[極限挑戰第二季]用8日喪遊半個日本 (北部九州 ~~> 名古屋)

Day 7
前一晚原來長野有脅持案，極不安


咁多日都未抽到時間食松屋或者松のや
今次就黎番第一次獨遊食過既松のや名駅西口店



得朝ロースかつ定食 豚汁変更 <680yen>
呢個定食係早餐時段減100yen，但份量冇少到
炸豬扒有番一定厚度，味道亦唔輸蝕名店
價錢只係港幣36蚊，係香港點搵




豚汁係我遊日必食料理之一
係日本要食菜好多時都係凍冰冰既沙律菜
而呢碗湯熱辣辣之餘仲充滿膳食纖維
有紅蘿蔔薯仔牛蒡豆腐等等，又好味

朝早本來只係去彥根城
搭新幹線轉在來線唔駛1個鐘就到
但係遲出門口硬係覺得好蝕底咁
所以前一晚研究Google Map睇下有乜野可行路線
結果砌到1個要搭5程車先到既終極鐵膠方案

1) 8:01 8:02 - 8:28 8:31名鐵犬山線 特急 <名鉄名古屋→犬山遊園>
名鐵名古屋站有著全日本最複雜既月台，冇之一
兩條路軌要應付南北方向12條直通運轉路線
仲有超過20款列車種類，次次黎都好頭痛
雖然列車到站之前，相應經由路線既燈牌會著
但係我就睇唔明點解一次會著咁多盞


大家應該覺得日本鐵路好準時，但名鐵就係例外
以平日為例，朝早8-9北行月台要處理45班車
就算落得切客都冇可能上得切
所以繁忙時間冇可能跟到時間表開車，肯定遲
唔想上錯車既話就望向月台燈牌上面既LED板
會列明列車種類同停站資訊，睇啱先好上車


部分連結劃位車箱既列車會標明"一部特別車"
只要上番一般車箱就唔駛補錢搭


呢程特急只係遲左1分鐘，算係少有
因為我上次星期六下晝搭都遲成5分鐘
呢架車停站少，最高時速可以上到差唔多100km/h


不過中途經常要停車待避
最後都要遲3分鐘先到犬山遊園站，車費620yen

出站轉右就係跨越愛知縣同岐阜縣交界既犬山橋
下面就係木曾川，橋上可以遠眺犬山城
不過呢日天氣唔好，臨時取消左唔去



過左橋就係岐阜縣各務原市
前少少就係名鐵犬山線總站新鵜沼站



隔離有一條天橋可以駁去隔離既JR鵜沼站
因為係JR站，張全國Pass又用得番

鵜沼係高山線車站，因為全單線所以班次唔密
我因為去廁所以走左8:59班車，要等多半個鐘




2) 9:32 - 9:44 JR高山線 普通 <鵜沼→美濃太田>
本來我係搭9:57開出既特急ひだ4號去岐阜
但係搭得1個站12分鐘唔係咁過癮
橫掂夠時間就搭反方向去前一個站美濃太田上車
沿途可以睇到木曾川景色，好天一定更加靚




特急ひだ有好多款編成，每班停車位都唔同
所以月台整左個表教你等車

3) 9:48 - 10:09 JR高山線 特急ひだ <美濃太田→岐阜>
今年3.18ダイヤ改正之後
全線特急ひだ都改用HC85系柴電混能列車
2022年先開始營運，所以非常新



Green Car座位同普通席一樣都係2-2排列
除左張凳厚啲同有腳托之外，基本上冇分別



不過張凳同N700S一樣貼背，所以都幾好坐


話到明柴電混能，列車有齊柴油同電池兩個引擎
起動既時候會兩個開哂，加速快之餘又靜啲
剎車又會儲電，用番係起動同室內照明，減少排放
車門上面塊LCD會顯示引擎狀態，等你知道幾時油幾時電
總括黎講比一般氣動車靜好多，感覺唔錯



鵜沼～岐阜呢段高山線既競爭對手係名鐵各務原線
不過論車費同車程都係JR贏哂

4) 10:12 - 10:48 10:49 JR東海道本線 特急しらさぎ <岐阜→米原>
岐阜係高山線既南部終點，連接東海道本線
特急ひだ會係呢度反方向駛入東海道本線東行去名古屋
情況同JR九州特急Sonic係小倉站轉方向一樣
而我就係向西行，所以要轉乘特急しらさぎ



