[偷得浮生半日閒]用8日獨遊西日本 (京都‧名古屋‧奈良‧廣島)

下一站去八坂神社，就行去伏見稻荷站搭京阪電車
又可以用番關西周遊卡搭車


呢個站等級比較低，得急行以下列車停靠
所以會見到啲特急高速飛站



第3次黎到祗園四条站，已經背左個落車位


之前飛膠鑊巴打所講既Premium Car
其實就係京阪電車為特急列車其中一卡劃為全卡指定席
視乎搭乘距離補400-500yen不等
如果想確保有位坐又坐得舒服啲既話可以一試
係月台第6卡既位置就有部劃位機俾你課金


出左站就沿著祗園商店街行過去
但因為仲好早，好多都未開門


中間會經過花見小路，係京都最大既花街
有時會見到塊面化到白哂著住和服同草屐既藝妓係度出入
但以前因為有遊客為左同佢地影相引致不快事件
而家棟左個牌出黎話請勿故亂拍照
正所謂可遠觀而不可褻玩焉

行10分鐘就黎到八坂神社



日本國寶八坂神社本殿
呢種建築風格係全國神社中獨有，稱為祇園造


神社中間個舞殿進行緊神秘儀式
唸啲唔知乜野又播埋唔知乜野音樂
有隊攝製隊係度但又唔俾人行近影相


神社後門可以行去圓山公園
風景唔差，但景色就比較單調
如果全部變哂紅葉應該好靚

你喺稻荷見到抽221系應該係みやこ路快速？
大和路快速好似唔經呢邊

你啱，眼殘添

唔識串快速

2萬9都未係最多
我最多果日2萬5已經斷腳

樓主有冇試過由大阪去白濱？
想問下你會唔會知買咩周遊卷會抵啲？ 因為我去8日 尾三果日由大阪去白濱 住一晚再返返大阪

冇去過
JR關西廣域Pass可用5日
剩係新大阪來回白濱已經回左本
但白濱站要轉明光巴士先去到酒店區
如果你諗住去埋千疊敷三段壁既話計下車費駛唔駛買Pass

京の米料亭 八代目儀兵衛 [Tabelog評分：3.57]
本來我想預約三嶋亭本店食壽喜燒，但Full左
唯有搵下附近有乜高分得黎又唔貴既和食Lunch
誤打誤撞俾我搵到呢間，就係八坂神社斜對面

窗邊綠色既鍋就係佢既秘密武器 - 土鍋炊飯釜”Bamboo!!”
用呢個鍋煮飯可以令米既香氣同甜味發揮到極致
就睇下有幾把炮
官網有得賣呢個釜，貴到嚇死人



日本既餐廳唔興禁飛仔，通常會擺張排隊紙係門口
叫你留名同寫低幾多人，呢度都唔例外
舖頭11點開門，早1個鐘就會放張排隊紙出黎
去八坂神社之前過黎望過，我個名出現係個表前列
所以都肯定個Booking係冇錯既
電郵寫住預約既人10:50要到餐廳，否則預約會被取消
我10:45到，張留名紙已經有超過20個人名
如果叫名冇人應就會俾後面扒頭，可能要重新排過
而且唔會答到你要等幾耐先有位，都幾串
因為咁已經有好多人企定係門口等執雞


之後就有個店員出黎叫名，叫到你就可以行過去報到
同時會俾個餐牌你睇，順便叫定餐
我用英文名預訂，濃烈既日式口音搞到差啲miss左
可能因為咁而令到個對答有少少搞笑
-----------------------------------------------------------------------
：Devil Kidさんいますが? [魔童係邊]
：はい~~ [閪~~]
：あなたは日本語が読めますか？ [你識唔識睇日文]
：...ちょっとだけ (我俾左個咁既手勢)
之後就隊左個中英對照既餐牌過黎


-----------------------------------------------------------------------
而我第一個反應就係點解覺得我一定識聽
同茶餐廳阿叔問鬼佬識唔識聽廣東話有異曲同工之妙

準時11點分批叫名入座，因為上下兩層得20個位
第一批就係我呢啲預約左既人
如果11點先黎寫名，我睇1點都未入到去
樓上係雅座，可以望住八坂神社啲JK行人送飯
我就坐下層吧枱最入，冇風景睇
有一個服務員專門接待我同隔離位條女，好好服務


