[極限挑戰第二季]用8日喪遊半個日本 (北部九州 ~~> 名古屋)

水哥周圍都係
利申睇緊day2

想問樓主好耐
點解你好似咁熟日本歷史

睇完

今日會再出，等等

因為我唔似一般人咁剩係去日本吃喝玩樂同打卡
我比較鍾情歷史名勝同睇展覽，睇得多自然熟
例如同年代建成既熊本城同姫路城經常有人比較城池堅固度
所以去完熊本城就會想去埋姫路城望下
而姫路城係日本五個國寶天守之一，咁我又會想去埋其他嗰啲
睇得多又會熟戰國時代同幕府歷史，自然想知埋近代史
於是順便去埋長崎，慢慢就會砌到個Full Picture出黎
而且我太好記性，自然隨口噏都講到出黎

樓主講日本歷史好好睇

Day 4

係九州除左博多同天神之外，基本上冇夜生活
前一晚10點就訓左，5點幾起身
睇新聞嚇我一跳，關東暴雨搞到溫度大降
5月既東京得番14度


6點鐘就Checkout出發去長崎
都係搭番市電去熊本站



香港幾時先可以所有交通工具都有免費WiFi用


係售票機攞完車飛諗住行下車站
點知方圓200m只係得站內間Family Mart有開
所以唔好貪方便住熊本站隔離，死城黎
呢間便利店同JR九州銘品藏合作，有好多熊本縣手信賣
但唔啱我心水，而熊本熊周邊四圍都係，唔駛係度買




ONE PIECE作者尾田榮一郎係熊本人，心繫故鄉
地震後就同政府合作，係縣內唔同地方設置角色銅像
希望OP迷去集郵既同時振興受災地區經濟


熊本熊：走拿，好行唔送

つばめ係九州新幹線站站停列車
因為車程長少人搭，基本上都係用800系6卡編成
不過係繁忙時間作為通勤列車就超多人搭
所以轉左用N700系8卡編成兼直通運轉去小倉



同時因為熊本以南通勤需求較少
就將我搭既呢班さくら400轉左用800系黎行
因為係冇Green Car，所以張Pass又蝕左次


800系全部座位都係2-2排列，所以走廊同位都好闊
不過張凳好單薄，搭短途都還好，長途不了
有冇人睇到個地下聯想到似廁所



木卷簾對遮太陽作用唔大，都係好光


卡同卡之間既空間同特急ソニック異常相似
咁當然啦，因為都係出自水哥之手




白底紅邊配搭800系Logo同文字裝飾，好水哥

講完列車就講下熊本去長崎既交通方式
最正路就係搭JR，車程大約2個鐘，轉3次車
想與別不同既話可以去熊本港搭船去島原港
然後再轉島原鐵路同JR，雖然車費係前者一半
但因為渡輪同火車班次完全冇夾過，你預要搭半日


第一程搭九州新幹線去新鳥栖轉在來線
呢個站冇轉乘閘口，所以要出閘再入閘



在來線呢間中央軒來頭唔細
係鳥栖站月台既檔口係九州歷史最悠久既立食店
本來諗住黎呢度朝聖試下招牌既かしわうどん
但觀察到阿姐同熟客西裝友有講有笑，5分鐘先出到餐
睇怕15分鐘未必夠時間食兼衝去對面月台上車
所以冇食到



第二程就搭長崎本線特急リレーかもめ
呢架列車包含兩個意思："リレー"同"かもめ"
因為西九州新幹線暫時得長崎 ~ 武雄溫泉段通車
武雄溫泉 ~ 博多段仲未落實最終方案
所以要通過"リレー"接力特急接駁新幹線既"かもめ"列車
雖然寫住長崎行先，但要係武雄溫泉轉乘
因為路線同去佐世保/豪斯登堡既特急みどり大量重疊
所以部分班次都會備註為リレーかもめ


リレーかもめ沿用以前特急かもめ既列車
呢班787系一睇就知係水哥出品，唔解釋咁多
個LED牌居然仲可以顯示到咁多字，佩服

787系Green Car非常好坐，椅背夠哂厚座距勁長
不過頭頂行李架係特急ソニック嗰款開門式，放唔到大喼
好彩前面個位冇人坐，所以問左車掌可以放係嗰度
搭普通車反而有行李架，貴啲既Green Car冇
我本來都想訂最尾嗰行，但好早就俾人訂左
現場發現係幾個冇行李既伯伯，佢地坐得好舒服


