[極限挑戰第二季]用8日喪遊半個日本 (北部九州 ~~> 名古屋)

食完沿海邊行就會到カモンワーフ，隔離就係唐戶碼頭
頭先係門司港站海旁搭船過黎就會係度上岸



中途睇左一陣馬騮表演，都幾多女


下一站去THE OUTLETS 北九州，係スペースワールド站隔離
最平就係搭巴土去下關站搭山陽本線去小倉，再轉鹿兒島本線
搭船返門司港轉JR都得，不過天氣唔好似乎好大浪
唐戶有幾個巴士站月台，其中5號去下關站班次最密，每個鐘至少10班車
我一行到去就有車黎，唔駛10分鐘就到站，車費220yen




下關係JR九州同JR西日本既在來線境界站
屬於前者管理既路線就只有下關~小倉呢段
當中會經過第一條穿越關門海峽既關門鐵道隧道


搭15分鐘就到小倉
不過撞正鹿兒島本線派彩，延誤12分鐘

去スペースワールド只可以搭各停列車，5個站就到
部分快速列車都會飛站，上車前去Google Map查班次穩陣啲
沿途指示非常清晰，出站之後行上橋就會到Outlet門口
呢個上年4月先開幕既Outlet由Aeon營運，好新好靚
舖頭面積大得黎種類又多，行起上黎好舒服
最特別係隔離仲有個Aeon Mall，兩邊加埋有超過250間舖
我出左名行路睇野快，唔計食飯都行左3個鐘




我見好似想落雨咁，就行左去Aeon Mall避下風頭
途中見到特急ソニック行過



首先去左超級市場補給，飲品又平野食又平
呢度有褔島縣白桃果汁，唔怕幅射既話其實都幾好飲




仲有寵物店可以睇到唔同種類既動物
貓貓好得意呀



水星的魔女模型搶到要抽選先買到，仲要限量
唔想等既話買番兩個女主角返去砌住先

走馬看花，人生跑馬燈咩

行完Aeon Mall就返去Outlet嗰邊既Food Forest食飯
其實嗰度都有個超大美食廣場，不過睇唔啱
呢個場係我去過咁多個之中最大，起碼有300個位
就算係周末12點幾呢啲繁忙時間都好易搵到位坐
而且有十幾間餐廳俾你選擇，總有一間啱你口味



伽喱本舗呢度都有分店
冇本店情意結既話不妨過黎食順便行街


我前兩次住博多都係揀巴士總站對面既博多CROOM
但今次真係貴到揀唔落手，成千蚊一晚
行番酒店途中都會經過一間極多人排隊既餐廳
就算去到深夜都仲係人山人海，所以冇機會試到
今次撞正呢度有分店，終於可以一嚐究竟
極味や 八幡店 [Tabelog評分：3.06]
應該因為新開先咁低評分，博多嗰間有3.54分


呢度主打漢堡扒同牛扒，前者比較出名
肉既份量有細中大選擇，仲有唔同Set揀
俾完錢就可以沿檔口側邊攞餐



極味や薪火焼ハンバーグ Mサイズ + Cセット <1738yen>
C餐有飯，沙律，洋蔥湯同凍飲，我就揀左飲可樂
沙律得好少醬，味道一般
洋蔥湯非常濃好好飲，但得幾啖唔夠喉


呢舊黑毛和牛漢堡扒事前用柴火燒過，外面望落熟左
實際上同吉列牛一樣裡面都係Fucking Raw
所以要放落鐵板度煎，再夾細舊去熱石度煎到你想要既熟度
不過現場冷氣比較勁，食到最後唔夠熱變左生生地
雖然可以換石但我嫌麻煩，和牛生少少應該食唔死我既
不過小心啲油會彈到成身都係，最好放個盤去遠啲



攞肉既時候有幾款醬可以揀黎點肉，不過店員話最多揀2種
所以就揀左甘ダレ同わさび醤油
甘ダレ同Pepper Lunch既蜜糖醬汁有啲似，甜甜地好惹味
醬油就麻麻地，點完同冇點冇乜分別，唔係太推薦
唔點汁就咁食都品嘗到香甜既肉汁，而且唔鞋
如果未食過既話都幾推薦黎試下，起碼唔駛排長龍先
煎漢堡扒之前廚師會將舊生肉快速拋黎拋去拍走啲空氣
個廣場又應聲，所以食食下會聽到嗰邊啪啪啪，有啲老尷

想問樓主 覺得飛日本嗰程值唔值比錢買U First

LM
又行軍

食完飯天氣轉晴，開始幫自己同朋友掃貨




Adidas本身做緊照價7折，下晝限時再9折
計埋出示護照退稅姐係原價56折，抵到爛


行完就搭番火車去小倉轉車返博多


我黎既時候撞正G7，山陽新幹線沿線所有車站Locker停用
所以都見到幾多遊客頭望住個告示頭痕
但係日本想搵Locker寄存行李又唔係咁難既
大商場都會有，不過就要當日營業時間內攞番
想寄存過夜都係用ecbo cloak方便啲


