[極限挑戰第二季]用8日喪遊半個日本 (北部九州 ~~> 名古屋)

落船之後就解散，本來想去四海樓試另外啲麵
點知是日公休，唯有去左博物館先



去到博物館VR房咁啱金毛仔係度當更
於是又好好服務幫我戴好部機
畫面係幾年前用無人機係30號樓拍攝既360度影片
清楚紀錄每層既間隔同附近既環境
如果想睇得清楚啲就肯定會扭黎扭去
出面有個主題區擺左幾張係軍艦島取景既電影海報
包括真人版進擊的巨人呢套垃圾大作
有個架掛住好多衫可以玩角色扮演



行完就搭巴士返長崎站食飯



雖然有好多餐廳，但係都睇唔啱
最後去M記食新出既炙り醤油風ダブル肉厚ビーフ <850yen>
醬汁惹味得黎肉都幾厚幾多汁，好食過香港
麥樂雞就比較鞋，香港好食啲




シャカチキ <190yen>
Shake Shake雞扒同麥炸雞質感一樣，肉質好嫩滑
加埋微辣既炸粉好香口

食完M記就代表要離開長崎
第二部分北九州3日半大長征正式完結
之後就係行程最終章 - 重遊舊地系列
剩番既日子大部分時間都係去番以前去過既地方
所以就唔會重覆景點介紹，重點講交通安排
同埋我都覺得寫得太耐，係時候加速完左佢

剩番呢半日都係用黎搭車去600km外既岡山
計埋轉車時間差唔多要4個鐘，非常漫長


第一程搭かもめ去武雄溫泉

第二程我就唔係搭對面月台既リレーかもめ
因為諗住抽時間去車站大堂既カイロ堂買和牛便當
點知3點就賣哂，撲個空



雙星4047係JR九州搵水哥設計既最新型觀光列車
主打文化體驗，所以車程長停站多
當地攤販會係列車停靠時係月台售賣當地特產
乘客有足夠時間落車消費，順便振興地區經濟
我呢啲急人就冇乜興趣，搭哂全程要差唔多3個鐘
上午班次由武雄溫泉開出
駛經有明海沿岸既長崎本線去長崎
下午班次就由長崎經大村灣沿岸番武雄溫泉
另外要留意運行日期，因為唔係每日都開


リレーかもめ係銜接新幹線既特急列車
所以係武雄溫泉站一律都係10號月台停車
方便乘客可以直接係同一站台行過對面轉車


我劃左15分鐘後開出既みどり就唔係銜接班次
所以要去番另一邊在來線2號月台上車
呢度可以望番去新幹線嗰邊

783系既みどり係4卡編成，來往博多～佐世保
係早岐站同ハウステンボス併結，變成8卡駛去博多



Green Car內裝明顯翻新過，冇787系咁爛
淺木色加深色地氈設計感覺非常溫暖
椅背極厚，坐得好舒服




不過我唔明點解要有咁多張枱


みどりGreen Car後面係ハウステンボス既車頭
兩邊車頭互相接通，可以行去對方車箱




博多落車既時候見到特急ゆふ
訂唔到由布院之森既話，搭呢架都去到由布院
不過近期旅客客實在太多，增結到5卡編成都滿足唔到需求
搞到JR九州係官網出聲明叫大家要提早訂指定席

第三程車有10分鐘時間轉乘さくら
走左既話就要等多1個鐘，所以要行快少少
一係就搭こだま搭到懷疑人生


本來諗住攞大喼先訂特大行李指定席
而家剩係用黎擺細喼，所以夠位挨後又唔會阻住人
不過呢程さくら Green Car係博多已經坐滿
揸全國Pass唔早啲訂位都真係會出事


頭先係博物館買左兩本全彩色印刷既軍艦島相集
內容非常豐富，值得買黎收藏


係新幹線睇下書睇下Netflix好快就過左兩個鐘
係窗邊見到一大堆國鐵車既時候
就代表差唔多到岡山，要準備落車
佢地現役既時候你老豆分分鐘未出世

中華そば こびき [Tabelog評分：3.59]
呢間拉麵店係車站東口既岡山駅前商店街附近
上次食完之後念念不忘，所以一落車就衝去食
係4年後既同一日，我再次重臨呢度
6點半黎到啱啱好唔駛排隊


拉麵得兩種口味 - 煮干醬油同濃厚味噌
並盛同大盛價錢一樣，大食人士褔音
另外呢度仲攞埋2021年米芝蓮推介，所以多左人幫襯
舖面裝修冇變過，師父都係同一個人



味玉濃厚味噌ラーメン [並盛] <950yen>
呢碗拉麵雖然貴左200yen，但紙水跌左計番港紙仲平左
賣相味道同上次黎食係一模一樣
師父咁多年黎都仲保持到水準，值得一讚
湯底同以往一樣都係濃味到爆，但我接受到
食開清淡既人可能會頂唔順要瘋狂飲水
加埋芽菜同粟米一齊食仲會帶有微微清甜味
自家製太麵食到最後都保持到彈牙既口感
叉燒同味玉蛋就正常味道，冇評語