681系同之前搭既281系はるか係同年代出品
Green Car座位同樣係1-2編排
內裝差唔多，都係非常有年代感
但係坐前排個BB嘈住哂，好唔舒服



岐阜下一站係大垣，可以轉乘養老鐵路
我對呢條鐵好有興趣，遲下去養老先



搭多一陣就會去到関ヶ原
影響日本歷史既關原之戰就係附近開打
豐臣秀吉病重前指定6歲既獨子秀賴為繼承人
並要求家臣輔助秀賴繼續統治天下
佢病逝後，家臣之首德川家康暗地裡違反規定
以石田三成為首既大名對此不滿，矛盾加劇
最後決定班馬起兵打佢老母
經過幾場零星衝突後，雙方各就各位係關原決一死戰
兩邊都精銳盡出，務求盡快打敗對方
最終以家康為首既東軍取得勝利，家康成為天下霸主
之後就創立德川幕府，開始江戶時代

5) 10:50 - 10:55 JR東海道本線 新快速 <米原→彥根>
到左米原本有2分鐘轉乘時間
但係しらさぎDelay搞到得番1分鐘
好在Green Car係正樓梯邊，一開門我就狗衝跑去對面月台
成功係新快速開出前10秒達陣


しらさぎ我DLLM
其實9分鐘後都有車，我唔駛跑到咁


搭5分鐘就會到彥根，閘口大大隻彥根喵歡迎你



講到彥根就一定要提彥根藩第一代藩主 - 井伊直政
家道中落既佢自小流離失所，四處移居
14歲既時候係德川家康面前自薦加入麾下
因為文武雙全忠心不二，又積極招攬盟友
係眾家臣之中最深得家康信任既一位，冇之一
佢既實力被天下霸主信長同秀吉認同
秀吉曾經多次拉攏佢都被拒絕，當時佢只係27歲
關原之戰中佢係東軍主將之一，戰績彪炳
戰後家康將佢改封到石田三成既舊地 - 彥根藩佐和山城
係籌建彥根城途中，因為關原之戰舊傷口復發而病逝
終年只係41歲，所以車站西口放左個像紀念佢


黎到已經11點，所以行15分鐘去夢京橋食飯先


近江肉せんなり亭 伽羅 [Tabelog評分：3.58]
彥根所在既滋賀縣係日本三大和牛 - 近江牛既產地
伽羅就係彥根其中一間食近江牛壽喜燒既名店
但係前幾個月先食過人形町今半同蕃YORONIKU
我相信呢度冇可能超越到呢兩間壽喜燒天花板
況且Lunch食一個御膳都要5500yen，好貴
所以今次我就唔揀呢一間

比内地鶏 ほっこりや [Tabelog評分：3.70]
最終我揀番5年前黎過既呢間餐廳
評分比伽羅更高，未開門就已經要排隊


入座前要先除鞋，放入門口既舊式鞋櫃
鎖匙就係一塊有特別刻度既木板
每個號碼櫃都唔同，幾特別



店員安排我坐地下吧枱，可以離遠望到廚房
裝修新舊交融，都幾有特色



午餐主食只有親子丼同拉麵
另外仲有布甸，串燒同酒等等
本來想叫個乜都有既レディーズセット (Ladies Set)
不過男人老狗叫呢個Set有啲怕醜，冇叫到




ねぎま <528yen>
串燒就係紅色布簾隔離個炭爐度燒
雖然好近但感覺唔到任何熱力，抽風做得幾好
因為用備長炭黎燒，所以有炭香味
比內地雞皮燒到勁脆，雞肉又好彈牙
夾埋大蔥一齊食香口又多汁

比内地鶏の親子丼 ラーメンハーフサイズ <2156yen>
上次黎食只係食左親子丼，意猶未盡
今次就試埋午餐限定既親子丼拉麵Set
拉麵可以揀Half同Full，我就揀Half


親子丼味道冇乜改變，都係咁好食
炭燒過既雞配合多汁滑嫩既滑蛋一齊食
非常有蛋香味同炭香味
不過今次略嫌調味過重，蛋漿鹹左少少



拉麵無論係湯底味道定麵質都同Dormy Inn極度相似
雞叉燒係比內地雞胸製成，彈牙又唔鞋


沙律菜好新鮮，用胡麻醬撈乜都好食


夢プリン <440yen>
呢杯布甸係我再次光臨既主要原因
敲開表面層焦糖就會聞到好香奶味
挖落去質地好似豆腐花咁實淨
食落去非常軟滑，慢慢係舌心溶化
微苦既焦糖正好中和左布甸既奶香味
食落唔會好滯，食多個都仲得



