[偷得浮生半日閒]用8日獨遊西日本 (京都‧名古屋‧奈良‧廣島)

上次黎好多公公婆婆係度啜泣緊都冇意欲影相
今次好早黎到冇乜人就可以慢慢行
不過為左尊重番個場合，我就冇點影啲展品
一黎有啲血腥，二黎我怕影左會帶左啲野返黎
三黎剩係睇展板啲文字都足夠令你聯想當時情況
呢個展覽無論係氣氛，動線同展品解說都可以話係世界級
如果想了解日本近代史，呢度非常適合
如果有情緒問題或者唔睇核突野既人請慎入
因為有啲展品都幾壓抑同好人體奧妙展，有病變相同標本睇
為左令你更了解核彈既威力，所有展品都有列明爆心地距離
有啲可能係幾十公里外搵到既物品或者拍攝既真實影片

1945年8月6日早上8時15分美軍對廣島投下原子彈
爆炸完之後滿目瘡痍一片愁雲慘霧
生還者透露周圍唔係死屍就係有人被瓦礫壓住叫救命
救援隊係事發幾個鐘後先到達災區都嚇到呆左
因為軍方冇諗到成個廣島會冇左，核實災情都用左好耐時間
越接近爆心地就越搵唔到瓦礫同死難者
事後研究發現爆心地方圓2km溫度可以去到攝氏3000度
產生既高熱會瞬間令街上既行人灰飛煙滅，屍都冇
而人體汽化既物質就會被爆風印落建築物既石牆度
所以當時救援隊應該係見到周圍有好多印係度
著名既人影石就放係呢個位置
另外仲有好多半熔或者高溫溶唔到既死難者遺物





原爆產生既蘑菇雲將地面既一切捲哂上高空
例如水，瓦礫，幅射塵，蒸發左既人等等
因為啲物質經過超高溫焚燒變哂黑色炭粉
遇到冷空氣溝埋就會變成墨汁咁既黑雨落番地下
呢啲黑雨因為超高幅射，淋到既話九死一生
但因為影響範圍估計接近1000平方公里
所以唔少無辜既人受波及，加劇死亡率
其實戰爭入面大部分人係無辜
睇番而家烏克蘭同俄佬打仗都真係有啲心酸

呢張相我睇完好深刻，高清大圖冇打格
你當好似日本文化祭完左會搞既營火會咁
但中間疊埋嗰啲除左木之外就係屍體


放射線既危害讀過書既都略知一二
呢張相我記得以前小學常識書有放過出黎
就係甩哂頭髮既兩姐弟扁哂嘴咁望住鏡頭影相
原來呢度仲講左佢地既身世同後續
淋完黑雨幾日之後佢地就甩哂啲頭髮，仲出現發燒同內出血既幅射症狀
雖然曾經好番一排，但都係30歲前去世，RIP



除左相之外，仲有唔少例如日記同回憶錄等既記錄



我影既呢幅畫已經算比較童真冇咁血腥
對於呢啲悲傷既事過左30年都仲咁歷歷在目，其實都好堅強
隔離嗰啲好恐怖，筆跡又凌亂，剩係用紅色同黑色筆畫了出黎
好似係精神病人畫咁樣，費事影相嚇親大家

原爆既災難令好多家庭破碎，活著既人生活都好困苦
當中一個受害者因為原爆後遺症做唔到野，靠老婆打工搵錢
但之後老婆都因為後遺症離世，留低佢同啲仔女
佢冇哂人生意義既時候就諗住掐死啲仔女一齊共赴黃泉
但臨尾收左手，然後，就沒有然後了



之後有一段篇幅講佐佐木禎子呢位小妹妹
佢2歲時經歷原爆，淋過黑雨但奇蹟生還
係差唔多10年後就患上同幅射有關既急性白血病需要住院
最終病情急劇轉差，幾個月後離開呢個世界



當時佢聽講摺千羽鶴可以獲得一個願望
所以瘋狂用包藥紙黎摺希望自己好番
摺紙好簡單，但咁細張你又摺唔摺到呢


佢既同學對佢既離世表示悲痛，想為佢起番一個紀念碑
呢件事報導出黎之後得到好多人支持
有人想為佢同其他一樣遭遇既小朋友設立一個紀念碑
最後就係平和紀念公園設立左頭先見到嗰個原爆之子像
底部係千羽鶴既形狀，頂上嗰個小女孩銅像就係佐佐木禎子

之後就經番條橋去東館，可以高空睇番成個廣場



頭先本館主要展示廣島係原爆後既景況
東館就比較多背景資料同幅射既學術資訊
例如廣島既歷史，原子彈既發展同埋幅射既影響

呢度有好多美國軍方係二戰既公開資料
除左廣島同長崎之外，原來小倉同新潟都係預定地點
但最終就以廣島為優先目標
如果天氣唔好既話就會炸小倉



當年美軍投彈參考既廣島高空鳥瞰圖
打十字個位就係對準頭先行過既相生橋
T字形做靶的確一流
十字位右上個黑色格中間就係廣島城
當年仲係現存天守兼國寶，可惜炸到渣都冇