之後去今晚住既東橫Inn西口広場，330蚊1晚
因為我係熊本先訂呢間酒店，最平得番佢


一入到房要行過3m長既走廊先見到張床
因為側邊係𨋢同廁所，所以先咁樣設計
我訂既時候要求高層房，所以冇乜聽到𨋢聲





東橫Inn其中一個賣點就係包早餐，係地下大堂食
不過我今次就無緣享用喇


間房望出去就係岡山站西口

舊式東橫Inn有個致命缺點，就係Wi-Fi滿天飛
前一日係佐賀都見到每間房都有一個SSID，呢度都一樣
網速慢到上連登都有啲疾



點解日本啲電視台晚晚都有鐵路節目SP


之後搞埋少少行程細節就好早訓左
因為Day 6係成個行程最癲既一日...

Day 5完

飛得咁快突然

博多仲可以食明太子
小倉市區冇點行過，唔知有乜野食
如果係門司港既話可以試下燒咖喱

Day 6
呢日既行程我用左最多心機黎Plan
因為出發前未訂酒店，所以諗左好多方案
搞到好似玩桃鐵咁，未去到都唔知有乜野搞
本來Day5晚想住姫路，但係酒店太貴先揀左岡山
咁就觸發到第一個隱藏行程 - 去高松食烏冬

大部分高質烏冬店都係好早開，賣完就收檔
之前都係下午先到高松，選擇得番好少
所以今次趁住係岡山，去高松搭一程JR就到
就抱住去築地豐洲既心態早起身，5點出發搭頭班車


マリンライナー係來往岡山～高松既快速列車，車程大約1個鐘
平時會併結一架雙層列車作為指定席同Green Car
其餘車箱就係普通席，唔駛收特急料金
可能因為太少客，頭班車只係全普通席兩卡編成
揸Green Pass黎搭蝕左


兒島係列車駛去四國前最後一個站
同時係JR西日本同JR四國既交界站
兩邊既運轉士同車掌都會係度換人再開車


之後就會經瀨戶大橋下層駛去四國
咁啱撞正日出，好多人影相


估唔到黎到高松會睇到併結
マリンライナー變番正常4卡編成駛番去岡山

我去食既烏冬店係花園站附近，要搭琴電
最近既轉乘站係JR高松站200m外既高松築港站
轉乘時間只有短短10分鐘，仲要計埋等燈位既時間
所以個個一出站就高速狂奔，我都跑埋一份
好彩3分鐘就到左，嚇死


琴電係私鐵，所以要攞番張IC Card出黎入閘
長尾線搭2個站就到，車費200yen



係花園站行5分鐘就會到烏冬店
手打十段 うどんバカ一代 [Tabelog評分：3.79]
高松作為讚岐烏冬既發源地，周圍都係烏冬店
最好食嗰堆因為用山水黎製作，冇雷公咁遠
呢間雖然唔係最Top，但都係烏冬百名店之一
入到去啲簽名板多到貼滿舖面四邊橫樑咁滯
咁多人黎過朝聖，我相信質素有保證



而家先朝早7點，呢度已經坐滿咁滯
以鄉下地方既人流黎講係好誇張
點餐方法同丸龜製麵一樣，叫完烏冬夾天婦羅再俾錢


釜バターうどん 小 <530yen>
之前有Blogger講過呢度既烏冬份量超級誇張
以我所見，小既1玉仲多過丸龜食既大
以早餐份量黎講其實都幾多
我叫左呢度自創既招牌牛油烏冬
上枱既時候烏冬面有塊牛油，仲灑左啲黑椒
後面塊腐皮係我自己加既，冇湯食麻麻地
打埋隻蛋上去就可以趁熱撈勻



無論係外觀定味道都出奇地有意粉既感覺
烏冬既質感係我食過最彈牙，好難嚼斷
牛油香氣加滑蛋汁食落非常順口，越食越香
唯一唔好就係最後會食到好滯，飽到上頸

走既時候點餐條隊已經排到出門口，好彩早黎
之後去番花園站原路返岡山



呢程マリンライナー雖然有Green Car
但係同頭先去程一樣得10分鐘轉乘
根本趕唔切去售票機攞飛，所以坐番普通席算數
隔離就係寢台特急サンライズ瀬戸，有幸搭過


去到岡山睇到南風3號黃色麵包超人編成



衝到返酒店已經9點，冇早餐食
所以上房攞行李Checkout就搭新幹線去姫路
山陽新幹線有5個列車種類
ひかり同こだま係姫路必停
其餘3款のぞみ みずほ さくら就係部分停靠
所以上車前要留意顯示屏寫既停車站
如果唔係會搭到去新神戶先落到車
係呢個時間，得こだま啱我搭

對面月台係N700S編成既のぞみ1


呢班こだま係JR西日本500系8卡編成列車
圓柱尖頭既流線形設計加上輕量化鋁合金車身
1997年面世時創出當時商業營運表定速度世界紀錄
亦係山陽新幹線第一架以300km/h營運既列車




