[偷得浮生半日閒]用8日獨遊西日本 (京都‧名古屋‧奈良‧廣島)

之後就繼續行上去
因為人多路窄，要經常注意後面有冇車
如果見到就最好讓一讓
呢度啲司機係唔會響鞍嚇你走，會跟係你後面架



貴船川同鴨川一樣都有得食川床料理
夏天既時候啲旅館餐廳會係河上面搭個台
之後就放榻榻米同枱俾人係度食飯，順便消暑
雖然而家都踏入深秋，唔啱季節
但就擺左張凳攞啲石砌個心心係度俾人打卡


再行多一陣就到貴船神社結社
呢度就唔係祭祀水神，而係緣結神
所以係情侶必拜既勝地之一
不過呢個緣結神既故事其實都幾慘
----------------------------------------------------------------------------
女主角叫石長比賣，老豆係山神，仲有個好靚既女神阿妹
本來就同個妹一齊許配俾天皇既祖先瓊瓊杵尊
但條仆街仔嫌家姐醜樣，退番貨俾外父
雖然發生左件咁既事
但佢都希望祝褔情侶感情永固，就成為緣結神
----------------------------------------------------------------------------
緣結神個名"石長"就代表關係好似岩石咁恆久不變
神社中間有舊船形石，係信眾既奉獻

再行就會到奧宮，係貴船神社發源之地
1000年前受洪水侵襲之後搬到而家本宮既位置
出面都有一條紅色燈籠既參道，不過係平路
入面搞緊市集，有人吹Jazz同唱歌，感覺有啲奇怪





貴船神社三個宮唔駛1個鐘就行完
諗住行番去本宮睇，點知條隊仲長過之前
我獨遊就無謂浪費時間係啲兒女私情度
當刻先3點，附近要行既野都行哂
所以臨時將Day3其中一個行程調上黎
就係去錦市場

首先就係要搭巴士去貴船口站搭叡電轉京阪
因為嗰期有活動，原本個巴士站搬左落南面100m
由奧宮行落去用我既速度都要15分鐘
不過沿途風景幾靚又係落斜，算幾好行

呢度既公共交通就只有京都巴士33號
係鞍馬同貴船地區用交通Pass要注意一樣野
就係呢個區域並非京都市內均一車費區間
所以大部分京都市交通票券都無法適用
但我嗰張關西周遊券係全包既



搭5分鐘車就到貴船口站，附近有紅葉睇



...走先

當你以為特急就已經係最快列車既時候
京阪仲有架快速特急 - 洛楽
由京都總站出町柳去大阪總站淀屋橋只需要48分鐘
不過黎到送車尾，唯有搭番特急
今次就專登行去第六卡坐上層，感覺幾靜
其實我只係搭2個站，4分鐘就到




由貴船神社黎到祇園四条站都差唔多要1個鐘
之後就經過鴨川去河原町嗰邊
相信大部分黎過京都既人對呢個位都唔陌生
之前黎過坐係鴨川河畔吹下風都幾舒服，姼

去錦市場既路同幾年前比依然咁多人
但多左份寧靜，少左好多藥妝舖同中文
唔會見到啲大喼神係度橫衝直撞
咁樣先至係我認識既日本



星期日既錦市場都幾熱鬧
但就絕對唔係好似年宵咁人迫人
呢度雖然有好多野食，但頭先可能飽得滯
而家聞到香味都冇乜想食野既感覺

こんなもんじゃ [Tabelog評分：3.49]
黎到錦市場我既首選係呢度既豆乳雪糕
幾年前仲插住舊八橋俾你𢳂雪糕


但冇食幾年，杯野冇加到價但係唔同左樣
不過同舖前面個模型100% Match，符合商品說明條例


呢杯豆乳雪糕既豆乳味同以前一樣咁濃
又唔甜，好似飲緊豆漿咁
但有個唔好處就係杯野溶化速度極慢
我坐係度望住條街昅女不停地舔呀舔
用左半個鐘先舔完杯野



時間過得好快，由天光舔到就快天黑(5點)
如果你覺得呢日行程就完既話，實在太睇少我
係11月既星期五六日會有京の奥座敷・貴船もみじ灯篭
貴船神社周邊既旅館街入黑後會亮燈
橫掂有時間，車錢又全包，唔係唔去呀嘛
然後我發覺有少少中伏既

京阪當然要坐Premium Car

請問京都巴士33號係咪唔可以用京都巴士一日pass？

搭2個站就唔浪費錢喇

係

Live咗

點樣搭車就唔重覆講，只係同頭先相反方向
今次終於影到ひえい既真身




今次我又搭到鞍馬線既きらら
但開車既時候我就發現
明明係期間限定活動，點解都咁少人搭車既
兩卡車全程基本上就係任坐



當列車離開市原站，車長就會熄燈
慢駛穿越亮左燈既紅葉隧道
雖然都幾靚，但因為啲葉未紅
所以就未去好靚，但都值得黎睇下既

黎到貴船口站坐番京都巴士33號
係活動期間會加班行駛，唔駛驚冇車搭
本身驚臨時班次會唔會唔俾用Pass，事實證明係得既


一落車就發覺啲燈咁熟面口既
原來我幾年前係嵐山花燈路見過，不過唔出奇
因為都係NAKED Inc.呢個創意藝術團體策劃





頭先係貴船神社落斜去巴士站冇乜壓力
但而家係上斜，未食飯都幾吃力下
沿途除左地下多左啲花燈，打多左燈之外
實際上同朝早睇既景好接近
唯一一樣野唔同就係人車都少左好多
仲要我行得快領先左主車群一大截
如果唔係有啲人行番落黎，我都驚自己行錯

