[偽鐵膠佛誕出遊] 長氣多圖 白銀袖湊進擊九州之旅

前言
今次係咁岩有frd去九州所以亂入部分日程
而呢個frd係第一次去九州，準備俾我賣豬仔

今次既旅伴 (らしい

我已經好多年無去九州 唔計上次係博多滯在3個鐘
九州呢幾年變化都唔細，除左天災既影響仍然好深遠之外
就係武廢末期多左條西九新幹線，不過長崎就唔再去住啦

不過唔知點解我手痕買左成田入高松出，都唔係九州既機場
但所謂條條大道通群馬，睇過我之前兩個遊記都知我有幾暴力
咁計計下數都開左張JR全國PASS，不過唔會洗到好盡

行程
無行程好似無咩人睇，所以寫定D劇透下大家


過去遊記

頂又手快出左post

序章 其實Skyliner是最快的

1. 起程


唔知點解等等下車果陣見到架673就好自然咁上左去


去到香港站咁自然就搭機鐵啦
寫呢篇遊記既時候終於有返市區預辦登機
或者下次可以試下


為左買枝水入左呢間智撚便利店
要用信用卡俾500蚊deposit先入去
然後想要咩直接拿就得，全程有cam望住你
出閘就會自動退返未洗d錢，成個過程好不安


今次都係幫襯大種黑衣之選HK Express
UO 650 香港 14:00 - 東京(成田) 19:30
個Gate又係行到好撚遠
我又last minute就快close先check in
所以又係急急腳


終於解除晒所有防疫既入境限制，入境都係填返紙仔
個app又唔會快d既，而且我本passport scan唔到


淨係食左個早餐就搭飛機
點都搵d野填下肚
但又唔想食咁多，點都留返今晚
所以已經訂左港式咖喱魚蛋
廿蚊有5粒，應該都平過美食車掛
個味道口感可以接受啦
另外咖啡都還可以，跟住就係等落機囉

2. 有羽田邊個想飛成田


班機19:05就落地，比定則早成差唔多半個鐘
因為揀左較前排既走廊位所以又係使出神速出閘既時候
但個gate都有d距離，成500幾米
不過超好行，5分鐘就跑到去入境位，可能因為我好興奮
雖然話就話無晒防疫限制，但都係會量體溫
如果發燒都可能會有麻煩既，所以都要小心d


無晒防疫限制後加埋三四個字已經出閘
果d咩排四五個鐘已經變返都市傳說



無咩事都係搭電梯落樓下搭車走人


JR旅客中心，咁叫唔叫好多人我唔係好清楚
但我就一定唔會想排，又唔係趕住第二朝開PASS
點都躝史gut路先算啦


JR售票果邊都唔少人排隊買成田特快，主要鬼佬啦
始終要搭去新宿渋谷既話，佢一定係最方便
慢d又好疏d都好，其實佢地就唔係太介意

3. 搭左Skyliner未？

去上野當然係搭Skyliner，點解？




買Skyliner特急飛，最快方法係拍卡入左閘落月台先買
你睇下日本人幾咁熟手，先唔會同班外國人係出面癲


大批乘客在月台等候Skyliner既來臨
個月台都好窄


遲左來，結果遲左3分鐘先開車


咁今次係去九州，就係櫃桶底掘返張九州既SUGOCA出來用
雖然好多年無用但相信都仲用到既
因為我旅日歷並不足十年，而呢D IC卡都係十年無用先會作廢


Skyliner快既其中一個原因就係佢最高運行速度可達160km/h
但其實都係成田湯川附近果段先去到呢個速度
愈接近都心佢就行得愈慢


到左京成上野，出返來8點半到
唔講廢話好肚餓啦，今晚既目標十分明確，出發！

Lm

交通痴線佬

4. 去叫鴨。蔥呀！蔥呀！蔥呀！


京成上野可以轉地鐵，不過都有一定距離


行返上野站既通道都有d特色
又唔洗點搵路，直行就係


上返地面就向御徒町方向進發
雖然係平日但夜晚氣氛好熱鬧


20:45 來到了好出名既鴨to蔥
目測成廿幾個人排隊


不過都係買食劵先


呢度特色之一係每月既蔥
可以三揀二，不過因為我追加了所以唔洗揀

btw 去到九點零鐘就會截龍




雖然條隊好多人但唔洗一粒鐘就有得坐低喇
入面哥仔識講國語所以更受台灣人歡迎吧 (利申我PTH唔合格，聽唔到佢地講咩)


