[極限挑戰第二季]用8日喪遊半個日本 (北部九州 ~~> 名古屋)

ゆふりん搭去鐵輪口車費880yen，可以用IC Card
除左SUNQ PASS之外，亀の井バスPass都可以搭
後者有1日同2日券，可以係時限內任搭呢程同別府市內巴士
不過計過數搭唔到咁多錢，所以冇買
https://kamenoibus.com/guruspa/hp/info/index.html



巴士有行李艙，帶大型行李既人唔駛擔心車上冇位放
而且部分座位上面都有小型行李架，背囊唔駛放地下


巴士會經過金鱗湖隔離，不過俾竹林遮住左


之後就會經過好多個髮夾彎既山路
沿途風景好靚，有少少去左歐洲啲草原咁








巴士好準時，45分鐘就到左鐵輪口

我都係自己一個去冇咩問題
反而主題樂園就未試過

咁勁Mark晒幾班車既時間

我通常搵前後兩班車就算

比樓主感染 去咗食松乃家

係咪好好食呢

別府地獄巡禮之一 - 血池地獄



別府地獄めぐり出左張共通觀覽券，價值2200yen
有齊7張地獄既門票，由購入日起計兩日內使用
我經KKDay買就港紙110蚊，平過現場買少少
列印張憑證去海地獄或者血池地獄售票處換就得
唔買都得，每個地獄入場費都係450yen
不過我去哂就梗係買呢張野最抵


一入到去就係琳琅滿目既物產商店
首飾工藝品手信服裝醬料藥品通通都有
全方位滿足遊客消費意欲，總有一樣啱你心水
而且冷氣非常充足，舒服到我唔想走
如果唔係出面有溫泉睇我一定縮係度避暑



每日都是地獄既地獄梗T-Shirt，最啱返工著

羡慕樓主

離開涼浸浸既物產商店就係熱辣辣既血池地獄
因為地底岩層含有豐富氧化鐵同氧化鎂等礦物質
所以泉眼湧出黎既水會呈紅色
準確啲黎形容就係蕃茄濃湯咁既色



現場硫磺味唔算太重，但行近個池都係蒸到好想走
附近有熱血同妖怪牌方便一家大細影相
可能我係現場少見既獨撚，有人問可唔可以幫手影相
原來係香港人黎既，幫佢地影完之後件事傳開左
開始有佢地啲姨媽姑爹定團友過黎輪我大米，差啲甩唔到身
現場啲職員係咪去哂涼冷氣



有間屋仔專賣血池地獄生產既天然產品
例如用溫泉沉澱物製成可以治療皮膚過敏既血池軟膏
不過1500yen咁細盒有啲貴，平啲先會買黎試
另外仲有溫泉水同濃縮左既入浴劑，我就冇乜興趣
無論係酒店定屋企試都驚浴缸染左色，麻鬼煩



屋仔隔離可以行上個小山，睇到地獄全境同別府灣


見到個地獄咁多蒸氣就知好高溫，跳落去包熟
但想體驗血池溫泉既功效都唔係唔得既
後面涼亭就有降左溫既泉水俾你浸腳休息下
仲有個大壁報詳細列出溫泉成份同特徵，等你安心浸腳
測定時間係平成18年，自己查下幾耐之前
泉水溫度偏熱要啲時間適應，不過認真有啲料到
頭先係由布院行左接近2萬步，腳踭有啲痛
浸左5分鐘之後腳踭同腳背既疼痛感舒緩左好多
另外現場陪我浸腳既遊客當中，香港人比率100%
老母呻熱老豆又呻悶，要啲仔女安撫，辛苦哂

係血池地獄留左半個鐘就去下一個地獄
門口轉右落斜就係龍卷地獄



別府地獄巡禮之二 - 龍卷地獄


每次入場前係共通券搣番相應地獄既飛尾就得


穿過冷氣好舒服既商店之後就係一個半露天空間
大家都圍住個石壁坐，我都唔執輸搵到個靚位黎坐

龍卷離血池唔夠100m，睇既野完全唔同
呢度既地下水會流去地底50m既岩洞
地熱會慢慢煲滾水，產生蒸氣既同時水壓慢慢增加
當壓力超過臨界點，就會持續噴出蒸氣同熱水
過程中周邊溫度較低既地下水會流番入岩洞減低壓力
慢慢就越噴越少水，最後靜止，周而復此



呢個間歇泉每次噴完之後都要等30-40分鐘再噴
我黎既時機啱啱好，唔駛10分鐘就開始噴

開頭既蒸氣量同噴出力度最強，隔咁遠都有少少彈到我
所以有廣播提醒大家千祈唔好行咁近



大家就咁睇可能唔知點解呢個地獄叫龍卷
以前可以噴到50m高，水柱同蒸氣好似龍咁樣飛騰，因而得名
不過後來覺得觀賞過程太危險
就係石山上面加左塊檔板，可觀性大減
想睇水柱就睇鬼滅啦，下季好多戲份
去到中後期水壓開始唔夠，就可以行過去近距離欣賞



噴左10分鐘都攰喇，要俾時間佢回下氣，走先

要離開呢度都係要靠巴士
我就去番頭先落車嗰度搭去別府站方向
見到16或者16A巴士就上得
因為班次好少，真係要睇住時間表黎Plan


龍卷地獄出面就係去鐵輪同海地獄方向，唔好搞錯


如果唔想諗交通又想去行地獄既話
眼前呢架別府地獄めぐりコース就啱哂你喇
佢係日本歷史最悠久既定期觀光巴士，冇之一
已經運行左接近100年，隨團仲有導遊介紹景點
每日朝早同下午各有一班車由別府站出發
大約3個鐘行程接送你去哂7個地獄
4000yen我覺得唔算貴，想搭上網訂就得
https://kamenoibus.com/sightseeing_jigoku/



一般人會搭半個鐘去別府站落車轉JR，車費410yen
但我份轉乘天書睇到呢班車仲夾到龜川站既JR
所以搭10分鐘就到，車費只係150yen
可以避免塞車之餘又慳到錢，搭JR又唔駛錢

大分縣境內既日豐本線普通列車主要用815系
單單以Logo同內裝，應該都知又係水哥既傑作




去到別府站又夾到係隔離月台轉特急ソニック
仲比原先架普通列車快10分鐘到大分



冇訂定Green Car既我就去自由席搵位坐
但行車方向左邊既位都俾人霸哂
所以無緣睇到別府灣一望無際既海景

樓主嘅交通sense真係勁到傻

已經被洗腦

已經唔係交通sense咁簡單
係做功課做得好足

搵次完全抄足樓主行程先

塊豬扒真係好意外地好食 咁嘅價錢真係估唔到

小紅書果d 行軍式旅遊嘅日本版？

要抄我行程既首要條件係行路快，你得唔得先

我今次去完覺得松屋質素差左好多，松乃家反而冇乜事，雖然加左價都仲係抵食

行程朝7晚5唔算行軍掛，小紅書嗰啲未天光玩到食宵夜喎

試下，自己去想充實d