頭先係Outlet已經上左全國Pass官網訂新幹線飛
黎到小倉搵番指定席券売機出票就得，慳番好多時間
如果用MCO換飛既話就一定要去車站先劃到位


係等候室睇緊電視既時候見到澤連斯基飛左去廣島參加G7

頭先係博多搭成個鐘特急先到小倉
但新幹線只係15分鐘車程，今次搭N700系Green Car



さくら係全國Pass山陽新幹線路段最速達列車，好受外國遊客歡迎
尤其係Green Car只佔8卡車既半卡，得6行24個位
繁忙時間或者臨上車先訂都可能會滿座



雖然Green Car同指定席都係一行2-2座位排列
但張凳厚好多，坐落明顯覺得包住個人咁，好舒服


走廊/窗邊手枕可以拉張細枱出黎同埋調較斜度
不過後面有人坐緊就無謂搞到人



中間手枕位前面有電掣可以差電，側邊有個掣可以開閱讀燈



之後兩日既天氣就係咁，萬里無雲

舊牛好靚

U-first賣點在於寄艙行李會出先，趕時間既話絕對值得俾
所以先可以落機半個鐘內出到機場
但如果你Handcarry既話加錢坐前面就算

欣賞巴打除咗飲飲食食都會睇歷史文化野

留名，見到你啲相好懷念
部分我都去過尤其是個福岡山口縣交界

返到博多，對面月台停左部去博多南既列車
好多人唔知博多以南除左九州新幹線之外
其實仲有條山陽新幹線延線 - 博多南線
本來只係通去當時附近仲係荒地既新幹線車廠
隨住嗰頭發展成住宅區，交通不便成為當地居民既關注點
佢地希望JR利用呢條回送線接載佢地來往市區
幾經爭取，1990年就係車廠隔離開設左博多南站
去博多既時間由巴士大約1個鐘縮短至8分鐘
雖然用新幹線列車，車費就以在來線特急計算，只係330yen
因為係JR西日本營運，揸JR九州Pass就唔包
不過車費都唔貴，想搭就豪俾佢啦



返酒店放低哂啲戰利品之後就繼續出發
係站出面見到一架FUKUOKA OPEN TOP BUS
路線會經過褔岡塔，大濠公園，博多港等等市內景點
不過價錢有啲貴，想去自己搭車會平好多


下一站去LaLaport福岡睇高達，都係搭JR
係月台見到傳說中既いさぶろう・しんぺい
一睇外觀就知又係水哥既傑作
本來行駛熊本~人吉~吉松，同SL人吉重疊區間
所以因為同樣理由而調左去其他地方
而家逢星期六會變成來往小倉工場鉄道ランド既專用列車
有消息指今年秋天會結束營運，咁啱送到佢殯


搭1個站鹿兒島本線普通列車就會到竹下站


出左車站跟住指示，沿住路軌隔離條路行就會到LaLaport
佢所寫既徒步9分鐘實測係準既，前提要有我對摩打腳
一般正常人慢慢行應該要15分鐘
但係沿途冇遮冇檔，夏天小心中暑



西鐵巴士廠有部自動運轉巴士試驗中

行到死死下終於見到個門口，但係高達呢



睇平面圖原來係商場另外一邊
九州啲商場真係好大，行極都未到盡頭



橫濱有元祖，東京獨角獸，上海有自由


行左5分鐘之後終於見到ν Gundam
成就解鎖：✓ 日本三大高達立像朝聖達成




<博多ν>
就咁睇相既話，我以為橫濱嗰隻係最高
而實際上佢係最矮先真，得18m高
因為個高台同埋附近空曠先產生視覺錯覺
最高既反而係褔岡呢一隻，由腳底到砲頂總長24.8m
高橫濱高達足足6m，重量達到驚人既80噸


不過官網話因為維修，日間所有演出休止
於是就有架同隻高達撞色既吊臂車係佢下面
現場香港人比率接近一半，壓倒性超越日本人同其他地方遊客
所以毒撚想搵人幫手影相絕對唔難，好易聽到廣東話
行埋去問"可摸耳幫我影張相"就得

好在夜間表演繼續，離第一場7點仲有個半鐘
一於慢慢行陣商場再搵野食
呢度有車睇，有位坐，有Jump Shop
乜野年齡層黎行都啱




超級市場凍櫃整左個西鐵巴士車頭，引左好多小朋友黎玩
明明巴士同超市風馬牛不相及，做出黎既效果就唔突兀
家長係入貨同時小朋友又有野搞，下次記得又會再黎
宣傳效果仲大過你登報紙頭條同搵明星代言
香港啲商場同廣告商學下野啦，呢啲先係吸客手段黎架嘛


