[極限挑戰第二季]用8日喪遊半個日本 (北部九州 ~~> 名古屋)

Day 2 - 水戶岡之日

前一晚一早返左酒店，所以好多時間研究張床
可能因為左邊俾人訓得多，所以冇乜彈力
轉左去右邊訓再加上酒精影響，呢日滿血復活
一起身開電視就係岸田帶尹錫悅去平和公園獻花
所以當日廣島交通接近停頓，RIP


酒店Checkout之後行程正式進入第二階段
北九州3日半大長征
不過我Day3就會返黎博多，無謂攞咁多行李去咁遠
所以就用ecbo cloak寄存個大喼去サイバック博多駅前店
間舖離車站同酒店都好近，仲係24小時寄存取回，好方便
本來想擺車站Locker，但G7封哂都冇辦法


博多站既牛角包名店il FORNO del MIGNON未到8點已經排長龍
係就係好食，但其實唔值得排咁耐隊去買
想試就去APM美食廣場，價錢差唔多兼且長期冇人



博多附近唔係太多特色早餐，通常係Cafe同麵包舖
本來諗住去はかた天乃 KITTE 博多店 [Tabelog評分：3.52]
疫情前帶過屋企人黎食晚飯，高質得黎味道都唔錯
但早餐價錢實在貴得滯，唔值得食



係博多站地底行左個圈發現到早餐救星 - M記
用App落單既方法同香港差唔多，俾左錢就等叫號碼攞餐



マックグリドル ソーセージエッグ セット <540yen>


紙飲管？負皮


食過豬柳強McGriddles之後返唔到轉頭，今次Encore
呢間M記可能因為少客啲，個包賣相靚過上次
甜甜地既楓糖Pancake加上鹹香既芝士同柳強
一大啖咬落去非常滿足，味道冇得輸

食完仲有大把時間，繼續係車站入面行下
博多名物除左豚骨拉麵之外，仲有明太子
元祖博多めんたい重呢間餐廳有唔少Youtuber推介過
最近係博多站搞期間限定外賣店，未開門已經排哂隊


廣島開G7搞到全國保安級別提升
山陽新幹線區域所有Locker同垃圾桶都停用



揸全國Pass既好處就係可以隨意進出車站
我走左去新幹線閘內既候車室坐到夠鐘
見到難得一見既東海道新幹線派彩



臨開車15分鐘就過閘去番JR九州嗰邊
月台勁多人等緊，應該都係搭由布院之森



對面泊左架時代的眼淚 - 885系，由水哥設計
之前作為長崎本線特急かもめ既主力列車
西九州新幹線啟用之後個名送左俾人
部分變成リレーかもめ連接博多~武雄溫泉
部分就變成特急ソニック行日豐本線

希望今個星期出到，好忙

最終比原定時間誤點3分鐘先黎到由布院
車頭係博多影左，所以影埋車身Logo就立即衝出站食飯


由布まぶし 心 駅前支店 [Tabelog評分：3.56]
呢間餐廳可以話係由布院必食，冇之一
位置就係站前巴士總站既松本清樓上，好易搵
本店要行多20分鐘，過到去實排哂隊，不了
雖然係星期日，但黎到已經即刻有位



店員俾左個對住窗既靚位俾我，諗住有野望下
點知呢個鄉下地方5分鐘都冇人行過
都係調番轉望番廚房算數，起碼有女昅



呢度既招牌釜飯只有3種Topping：豐後牛，地雞同鰻魚
如果覺得唔夠仲可以單點



要留意呢度只收現金


叫完餐之後頭先搭火車啲人先開始黎
好快就滿座兼排到出門口


首先黎左碟用好多種新鮮食材製成既前菜
大部分都冇落太多調味，主要食原味同口感
有脆既炸鰻魚骨同風乾雜菜片，有爽既秋葵絲同荀
有香甜既玉子燒同牛蒡絲，仲有刺激味蕾既梅子
擺盤好靚，作為開胃菜都幾有心思


然後店員就上左一大盤調味料罐，總共有6種
然後一輪嘴咁講食唔同野落唔同配料，我聽唔切
橫掂寫左係啲乜，鍾意落乜就落乜啦

豊後牛まぶし <2850yen>
釜飯係即叫即整，所以等左10分鐘先有得食
黎到既時後除左香氣衝天，仲聽到油脂既滋滋作響


飯面舖滿微微粉紅既豐後牛肉片，油光四溢
另外仲有碟擺得好靚既5種醃菜
味道都唔會太濃烈，用黎送飯都幾夾



釜飯同鰻魚飯一樣都係建議三食，食法差唔多
頭先盤醬料就係用黎俾你加料


第一食就係乜都唔落食原味
牛肉雖然望落好瘦，但咬落去非常軟嫩
佢唔似得食和牛咁成口油，而係有食緊肉既實感
白飯吸收左牛油同醬汁，加上鍋底有少少微焦
口感彈牙得黎又有少少煙韌，同肉一齊食越𡁻越香
加啲醬汁同辛味噌一齊食仲減低左油膩感，勁正
第二食加柚子胡椒同Wasabi太搶味，唔推薦


第三食就係加出汁，味道柔和得黎食落又冇咁乾
感覺出乎意料地唔錯，不過都係第一食好味啲


因為太好食既關係，成個釜俾我清乾淨哂
差在未加湯落去用勺捽哂啲精華黎飲


食完見收銀隔離好多人等緊，都係早啲讓番張枱俾人
雖然只係12點幾，但隊尾已經排到落地下，最少30人等緊
當中有唔少係頭先由布院之森排小賣部既遊客
所以奉勸大家一句，執輸行頭慘過敗家

