1星期都係市內活動就冇乜可能，幾日都夠既
想行街有名古屋站前面嗰堆百貨公司，榮，大須觀音
Outlet有長島
市區景點有熱田神宮同名古屋城，近郊有伊勢同名花之里
食就有鰻魚飯，味噌豬扒，手羽先，台灣拉麵等等
Cafe質素都唔錯，仲有小倉多士食

可能十月會追隨樓主足跡
不過jr pass係咪十月開始加價

係，所以要去就快