[極限挑戰第二季]用8日喪遊半個日本 (北部九州 ~~> 名古屋)

G持
出快啲唔該

10分鐘車程就黎到東九州最大交通輸紐 - 大分
係日豐本線，久大本線同豐肥本線既交匯站
去九州大部分地方都可以一程特急直達
例如博多，熊本同宮崎



大堂既木地板好似熟口熟面，唔知係邊度見過


出左閘就見到逢周末假期行駛既ぶんぶん号
呢架由水哥設計既小火車每個鐘1班
會沿著車站大樓既貼紙路軌行1圈
小朋友搭呢架野應該都幾開心



站入面都有il FORNO del MIGNON，不過都係排長龍


呢晚酒店住JR九州飯店Blossom大分
位置就係大分站上蓋，係我住過最近車站既酒店
本來訂左200蚊晚既Hotel Mystays大分，離車站10分鐘步程
不過怕落雨行過去麻煩，於是係Google Map望下其他酒店
無意中見到呢間酒店雙人房只係500蚊晚
論位置，酒店品牌定房間質素都有保證，仲有得免費退款



酒店入口係商場入面，跟住路牌行再搭𨋢上8樓大堂

水戶岡鋭治呢個名係我既遊記周不時出現
佢本來係工業設計師，慢慢涉足設計觀光列車
例如去天橋立既丹後の海，河口湖既富士山ビュー特急
全部都明顯帶有濃烈既個人風格
主要包括Logo，車型編號，木板，花紋呢4樣野
和歌山電鐵列車同貴志站都係佢設計，不過未去



因為水哥係JR九州御用設計師，所以提到佢既機率激增
我將Day2命名為水戶岡之日
係因為截至呢一刻已經睇到7樣關於佢既野：
1. 由布院之森 (博多→由布院)
2. キハ220形氣動車 (日田)
3. 豐後森機關庫博物館 (豐後森)
4. 或る列車 (由布院)
5. 815系電車 (龜川→別府)
6. 特急ソニック (別府→大分)
7. ぶんぶん号 (大分)
但估唔到酒店原來都係水哥作品之一
所以呢日我唔止睇咁簡單，仲住埋


酒店前台設計簡約，但休息區就充滿貴氣
坐係張凳度等𨋢感覺自己格調都提升左



Checkin完就轉另一部𨋢上房，大堂係和洋合璧既風格
大堂背板用左幾何圖案既類日式屏風設計
地毯同牆紙就用左暗花紋，門口仲有盞吊燈

酒店房裝修沿用大堂既水哥風格設計
木紋配上暖色配搭，營造到溫暖既感覺
廁所門印有JR大分城標誌，裡面非常新淨
頭先行到身水身汗，即刻去沖番個涼先




酒店窗對西北所以西斜勁曬
可以望到別府同別府灣海景，如果我住高啲既話


會送水既酒店就係好酒店


沖完涼咁啱睇到水星的魔女第18集生放送
當刻睇完既感覺就係大河內我DLLM



之後趁少人去樓上自助洗衣機洗哂呢幾日啲衫褲
我住過既酒店9成9都係呢款，玩熟哂
冇洗衣機既酒店就係垃圾，博多S-PERIA


洗衣+乾衣要等2個鐘，最啱出去食飯
行出酒店見到大分站門口有2隻雞同金蛋，意義不明


JR大分城係一個超大型複合商業設施，係2015年開業
集合車站，百貨公司，公園同神社(?)於一身
北口同JR博多城一樣有個大鐘，但比較復古
外觀就係仿古紅磚加現代玻璃，新潮得黎又融合到附近環境
同時都係水哥作品

