[極限挑戰第二季]用8日喪遊半個日本 (北部九州 ~~> 名古屋)

廣島炸到渣都冇，得番個原爆圓頂有啲野睇
不過附近有宮島神社，成個旅遊package 好好

長崎啲野保存得好啲，但地理偏埋一邊
仲要條新幹線通啲唔通啲，搞唔掂

睇左原爆資料館再睇埋套戲係有啲感受既

下一站去大浦天主堂，交通有啲麻煩
無論係搭路面電車定巴士都要轉一次車
行到半路見到前面巴士站有巴士準備停車
於是冇理咁多，衝左上車拍卡嘆冷氣先
預先查過呢度出發既巴士一定經長崎站，冇伏
但問題在於我唔知道呢班車既目的地係邊
所以一直留意Google Map定位，唔對路就跳車
好在有驚無險，巴士總站係市中心既中央橋


有啲乘客一落車就急急腳跑去前面站頭轉巴士
今次我就唔敢咁衝動，慢慢行過去睇清楚
點知架巴士就駛走，真係去大浦天主堂方向
不過中央橋仲有一個方法去到目的地
就係去河邊既浜町アーケード搭路面電車5號線
大約10分鐘就會到大浦天主堂站



落左車過馬路就會見到四海樓
諗住一開門就黎一定少人排隊，點知話滿座



岩崎本舗 グラバー園店 [Tabelog評分：3.24]
好在我都有後備方案，就係對出長命斜側邊
呢間舖主要係賣長崎名物之一 - 角煮饅頭
佢係由台灣刈包演變而成，都係蒸包夾肉
因為要保持急凍，所以冇得當手信帶番香港
想試既話就只可以係現場買黎食
有位坐有冷氣嘆之餘又有免費水飲，消暑一流



角煮まんじゅう <470yen>
扁平既蒸麵包夾住滷到變成既厚切五花肉
咬落去口感鬆軟，舊肉又炆得好林好入味
但食完好似陣風咁，唔係咁抵食

回復力量之後就繼續行上長命斜
盡頭就係世界遺產兼日本國寶 - 大浦天主堂
因為入場券要1000yen，裡面亦嚴禁拍攝
如果你唔係好有興趣既話，唔駛專登俾錢入去
但我今次點都要入去探一次伏


大浦天主堂係1865年建成，名銜非常多
除左係日本現存最古老既天主教建築之外
亦係享有天主教特殊地位既日本唯一宗座聖殿
教堂採用哥德式設計，樓底好高但面積唔大
陽光透過彩繪玻璃映射到教堂地下，非常靚
不過冇得影相好難形容個氣勢，想知就入黎睇一次
門口中間個聖母像係紀念信徒發現呢件事，後面會講

行完大浦天主堂就行番落山坡準備走
但我都係唔心息，去四海樓睇情況先



四海樓 [Tabelog評分：3.49]
成幢野只有5樓係接待散客，地下有𨋢上去


黎到既時候要填名落排隊紙上面，我係順位第3
店員會指示你坐低等，順便俾餐牌你睇住先
呢度係長崎名物ちゃんぽん既發源地，當然要叫
其他料理選擇比較少，價錢都唔平




唔駛5分鐘就可以入座，俾左個海景位我坐
景觀開揚得黎又唔會俾太陽曬住
不過我獨佔左張6人枱，雖然好闊落
但係望住出面排隊既人越黎越多，都幾大壓力




焼餃子 <660yen>
點心類選擇唔係好多，性價比最高就係餃子
皮薄得黎又煎得香口，咬落去爆汁
餡料係椰菜豬肉，味道唔錯



ちゃんぽん <1210yen>
除左角煮饅頭，強棒麵都係透過華人移民傳入長崎
湯底用左大量芽菜椰菜同海鮮粒煲成
所以呈現好似忌廉湯咁既奶白色
味道香濃而膠口，充滿海鮮既鮮味
麵條係特製粗麵，浸係湯一段時間仍然保持彈牙既口感
而且份量比我想像中多，食完都幾飽
之前食過褔山雅治既愛店思案橋ラーメン
我就覺得呢間環境好啲好食啲

