[偷得浮生半日閒]用8日獨遊西日本 (京都‧名古屋‧奈良‧廣島)

唔怪得成架JR九州車咁

廣島本通 原爆 宮島 呢3個點應該點排先順

正常就係我咁行法，但係我唔行街就直接由本通衝去宮島
如果第一次去就市區一日，宮島半日以上

看透巴我冇估錯你，果然行文流暢幽默風趣百科全書咁，一定有撚排出，所以一個月前專登 bookmark 唔睇住


不過居然今日都未出晒
live 咗

仲諗住一日搞得掂可能要skip本通

我上次係宮島 原爆 本通

宮島如果一早去可以食完晏就去原爆，下晝行完原爆就行本通行到收工

宮島大概要行幾耐 我預10點左右到廣島站

好難講，就算我11點到宮島都玩到5點幾先走
我剩係去食飯去景點同行山，冇行過個商店街
所以你第一次去唔行山應該都夠玩半日以上

差唔多寫完架喇，proofread緊

但佢10點先到廣島就2揀1算啦

我講緊8點幾到廣島都係剛剛好行兩邊

去宮島途中見到好多蠔排，養既就係馳名世界既廣島蠔
廣島灣呢度風平浪靜，水中微生物豐富，仲係鹹淡水地帶
所以非常適合養蠔，出哂名又大隻營養價值又高


5分鐘之後隻船就會轉左，船既右邊會對住宮島沿岸
點解之前提過要企係船既右邊
係因為呢度會對正日本三大木造鳥居之一 - 嚴島神社大鳥居




作為擁有世界遺產同日本三景兩大名銜既宮島
無論係外國人定日本人都對呢個地方情有獨鍾
疫情前既2019年來島人數高達460萬人次
疫情期間少左外國人黎，但都仲有200萬人次到訪
就算而家開左關冇耐黎到，感覺上人流同以前冇乜大分別
落船出碼頭迎接我既同奈良一樣，都係鹿
但記住呢度禁止喂鹿呢種行為，大家要守規矩
啲鹿冇學壞到所以好Cool，行到咁近影都唔肯望鏡頭




碼頭轉右就係表參道商店街，好多手信舖同餐廳
因為上次已經行勻，所以今次我就直奔餐廳

牡蠣屋 [Tabelog評分：3.64]
宮島係正廣島灣隔離，自然就係食廣島蠔既好地方
所以好多餐廳轉登係門口放爐賣即燒廣島蠔，呢間都唔例外
雖然燒蠔個師父已經好努力咁燒，但似乎力有不逮
要清哂佢面前啲碟起碼燒多100隻先搞掂
因為呢度評分幾高，開左門半個鐘就已經排長龍等入座
不過就唔係入面冇位，而係樓面唔夠人帶位
睇黎情況同香港既餐廳一樣，復常之路嚴峻



等左5分鐘終於安排我坐樓上既長枱
呢度既Lunch Set首選牡蠣屋定食，基本上就係全包乜都有
另外再叫左個法式焗蠔同埋檸檬梳打




Menu個背面係打錯字定係想搞Gag


広島レモンソーダ <550yen>
廣島除左蠔出名之外，所處既瀨戶內海地區溫暖少雨
所以盛產橄欖同檸檬呢類需要日照時間長既農作物
呢杯廣島檸檬梳打賣相一流，充滿夏日氣息
杯底黃色嗰啲係檸檬糖漿，配合冰面既糖漬檸檬
再加埋梳打水三重夾擊底下，飲落又甜又刺激
佢既甜酸度同味覺糖有得揮，提神威力勁過Red Bull
之前仲讚完日本啲野食冇以前咁甜，睇黎我錯了
不過只要唔好完全攪勻唔好飲個底，其實都幾好飲
如果配有苦味既Highball或者豬閪應該會更加夾
慎防有人以為我真係奶過豬閪，係度澄清番先
豬閪姐係日本既燒酎，讀音真係Chuhai
杯上面既GEBURA係同一個老細開係同一條街既酒吧
如果剩係對飲野有興趣可以去嗰度幫襯

牡蠣屋定食 <2365yen>
落單既時候店員話製作需時，最終等左20分鐘先有得食
除左杯野飲之外，全部都係蠔
沙律聲稱係淋左蠔汁製成既沙律汁，我就食唔出
蠔既功效相信唔駛我多講，男士們有福了嘿嘿嘿


