[極限挑戰第二季]用8日喪遊半個日本 (北部九州 ~~> 名古屋)

咁似以前泡泡浴叫土耳其浴,結果又係被投訴

獨遊好爽

我喺La Vista 阿寒川嘅夜鳴拉麵就太鹹

都係淥麵食level啫

留名 我十月去

樓主的意見好好用 未睇曬 但我行程有幾日都同你一樣咁濟

本身有一日係由布院再落別府 但我諗諗下cut左別府

睇完樓主介紹又想去埋

利申:全部都住博多 即日來回

睇d交通睇到我頭都痛 樓主

我留左2日時間係長崎 最主要目的係要上軍艦島 驚天氣影響會上唔到

Day 5

九州産華味鳥チーズチキンカツ <410yen>
一早起身浸多次溫泉就落樓下7仔搵早餐食
居然俾我見到九州限定既芝士吉列雞胸肉三文治
肉用左博多水炊鍋名店 - 華味鳥出品既雞胸肉
叮完再食都唔會有乾同鞋既感覺，仲幾彈牙
芝士同燒汁惹味得黎又唔會太濃味，非常好食
益力多就係去休息室攞既


食完就Checkout攞埋行李去長崎站
除左去售票機攞車飛之外，仲要處理行李問題
因為今次同以往唔同，九州去名古屋冇回頭路
如果想中途遊歷關西既話，寄行李方便好多
我就唔想每去一個景點就搵Locker，浪費時間同錢
因為我未試過怕甩轆，穩陣起見已經準備左應對方案
寄唔到就一早去酒店放低行李，再番轉頭玩
不過會浪費左好多時間搭車，但都冇辦法

呢次旅行黎九州，其中一個原因就係想去軍艦島
而登島就係今次行程既重點，冇之一
要實現呢個願望，一定要參加指定幾間船公司既見學團
各自既集合時間地點價錢同服務都唔同，自己睇餸食飯
但係預約到都唔代表一定可以登島
風浪太急埋唔到岸就會變左遊船河甚至取消行程
當中5-7月係上陸率最高既時期
我做得好事多，呢日係旅程之中最好天既一日
個天真係一舊雲都冇




軍艦島Concierge係咁多間當中聲譽最好既一間
因為出航率最高，隻船最靚，又有得行博物館
雖然係咁多間之中最貴，但絕對係值得
出發前1個月經官網訂朝早時段已經得番幾個位
想當日好天先去Walk-in執雞睇怕唔係咁易
渣打國泰Master過唔到數，Red Card先得
填好哂所有野收埋E-mail就代表預約完成
如果當日天氣唔適合出海，8點半前會有email通知


首先去四海樓隔離既軍艦島數碼博物館報到
前一日搭巴士黎差啲瀨野，今次查清楚班次先上車
係松ヶ枝国際ターミナル落車行入去就係

呢舊好似屎咁既物體係吉祥物ガンショーくん
頭頂係軍艦島本體，佢個身就係煤礦


博物館有3層，好多展板同展品可以慢慢睇
呢度唔提太多，有興趣自己過黎睇





好快到左集合時間，導遊會叫我地聚埋一齊
播片既時候會順便講下軍艦島既歷史
金毛仔叫我跟佢企遠少少，同我廣東話即時傳譯
仲提醒我幾樣野：
1. 出面體感超過40度，小心中暑
2. Premium以上係船上有免費野飲同小食，記住飲多啲甜野
3. 島上冇垃圾桶，全部野自己帶走
4. 呢度個VR館好正，記住落船返黎睇