不過呢架車既缺點就係好窄，1行得4個位
而且車身向內彎，坐窗邊有壓迫感
之後既700系同N700系轉用方形車身，闊落好多
而且冇Green Car，呢日蝕左3次

如果搭最快既のぞみ みずほ さくら既話
搭1個站20分鐘就到姫路
但係ひかり同こだま要停多個站待避，就要半個鐘
係車站北口行15分鐘就會到姫路城內城既入口 - 櫻門橋
要上天守就仲有漫長既路



6年冇黎姫路城，手機都換左幾代
但我既拍攝角度咁多年黎始終不變

適逢平成中村座姫路城公演，係三之丸廣場搭左個台
結果就阻住我影相


行過左廣場就係收費區域
同熊本城唔同，姫路城建成之後就冇經歷過戰火
即使二戰末期姫路大空襲亦離奇地冇事
天守閣仍然保持400年前既外貌同內裝
係日本目前保存得最好既城池，冇之一
所以作為日本第一名城兼國寶兼第一個世界遺產
入場費1000yen絕對唔過分，裡面行到你傻



參觀姫路城記住唔好攞住行李黎行，你會後悔
閘口有Locker可以用，仲平過車站


適逢姫路城登陸成為世界遺產30周年
張入場券都特別設計過，幾值得收藏
橫掂多50yen就可以去埋好古園，唔差在俾埋

去天守閣之前去左西之丸先
行呢類國寶建築一定要除鞋先入得
到場有工作人員俾個膠袋你入住對鞋黎行
所以最好都著番對襪先好上黎



如果你地認為呢度冇野好行，咁就錯喇
西之丸城郭係姫路城西面既防禦工事，全長250m
沿途放左唔少介紹姫路城既展板
天守閣反而冇乜野睇



文獻記載姫路城係1346年建成，城主曾經多次易手
到戰國時期，黑田家開始擴建內城同城下町
第13代城主黑田孝高係個奇才，城府極深
1580年將姫路城獻俾當時既霸主秀吉，換取其信任
佢同時係吉利支丹大名，禁教時公開放棄信仰
關原之戰後德川家康既女婿池田輝政立大功
所以獲封姫路城，成為第18代城主
任內大規模擴建，而家見到既內城就係當時既成果



去到後面有間房專門介紹德川家康既孫女 - 千姬
7歲時因為政治聯姻，嫁左俾秀吉個仔秀賴
12年後家康統一天下，發動大坂之役鏟除舊勢力
千姬被德川家武將救走，秀賴就命喪大坂城
之後被改嫁戰國名將本多忠勝個孫忠刻
佢老豆係第21代城主，自然黎到姫路城
西之丸同三之丸就係用千姬既嫁妝建成
化妝櫓係西之丸其中一段，作為千姫既住所
呢度可以遙望姫路城天守，環境唔錯




但坎坷既日子仍然持續，兒子夭折老公早死
因為太過劏豬凳，係30歲時就決定削髮為尼不問世事

西之丸冇回頭路，行出黎就係上天守閣既路


姫路城因為佔地非常龐大，仲有大量防禦工事
冇人有把握可以打得下呢個城，所以一直以黎相安無事
要上天守閣首先要經過一連串異常曲折既山路
明明望到但就行極都未到，好似迷宮咁
城牆側邊既窿係用黎俾士兵放暗箭同射擊
條路咁長，未上到去已經變箭豬





有部分石級太危險，所以加裝左木梯
啲老人家都行得幾辛苦，大家量力而為


就算行到天守閣下面，石垣接近垂直都爬唔到上去
上面淋屎掟石既話，下面既敵軍都係死路一條

入天守都係要除鞋入落膠袋咁行
梯級接近垂直上落，女士著裙一定會派褔利
老人家膝頭唔好亦要好小心，上左去未必落得番黎
至於我呢類高人就要小心頂到條樑



因為天守閣樓面面積好大，頂層都唔會好迫
上到黎可以一眼望哂成個姫路既景色



行番落2樓有影片介紹天守閣建築結構
如果有興趣想知多啲可以去睇下

呢個模型係根據天守閣真實結構製作而成
中間以貫穿天守六層既東大柱同西大柱作為心柱
其他部分就以榫卯接駁，一口釘都冇落
地震既時候可以容許少幅度變形同吸收震蕩
就算經歷1995年阪神7.3級大地震，依然絲毫無損




姫路城係歷史上被譽為不戰不燒之城
除左頭先講過既防禦工事充足之外
所有城牆表面都塗上防火既白灰漿，所以極少發生火警
再加上用灰色既瓦片裝飾，就有"白鷺城"呢個花名



行番落門口會見到唔同時期既鯱
明治時期係人手雕刻，魚鱗有層次表情有氣勢
昭和時代開始用機器打磨，魚頭比例失衡
平成嗰條尾整到椰子樹咁，魚鱗是旦刻個U字就算
可以話係一代不如一代

lm