食完就搭𨋢落2樓參觀ちゃんぽん資料館
𨋢掣同顯示燈都係用漢字，一時反應唔黎


呢個資料館介紹四海樓呢百幾年既點滴
以前係一間旅館兼中華料理餐廳，只有兩層
而家係第三代建築，20年前建成



四海樓創辦人陳平順係褔建人，1899年黎左呢度開餐廳
老闆好關心清朝留學生，見到就會問佢地"呷飯未"
但好多唔係話冇食就係食唔飽，搞到佢好憂心
於是參考故鄉褔建滷麵既製法整成呢碗麵
仲專登整到大件夾抵食，等留學生安心食飽
因為味道唔錯傳到本地人都知，但黎到唔識叫
聽到老闆成日講閩南話"呷飯"，就以為係碗麵既名
最後個個都咁叫，索性跟機叫做"ちゃんぽん"(Cham-pon)


以前用過既碗碟同餐牌，而家成為文物



鐵拳無敵 國父孫中山同日本關係密切
國民黨前身既同盟會就係由佢牽頭係東京成立
民國成立初期佢黎到長崎，華僑迎接佢去四海樓食飯

長崎hea行咗下我就走了

成個月都未完

去緊旅行，等一等

又去

懷疑你個極限挑戰係指挑戰一年去最多次旅行

火車有小黑夾到手圖

大癲

大癲

睇完展覽其實只係1點，仲有2個鐘先有得Checkin
咁就去埋天主堂隔離既哥拉巴園，入場費620yen
"哥拉巴"出自蘇格蘭商人Thomas Blake "Glover"既姓氏音譯
佢開港冇耐就黎左呢度做生意，引進大量外國新技術
例如蒸氣火車，造船同埋採礦等，令長崎迅速發展
園區大部分都係佢既住宅同相關物業，因而得名


除左哥拉巴之外，都有唔少外國人飄洋過海黎做生意
不過幕府想有效管理呢班金髮碧眼既人
就劃左市郊呢幅地俾佢地起樓住，唔好係市區行黎行去
所以附近西洋建築特別多，同外圍有好大對比
呢幢平房係哥拉巴既故居，亦係日本最古老既木造西式建築
為左致敬佢本人對日本工業現代化作出重大貢獻
所以亦名列世界遺產"九州、山口的近代化工業遺產群"之一



行扶手電梯上山頂就係舊三菱第二俱樂部遺址
係以前外國船員入港之後休息同住宿既地方
同時係成個園既制高點，遠眺長崎港同稻佐山
地下有個魚池，好多𡃁仔餵錦鯉

園入面仲有幾幢建築，全部都背山面海景色超靚
不過現場體感40度，冇耐性坐低慢慢睇




好快咁行左1個圈就黎到出口 - 長崎傳統藝能館
每年10月7-9日長崎會舉行諏訪神社秋季大祭
市內唔同地方都有唔同既祭典儀式
有啲會枱神橋原地轉，有啲就舞龍，有啲表演能劇
證明長崎係一個文化大熔爐，活動各有特色



https://youtu.be/rZosVAxX-w0

呢度都係動畫聖巡地，不過呢套野我冇印象

行完哥拉巴園就行去海邊常磐碼頭
因為第二日去完軍艦島就會搭新幹線離開長崎
最近嗰班落船後半個鐘就開出，再下一班要個半鐘後
所以驗證下係咪如Google Map所講行得切


行到路口見到有個路牌寫住去恐龍博物館要23km
如果我係自駕既話，睇到仲有咁遠就唔去


結果我15分鐘只係行左40%路，Mission Fail
睇黎冇計到等燈位既時間，垃圾Google
橫掂行到黎出島附近就走去望下


出島原本係幕府劃俾葡萄牙人做貿易既地方
但佢地係天主教徒又成日搞搞震，令幕府非常不滿
最後為左斬草除根，決定鎖國兼驅逐境內西方人
剩係留低紀錄良好既荷蘭人成為唯一西方貿易伙伴
條件就係佢地不得行出出島半步
日本商人入島都有嚴格限制，防止境外勢力滲透


出島係一個扇形人工島，靠一條橋同本土連接
明治時期城市發展填海填左三邊，變成市區一部分
島上大部分建築都係重新起過，包括條橋
所以我就冇乜興趣俾520yen入場費參觀
而且圍欄咁矮，唔入去其實都大約知係點