一出黎見咁曬，諗住去車站搵Locker放低個袋
點知連隔離巴士總站都滿哂，唯有孭住個1Xkg既大背囊行


由布院呢啲鄉下地方冇IC閘機，係全人手驗票
所以搭普通列車既話就要去售票機買飛
係其他站用IC Card入閘既話，出站就要搵駅員幫你用機扣錢
想坐特急既話都有部簡陋版指定席券売機出飛
唔駛上車先黎補錢，不過唔收現金


以往JR九州既D&S觀光列車都係以特急型為主
例如由布院之森，阿蘇BOY，海幸山幸等等
以上三架火車都係水哥操刀
但近年遊客追求深度遊，比較著重當地文化體驗
所以新推出既列車都有好多唔同主題，唔再著重快
例如5日環繞全九州既36ぷらす3，西九州低速遊既雙星4047
以上兩架火車都係水哥操刀
呢張海報講既就係或る列車 (ARU RESSHA)
每年都會更改路線，呢期就同由布院一樣行博多~由布院
以"Sweet Train"為主題，搵黎世界級主廚打造甜品套餐
再配合復古同華麗既車箱，令人置身於美滿既環境之中
因其高貴既用料同食材，價錢當然唔會平
搭一程既價錢相等於一張7日普通車箱用既全國Pass
不過潮流興打卡，呢架列車絕對有價有市
以上火車仲係水哥操刀


車站出面有辻馬車帶你遊由布院
但路線唔包含金鱗湖，有時間可以試下既但我冇
大路對住嗰座山就係由布岳，有2個小山峰



因為行程緊密關係，由布院最多逗留3個鐘
食飯已經冇左1個鐘，所以拿拿聲衝左去金鱗湖先
有時間剩先係回程慢慢行番黎車站
拎住大背囊係烈日當空急步行同做Cardio差唔多，都幾吃力


沿車站出面條大路行5分鐘就會黎到呢條分叉路
"大分合同新聞"右邊條路就係湯之坪街道


呢幢野地下就係大名鼎鼎既B-speak本店
裡面冇人行，因為所有卷蛋一早已經賣哂

湯之坪街道係民居夾雜小店，好似鎌倉小町通咁
遊客非常多，所以跟住佢地都好難蕩失路






由車站出發曝曬20分鐘終於到金鱗湖
普通人慢慢行睇下舖頭既話預單程30分鐘以上
景色又冇連登仔講到咁差，不過天氣好有加成
因為湖底有個細泉眼，所以水溫比一般湖高
清晨氣溫低既時候會因為溫差，湖面就會產生薄薄既霧汽
秋天冬天朝早會比較易睇到，夏天就唔駛諗




湖邊有個天祖神社，岸邊整左個湖上鳥居
一直都冇時間去琵琶湖個白鬚神社，攞呢個頂住先




成個湖最標誌性既建築就係ペンション金鱗湖 豊の国
只有影到佢先算黎過金鱗湖

我上次黎金鱗湖係落雨

個釜飯兜影響咗個賣相

下關一條大路直去會經過，唔行埋好浪費

嗰度隔離仲有條李鴻章路，係佢會談放風既地方
不過趕時間去唐户市場就冇行到

下關單人去又唔會去果個水族館, 其實都夠時間

日本寫既步行時間，係咪以年輕人步速計？

香港d 行山時間，通常寫3個鐘，我行2個鐘會行完

但日本寫3個鐘，就真係摩打腳行3個鐘先搞得掂

1個麻甩佬去水族館會唔會有點兒悲傷

日本寫時間真係冇次準，正常人起碼要x1.5
我懷疑佢剩係睇地圖估，冇計埋要過馬路或者暗斜慢行既時間

下次你可以挑戰下, 反正日本咁多水族館

個湖好細，唔駛10分鐘就可以繞湖一周
再加上當時熱到仆街，好想快啲走
睇番時間可以搭早一班35分鐘後開出既巴士去別府
扣除回程20分鐘，姐係有15分鐘可以行街，對我黎講足夠
啲舖頭都係賣筷子同奇怪T-shirt，冇乜特別
btw杉養蜂園老是常出現


係小路行番出黎有間湯布院昭和館
有好多日本舊年代特色既野，例如甲蟲車同模型
只可惜冇時間參觀，係出面影相就算





前面有間犬家敷，對面係貓屋敷，隔離有豆柴Cafe
直覺話俾我知有古怪，應該係同一個老細開既




有一檔賣原個橙搾汁，500yen咁貴都有好多人排隊


行到半路我已經出現輕微中暑症狀，少少頭暈咁
並唔係因為唔夠水飲，而係曬到著火
我用最後既意志力衝番去車站隔離既巴士總站歎冷氣
頭頂打隻蛋分分鐘煎熟

臨近暑假，好多第一次去日本既人係唔同Post問行程
當中唔少非自駕既人係Plan行程都出現問題
以下係本人一啲小建議：
1. Pass有使用範圍同有效期，冇行程係唔會知用乜野Pass最抵
2. 砌好行程之後上Google Map查下交通時間可唔可行
3. 留意景點開放時間，費事去到摸門釘
4. 鄉下地方既交通工具未必有IC Card，請自備散銀
5. 冇行程諗唔掂唔識用一律建議乜都唔買現場買飛


下一站去別府地獄めぐり
一般人買左JR Pass就會搭鐵去別府再轉巴士 (橙線)
但呢個方法其實係兜左個大圈，差唔多2個鐘先到
其實仲有一個方法可以將交通時間減半
就係周末假期限定既觀光快速巴士ゆふりん (藍線)
1個鐘1班，由總站搭去鐵輪口只係45分鐘
就算係平日，搭36號巴士去別府再轉車都仲係快過JR


除左別府之外，呢度仲有去熊本同褔岡天神既高速巴士
部分座席指定既班次可以用售票機或者直接人工窗口買飛