終於有飯開喇！真係有飯架，因為叫左個親子丼
食落都唔錯，但都係肚餓先叫埋，唔需要特登去試


講返主角，湯底純正都好正，水準OK，基本上就無伏
好少食鴨肉，啖啖肉，對我黎講算新鮮，蔥就絕對有驚喜
加加埋埋係一種特別既味道
間野訪問難度屬超低，黃金地段有晚市沒有定休，值得加分
要講缺點可能就係樓上好嘈，因為樓上就係山手線



最後都要鳴謝京成電鉄提供我一個美好既晚餐

らーめん 鴨to葱 (3.74)
https://tabelog.com/tokyo/A1311/A131101/13210392/

5. 借宿一宵 - 湯島


食完麵其實都無咩好做
係附近鳩行下



夜闌人靜既阿美橫，感覺好似上水新康街

日本過晒8點大部分野都閂門架啦，東京除左最熱鬧果d都唔例外
係香港既服務業同零售業先咁痴線


又行返去京成上野果到
今次見到正門


行埋去隔離湯島，進入文京區既範圍
途中條路好多人拉客，麻撚死煩


自武廢後日本酒店貴左唔少，東京更為顯著
所以今晚搵左呢間capsule hotel借宿一宵
都要3千幾一晚，位置再好d就仲貴
好耐無住過呢類住宿，已經唔記得個流程係點



沖完涼就去訓覺，不過都唔係好訓得著
空氣好唔流通下，個枕頭又勁硬

anyway養精苗銳準備第二日大長征

序章 其實Skyliner是最快的
完

而家日本啲野都好早閂

Day 1 (前半)
始動之章 東海道特急制霸完璧究極拉麵

劇情大要：
今日會先去換返JR PASS
跟住就會出發一日搭到去九州！
但係已經book左間拉麵 (咩話？拉麵都要book？)
所以會食埋先起行，超級期待

1. 旭日初昇，朝氣正清新


日本明明比香港快一個鐘
但我每次去到日本都會勁早就彈起身
呢D叫做返鄉下就會自動出現既原始之力，好似係

依家6:30，即係香港先5點半
既然都醒鬼左就check out啦
以後無咩必要都唔會再訓呢d老土capsule
但上年係大宮住過果隻新潮d既我覺得ok，可以考慮

住既地方係湯島，可以行返去御徒町/上野
本身亦都有個地鐵千代田線可以前往都心唔同地方
可以直到皇居、乃木坂、明治神宮前，都算方便


不過既然一場來到，當然要參觀一下呢到既名勝啦
況且朝頭早唔係好多野可以做，最適合就係去下神社寺廟
我最早紀錄就係清晨5點半就去參拜成田山新勝寺


發現自己用左側門入左湯島天滿宮
有小小唔好意思


最多遊客去既有太宰府天滿宮、北野天滿宮等
我個人覺得呢d都係攝時間既景點
東京眾多天滿宮之中最出名之一就係呢到，相信跟位於東京大學所在既文京區都有好大關係，東京大學係唔少日本人既人生夢想


天滿宮就係祈求學問既地方 (雖然大部人信眾都只係求學業)
所拜既神名就係平安時代既菅原道真，稱為天滿天神，通稱天神




呢個天滿宮好細，兩三個字就參拜完
沿正門往御茶之水方向行返落斜


文京區都有居民巴士，三條路線都係100YEN
隻吉祥物好QQ下




由於見唔到實物所以係官網搵張圖
真係好QQ，想轉行做巴膠了

居民巴士將會係本遊記後面既部分展現其驚人既力量


好快就行返落去lu


前面有間cafe，有幾個食客係到排隊
以為有咩咁把炮，只係等7點開門咁咋
咁既然有早餐食我都唔差在lu

2. 銀牙之旅


由湯島行到去御茶之水
就會見到橫跨神田川既聖橋

神田川係荒川水系既一級河川
由三鷹市既井之頭池開始，穿過東京都心至到兩國橋附近與隅田川會合
為東京都最具代表性既河川之一


呢到近年成為左動畫大師新海誠最新作品
「鈴芽之旅」既主要場景之一

關門師草太係東京既住所就係位於御茶之水，為左成為教畜而努力
而鈴芽就背負了關門既宿命，跟化成了椅子既草太碌粟米到東京

所以望落都有人係慕名而來朝聖既樣子

地鐵丸之內線與JR中央線

丸之內線係山手圈內中最多地上區間既地鐵線
(總共3段，後樂園站甚至係高架車站)
所以呢到都可以見到有零星龍友係度影下相

當時條巨大蚯蚓就係從呢條丸之內線隧道出沒
然後覆蓋成個東京都心
最後鈴芽成功解決條蚯蚓，跌左落河係皇居地下水道搵到了「門」


JR御茶之水站，好似仲翻新工程緊
東京既中央線有快速(紅色)同埋緩行(黃色)之分
從秋葉原以東搭去新宿方向，轉車就呢個站最方便，對面線就係

御茶之水係文京區既地方，不過JR御茶之水站隔住神田川，實際上位於千代田區
所以文京區係無JR車站既，幾乎全域都被山手線圍繞住
至於丸之內線既御茶之水站所在位置就與站名相符喇