導遊講完之後佢就同個妹妹做領隊帶我地去碼頭
全程見佢用好流暢同冇口音既日文溝通
睇黎應該係日本住左好耐



離遠已經見到成堆Standard人係等候室行出黎
不過我地啲高等人士係優先上船



對於我啲高人黎講，個位頂腳程度仲衰過UO
如果想坐得舒服啲建議訂走廊位，起碼伸到隻腳出黎
導遊就同Standard係下面講野，有大電視轉播



2樓有個領隊妹妹專門接待我地啲高等人士
佢遞左本幾十頁紙既文件夾俾我
裡面係軍艦島介紹同導遊講稿全文既英文翻譯
我睇哂成本野都要15分鐘，真係好詳細


開船既時候金毛仔係碼頭同我地揮手

香港人在長崎

本身訂左8正海運 即刻轉場擇你個間先

我係跟八正

2樓係Premium專用空間，Standard上唔到黎
除左室內有冷氣既指定席之外，出面啲位都係任坐
導遊就係下面講解登島需知同介紹長崎歷史
因為頭先已經聽左，基本上冇人聽佢講野
呢度計埋領隊妹妹最多得32人，所以大把位影相
下層就會爭餐死驚擋到人，仲會有浪花濺到






Premium以上船飛提供大量免費飲品同小食
尤其係夏天，唔飲凍野好容易中暑
小食就有好多甜既駄菓子，可以減輕暈浪感
唔夠既話領隊妹妹會補番，所以適當地攞




中途會經過女神大橋同伊王島大橋



過左伊王島大橋就會見到高島
呢個島比端島更早開發煤礦，所以又係俾三菱買左
前島主係之前提過既長崎發展之父 - 哥拉巴

高島隔離係另一個礦島中之島，後面就係端島
呢個位置望過去真係好似軍艦



黎到呢度船程只係半個鐘
之後會用半個鐘時間慢慢圍繞個島遊一圈
務求所有人係所有角度都可以影到靚相




下層勁混亂，好多人霸住船邊影相
所以Premium絕對值得推介，舒舒服服




臨上岸就要坐番埋位

上岸條棧道非常窄，揸住手機同遮行好易仆街
所以導遊千叮萬囑要小心，跌左落水執唔番



上岸地點係端島西南面，逗留時間45分鐘
因為係每間船公司傾出黎，所以大家時間都差唔多
因為荒廢左幾十年，所有建築都係廢墟狀態
為左安全遊覽，遊客只可以沿石屎步道跟領隊指示行
唔可以越過欄杆去其他管制區域，違者重罰



會經過3個見學廣場，導遊都會停低講故事
除左口講之外，仲有本舊圖片集解釋當時環境
因為佢以前係島上生活過，所以仲會夾雜一啲往事
博物館展板同英文翻譯本係冇提到既
半桶水日文既我都聽得明一半，都幾搞笑
不過完全唔識聽既話樂趣少好多

第二個廣場前面既紅磚建築係礦場既綜合事務所
好明顯睇到有人工加固過，後面搭左棚架
原因係幾年前打風吹冧左佢，之後照舊相砌番
但舊磚碎哂搵左新紅磚黎補，望落好怪



端島既提壩有好多層，分別代表唔同時間既海岸線
最入就係明治時代既傳統工法，用用石磚同泥砌成
外圍比較高就係昭和初期用鋼筋水泥製成




導遊話而家極端天氣令颱風越黎越勁
連鋼筋石屎提壩都頂唔住風浪吹到幾十米遠
要睇趁早，真係好快會冧哂



第三個廣場就係講後面既30號樓，建於1916年
係日本第一幢鋼筋石屎住宅，好似香港啲唐樓
每層都好似以前石硤尾邨咁得公家廁所
導遊俾我地睇番5年前啲相都仲係好地地
而家見到有幾層已經倒塌左

臨上船之前影埋啲靚相







回程途中有獎抽之外仲會派紀念品
我揀左File同襟章，另外嗰啲就唔記得左係乜



參加呢度既見學團仲可以儲印仔，搭滿3次送1次
除番開分分鐘抵過另外嗰幾間
如果之後有朋友想去既話不妨攞去
不過要用到個優惠就要親身預訂，應該好易冇位



導遊講緊長崎既世界遺產
無啦啦叫我地留意航行方向右邊
係日本第一個西式船塢兼造船廠 - 小菅修船場遺址
以前有大量外國船泊岸，慢慢附近就開左好多船廠
去到二戰時期就成為日軍造船基地之一
曾經造出當時世上最大既戰艦 - 武藏號
不過落左水2年之後就俾美軍炸沉左