[極限挑戰第二季]用8日喪遊半個日本 (北部九州 ~~> 名古屋)

而家搭uo都可以用里數換？

岩岩九州番黎再睇九州既相覺得好親切

俾錢嗰陣有得揀里數加現金
但個兌換率西到爆炸，2000蚊用左40000里數黎換
不過啲miles就到期就順便用埋佢咁解，平時唔建議

其實好多集團式酒店都有洗衣機，乾唔乾淨就留意下訂房網同google啲評語
近唔近就自己開Google Map睇，當然越近站就越貴

咁真係不了
仲要換uo

有自助洗衣機都幾重要

lm

係咁食工作人員同員工

Lm
睇下你個九州定我個九州極限d

樓主 我們到了

其實keep住有寫緊，但我諗住一炮過出多啲

瘋狂坐車

原來有新遊記

唔知係咪逢周末都有大型活動，博多站附近啲酒店貴到嚇死人
呢兩晚住既博多S-PERIA，每晚600蚊已經係附近最平
酒店係博多站西面5分鐘路程，地理位置算幾好

我都係住S-PERIA
地理位置幾好不過一夜附近都幾靜
我好彩早book就500蚊晚 記得再過幾日睇已經要700幾

洗手盤擺出面本身都覺得幾好
但checkin先發現佢個廁所同洗手盤都有啲距離

唔怪得你少咗入九州Post，原來有新遊記

Day 1 - 步行之日

可能因為平時訓慣硬床，酒店張床太軟搞到訓得唔好
因為6點就要起身，所以呢日精神狀態有啲飄忽


黎到九州第一個行程就係徒步橫越關門海峽
首先要搭JR去門司港，再轉巴士去關門隧道門司入口
我揸全國Pass，只要新幹線唔搭のぞみ同みずほ既班次就得
但揸其他Pass既人要特別留意博多~小倉路段
呢段山陽新幹線係JR西日本營運
而相同路段既在來線同特急就係由JR九州營運
各自出既周遊券都唔可以用黎乘搭對家區間，否則補全費
之前買嗰張垃圾係共同出品，可以搭哂兩邊所有列車



因為轉乘時間問題，我最後揀左搭特急ソニック
專門行駛博多~大分路段，中途經過小倉



883系由JR九州御用設計顧問水戶岡銳治負責設計
因為佢老是常出現，往後我簡稱佢做水哥
列車從外到內都充滿住佢既設計風格
車身佈滿列車型號<883>，名稱<Sonic>
而特別設計既Logo<鼠耳>就同座位頭枕有關

咁大個仔第一次坐Green Car，當然要整番個開箱文
因為一行得3個位，所以顯得非常闊落
除左車長有時入黎巡下之外，全程都係得我1個人包車



頭頂行李艙好長但唔深，20吋喼就好肯定放得落


凳係大班椅同上海理髮店座椅既混合體
側邊有個掣可以攤到張凳向後多45度，都坐得幾舒服
不過架車車齡仲老過我，內裝都明顯睇到歲月既痕跡
包括裂裂地既皮墊，補過油既手柄等等



Green Car係1號車箱，車頭有展望空間可以睇住車長揸車
但博多→小倉係車尾，剩係可以睇風景
去到小倉之後，車長會廣播叫大家擰轉個位
因為列車會以折返形式駛入日豐本線，行駛小倉→大分
呢度就會變番車頭，但今次就搭唔到



只需要踩住走廊邊既腳掣輕輕一轉，個位就可以轉方向


883系有振子，列車會根據路軌線形而調整車身角度
降低離心力減少不適感之餘，仲可以用更高既速度過彎
不過架車可能太老，去廁所都係要紮住馬唔好飛出街
雖然有少少浪但可接受，坐落都幾舒服

搭左差唔多1個鐘就到小倉
7分鐘轉車時間行去隔離月台上車綽綽有餘



車上面見到張廣告"講ありがとう SL人吉"
佢係日本最古老而又運行緊既蒸汽火車，超過100年歷史
之前行駛熊本~人吉，因為3年前暴雨沖斷左路軌
所以而家變左運行熊本→鳥栖，相反方向係DL人吉會冇咁好Feel
因為大部分時間得周末運行，車飛比由布院之森更加難搶
由於維持蒸氣火車運作既零件同修復技術達到極限
JR九州決定結束業務，係下年3月23日就會光榮引退
未來要坐呢類舊式蒸氣火車買少見少，有機會好快啲過黎坐


呢架813系列車又係水哥出品，搭15分鐘就會到門司港



現存既門司港車站係九州歷史最悠久既車站
月台充滿住舊日本風情，鐵達時啲廣告黎呢度拍啱哂


係呢度見到一個大正裝扮既Lycoris廚，影低佢先
要哂千束同瀧奈，臭DD


1891年呢度成為九州鐵路北面總站
以前列車會接駁碼頭既關門連絡船來往本州既下關
透過貨物同人員往來促進九州既經濟發展
所以月台尾就建立左0哩紀念碑黎紀念呢個站既貢獻