らぁ麺 牛ごろ極 [Tabelog評分：3.49]
係大分站行5分鐘就會到
明明係星期日，沿途路人少到我以為入左結界



去到舖頭啱啱開門，買左食券就可以入去坐



呢度想飲水要行出位斟，有啲唔方便
自助位仲有得拎大蔥製成既自家製泡菜
就咁食怪怪地，但係加落拉麵同飯就可以增加香味



ビーフ丼セット <450yen>
等左5分鐘就黎左碗牛肉丼，賣相好靚
櫻花色既牛肉片肥瘦適中，嫩滑得黎又冇筋
酸甜既醬汁極度惹味，送飯一流


白丸らぁ麺 <780yen>
拉麵既肉係燉牛腩粒，用隻勺裝住
雖然入口即化但係得幾粒，份量少得滯
不過港紙40蚊就食到有蛋有肉兼唔係味精湯既拉麵，仲想點



牛白湯底落左唔少芝麻，聞落好香
因為有微微胡椒味減低油膩感，飲落幾清爽
細麵麵質麻麻地，雖然索湯但係唔夠彈牙
個湯又熱，所以要食快啲先唔會浸到漲哂


食完拉麵啲湯唔好嘥，將食剩既飯同泡菜加落湯度
整左一個韓式牛白湯雜炊，又係另一番風味

食完就行去隔離既中央町商店街
同頭先一樣都係舖頭多過人
沿途都幾多居酒屋，可能因為早得滯先冇人
黎到呢度我又係行Daiso，一入去就聽到廣東話



築地有壽司大，大分有廚房大


黃昏既大分好靚



九州之所以叫九州，係因為島上有9個令制國
而大分屬於豐後國，由鐮倉幕府開始就係大友家既領地
到左戰國時代，領主傳到第二十一代大友宗麟
佢積極擴大勢力範圍，將北九州六國納入統治版圖
因為宗麟同日本第一位傳教士沙勿略係好朋友
所以治內宗教自由，容易接受西方新事物
早於1551年就同西方貿易，比長崎仲要早20年
又派少年使節去歐洲見教宗，令西方知道東方有日本既存在
所到之處受到帝皇級待遇，亦帶左唔少西方機器回國
因為有咁多貢獻，所以就係駅前廣場建立雕像紀念佢
可惜佢死後幕府就推行伴天連追放令，長崎篇會詳細講解


番到車站就去商場上蓋既屋上庭園，有一個鐵道神社
鳥居前既地台有七福童子手拉手企係九州島形狀上面
象徵九州七個縣攜手維持鐵道安全，確保旅客平安
JR博多城屋上庭園有個一模一樣既

庭園另一邊就係觀景台，睇夕樣景同夜景一流
前面有對情侶霸住個超級靚位
我費事俾人燒春袋，縮係後面影就算



右邊個新式金屬三重塔叫夢かなうぶんぶん堂
係除左酒店之外車站第二高既制高點
小火車又叫ぶんぶん，究竟ぶんぶん係點解


天黑行上塔要小心啲，陰影位黑到睇唔到梯級
另外畏高者慎入，因為側邊係通窿既



上到去風景非常靚
北面望酒店同車站廣場，西面望餘暉
南面望住對情侶攬頭攬頸，DLLM




呢度返酒店唔駛落地下再轉𨋢
同一層有特別通道可以行返去大堂


收完衫入房又落番JR大分城行街
呢度大部分舖頭8點關門，7點幾開始趕緊人走
所以拿拿聲去手信舖買番幾盒交差

黎到車站又偶遇ぶんぶん号
唔開既時候原來就咁泊係度任人睇
牌上隻黑色狗仔就係阿蘇站名譽站長兼吉祥物くろちゃん
大分站大堂有好多佢既身影，不過冇影到
如果對佢好有興趣就要搭Aso Boy，成架都係







臨返酒店順便去Lawson買宵夜食
からあげクン レッド <238yen> 姐係辣味炸雞塊
味道同以前一樣，辣得黎雞肉又多汁，幾好食
耶馬溪牛乳就係大分地區限定既牛奶
雖然好飲但冇明治おいしい牛乳咁濃


又係試網速既時間，下載速度180Mbps
亦係呢個旅程當中網速最快既酒店，抵住


繼上次搵3個搞笑藝人木口木面unun下賣お椀
今次就搵3條女跳鳩舞唱鳩歌用五毛特效賣CUP NOODLES
日清班創作團隊係咪隊左草先諗到咁既野
不過又幾好睇


https://www.youtube.com/watch?v=zXVjNcfj3gc

睇埋偉大主席既傳記就訓了


Day 2完

呢間酒店值得俾多300 yen

兩個地獄連埋交通時間睇左幾耐

配服樓豬寫到咁精彩

多300蚊絕對值，住得近車站配套好，搭車行少好多路
另外頂樓仲有溫泉，住客住客可以免費浸
可以望住別府灣風景黎浸，下一篇會講

由布院去血池大約1個鐘
血池同龍卷各半個鐘
龍卷返大分大約1個鐘
前提係我查好哂班次先可以咁快，如果甩1班車就要多半個鐘

原來我打錯字 300 hkd 先啱

請問酒店名？

JR九州飯店Blossom大分

你呢次係咪5月去？
我5月尾係京都酒店都有見到nhk播習近平傳
心諗做乜鳩
以為去左中国日本特別行政區

係呀，咁都有相認
Nhk連佢以前去外國交流個Host Family都訪問到
同時又唔牽涉好多政治野，幾好睇

Day 3 - Delay No More

大分早晨，時間係朝早6點


酒店頂樓係溫泉設施CITY SPA てんくう
平日收費2300yen，但酒店住客憑房卡免費任浸
所以搵酒店唔好只係睇價錢，仲要睇配套
係可接受範圍內俾多少少，去旅行開心好多
因為出名有靚景，係國內作為日歸溫泉都幾受歡迎
前一晚上去見到勁多人，費事濃厚接觸瀨左野就唔好
而每日6:00~9:30係酒店住客專屬時段，唔對外開放
所以我專登咁早起身就係為左可以靜靜地浸