夜晚既貴船神社本宮別有一番風味



其實我應該趁嗰陣玩水占卜，都冇人排
但因為入黑比我想像中凍好多
驚凍死想趕返酒店就冇去到，所以冇左件事



係神社留左10分鐘就衝番落去搭巴士
來回2個鐘去得10分鐘，絕對係唔划算既



回程都仲可以睇多次紅葉隧道
有啲發燒友會專登係市原站落車
再搭番對頭車去影多次




今次我就唔咁傻搭去丹波橋站轉近鐵
係三条站都可以轉兩程地鐵番京都站
但撞正架地鐵都係京阪既列車
因為地鐵東西線同京阪京津線係直通運轉
所以唔睇清楚總站上車既話
分分鐘會去左琵琶湖

番到京都站已經8點
第一時間去京都拉麵小路食飯
呢度匯集左唔少高分既拉麵店，評分都唔錯


最後就鎖定左呢間
因為佢係最多人排隊既
東大 京都店 [Tabelog評分：3.59]


東大其中一個特色就係生卵無料
你夠膽生食雞蛋既話食幾多隻都得


徳島ラーメン 唐揚げセット <1030yen>
因為頭先係高安個餐太回味
黎到東大我專登揀左個一樣既餐黎對比下


德島拉麵既特色係醬油豚骨湯底
味道濃得黎唔會死鹹
不過同高安比就冇嗰種漿口既濃厚感
加左生蛋落湯撈勻之後就有番嗰種感覺
醬油味淡左又冇咁鹹，但都濃味到試唔出蛋味
麵條就食唔出乜野特別
叉燒就係醬油五花腩，濃味但香口
正常得2塊，加200yen叫肉增就會多啲肉



炸雞就係負評狀態，厚粉之餘又唔脆
雖然佢係熱辣辣，但係咬落去成口油
似係翻炸但係油溫唔夠
好在本身有蒜味搭救，如果唔係我實食淨

食完就順便去京都站換埋張關西&廣島地區鐵路周遊券
用官網買會貴啲冇乜著數，除非你要預早訂車飛
我經Klook買，俾完錢就會出個QR Code憑證



京都站自助換Pass既地方
就係中央口左邊綠色嗰啲機
見到咁多外國人係度就知你冇黎錯





換完周遊券就換指定席
如果想知詳細啲既去番鐵道Post #1
咁就成功一己之力出到第一張日文指定席券




搞掂哂，返酒店沖涼訓覺


Day2 完

Day3行程....會斷腳

下年去試下呢間

4月去lm

點解樓主d相打格打唔打d
同埋樓主用咩影？手機？

iPhone 13Pro影相比我想像中靚，完全唔駛執相
btw本身都鳩影開，但今次專登跟住啲單反人
佢地啲取景角度真係靚好多

Day 3

個個都話Day3 Chur爆，我又唔係咁諗
因為好多景點都順路可以搭一程車就到
我又計好哂時間好少要等車，所以時間好好駛
至於話會唔會斷腳...見仁見智啦
Day3步數：28904 | 步行距離：23.4km
呢日既都唔係行得最多嗰日


呢日去啲景點其實好大路
我都無謂介紹太多，大部分放相算

首先食個好飽既早餐先


食完就去伏見稻荷大社
雖然呢日都會用關西周遊卡
但由京都站出發用呢張野好唔方便
搭巴士班次少又驚塞車，搭私鐵兜遠好多又要轉車
而搭JR奈良線去稻荷站只係2個站
橫掂車費150yen，豪俾你
記住千祈唔好搭快速，會飛站架

稻荷站一出就係伏見稻荷大社
之前黎過3次，每次都多人到我好想走
今次係開關冇耐黎到，超少人
但我觀察到西方遊客比例居然接近一半
其實好正常，包括今年2022年在內
呢度榮獲TripAdvisor日本最受歡迎景點首名好多年
原來頭10名我今次行程去左7個




平時千本鳥居想影到冇人都難，而家好易





之後就係稻荷山登山之旅
全程冇乜分叉路，指示都好清楚

因為陣間book左係祗園食Lunch要好準時到
所以要預時間落山，登唔切頂
只可以去到四つ辻過少少





9:30開始神社門口人流激增
不過而家天色比頭先靚左好多





想去個廁所姐，駛唔駛咁話我


JR 221系大和路快速