座椅印左燕子圖案，走廊邊都寫住"TSUBAME"
皆因呢架列車當年係作為行駛鹿兒島本線既特急つばめ
九州新幹線投入服務之後特急停運，つばめ個名俾左嗰邊
部分列車投入行駛博多 ~ 長崎既特急かもめ
然後西九州新幹線啟用，かもめ個名又送左俾嗰邊
到全線通車之後，睇怕都係改造變觀光列車，例如36+3


呢度有Green個室，最多可以容納6個人
全國Pass個網訂唔到，因為仲要補個室料金



另外車頭仲有3個DXグリーン座席，比Green更高級
之前有巴打坐過話感覺麻麻，我幾認同
因為張凳同800系—樣都係椅背好薄
就算可以調校角度，坐耐左都係會覺得硬
加上又冇前面展望，唔明白點解值咁貴

搭左大約10分鐘就黎到佐賀，日文發音Sa-ga
JR九州見同RPG大作Romancing SaGa食到字
所以就玩聯乘改左個站牌標誌
順便加埋當地另一特色 - 熱氣球


車站隔離有間東橫INN，WiFi隔咁遠都收到



開車之後過左5分鐘就會經過一個大草原
呢度就係佐賀國際熱氣球節既舉行地
每年10月尾11月頭都會開一個臨時站接送遊客


係新鳥栖出發大約40分鐘就會到武雄溫泉
呢個站好特別，リレーかもめ同新幹線設係同一站台
班次都有夾過，落車行過對面上車之後3分鐘就開車
想影車既話就行快啲，走左班車要等成粒鐘


西九州新幹線"かもめ"採用最新型N700S系6卡編成
係JR九州御用設計師水哥既最新傑作
車身沿用800系白底紅邊為主調
全新Logo係原有特急かもめ設計上加多兩個圓形，表現速度感
但我略嫌Logo同列車名稱係車身出現頻率太多
唔知係咪因為車身太長好多空間，強迫症想填滿佢
剩係第一卡，我粗略數過有40個KAMOME同Logo

當年水哥以つばめ專用列車為概念設計800系
所以搵左當時JR九州社長題字，放係每卡車身號碼隔離
之後因為有さくら用800系，怕引起乘客混亂所以抹走左
我估佢應該懷恨在心好耐，かもめ終於有機會一雪前恥
繼續都係搵社長題字，放係同一個地方

內裝睇得出水哥偷懶，明顯照抄800系
張凳除左背板顏色同座墊Pattern唔同之外
基本上所有野都係一樣
自由席就用番東海道新幹線隻膠凳

張枱都係中間椅柄拉出黎，不過實在太細
放個便當加支野飲就冇位再放其他野
頭先架800系張枱斜既，要用腳頂住



插頭就係椅柄下面，設計幾好


西九州新幹線都要遵守特大行李規定
不過訂唔到每卡最後既特大行李指定席都唔駛驚
かもめ預留左大量位置放行李架，1號車有2個



以往新幹線既LED車內顯示屏像素太低
個報站走馬燈碌成分鐘都未睇得完
N700S轉用像素較高既LCD兼面積倍增
睇得舒服又顯示更多資訊，色調又多啲

plan 緊行程
即刻book 咗ching 大分間酒店

かもめ無乜人坐咁
架駁腳車仲多人坐

等我又貼かもめ，提樓主出po

現場所見かもめ入座率不足30%，情況都幾差
以前搭特急一程雖然要2個鐘，但起碼直達唔駛煩
點都好過而家快得半個鐘但係要轉車，完全冇吸引力
搞到咁既終極原因就係兩個字 - 政治

西九州新幹線連接長崎至博多，中途經過佐賀
當中長崎 ~ 新鳥栖係新建路段，接駁現有九州新幹線
呢條路線早係1973年就被中央政府列入整備計劃
有法律約束興建程序同各持分者既責任
條文列明建設成本由中央同地方政府承擔
並且係新幹線落成啟用後，為減輕營運壓力
JR有權廢除同新幹線並行而潛在蝕錢既在來線路段
亦可以將其經營權移交俾地方政府亦可以繼續營運
最終要得到三方完全同意先可以開始建設程序，咁就出事了