溫泉設施有3層，19樓係前台
除鞋之後拎房卡登記就可以上20樓換衫洗身
呢層既室內溫泉有塊大玻璃對住西北面
除左大分市景同別府灣之外，仲望到雲霧中既別府
泉水就係抽自地底深處既炭酸泉，浸完全身滑捋捋
行上21樓就係露天溫泉，泉質一樣不過溫度低啲
一邊思考人生，一邊吹住海風欣賞180度無邊界海景
加上天氣又好萬里無雲，呢種感覺好難忘
另外仲有桑拿同冷泉，但係就冇咁多時間試哂




庭の食卓 四季 [Tabelog評分：3.50]
除左溫泉之外，酒店早餐既評分都極高
所以我Checkin嗰陣專登課左2200yen買餐券
官網寫係酒店住客限定，外人唔清楚可唔可以Walk-in
餐廳位置係8樓前台隔離，雖然7點先開門
但係早5分鐘黎到已經排長龍



早餐係半自助形式，係和洋之中揀1個作為主食
黎到日本就當然揀和食啦

叫完餐就出左去自助區攞其他野食
常見既沙律，西式既炒蛋煙肉腸，日式醃菜味噌湯都有
主食就有大分炸雞，麻婆豆腐同埋牛丼の具
加埋都有超過20款野食，選擇都幾多





我每樣拎左少少黎試，夠熱得黎味道都唔錯
當中最好食既居然係牛丼の具，姐係牛丼既配料
肥牛既厚薄同肥瘦都適中，食落去唔會韌或者痴牙
洋蔥煮到變成醬汁既顏色，雖然淋但未至於一夾就散
而醬汁完勝包括松屋既所有日本快餐店
顏色清澈又冇雜味，剩係有香濃既牛油味同甜味
應該係煮既時候不斷飛走浮沫同油，幾花心思
以前見吉野家煮牛肉係成餅急凍肥牛車落個鍋度煮
啲嘔汁又油又一大陣油膱味，諗起想嘔


食左冇耐就上主菜，用木盒裝住非常有儀式感
港女黎到唔影夠10分鐘都唔會開始食
裡面裝左6種和式食材，例如玉子燒同燒鮭
好唔好味我唔係太記得，因為有樣野沖擊力好大
就係中上偏右既海蘊，又腥又酸唔知食緊乜



食完頭先嗰兩碟野已經飽左7成
所以整左杯酸橙汁配麵包，順便Encore牛肉


甜品真係飽到頂唔順冇食到
2200yen黎講質素算唔錯，不過就未必會食第二次

食完就返房攞行李Checkout去別府
大分站作為九州使用人次最多既非新幹線車站
繁忙時間既人潮同班次密度拍得住唔少大城市



特急ソニック有兩款列車，一架係藍色車身既883系
另一架同樣係水哥作品，係博多見過既885系
想搭中呢架車唔難，JR九州時刻表寫住"白いソニック"就係佢
橫掂搭得1個站就費事訂飛嘥Quota，坐自由席算數


列車車箱設計成機艙樣式
頭頂行李架好似飛機咁要打開道門放野
擺唔到大行李之餘又驚唔記得攞，放係前面行李架好啲



窗邊仲保留住呢架車既舊名 - KAMOME
而家個名俾左西九州新幹線既N700S



前一日睇唔到別府灣，而家補番



唔駛10分鐘就到別府，搵Locker放低行李就啟程去鐵輪

前一日已經去左比較遠既血池同龍卷地獄
呢朝就去埋地獄巡禮其餘5個，全部都係鐵輪地區
互相之間距離都係幾十米，可以順路行哂
搭巴士既話就去別府站西口既のりば③
雖然每架巴士都去到，但途經路線唔同車程都有分別