跟住就係搭去新宿換JR PASS了

3. JAPAN RAIL PASS


呢到就係SJK．新宿站，源源不絕既人流寫入了健力士世界紀錄
btw相中所站位置屬新宿區
但甲州街道對面Busta同埋新南口就已經係渋谷區


新宿可以換PASS既旅客中心有兩個，早D開門既係新南口
8點開門，係度排隊既遊客唔算多
主要都係鬼佬啦，佢地真係最鍾意就係住新宿渋谷



去完洗手間就返出來排，前面大概5組客人
排隊果陣有位識多國語言既女性職員會詢問你做咩
不過佢見到我本護照就講賡東話了，小尷


今次試下用官方網站買PASS，普通車7天
雖然貴D，但可以試下玩佢個予約系統
由布院之森、海幸山幸都無咩難度，唔洗俾九州食1000YEN一張
最後仲成功劃到SL人吉，開心


好快就換到pass，無咩難度
職員問我要唔要出返預約左既指定席，唔洗喇我自己換啦
至於點解會走去SJK換PASS
其中一個原因係東京站條隊好長，當中可能有拼命趕新幹線既旅客
就廢事同佢地迫啦


今次算係PASS加價之前玩返次
因為年頭都宣布左今年會加價，而個加幅都相當驚人
來年開始應該會玩多D唔同既野
巴士呀、船呀、內陸機呀，甚至踩單單、行路JJ

接住落來就係搭車去食拉麵lu！

4. 踊り子


開PASS第一件事就係搭返中央線返東京站


第一個搭既特急係Odoriko
10:00係東京出發


Odoriko (踊り子)
名稱來自川端康成短篇小說伊豆の踊子
雖然依家都俾新型特急Saphir Odoriko搶晒風頭
但普通既Odoriko都好多人搭，因為得佢可以去到修善寺




真鶴附近


拉麵愛好者應該就估到係湯河原下車
小田原與熱海之間既停車站


湯河原都係溫泉區，不過好多都要搭入去奧湯河原
但湯河原最出名當然唔係溫泉，而係拉麵
呢到基本上都係人煙稀少既地方了


呢到都有箱根登山巴士同埋佢對家伊豆箱根巴士
以前都有路線前往箱根，但依家cut左

5. 飯田商店

山長水遠(?)來到湯河原
當然就係為左一嘗日本最高評價既拉麵：飯田商店


呢間野已經變左完全預約制
星期二12:00可以book跟住星期四至星期一既位
而且需要俾390YEN手數料
同book由布院之森差唔多，都係10分鐘左右就會爆晒




站隔離就有飯田商店....既土產店


今日天氣幾好
沿住馬路行一兩個字就去到目的地


目的地就係前面
呢個感覺有d似去大圍徑口村搵野食


客人們已經到晒，等待12:00既時段
要報到左先


佢部食劵機係收卡既好先進

時間到就會安排所有食客入座


鹽味雲吞拉麵，睇相都覺得高汁
佢既自家製麵條個感覺係日本好少見，我會直頭話好唔日本，硬要說就介乎瀨粉同金邊粉之間 (???) 所以日本人既話會覺得好特別
呢碗湯底係雞湯，好香好清


去到先發現個個食客都連食
一碗湯麵一碗沾麵
係我先咁柒叫左個店主推介野菜拌飯......
不過又OK喎！似豉椒排骨飯走排骨
攝取野菜係好重要既


完食
呢碗係咪我食過最好食既拉麵
我覺得唔係，不過已經食唔返
而且呢間既價格都相當進取，亦有點浮誇
overall絕對係值得一試既
但會唔會想再戰，暫時無特別想，睇緣分啦

らぁ麺 飯田商店 (4.10)
https://tabelog.com/kanagawa/A1410/A141002/14038776/

食完呢碗拉麵後就真係真係大長征了
Day 1仲有好長既路要走.......

始動之章 東海道特急制霸完璧究極拉麵
完

第一次見拉麵都要book咁癲

行軍咁

唔係咁我反而更難安排行程去食
以前要7點去拿籌，但係11點先第一軍
前一晚要住小田原熱海先搞得掂
仲要中間幾個鐘真係發坳臭

腸字都知樓豬係死毒J
嘩拉面真係很正式