LaLaport 3樓劃左一半係餐飲區域
美食廣場佔地面積應該比北九州Outlet仲要大
有21個檔口同11間可供入座既餐廳俾你揀
平時嗰啲你可以話冇野啱食，但呢度就真係難啲
逐間經過望下餐牌再考慮都未遲，大把位坐




除左一般座位，仲有為親子而設既こあがり席
張枱比較矮，所以小朋友食野鍾意坐又得企又得
仲因為似居酒屋既榻榻米座位，啲阿叔都走左入去坐


呢間騒豆花係台灣開過黎，但係個名改得咁衰既

宍道湖しじみ中華蕎麦 琥珀 ららぽーと福岡店 [Tabelog評分：3.47]
呢間拉麵舖看似平平無奇，實質暗藏玄機
東京本店2019年開業，2020年開始登上Tabelog拉麵百名店
現時評分3.98，暫列全國拉麵排行榜第3，東京第2
位置偏遠得黎間舖得5個位，想食睇怕難過登天
呢度就環境舒適，食券機買完拎個震蛋就可以埋位等
味道肯定不及本店，但黎到實在冇藉口唔試下


特製宍道湖しじみ中華蕎麦 <1280yen>
呢碗拉麵雖然賣相一般，好似坑渠水咁既顏色
但佢既鹽味湯底出色到我雙眼射出眼部火焰炮
飲落就好似濃縮版既清酒煮蜆湯咁，充滿貝類既鮮甜
配合埋帶微辣既紫洋蔥碎，清爽得黎帶點刺激感
第一次食拉麵飲湯飲上癮，名店果然係名店
但除左記得普通叉燒同慢煮叉燒都好滑，細麵好彈牙之外
其他食材既味道都冇印象，因為湯底既衝擊力太強
亦都係成個拉麵唯一美中不足既地方



俾頭先碗拉麵刺激左食慾，趁未夠鐘又食多一間
呢次我冇睇評分，剩係以排隊人數黎決定我食乜
因為掛住搵，冇影到間舖外觀

わっぱ定食堂 ららぽーと福岡店 [Tabelog評分：3.32]
呢間餐廳係田中田式旗下定食品牌，有3間分店
有兩間入選Tabelog全國定食百名店，姐係差呢間
佢旗下仲有個居酒屋品牌，又係入選全國居酒屋百名店
單睇呢個CV，應該冇乜可能唔好食
事實係我打文查資料先知呢間野咁猛料

豚汁定食 とんかつ <980yen>
之前我以為松のや食吉列豬排定食已經好平
點知以同等價錢，呢度既豬扒同豚汁份量多過佢之餘，仲要有沙律


炸豬扒外皮薄得黎鬆化，而且好多肉汁
肉質鬆軟得黎又唔會有鞋既感覺，好食過松のや好多



呢度既定食可以揀兩款湯：博多肉吸い或者豚汁
前者碗湯既豚肉份量仲多過碗飯，我怕飲唔哂先唔揀
不過後者都不惶多讓，料仲多過湯
一般豚汁有既野佢都有，仲加左冬菇粒同魔芋粒
係一碗中華風既豚肉雜菜湯，味道好柔和
而且冇松のや咁鹹，飲完喉嚨好舒服

食完落番去高達，啱啱好開始夜間表演
台場嗰隻剩係識NTRNTD，郁下裝甲轉下白燈紅燈咁
但褔岡呢隻新啲，仲識得郁頭舉手郁手指
下面部吊臂車好似冇違和感




之後每半個鐘都會有其他演出
不過睇完橫濱嗰隻之後，呢隻算得係乜
都係早啲返酒店執行李預習行程兼補眠好過
最後影埋呢張相就結束呢日行程


由朝早起身到而家已經超過13個鐘，已經謝緊皮
所以回程就唔原路行番去竹下站搭JR
而係去商場西區既室內巴士總站等巴士
呢度有車可以去到博多站，天神同埋福岡空港
落左機夾啱時間都可以黎左呢度先



來往博多站架巴士路線號碼叫L，L for LaLaport
平日得好少班次，所以都係靠行去竹下站
假日大約1個鐘4班車，會比較方便
車費220yen，車程大約半個鐘
落車地點係博多站近新幹線既筑紫口



執哂啲野入喼之後就飲番罐Jack Daniels可樂 <210yen>
飲落去第一啖有好重既Whiskey香味
而回甘既可樂味將酒既苦味完全中和，變得好易入口
但呢種感覺令我回憶起細個體弱多病飲過既咳藥水，有輕微反胃感
好彩唔係好大罐，慢慢飲都飲得哂既


Day 1完

樓主近排係咪peak season?

一黎啦，二黎我諗住打好哂由布院先一次過出

辛苦了
play hard work hard

Lm

幾時有得睇別府地獄攻略

lm 支持