[偷得浮生半日閒]用8日獨遊西日本 (京都‧名古屋‧奈良‧廣島)

疫情前帶住兩老係東京鈴波食左餐好好食既魚
今次去關西想回味下，就揀左名古屋作為第二旅遊點
因為鈴波既總店就係呢度
仲有個原因就係岡山姫路啲酒店好貴，呢邊平啲

[帶住父母去旅行]12日橫越日本列島 (札幌 ~ 鹿兒島)
- 分享自 LIHKG 討論區
https://lih.kg/pQuAmfX

鈴波 栄南店 [Tabelog評分：3.53]
鈴波本業係賣みりん粕漬，姐係西京燒啲fd
餐廳只係副業，所以唔係好多位坐
總店係呢度附近，剩係開Lunch時間
所以就黎左呢間分店食晚飯
呢度既餐牌清一色都係定食，只係配菜唔同
每日用既魚都會唔同，門口個牌會寫明



隔離枱幾個嬸嬸食完行錯路去左廚房
之後就聽到店員同佢地瘋狂すみません
唔知係因為冇乜客定年紀相近
佢地無啦啦講點樣整條魚，互相交流煮食心得
傾左成10分鐘先行番出門口埋單


鈴波定食 <1540yen>
佢地講完既同時個餐就送到黎
定食除左魚之外都仲有好多野
左上角係海帶絲配魚糕，清清淡淡都幾好味
玻璃杯裝住既係果醋，非常醒胃
隔離就係糖浸丹波黑豆，又香又淋
味噌湯又係我好唔鍾意既紅味噌



舊魚同上次食一樣都係白ひらす
魚柳加入味醂同酒粕醃漬，將多餘水份抽出兼辟腥
所以肉質好彈牙，就咁夾起都唔會散
而味醂同酒粕本身帶有甜味同香味
焗到好似叉燒咁有少少燶邊，非常惹味

問JR站長佢會俾紙你出面個電話亭自己CALL

唔知可以咁
來回行咗成兩個鐘

下個月去試下先

日本酒店真係無邊間有view
成日派啲後巷房俾外國人住

咁勇
睇地圖最近既地鐵站出要行半個鐘先去到

咁我又唔介意既，又唔係成日係酒店
我要求只係舒適同性價比高
遲下會講下難波間酒店

我單程都行咗成個鐘
仲要行埋回程

PUSH

榮除左地下街之外，地面仲有一堆百貨公司
我個人就麻麻地行呢啲地方
所以就行左去Oasis21同埋名古屋塔嗰邊
夜晚睇都幾靚，但就真係冇乜特別
唔好以為好夜，當地時間6點未到



Oasis21下面有間便當店
咁大盒烤雞雜錦便當同玉子雞飯都係HKD40
仲要係熱辣辣賣相咁靚，香港都幾難搵


橫掂冇野好行，就去埋新開冇耐既Aeon則武之森店
搭地鐵東山線去龜島站，跟住路牌行5分鐘就到



行到等過馬路嗰陣見到班JK影個天係度やばいやばい咁
我望一望，原來啱啱開始月全蝕
影完相send去家族群，好快收到message
----------------------------------------------------------------------------
媽爸
：快啲去室內避一避啦，小心血光之災呀
：咁做乜仲行街呀，返酒店啦
：咁迷信既你地，我幫你地買野喎
：唔駛專登同我搵啦，返酒店啦
：(已讀不回)
----------------------------------------------------------------------------

唔知係太早定關月全蝕事，個商場真係冇乜人
裡面好多舖頭，而且超大超新，非常好行


去個廁所都要擺個牌叫人唔好傾偈會唔會有點兒那個


今次黎到發現多左好多扭蛋舖
榮地下街又有，Aeon呢度都有



裡面有間2層高既TSUTAYA書店
中間接駁既樓梯背景有個好靚既書櫃牆
不過唔知係咪太多人過黎打卡影響生意
而家大大個牌寫住請勿攝影，咁我好守規矩就唔影了


去完Daiso幫完老母添置日用品
去埋藥妝店幫同事朋友格價之後
當然就要去超級市場買野食
見到啲便當平到癲，用匯率6算計都係23蚊


但呢度既俾錢方法令我大開眼界
店員嘟完啲貨品之後就放我個籃去後面部自助機俾錢
咁點解要個店員係度，我全程自助唔好

買完野就行返酒店，出到黎就見到血月


行到近名古屋站就見到間松屋
橫掂行到攰攰地，食多餐無妨


呢間松屋比較新式，同マイカリー食堂共構
係食券機可以買到哂2間既野食
舊式既一坐低就有店員過黎撕食券同送餐過黎，食完就走得
呢度就係等叫號碼自己出去攞餐，食完要自己捧番去回收
相傳因為請唔到人，唯有靠咁樣減少樓面人手同工作量