蠔飯 <かきめし>
成個定食唯一既澱粉質，但蠔既份量好似仲多過啲飯
因為用左蠔汁黎煮，所以有少少似蠔油咁既色
質感好似釜飯咁樣軟淋淋但好重蠔味
蠔就用同一個汁煮過，冇乜點縮水仲係好大隻
因為煮完收乾左水，食落比較彈牙而且完全冇腥味


炸蠔 <かきフライ>
剩係賣相已經贏哂，外表金黃又炸得非常乾身
咬落去脆口兼噴汁，唔會有一絲油膩感同腥味
點埋他他醬同蠔醬一齊食就更加開胃



油浸蠔 <牡蠣屋のオイル漬け>
外表望落好似蠔豉咁，食落好鮮味
不過就偏硬偏鹹，用黎送酒一流


佃煮蠔 <牡蠣屋の佃煮>
蠔醬 <牡蠣ドレッシング>
左邊既佃煮同油浸蠔望落有啲似，但味道就甜啲黏口啲
隔離就係他他醬同蠔醬，後者味道非常出色
佢用蠔碎醬油味醂等材料煮成，所以好香濃
食法類似食炸鯪魚球點蜆蚧醬咁，專點炸蠔黎食
因為唔太鹹，所以加落飯或者就咁食都得


蠔味噌湯 <牡蠣の出汁>
本身以為佢係普通味噌湯，原來裡面仲有隻蠔
所以飲落好鮮甜，同時又唔會好鹹
但因為煲哂啲味出黎所以舊蠔縮哂水有啲韌
以前係やよい軒飲過要換腎既貝汁之後對海鮮味噌湯有陰影

燒蠔 <焼きがき>
燒蠔唔止有堂食，仲可以外賣係舖外面食
頭先都講過門口個師父完全燒唔切甩哂單
最終食完個定食再等多10分鐘先有得食
啲蠔燒完又唔會太縮水，外面乾身咬落去仲係爆汁
唔腥得黎仲有好濃海水味，但咬到有蠔殼扣少少分



法式焗蠔 <牡蠣グラタン>
蠔俾人叫做海中牛奶，天生就同芝士呢類含豐富蛋白質既食材好夾
因為有層芝士膜係面，所以保留左更多水份
味道比燒蠔更加柔和，仲可以飲埋啲蠔汁，正

頭先起碼食左12隻蠔，個人充滿力量
即刻就衝去宮島行程第一站 - 嚴島神社
穿過商店街，沿海邊既表参道就會行到去



呢度啲鹿唔止唔理我，仲縮埋個頭唔俾我影
係咪聞到我尋日去過奈良周身陌生鹿味
鹿s：I don't give a shit




大鳥居係宮島既象徵我相信冇人會反對
作為日本少有既水上鳥居，最特別係唔同時間會有唔同既觀賞角度
而家漲潮睇落就好似係海中心咁樣，退潮嗰陣就可以行過去
初代既大鳥居早於1168年就建成，作為嚴島神社既海上參拜入口
但經過多次天災洗禮冧完再起，而家呢個已經係1875年建成既第9代



漲潮嗰陣仲可以參加見學團泛舟過去

有得坐船咁特別

我嗰時係潮退喺左邊條橋行過去

其實一路都有呢啲人力船
不過會視乎天氣同潮汐時間而開，可遇不可求

我本來都諗住行橋過去，點知中左伏，遲下講

個鳥居原意應該都係神社入口，俾人由下面穿過進入神社範圍？

係咪過左見學時間，冇記錯去到12點咋

咁放棄本通
剩係宮島原爆算
行邊度先方便d

鳥居係神社入口，係神專用既入口
理論上人係應該走側邊過而唔係中間過
我就冇留意啲船有冇穿過去
不過是旦啦，唔通去伏見稻荷唔行得千本鳥居咩

Bingo

最好睇番神社潮汐表，因為睇鳥居唔行過去好蝕底
通常退潮都係一早一晚，視乎月份
我就揀晚嗰個時間去

3點半潮退 即係唔洗諗原爆左先

我見老一輩日本人平時入神社都係喺鳥居下面入，不過入前同離開都面向神社鞠個躬咁。後生直頭就咁行過唔鞠躬。我都係照鞠躬咋...


應該都夠入鄉隨俗嘅...