出島隔離就係長崎新地中華街
作為日本三大中華街歷史最悠久既一個
17世紀就有華人聚居同做生意
不過條街同橫濱比規模細好多，冇乜野好行




點解香港買熱浪會貴過日本買進口既香港製造熱浪


行完中華街就夠鐘去酒店Checkin
搭路面電車1號線去五島町再行3分鐘就到
Dormy Inn PREMIUM長崎駅前，1晚530蚊




長崎同褔岡一樣都要收宿泊稅，房價唔包
最低消費100yen一晚

酒店房既格局同我以前住過既好唔同
開左房門仲要開多道門先見到張床
呢度面積大到搵6個人黎訓都唔會迫



廁所同企缸係門口右邊，洗手盤就係左邊


酒店仲送左盒啫喱



上網速度不過不失，最起碼睇Youtube唔疾

放低個袋就行去車站Locker攞番個喼
順便去埋商場買長崎蛋糕做手信
雖然酒店個名有"長崎駅前"，但要行10分鐘先到
因為站前廣場仲整緊，搞到啲路改黎改去




安頓好一切已經差唔多5點，天色勁靚
呢個天氣上稻佐山簡直係完美
不過上次黎長崎去過，冇乜野驅使我再去多次
所以都係攤係酒店頂樓浸溫泉算




更衣室裡面有洗衣機，仲要係免費
不過時間視乎衫褲重量而改變，重啲就耐啲
我洗3日衫褲大約半個鐘，其實都幾快
乾衣每20分鐘100yen，都係非常平
總好過自助洗衣機限死兩粒鐘先攞得番啲衫


酒店有室內同露天溫泉，仲有冷泉同桑拿
露天溫泉水溫唔高，浸緊既時候有啲風吹下都幾舒服
想知多啲就睇番官網：
https://www.hotespa.net/hotels/nagasaki_eki/spa/

出番大堂有個好大既休息室
除左有按摩椅同大量漫畫之外，仲有個大窗睇風景
窗邊有個雪櫃放雪條，浸完可以攞番條食
朝早就有益力多

かみんぐ [Tabelog評分：3.59]
酒店除左近長崎站之外，基本上冇優點
想多野食多野行既話，住觀光通同中華街嗰邊比較好
呢度附近都係美食沙漠，又唔想搭車過去咁麻煩
於是係Tabelog臨時搵左呢間相對高分既餐廳
離酒店兩個街口，大約5分鐘路程
呢類家庭式餐館我一般比較抗拒，因為怕唔識溝通
而且做佢第一個客既話怕老細太熱情撩我講野


呢間餐廳既招牌菜就係長崎名物之一 - 土耳其飯
佢個名同瑞士雞翼同揚州炒飯一樣
完全同地方名無關，土耳其曾經抗議過當地冇呢樣野


トルコライス <950yen>
呢碟野非常有茶餐廳港式西餐既感覺
有沙律，茄汁意粉，咖喱飯同炸豬扒，再淋左個汁
味道幾好，豬扒炸皮薄得黎仲有啲脆口
醬汁酸酸甜甜，好夾濃味既咖喱飯同意粉



食完飯就去AMU PLAZA長崎個超級市場
呢度既物價平到嚇死人，望下支炭酸水價錢


大分有廚房大，長崎有地中海

呢兩日我好早就返到酒店，唔係因為附近冇野行
而係仲未定好Day5下晝 ~ Day7既詳細行程
所以真係諗爆我個頭


解決大部分問題之後就已經9點幾
係時候落1樓餐廳試下Dormy Inn名物 - 免費深夜拉麵
好似大學Canteen咁，同個廚講就即刻煮俾你
另外飲品機既果汁同茶都係任飲




呢碗拉麵份量唔算多，配菜只有筍同海苔碎
但味道絕對唔會輸俾人氣拉麵店，至少好食過黑亭
醬油湯底濃香得黎唔過鹹，非常好食
麵條就係曲曲地既中麵，食落彈牙清爽，同湯底好夾


食完就返上房繼續煩惱行程
Day 4完

LM Gchi