儀兵衛の銀シャリ三色御膳 <2590yen>


黎得呢啲地方，食最貴個餐應該就冇錯
有2款烤魚，天婦羅同刺身，賣相好精致
味道都唔錯，但都唔係重點


呢間餐廳叫米料亭，飯自然係重要過啲餸
見唔見到碗飯好似自己識發光咁
好食既日本米係微黏唔爛粒粒分明
食落有少少彈牙同甜味
呢度既飯除左做到以上既野之外
每粒晶瑩剔透既米仲係Al dente既口感
好味到難以用言語去描述
同埋餐廳深知飯擺耐左會冇咁好食
所以煲飯煮好之後只可以擺10分鐘
過左時間就會成煲唔要，保證客人食到最高質既飯


豊後の息吹 <250yen>
呢隻蛋話係京都本地飼養，可以生食
咁就當然趁飯熱打落去做TKG
蛋黃顏色橙過蘭王，但唔係太杰
食落居然係冇腥味，醬油都唔駛落

呢度食飯唔需要就住，因為白飯任裝
只需要拎起個飯碗，服務員見到就會幫你攞隻碗去添飯
另外再贈送飯焦一塊
其實佢係換左另一隻碗，因為第二碗飯冇蛋汁
官網有得賣隻碗，貴到嚇死人


飯焦同香港啲煲仔飯唔同，係冇油既
但脆到好似薯片咁，唔講得笑



為左食多舊飯焦，我再添左碗飯
雖然唔夠餸，但隨餐都有味附海苔同魚乾
枱面又有普通鹽同芝麻鹽，加埋食蛋支醬油
其實硬啪兩碗飯都冇乜難度，係飽啲姐
我隔離條女瘋狂叫料理長剩係攞飯焦
仲識食到灑鹽黎食
丫咁樣食又幾好食喎衰鬼



食完飯大約11:40，其實都仲係好早
但出面排隊既人潮係爆炸性增長

strong post, 2月去

日本大城市d街真係..無樹都算, 仲曬到暈.
有次去東京, 撞正熱浪, 個地面好似桑拿咁, d熱力烘返上黎.

知恩院就係圓山公園側邊
經南門行過去就會見到一座超級壯觀既三門



知恩院比IU早超過800年出現係呢個世界上
呢度係日本淨土宗創立人法然既圓寂地
弟子源智為左向師父報恩，選擇呢個地點創立寺院
並接受天皇御賜「華頂山」山號，門頂可以睇到個匾額
佢係知恩院既正門兼日本國寶，有400年歷史，高24m寬50m
比起日本最大既木造大門 - 東大寺南大門只係矮1m



對住三門呢段梯級叫做男坂，高到不得了
側邊有條冇咁急既梯級叫做女坂，陣間有相


行左幾十級超高既石階之後
就會見到左邊既國寶御影堂
免費參觀但要除鞋，裡面都唔俾影相
好值得入去，非常金碧輝煌




睇完御影堂內部，其實出面既迴廊都可以參觀
知恩院流傳七不思議，呢度有其中一個
以前有工匠係翻新御影堂時為左驅魔同埋防火
將一把濕遮晾係屋簷頂，晾到而家
因為驚你睇唔到，專登釘左個牌叫你望上去
我當刻睇唔到，影相先睇到

行去御影堂後面就係去方丈庭園既地方
咁啱真係有個方丈行緊出黎





方丈庭園拝観料400yen
售票處個嬸嬸好清楚咁俾左個地圖
又用紅筆劃底有乜野睇，要點樣行先順路
不過佢全日文又講得快所以聽唔切
但最後佢特別講明去到出口要轉右落樓梯
最後我明點解個嬸嬸要強調


呢塊板講哂知恩院七不思議，除左頭先把遮之外
其他基本上係攝影禁止或者入唔到去影


方丈庭園個方丈頭先行左出黎，所以得番庭園係度
呢幾日睇得太多靚景，呢個唔特別

靜靜請進入


山亭有道掩門寫住出口
一推開就不得了，係墳場黎既
如果怕呢啲野既人應該會嚇死
方丈庭園最後入場時間15:50應該都係呢個原因
我記得嬸嬸講要轉右，但我唔覺有路同指示牌
後面有人推開門之後就轉左，咁我跟住啦
點知佢地真係去拜山，係個墓前瞻仰
嚇到我行番轉頭，穿過墓碑之間既小路咁行
好彩行左30秒就見到條樓梯行番落去