師父一次過睇4個爐，手法非常純熟
由我點餐到食完佢隻手都冇停過

長野單野終於發現同樓主係差唔多日子去九州

食飽就去參觀彥根城，有好多個入口
我就揀左離夢京橋最近既大手門
入城券800yen，包埋附屬庭園玄宮園
我今次會去埋博物館，所以盛惠1200yen



登城既路又長又斜，又要兜黎兜去
落雨既話我未必想行上去



彥根城係井伊直政個仔直勝修建
天守位處琵琶湖東面平原既金龜山
附近係關西來往北陸同關東地區既必經之路
所以自古係兵家必爭之地，戰略意義重大
而家康改封直政黎呢度仲有一個重要原因
就係信得過佢，監視豐臣秀賴等西軍殘餘勢力
因為要趕工，建材大部分取自近江周邊既舊城
所以保留左江戶時期前既建築風格
而家同姫路城犬山城一樣，並列國寶五城
仲係日本世界遺產候補名單之一，預計2027年表決

彥根城天守閣都係要除鞋放入袋先行得
條樓梯好低，要小心撼頭


以前天守入口係附櫓同多聞櫓
因為耐震程度不足所以封閉
我預期未來呢幾年都行唔到


天守閣面積唔大，好快就可以上到頂樓
望出去就係琵琶湖，好似準備落雨




彥根城天守國寶指定書


相比上樓梯，落樓梯要更加小心
如果唔係差錯腳真係會碌落兩層樓

出城既時候撞正落雨要避一陣
我既表情就同隻彥根喵一樣


之後就經表門山道去彥根城博物館
門口有架彥根喵配色既K Car




博物館既展品大部分出自80年代既考古發現
當中有大量井伊家既歷代收藏
家康係本能寺之變後趁亂攻佔甲斐國全境
直政亦積極招攬武田家舊臣加入陣營
最終將佢地代代相傳既赤備軍團收入旗下
被後世稱為井伊赤備隊，係戰場上所向披靡
直政本人就戴住一個巨形金色兔耳既紅色頭盔
古代日本人好矮，要靠呢啲野樹立威信
所到之處血流成河，有"赤鬼"呢個稱號
自此就成為井伊家家主每次出征既指定服飾
彥根喵個頭盔典故就係咁樣黎


其餘展品都係我冇乜興趣既字畫同能劇相關藝術品
睇埋個內庭園就走

行番出博物館門口就見到勁多人睇彥根喵表演
不過隻野係走廊行黎行去，完全唔知佢做緊乜




睇左一陣就夠鐘番彥根站搭車
呢度雖然有巴士搭，但係班次極疏
所以都係用15分鐘行番去好過
途中仲見到彥根喵石像




去到米原就搭細Aこだま返名古屋

落車已經3點，去唔切本來想去既豐田博物館
所以就行次選方案 - 磁浮·鐵道館
搭あおなみ線去總站就到，車費360yen


大約25分鐘就到總站金城ふ頭
跟住路牌行2分鐘就會到磁浮·鐵道館，門票1000yen



磁浮·鐵道館作為JR東海旗下既博物館
感覺好型格，入到大堂首先會見到3架劃時代列車


第一架係1948年製造既C62蒸氣機關車
行駛東海道本線特急つばめ
以129km/h刷新當時狹軌蒸氣火車時速紀錄



第二架係1994年製造既300X試驗新幹線
以443km/h刷新當時電氣化列車時速世界紀錄
所得數據用黎製作後續車型700系同N700系


第三架係1995年製造既MLX01-1磁浮試驗車
以581km/h刷新當時陸上列車時速世界紀錄
而家既紀錄就由中央新幹線L0系取代
2015年係山梨試驗線創出603km/h




磁浮列車側邊係超導線圈
透過軌道兩邊相反磁力將列車浮起
從而係冇軌道摩擦既情況下高速向前行駛
L0系都係用同一方式行駛

3架列車後面就係通去另一個車庫
左邊係東海道新幹線歷年黎所有用車
由右至左係0系，100系，300系同700系
全部都開放車箱，可以行入去睇
500系係JR西日本設計所以唔放係度
屋外展示有N700系，但係出面落雨冇去到