我對巴士既印象向來都唔好，因為會Delay
今次都唔例外遲左5分鐘先到海地獄前落車
一落車轉右行上個長命斜就係鬼石坊主同海地獄


別府地獄巡禮之三 - 鬼石坊主地獄
入到去我有一種返到家鄉既感覺
因為裡面全部人都係講緊廣東話，好似去左公園晨運咁
見到導遊支旗仔，原來係食得招積既團友



血池特色係顏色，龍卷特色係間歇泉
鬼石坊主既特色就係有幾個會BluBluBlu既泥漿池
開始明白點解啲人話唔駛去哂



後面有個瘋狂噴蒸氣既石堆，起左個朵叫做鬼之高鼾
雖然話有98分貝，但其實同鬧市行街既音量差唔多
啲聲有少少似大排檔炒爐開火



朝早先浸完溫泉，加上趕路，唔浸了

別府地獄巡禮之四 - 海地獄
鬼石坊主實在太無聊，留左10分鐘就走去隔離海地獄


門口側邊有間賣地獄名物極樂饅頭
係用右邊溫泉蒸氣爐蒸出黎既豆沙餡小饅頭
因為外形有點嘔心再加上聽人講好甜，不了


海地獄個打卡牌放到冇雷公咁遠，遠處出煙嗰個先係


行行下見到前面垃圾桶出煙以為熱到自燃
原來係因為蒸氣太勁攻埋入坑渠口



穿過一個好靚既物產商店之後就係海地獄
同血池一樣，因為地底岩層含有豐富既硫酸亞鐵(FeSO4)
所以湧泉就係Tiffany Blue既顏色，港女至愛



夏天黎呢度既人要有啲心理準備，唔好行咁近
因為感覺同入左桑拿房冇乜分別，好難抖氣
持續高溫濕蒸兼臭蛋味既多重感官攻擊，個人呆下呆下咁
繞池一周我已經有少少中暑，虧佬慎入




池邊吊左個籃烚緊溫泉蛋，每隻100yen
不過頭先個早餐有排都未落格，食唔落


池側邊有條樓梯通上物產商店2樓既觀景台
呢個位影過去海地獄靚得黎又避到蒸氣，涼爽好多

呢度仲有個展覽廳介紹別府地獄歷史同溫泉小知識
又掛左唔少舊相，最重要係有冷氣歎可以消陣暑



早係1300年前，鐵輪地區就有文獻記載為"地獄"
因為獨特既風光吸引唔少遊人過黎留下紀錄
到左近代，九州開始舖設鐵路，遊客出行更方便
海地獄既創始人睇到呢度觀光資源既商機
係1910年買左呢塊地，成為第一個係度插旗既商家
佢向每位黎參觀既人收入場費，結果賺到Fat Fat
呢種地獄開發觀光模式吸引唔少商家爭相仿效
乜叉地獄如同雨後春荀開到四圍都係，但又各有特色
就成為而家別府地獄既雛型



海地獄聲名大噪再加上唔同地獄既全國性宣傳
別府成為知名既溫泉鄉，遊客數量激增
一般既人力車唔足以應付陡峭既山坡同觀光客交通需求
油屋雄八睇到商機，1928年係別府設立亀の井巴士
除左公共運輸之外，同年增設地獄巡禮觀光巴士
首創以少女車掌做導遊介紹唔同既地獄，大獲好評
而家都仲開緊，就係之前提過既別府地獄めぐりコース




溫泉小知識呢個區域做得幾好
想知答案就拉開下面塊板，一睇就知俾小朋友玩


日本有溫泉法定義何謂溫泉，亦有嚴格既分類
別府因為鄰近活火山而且地質複雜
可以係10種泉質之中搵到其中7種，算係世間少有
炭酸泉既話頭先浸左，不過位置係大分
剩番既放射同含碘泉可以係有馬同白子温泉搵到


立山同長崎既雲仙同都有類似既地獄風景
不過別府呢邊明顯識做生意好多，交通又相對方便


行完去Cafe買地獄蒸布甸就走人

架Copen都幾型棍


5個地獄本來預左2個鐘黎行
但鬼石坊主同海地獄加埋都只係用左45分鐘
提早完行程冇乜野，但係車站等半個鐘車就好嘥時間
所以我挑戰早一班JR離開，用半個鐘去埋剩番既地獄
位置全部都係呢條地獄めぐり通隔離




別府地獄巡禮之五 - かまど地獄


呢個地獄有6個池，同譚仔過橋米線一樣乜都有
血池有，噴蒸氣有，海池有，BluBluBlu都有
不過全部都好細，總括黎講冇乜特色
好多人浸足湯同埋排隊買地獄蒸氣蒸出黎既食物
全部都係韓國人黎，不了