頭先嚇一嚇，而家要買野飲定驚
泰平亭隔離有部念佛自販機
一入錢就喃嘸，禁野飲又喃嘸，跌野飲又喃嘸
洗濯心靈之餘，出行更加安心


行左1個鐘係時候出發去下一站 - 嵐山天龍寺
落山呢條路就係男坂隔離既女坂，平緩好多

好正

巴打驚呢啲

去名古屋必食蓬萊軒嘅鰻魚飯。超好味

其實唔係驚，係嚇一嚇姐
實在估唔到個庭園出口就係一堆墓碑

呢度去嵐山有非常多方法同組合
1. 祇園四条站附近有巴士直達，我就最憎既
2. 河原町站搭阪急到大宮/西院站轉嵐電去嵐電嵐山站
3. 河原町站搭阪急去桂站轉嵐山線去阪急嵐山站
我揸住關西周遊卡，搭邊種都唔駛錢
為左方便去多個景點，我揀方法3
由知恩院行去河原町站大約要20分鐘







嵐山附近鐵道交通非常發達
嵐電嵐山站就係中心點最方便
JR嵯峨嵐山站就偏東北，可以順便搭埋小火車
阪急嵐山站就係南面，係桂川南岸
係呢度落車可以順便行埋渡月橋






平日既嵐山都已經咁人多車多
如果回復疫情前水平真係行都唔駛行
係呢度行路會快過搭車
黎到呢度終於聽到有人講廣東話




嵐電嵐山站，出面多人到呢

天龍寺門口就係嵐電嵐山站對面
呢條路仲可以通去寶嚴院同弘源寺
聽講睇紅葉好靚，睇下陣間有冇時間行





天龍寺参拝料有好多個Package，總有一個啱你心水
我就當然俾800yen去哂本堂同庭園
本身諗住去埋法堂睇雲龍圖，點知我唔記得左冇去到


天龍寺本堂係國寶，都要除鞋
門口有個架俾你放鞋



一入本堂就會見到呢幅超大紅色達磨圖
達磨你可能唔知係邊個，達摩禪師呢個名大家會熟悉啲
佢將禪宗由西域傳入中國，再發揚至整個東亞
天龍寺所屬既臨濟宗就係禪宗既流派之一
其思想同處世態度對日本文化影響深遠
天龍寺上一任住持平田精耕畫呢幅畫既原因相信係致敬
點解個畫風係咁，藝術既野我地識條鐵咩


我上網睇人話裡面仲有幅細既黃色達磨圖
點解會變左外面嗰個既縮細版架


雲龍圖就唔止法堂有，本堂都有
但條龍好似同我講緊「影乜撚野呀過主啦」咁

不過達磨圖同雲龍圖唔係重點，主要都係睇庭園
呢個曹源池庭園已經有700年歷史
本身個池唔大，但借埋後面嵐山山景，氣勢出哂黎
雖然介紹話個池後面有好多造景
但因為曬得好緊要，完全睇唔到





多寶殿除左去嗰條路有少少園景之外就冇特別



行完本堂就去門口著番鞋行去隔離庭園入口
用番頭先本堂張飛尾就可以入


右面就係我頭先行既本堂，又叫做大方丈堂
所以大大個牌匾寫住方丈，好小氣架


有啲樹轉左紅葉都幾靚



如果對達磨圖同本堂雲龍圖既話
其實俾500yen剩係去庭園都好夠

天龍寺除左頭先嵐電嵐山站既正門之外
仲有係竹林之道中間既北門
咁就唔駛出番正門行成公里黎番呢度
就係因為行左呢度，我就miss左法堂雲龍圖




竹林之道既人流如你所見，非常闊落
同我5年前朝早黎相比更加少人
除左聽到1把港女聲話「快啲快啲」之外
其他大部分都係外國遊客，大家都好靜

竹林之道行到最入就係分叉路
轉右就去小火車嵐山站同埋御髪神社
轉左就可以經嵐山公園去桂川邊兜番去渡月橋
我就唔會咁傻折返，梗係揀轉左
沿途非常少人，好好行






本身預時間行嵐山附近啲舖頭
但如你所見仲多人過疫情前既老銅，所以就唔行喇
之後預定行程剩番晚餐同天黑去二条城
而家先2點幾，仲有大把時間
橫掂今日交通免費，即刻去埋隱藏行程金閣寺

嵐山去金閣寺都有好多方法，但冇直達
最穩陣就係搭嵐電去北野白梅町站轉巴士
嵐電因為搭幾遠都係收220yen
所以直接上車就得，落車先俾錢



由嵐山站去北野白梅町站中途要係帷子ノ辻站轉車
直接落車行去對面月台上北野線既車就得


落車之後行去のりばG搭路線巴士204/205
係金閣寺道落車，跟住路牌行就到
雖然好唔想搭巴士，但我行到過去就見到巴士
周遊卡又包車費，冇理由唔搭掛