東海道新幹線啟用初期，最高時速只係200km/h
來往東京同新大阪最快要4個鐘
所以0系同100系列車都設有食堂車
食物主要係容易翻熱既咖喱飯或者冷盤
隨住車程減少同遊客出行模式改變
300系開始就轉去提高乘客舒適度
食堂車亦取消，想食野就要係車站買便當



新幹線既維護主要靠Dr.Yellow
除左檢測路軌情況，天花都裝左鏡頭監測電纜
呢架係以0系改造既922型，已經退役
現時運行緊既係以700系改造既923型



右邊同後面就係一堆國鐵時代東海地區既列車
我就唔係太熟，冇點睇過

地下兩旁既展板主要講下鐵路小知識
日本大部分在來線都係用1067mm窄軌
好處係成本低同埋容易係曲折既山路舖設
壞處就係列車重心高，高速行駛會好唔穩定
所以新幹線就改用1435mm標準軌，提升最高時速
泡菜同祖國既在來線同高鐵係同一軌距
所以做少量改善工程就可以將高鐵駛入普通火車站
日本就要係窄軌外面起多條軌解決
秋田同山形新幹線就係其中既例子


日本係最早利用自動化系統處理票務事宜
1960年MARS-1系統上線
駅員可以透過終端為旅客預訂指定席
因為係中央處理，唔會發生超買或者重複訂票問題
時至今日已經發展到MARS-505，功能多左好多
除左係各JR公司既中央票務平台之外
亦支援多種票務操作，增加便利性
全國Pass，ekinet，e5489，Cyberstation，車站售票機等等都係用佢



大月既磁浮展示中心可以體驗真正既磁浮列車
不過遊客要搭近乎冇可能，因為要抽籤
呢度就整左個模擬車箱俾你感受下
好似4DX咁架車會震窗外會郁咁
同埋真係會感覺到有轆同冇轆既分別

東海道新幹線貫通東京名古屋大阪三大都市
一直以黎都係日本經濟命脈之一
繁忙時間最密可以開到3分鐘1班，密過地鐵
但係路線鄰近富士山，一旦爆發可大可小
再加上近年極端天氣越黎越頻繁
前幾日打風停駛1日就有超過30萬人受影響
所以中央政府諗過延伸北陸新幹線去大阪呢個後備方案
不過之前提過既西九州新幹線就係反面教材
呢條都係差唔多，下年年頭先通到去敦賀
預計2046年先起到去京都，抱埋孫都未起到去大阪

第三個後備方案就掌握係JR東海手上
由國鐵分拆開始就著手研究磁浮列車相關技術
係2008年將中央新幹線計劃提交中央審議
2014年正式動工興建品川至名古屋段
大部分路段都係隧道，環評同地區壓力比較細
而且路線取道最短距離，直接貫穿山脈
預計車程只需要40分鐘，比現時快超過1倍

而家唯一既阻力就係冇のぞみ停站既靜岡縣
知事川勝平太話隧道會令大井川水系地下水流失
影響當地農作物收成，要求JR東海解決先可以掘
令本來2027年通車既時間無限期押後
展板最尾明顯新整左個Mon方便改日子，陰工



2樓就係關於東海道本線同新幹線既歷史同發展
有講丹那隧道，整備新幹線同新幹線列車研發
呢度唔講咁多喇，上網自己跟Keyword搵





呢度有小賣部可以買到新幹線超硬雪糕
細字標明呢度買冇車上面咁硬


磁浮·鐵道館行左差唔多2個鐘
呢度比京都同大宮少人，靜靜地睇幾正
不過就冇乜特別野好買

回程就返名古屋排隊食拉麵
又見到一大堆修學旅行團旅遊巴


麺家 獅子丸 [Tabelog評分：3.74]
拉麵舖係名古屋站北面新幹線橋底
開門前20分鐘黎到，前面排左20入


結果我1個人都要排成粒鐘
點餐方法同松屋一樣，禁完食券先入座
老細真識食，剩係請女員工


ぜいたく盛り <600yen>
呢碟配料會根據廚師當日食材而定
我去嗰期可能蛋貴，得幾塊八爪魚同煙三文魚片
不過食落唔腥，嚼嚼下都幾過癮
煙鴨胸同燒牛肉調味啱啱好，鹹香得黎好惹味


伊勢海老らぁめん <1000yen>
行程規劃初期諗住可以即日來回伊勢
但係要搭埋しまかぜ既話難度過大，最終放棄
所以就叫左呢度既名物伊勢海老拉麵當去左
湯底有好濃既蝦味，少少黏口
因為用打泡機攪過，所以入口好幼滑
細麵用粗粒小麥製成，所以食落有獨特既香氣
筷子前端有螺旋紋，容易夾起麵條