由結論講起，長崎恐成最大贏家，佐賀得不償失
如果以效益最高既全複線規格興建新幹線既話
長崎來往博多既車程可以大幅縮短到50分鐘
但對佐賀縣黎講絕對係唔起好過起
政府除左要俾高昂既建設費之外，仲要接手蝕錢既在來線
對於當地黎講會加劇財政赤字，影響民生
而且佐賀離福岡好近，新幹線唔快特急好多但車費就貴左
所以係接近40年既討論當中，佐賀都係消極應對
最終三方同意先興建冇爭議既長崎 ~ 武雄溫泉段

上述路段係長崎主導，所以採用造價最高既全複線
而中央政府同長崎縣明顯係同一陣線，想霸王硬上弓
迫使佐賀縣係10年建設時間內同意建設方案
過程中討論過用迷你新幹線，靠套軌同改善在來線慳錢
甚至想研發FGT軌距可變列車，連路軌都唔駛鋪過
可惜最後全部被否決，到而家都仲未落實走線同規格
當年談判既佐賀縣知事今年又大熱連任
係政敵都話可以攻擊佢，弊在係執政黨自己人，搞佢唔掂


呢一段新幹線隧道部分佔超過6成
不過劃右邊窗邊位都可以欣賞到5分鐘海景
另外可能因為用左新工法，過隧道時冇乜耳鳴感


仲有一樣抵讚既係入隧道終於唔會斷WiFi，仲收得幾好


話都冇咁快，半個鐘就到長崎
為左引多啲人搭，JR九州使出渾身解數
早7日買票價55折，當日買都仲有7折

車站離酒店有一段路，放行李入Locker方便啲
之後就直接出發去長崎原爆資料館
根據轉乘天書，搭長崎本線去浦上行過去最快
另外都可以行去長崎駅前搭路面電車過去
不過而家新站比舊站向西移左100m，行遠左勁多


YC1系柴電混合車，專門服務長崎縣在來線
內裝一睇就知又係水哥設計
短短兩個鐘已經睇左佢6款作品



JR九州既電子化程度比我想象中高
除左用iPad顯示運転士時刻表之外
仲內置報站系統同列車速度紀錄儀，厲害


作為近郊列車好常見既手動開關掣
去到鄉下地方運転士唔會主動開車門，要自己禁掣


搭3分鐘就到左浦上


行去資料館沿途有路牌指示，前段係平路
後段就要行上山，路程大約15分鐘
不過全程冇瓦遮頭，小心中暑

門口有大量千羽鶴，祈求世界從此無核


資料館入口係地庫，要經過一個旋轉既斜路
牆上倒數既年份將大家由21世紀返到去1945年



呢度既觀覽券同廣島一樣都係200yen
如果想了解更多可以租導覽機



同盟國係歐洲戰場結束後發表波茨坦公告
向僅存既軸心國日本發出最後通牒，要求無條件投降
否則會面臨迅速及完全毀滅(prompt and utter destruction)
遭到無視之後，美軍對廣島進行史上第一次核攻擊
日軍高層認為「幻覺黎既啫，嚇我唔倒既」，唔相信仲有第二粒
結果美軍係廣島原爆3日後繼續行動
1945年8月9日早上11時02分，向長崎投下第二粒原子彈
再加上蘇聯趁火打劫進攻滿洲國既三重打擊下
天皇裕仁明白日軍已經無力對抗同盟國
決定係15日中午發表終戰詔書，標誌住二戰正式結束
亦因為咁，長崎成為最後一個被爆地
如果仲未投降，美軍仲有第三粒準備係19日投下



相比廣島平和紀念資料館，呢度規模細好多
但展廳展出既大型實物展品比較多，好壯觀
背景資料兩邊都差唔多，呢度唔詳述
想知多啲就睇番上次去廣島篇文：

[偷得浮生半日閒]用8日獨遊西日本 (京都‧名古屋‧奈良‧廣島)
https://lih.kg/yAsjkaX

至於長崎點解入選轟炸目標之一，去另一個景點既時候會講

講到核武，大家第一時間應該諗起鈾元素
除左學校有教之外，新聞都成日講北韓提煉濃縮鈾做核彈
廣島原子彈Little Boy裝住64kg鈾-235
就已經將爆炸中心方圓2km夷為平地
而長崎原子彈Fat Man就係第二代原子彈
裝住原子數比鈾多4粒既鈈-239，雖然重量少10倍
但釋放既能量比廣島仲要高


