[偷得浮生半日閒]用8日獨遊西日本 (京都‧名古屋‧奈良‧廣島)

Ching， 我過幾日去京都，請問琉璃光院 walk-in 得唔得㗎，定係一定要book? 我見到一真都full booking

好正

留名睇一個人去旅行究竟是做乜春
ps未試過
但假已請準備去

排隊要出示booking email，職員有個表對你名
所以冇book既話理論上係walk-in唔到
不過出面八瀨站附近啲紅葉都幾靚
如果真係入唔到咪搭纜車上延曆寺睇，順路

我淨係帶左一個背囊就check完護照就pass左不過我發現得果條友係咁 左右都會開gip check

1617年去嗰陣次次都要開喼查，但18年之後就通常直行直過

我剩係18年俾人check，之後就冇試過

樓主好享受係日本搭交通工具？

日本啲交通工具係坐得幾舒服既，尤其係搭鐵
不過我就未去到話會好似青春18咁坐成日普通車
所以有得揀都係搭新幹線同特急
今次坐ひのとり真心五星級享受
原來俾貴啲坐Premium 真係唔同啲

Day 2

當我同啲朋友講去旅行會早起身既時候
其實佢地係拒絕既，因為佢地覺得
「DLLM平時返工已經唔夠訓
黎到旅行唔訓夠本邊叫做去旅行？」
我就唔係咁諗既
一黎可能每日行程好似軍訓咁樣
所以攤係床就好快訓得著，睡眠質素極好
二黎呢個時候日本5點就會天黑
早去早回會比較實際，景點又少人啲


酒店7點開始有早餐
我6點55分就走落去都中伏
估唔到咁多人仲早起身過我
排左成15分鐘先入到去


排到你既時候放低張朝食券就會俾你入
一個人去食唔駛擔心個位俾人霸左
可以攞張留位券放枱面，食完俾番職員就得
有啲人可能怕堂食容易中招
所以有外賣盒俾你夾完拎上房食



夾野食之前要戴手套防止濃厚接觸
雖然質感幾好，但係好跣好難攞起個夾
免費早餐黎講呢度既種類都幾多
呢度招牌就係呢個煙肉焗蛋
我冇為意攞左前面個熟蛋版
食完想送佢去關愛座


後面就有德國腸酸椰菜炒蛋烚蛋
仲有南瓜濃湯同埋雜菜湯，味道都唔錯
有唔同款既撈沙律同沙律菜，非常健康
有4種麵包，有果醬牛油，窗邊有焗爐仔可以烘熱佢
飲品都好多款揀，我就飲野菜汁

之後返上房攞袋諗住走
見到電視講緊なかやまきんに君入圍今年流行語大賞
見到佢我就記得之前睇左佢個洗腦MV
我包你地睇完返唔到轉頭

https://www.youtube.com/watch?v=VCWcDtdKuyQ

食完就出發去琉璃光院
搭京都巴士17號就可以直達八瀬駅前行過去
不過我多年前已經對京都既巴士失去信心
所以決定全程都係搭鐵，雖然要轉3次車
但今日我用關西周遊卡，1蚊車費都唔駛俾

正常人應該行去搭地鐵轉京阪
但我間酒店離近鐵站好近，就費事行
所以就向南搭去丹波橋站再轉京阪去出町柳站





之後就出站轉叡山電鐵
去琉璃光院同比叡山就搭叡山本線




因為冇位坐就唯有企車頭
搞到好似玩緊電車Go咁



叡山本線觀光列車ひえい (Hiei)
上官網會搵到運行時間表，但今次夾唔到時間坐

黎到八瀨比叡山口站前面就見到橙葉



本身有條木橋過河，但好似要整修
所以要兜個大圈行另一條橋
因為咁所以經過叡山纜車八瀨站
呢度可以搭去比叡山觀景台同延曆寺
但係今日行程太密去唔到，唯有等下次

琉璃光院係京都其中一個熱門賞紅葉地點
睇番啲Blogger講以前閒閒地要排幾個鐘先入到去
呢幾年疫情為左防止濃厚接觸
紅葉期間要上官網提前預約先可以入場
今年就定係11月1日-12月4日
開放預約嗰日我就衝去禁，當時所有時段任揀
如果你而家先入去睇，應該都爆哂