廣島市因為位處大平原兼三面環山
原爆既衝擊波可以擴散到好遠，受災區域好大
相反長崎原子彈投放既地點並非預定長崎市中心既常盤橋
而係去左北面既浦上，有山阻住衝擊波導致威力減低
長崎市區受損程度相對輕微，大大減少死亡人數



以前讀Physics既時候會教放射線分α β γ
核幅射大部分屬於γ，會以高能量穿透人體
導致DNA變異同細胞異常，影響免疫系統同遺傳因子
係未有廣島長崎原爆之前呢類學術研究都仲未存在
而呢兩次悲劇就等同間接人類活體實驗，產生大量病例參考先得以證實
其中一樣就係胎內被爆，原爆地區生出黎既嬰兒大部分都有缺陷
例如肢體異常，智力障礙，壽命不長等，當年醫生見到咁都唔知乜事



係二戰結束後美國仲進行過多次地面同海底核試
有研究顯示係核試附近既人生癌比率會上升，亦會較短命
而家睇係常識，但係冇人做長期研究既話邊個會知

我一個人去獨遊日本， 都係試過一次比人 搜身
都幾 尷尬下

原爆真係睇到好sad，我同一個Trip去齊廣島長崎，睇到想喊

睇一個館都已經好大壓力，睇哂兩個夜晚訓覺會發惡夢

四國加九州搭船搭車都死，所以我上次全國Pass直接飛走四國

想問廣島玩3日

有邊張pass 岩用

唔想煩就JR Pass

行完出黎見到一車車準備入館
好彩早黎，如果唔係搞到個展館勁嘈就冇乜氣氛


行程非常緊湊，飛哂所有市區景點直衝去宮島
首先經元安橋去本通商店街，但10點幾仲係死城咁乜都未開




街尾行落地底就係Astram線總站本通站
搭3個站就可以去新白島站轉JR山陽本線
不過架車都幾細架，1節車箱得1道門24個位
有少少似去鐵道博物館嗰架埼玉新都市交通列車




新白島站既位置係山陽本線同Astram線既交會點
直至2015年先成功爭取係呢度興建車站
所以個站好新淨，設計簡約得黎都幾靚
上次黎呢度仲係要買實體車飛，今次黎終於可以用IC Card

JR新白島站就係由原有路軌側邊加裝月台，都係2015年啟用
設計上並冇預留空間係閘內連接兩邊月台
所以Astram線轉乘JR條天橋只可以通去宮島方向既月台
想去廣島方向就要落天橋轉入隧道過對面上番去
入錯月台就要搵站長搞，一係搭去下個站過對面
我揸Pass所以自出自入都得
另外呢度同時係山陽本線同可部線既中途站，小心搭錯車



係2014年之前，JR廣島地區出哂名用國鐵時代既舊電車
因為車齡太老兼成日壞車，第二年開始大規模更換成呢架227系電車
車頭左右各有1塊"Red Wing"檔板，防止乘客係併結時意外墜軌
另外JR西日本順便導入埋車站編號同埋定義路線顏色
將廣島站周邊路線統合成廣島都市網絡



23分鐘車程就到宮島口站
出站之後要經行人隧道行5分鐘過去碼頭轉船
途中經過明治時期創業既穴子料理名店あなごめしうえの
不過今次都係冇機會食，因為有更重要既野食等緊我

幾年冇黎，成個碼頭唔同哂樣，開揚左好多
以前既廣電宮島口站拆左搬左出海邊
靚左好多之餘仲多左好多個月台，方便列車調度
宮島航路繼續有松大汽船同JR渡輪選擇
以前兩邊碼頭相距好遠，而家拆哂整合左做同一座旅客大樓
唔揸Pass既話可以隨時睇邊班先發就搭邊班
橫掂大家船程都係10分鐘，單程船飛都係180yen




用JR Pass可以免費搭JR渡輪，所以好多外國人搭
松大汽船就比較多本地人搭，而且比較多優惠Pass
例如宮島汽船纜車特惠券，廣電一日乗車乗船券等等
係市中心搭廣電宮島線過黎一程就搭到黎，行去碼頭又近
元安橋碼頭有世界遺産航路直接搭到去宮島
但係時間唔夾之餘船費都幾貴，不了
搭JR既話就要好似我咁轉山陽本線過黎再行出碼頭
雖然路程會快過搭廣電，但計埋轉車同行路時間其實冇乜著數
不過我買左JR Pass就無理由蝕俾佢啦



JR渡輪有3隻船，呢隻みせん丸就係最舊嗰隻
1樓係汽車甲板，2樓係有冷氣既雅座
想影相靚既就上3樓冇冷氣位，記住揀航行方向既右邊

你10點幾就行完博物館

我上次去高知係朝早9點香港起飛，一落機轉JR，搭夜晚7點先到

全國Pass

我嗰陣喺松山落埋宇和島城再坐四萬十Torocco過高知

我差四萬十嗰段未坐過

原來呢架車都係水戶岡作品