理論上長崎既受災情況應該比廣島嚴重
但當時機師係第一目標小倉上空投放失敗
轉去第二目標長崎既時候已經冇乜油剩，於是鳩掉
原子彈就係長崎以北3km既浦上上空爆炸
因為附近多山有地形阻檔，爆風威力減低
人口密集既長崎市區受損相對輕微，但都死左過萬人


睇完二戰日本既災劫之後就睇核武既發展史
1938年納粹德國科學家成功發現核裂變
1941年珍珠港事件發生之後，美國向軸心國宣戰
製作原子彈由一般學術研究成為終戰最高專案
促成美軍同科學界聯手秘密進行曼克頓計劃
計劃核心既實驗室主任就係天才理論物理學家 - 奧本海默
如果想了解核武發展史，我非常推薦大家睇呢套戲
我對呢套野既評價非常高，片長3個鐘內我都冇睇錶

係日本投降前，呢個實驗室總共出產左3粒原子彈
第一粒“The Gadget”用黎驗證原子彈理論同調整參數
第二同第三粒就係廣島”Little Boy”同長崎”Fat Man”

二戰後既核發展正如奧本海默同阿寶所講
人類總要重複同樣的錯誤.jpg
美國自以為獨佔核武關鍵技術可以成為世界霸主
殊不知曼克頓計劃核心成員有蘇聯間諜通風報信
令戰後蘇聯成為第二個擁有核武既國家
由於意識形態衝突，雙方為左爭龍頭就開始核軍備競賽
再加上其他國家為左自保，亦開始發展核技術
有紀錄最多既一年有超過110次核試
到冷戰末期因為核武過多，產生維護成本同安全等問題
雙方先開始係減少核試同核彈頭數目達成共識
但核武數量到而家仍然增長中，無核之路遙遙無期



核試場雖然選擇係人跡罕至既地區
但地球係圓既，幅射物質始終都會隨空氣同水流散播
最終污染鄰近城鎮，居民無辜成為核試故受害者
呢度搵左6個地區既居民講述被核幅射影響既經過
有人全家白血病，有人生畸胎等等
但政府礙於國防機密而向佢地隱瞞真相
只可以話不論美國定蘇聯，天下烏鴉一樣黑


當時七國元首加澤倫斯基齊集廣島開G7
岸田首相其中一個議題就係提倡無核武世界
正值俄烏戰爭核威嚇同核電廠意外
佢呼籲各國削減核武器並公開數量釋除疑慮
長崎新聞出左報導並且係原爆館免費派發
希望參觀人士將無核既理念傳揚出去

睇完原爆館就去埋附近既相關景點
門口行樓梯落去就係爆心地公園，面積超大
Fat Man就係碑上空500m爆炸
右邊既紅磚柱係浦上天主堂既遺壁
柱頂石像本來係白色，原爆後被薰到全黑



平和公園就係爆心地公園前少少既高地上面


呢度同廣島平和記念公園一樣都係長形對稱
平和之泉前面都有塊紀念碑，引述左一位少女既日記：

・・・・・・・・・・
のどが乾いてたまりませんでした
水にはあぶらのようなものが
一面に浮いていました
どうしても水が欲しくて
とうとうあぶらの浮いたまま飲みました

⠀⠀⠀⠀⠀⠀⠀⠀―あの日のある少女の手記から

大意係話少女係原爆之後異常口渴
雖然見到水池上面浮左一層油，但都冇理照飲
真實情況就係原爆幅射穿越人體時直接燒傷器官
所以倖存既人會感覺俾火燒，於是極度渴水
浮係水面既唔係油咁簡單，而係瀝青狀既黑雨
飲左呢啲充滿放射性物質既水，後果唔駛我多講
日本總務省官網寫呢個水池係向鬼魂獻水，祈求祝福


附近有好多其他國家贈送既平和雕像
咁啱有堆鴿飛黎飛去，都幾應景



廣場盡頭就有本地彫刻家製作既平和祈念像
呢度似乎係修學旅行同外國旅行團既必去景點
所以起碼有過百人係度影相打卡




平和祈念像後面可以離遠望到大浦天主堂
呢度落樓梯經小路行過去，路程大約5分鐘
不過我冇食早餐之餘仲出現中暑症狀，唔去了

因為想睇埋奧本海默先寫原爆資料館篇文，遲左出

做咩要咁細隻字

睇完之後其實無乜關聯