我早左半個鐘到，問個哥哥佢唔俾我早入
所以出面都有堆人等緊
我就行番出去影左一輪紅葉先走番過黎
Book左10點，9點9先開始係出面排隊



唔知係溫差大定係我個人太熱血
口罩入面係濕到滴緊水


入場前有幾個專人攞住個預約名單
逐個人核對預約e-mail同名先俾入
所以Walk-in入到既機會應該比較低




門口左邊就係售票處，入場費盛惠2000yen
除左入場券之外仲俾左個膠袋你
裡面有張佛經，介紹單張同埋一支原子筆

行一段樓梯就會見到間屋仔
嗰度就係琉璃光院既本體，要除鞋先入得
職員會指示你去上一層




跟住就會見到嗰張出名反哂光既黑色枱同園景
呢個位係著名打卡點，要係枱邊影出去
黑色枱面既倒影配合外面既環境好似一幅畫咁



呢度既人流管制都幾好，得十幾人係度
所以影既時候好少阻到人，又冇人阻到我





但係庭園入面唔夠光，啲葉影落變左暗紅色
所以就唔係特別靚



反而外面好好太陽，影出黎仲靚

落番下一層有一舊好似避難所咁既野
佢個名堂叫做八瀬釜風呂
其實就類似焗桑拿咁訓係入面
相傳以前有貴族打仗背脊中箭受傷
係呢度養傷之後好番
之後呢度就變左日本其中一個療養勝地



呢度就係琉璃之庭，我覺得靚過上面
起碼唔止得樹同葉，仲都有啲園景同湖景睇下



如果唔知點樣影最靚，跟人影就得





另外入面都仲有啲古物睇，不過就唔特別

成個院面積好細，快行既話10分鐘乜都行完
我見影哂相又越黎越多人入黎
所以我留左半個鐘就走先





今次呢架列車就新好多

lmlm

之後就搭番叡山本線去一乘寺站食Lunch
呢度係關西其中一個拉麵店激戰區
舖頭多之餘評分都幾高
我就揀左其中一間名店黎試
離車站大約5分鐘路程
中華そば 高安 [Tabelog評分：3.72]


舖頭正常11:30開門，我早15分鐘到
可能見出面已經好多人，佢提早放人入去
好彩可以第一輪入到去


舖面唔大，大枱連埋窗邊牆邊得大約20個位
我個位咁啱就睇到哂歷年既獎座
間舖呢2年仲攞埋Tabelog關西拉麵百名店
好期待佢既味道



餐牌好簡單，唔識日文你都一定識睇圖
叫右上角嗰個定食實冇錯
呢度仲出名牛筋拉麵 (スジラーメン) <850yen>
定食正常配中華そば，想轉牛筋拉麵加50yen就得

可能因為太多人，個定食要15分鐘黎到
不過好食既野就唔怕等既
からあげ定食 <1260yen>
炸雞定食包左碗拉麵，3舊炸雞同一碗飯
見到呢個份量，細食人士請考慮走飯
大食人士有褔了，餐牌寫到明白飯任裝


中華そば係典型既豚骨拉麵
湯底比我想像中濃厚
好重骨膠原，飲落有啲膠口
因為用細麵，所以都要快啲食費事淋哂
啲青葱提起香味又消滯，配搭非常好
叉燒雖然切到好薄，不過都好嫩



炸雞就真係唔講得笑
係我人生中暫時食過最好味既
每舊都冇骨，啖啖肉得黎炸得又脆又多汁
味道有啲似台灣既鹽酥雞，搭埋飯食一流
我呢個大食仔處理哂成個餐都有啲吃力
但實在太好味，我含淚都要食完佢
但我隔離個小妹妹食同一個餐仲食得快過我



為左向大家展示炸雞既份量
我專登放左隻筷子係度做對比尺
你地試下行去廚房攞隻筷子出黎望下


可能因為見太多人食唔哂
有告示同你講食唔哂啲雞可以打包拎走


如果唔係早左到，我而家應該仲排緊隊

食完發覺仲有5分鐘就有去鞍馬既車
頂住個肚都要衝番去一乘寺站，好彩趕得切
因為呢度可以同時搭到叡山本線同鞍馬線
所以要睇清楚車頭個總站名先好上車
如果你都驚會搞錯既話就睇車箱數目
一卡就係去比叡山既叡山本線
兩卡既就係去鞍馬同貴船神社既鞍馬線
今次搭到鞍馬線既觀光列車きらら(Kirara)



同普通列車唔同既地方就係個窗寬落左
座位有一邊係完全對住窗，呢個設計係有原因既




因為市原站至二ノ瀬站之間既路段係紅葉隧道
啲人就可以坐係度望住啲紅葉
咁姐係面窗嗰邊啲紅葉係靚啲



我發誓我放既所有圖都冇經過任何後製
人眼睇都真係咁靚

一乘寺食過極雞
勁重口味

極雞仲高分過高安
但係個賣相真係令人卻步…

幾星期前去京都勁多中學生高中生，懷疑11月係畢業旅行嘅旺季