ローストビーフ丼 <680yen>
之前睇過食評話份量偏少
所以我都單點左一個燒牛肉丼，肉質唔錯
個燒肉汁簡直畫龍點精，加落鞋底都好好味
配埋隻溫泉蛋一齊撈飯，啱啱好飽


食完就返酒店執喼，準備第二日返歸了

Day 7完

咁揀chur 去個旅行

Day 8
雖然呢日下午5點機，但我會好早去到機場
首先就係名古屋市區食最後一餐
上次去左つばめパン&Milk食小倉多士
今次就揀間再高分啲既

コーヒーハウス かこ 花車本店 [Tabelog評分：3.73]
呢間餐廳係巷仔裡面，離酒店10分鐘路程
係名古屋站附近既Tabelog Cafe百名店之一
呢日係星期六，未到8點已經排長龍
因為裡面比較少位，可能等成粒鐘先到
所以果斷放棄


KAKO 柳橋店 [Tabelog評分：3.66]
我當然有第二個選擇，就係隔離街口既分店
舖面大啲環境又好啲，餐牌都好接近
而且都係Cafe百名店，雖然多人但至少有位坐




同之前嗰間一樣，叫杯野飲就可以加錢叫多士
不過飲品選擇得咖啡，紅茶，奶同果汁



カフェオレ (ICE) <600yen>
黎Cafe冇理由飲紅茶奶果汁咁搞笑
即使我飲咖啡好易肚痛，但都叫左杯咖啡歐蕾
可能落左好多奶，飲落唔係好苦
不過我唔識品評咖啡，好難俾到意見
壺裡面裝住糖漿，可以加落杯咖啡
另外仲送左杯蔬菜汁，野菜生活咁既味


シャンティールージュスペシャル <+400yen>
多士黎到既時候店員服務好好
主動向我講解上面加左乜野配料
除左多士面搽左牛油，加左紅豆蓉同忌廉之外
仲有4款果醬：奇異果，橙，士多啤梨，柚子
多士同香港嘉頓方包差唔多，略嫌薄左少少
而酸甜既果醬中和左忌廉既油膩感
配合埋微甜既紅豆同鹹鹹地既牛油一齊食，非常好味
當中最好味係橙，香味最濃

食完就行番酒店，中途經過柳橋中央市場
除左有海產賣，仲有乾貨同生果，類似陽春版既築地




呢間舖叫魚柳


之後就Checkout，攞埋行李出發去機場
呢度去中部國際機場最快既方法就係搭名鐵μSKY
大約半個鐘一班，班次都算幾密
因為全車指定席，每程除左基本車費890yen之外
仲要買埋價值360yen特別車兩券，姐係劃位票
大家可以好似我咁臨上車係售票機買
或者上官網劃位，俾完錢收到確認E-mail就可以



μSKY係特別車，所以係中間月台上車


搭JR經常要衝上車搶行李架，呢度唔駛
因為每節車箱前後加埋有4個行李架，唔駛爭



列車最高時速可以去到120km/h
但之前講過窄軌高速行駛會唔穩定
所以架車Chok到痴線


中部機場同關西機場都係人工島
前者離陸地好近，過海唔駛2分鐘


列車準時到站，車程只係28分鐘
因為同客運大樓共構，可以推車仔出閘

中部機場有兩個客運大樓，我係T2上機
但係要搵地方放行李就只可以去T1
比較過Locker同人工櫃位之後，我選擇後者
因為不論行李大小都係收每件500yen
大Locker反而要800yen，仲要得好少




放完行李就去Aeon Mall常滑
逢星期日呢度會有免費穿梭巴士，每個鐘1班
不過呢日就冇，所以要搭名鐵係りんくう常滑落車
除左Track 1既μSKY，特急同準急都可以到機場
雖然唔駛補錢，但俾多360yen搭係舒服好多


去りんくう常滑唔可以搭μSKY同特急
因為會飛站，所以只可以搭準急
迎面而黎就係頭先搭既名鐵2000系μSKY列車

一落車就會見到超大既Aeon Mall




除左Aeon Style之外
呢度仲有好多唔同類型既舖頭，總有一樣啱你行




我就走左去寵物店睇小布偶同狗狗




近Aeon Style有條食街
放左一隻超級大招財貓，記住黎打卡