出面既駅舍係大正年間落成，都有過百年歷史
2012年封閉整修，翻新之餘復原當初原有外觀
海旁碼頭可以搭船去對面岸既唐戶市場
右邊就係食燒咖喱既伽喱本舖

去關門隧道門司入口有兩個方法
第一個就係去隔離九州鐵道紀念館站搭觀光列車潮風號
去到總站再沿公園行去入口
但係10點先有頭班車，對我黎講太遲，不了


另一個就係門司港駅前巴士站搭西鐵巴士74號，大約1個鐘1班
不過巴士到站時間好易受路面情況影響，今次遲左5分鐘到



可能因為遲到，司機放飛自我咁揸
唔駛10分鐘就到站，落車時間居然冇點Delay


巴士站前面過馬路就係關門隧道入口
隔離可以飽覽關門海峽同上面關門橋既景色
關門係食左字，意思係指本州既下關同九州既門司
不過天氣唔好都幾難影得靚，求其影張相就去隧道



落隧道要搭𨋢，行人免費
單車電單車象徵式收20yen，大家都好自律
不過關門隧道深夜都係會關門

地底𨋢口擺左唔少展板介紹呢條隧道
由於跨越關門海峽既隧道總共有3條，為左避免混淆
通常叫呢條做關門國道隧道，因為佢係國道2號既一部分
同時係世界上第一條設有行車路既海底隧道，1958年全線通車
路盤下面就係我所在既行人通道，全長780m
用10分鐘就可以由九州行過去對面本州，都幾有趣




兩邊都有紀念印章，記住帶本簿過黎扱



隧道中間就係本州山口縣同九州福岡縣既邊界
同赤道條線一樣可以反覆橫跳彈出彈入



行到對面搭𨋢上番地面就係下關既御裳川公園
亦係壇之浦古戰場既所在地
平安時代末期天皇權力衰落，朝政被平家把持
因其專橫獨斷引起唔少貴族同民眾不滿
及後平家掌權人相繼去世，各地反平勢力承勢而起
其中被流放既前貴族源家得到唔少勢力支持，實力最強
多次同平家軍隊對戰並大敗對方，史稱源平合戰
平家一直向西撤退，最終黎到壇之浦
激戰過後平家見大勢已去，就抱埋8歲既安德天皇投海自盡
平家政權滅亡，源家恐成最大贏家，幾年後建立鎌倉幕府




海邊放左2個打緊交既銅像，分別係平知盛同源義經
用黎紀念壇之浦之戰兩邊主將既風采

行完隧道就去唐戶市場食早餐
雖然公園出面有巴士去但朝早巴士好疏，行路過去算


行行下就去到立石稲荷神社，海面放左舊石
據稱係海峽既守護神，每年都會有祭祀活動



再行15分鐘就會到赤間神宮
除左祭祀安德天皇之外，仲有當時一同戰死既平家之墓



水天門兩邊掛住超大既金色十六葉八重表菊
代表呢度係同皇室有關既地方

春帆樓落番大路就已經望到唐戶市場
海旁花糟已經俾人霸哂位食壽司




唐戶市場馬関街逢星期五六日同假期先會有
其他時間就只係普通漁市場，上網查清楚先好黎
檔口雖然好多，但人流只係集中係中間條通道


近門口有一檔賣緊300yen一件大拖壽司
多人排到出門口，雖然望落都幾抵但唔值得排咁耐，冇食到



呢度同香港買兩餸飯好類似，都係擺哂啲壽司出黎俾你睇
只要企係前面This This This就會夾俾你
叫完就行去後面收銀俾錢就得，好方便
我行左一轉，除左幾間特別有生蠔同河豚味噌湯賣之外
大部分舖頭賣既壽司款式都差唔多，係價錢份量同質素有分別
所以靠目測辨別食材質素係最穩陣既做法




有攝製隊過黎拍野，條女應該係藝人但係我唔識


我係唔同檔口買左魚生飯，幾款壽司同炸物，用左2500yen
雖然唔算貴，但係連鎖壽司店就有位坐有茶飲
呢度買完仲要行到好遠先搵到位坐低食，感覺麻麻


雖然魚生幾新鮮冇腥味，但質素同超級市場壽司部差唔多
舊炸河豚唔熱又多骨，炸蝦好食但個皮勁厚
不過冇期望就冇失望，體驗下都OK既，不過應該唔會再黎

我都同意係幾靜，但附近都幾多酒店所以唔會好雜
行幾步有7仔我已經好滿足

洗手盤個設計唔算大問題
係個廁所實在又深又長，離道門好遠好大壓迫感