ネギねぎ塩豚焼肉丼並盛 + 豚汁 <740yen>
我叫番好耐冇食過既蔥鹽豚肉飯加豚汁
豚汁同以往一樣水準，多配料又好味
但個飯好似改左整法，同以前完全唔同樣
啲肉煎得唔夠香口又鞋，蔥鹽汁直頭唔同左味
雖然唔係難食，但實在令我太失望
同一時間有個醉酒佬坐係位好大聲講野
極不安，拿拿聲食完走

行番去名古屋站就見到好多人圍住個閘口
原來撞正JR東海"運転見合"，姐係路段停駛
係香港如果港鐵全線閪冧主要靠免費接駁巴士
但通常都會變成月頭將軍澳線甩卡事件咁
個個都唔知去邊度搭車搞到大混亂，巴士上客又耐
最終搞到地面交通一齊攬炒閪冧
呢度就有"振替輸送"呢樣野
可以搭指定正常運作既公共交通去最接近既車站
搭名鐵所需既車費就由JR東海會幫你埋單
安排簡單又可以快速應變，絕對好過香港
不過排隊去名鐵閘口條隊長過百米
等得黎JR東海分分鐘搞掂通番車



所以好多人都走哂出去影血月



我就番酒店食宵夜準備訓
牛奶除左明治おいしい牛乳呢款之外
よつ葉牛乳都係非常好飲
因為比較少見，通常一見到我就會買黎飲
質感同奶味濃過明治，奶控必試
泡芙係栗子味，又多Cream又唔甜又香
咖啡牛奶布甸就略嫌唔夠咖啡味，都好食




Day 4完

よつ葉同好

我都有睇到血月，嗰晚我係博多

當行下山都唔錯

Day 5

Day4步數：31018 | 步行距離：25.5km
Day5步數：30100 | 步行距離：24.7km

平時係京都6點幾就要起身，就番7點食早餐
呢日我定左係休息日，行程少行街多
但不知不覺都行左勁多路
前一晚好攰超早訓，訓左超過8個鐘先起身超精神

一起身開電視就講番前一晚月全蝕


去食早餐之前首先去左買Pass先
因為呢日都搭得幾多巴士同地鐵
所以就會買バス・地下鉄全線一日乗車券
只要1日搭到4程車就會回番本
去營業所或者Counter買既話張券會靚啲
但我費事煩就去附近地鐵站售票機買
張券就係普通綠色磁飛



買完飛就出發去Cafe食早餐
但間舖8點開門，我早左到摸門釘
隔離就有間金券買取店俾我消磨時間
見咁多人有興趣，橫掂有影相就講多少少啦
之前講過大部分上市公司都會有株主優待券
啲股東用唔著就會賣俾買取店，再俾佢地以低價轉售
我上次去嗰間就要問店員，但唔識日文都冇問題
因為舖頭門口會印左熱門票券既名稱同價錢
叫個店員出黎This This This再俾錢就得
呢間就仲簡單，用自動販賣機連野都唔駛講

投資價格可升可跌，唔同地方買同一張金券既價錢都會有出入
我係難波買近鐵株主優待券就1780yen，呢度就貴啲
但唔知點解連交通一日券都會有得買，買2張仲可以平10yen
除左交通金券之外，仲有好多平過原價既現金券同門票
丸龜，M記薯條，磯丸水產，睇戲都會有得平

天然酵母の食パン専門店 つばめパン&Milk 名駅店
[Tabelog評分：3.49]

名古屋有一種好獨特既Cafe早餐文化
就係叫杯咖啡就會送多士，呢間都唔例外
而呢間舖最出名就係麵包，會比較啱我
因為我係唔飲咖啡既，啲豆幾靚都冇用


早黎就俾左張4人枱我坐，唔駛10分鐘出面就坐滿了



早餐多士得2款，普通多士同小倉多士
小倉多士係名古屋其中一種名物，會係多士面加牛油同埋紅豆蓉
平時啲Cafe通常都係送半塊多士
呢度有成塊之餘仲多隻烚蛋，所以都要加錢先食到
早餐+310yen食雪糕會係啲乜野人


呢間Cafe最出名就係雙重芝士玉子燒三文治
不過11點後先有，作為網紅店經常都要排隊


飲品種類好多，除左咖啡仲有奶，果汁同茶之類


ミルクココア(ICE) <550yen>
小倉トースト <+220yen>


等左5分鐘個餐就黎到
杯凍可可唔係好甜，奶味非常濃，飲完都幾滯下


係香港食茶餐廳厚多士，外皮一般比較乾硬
中間白色部分會凹左落去，食既時候仲好多碎跌出黎
呢度既多士用天然酵母發酵，表面焗脆左裡面都仲好濕潤
成塊多士都好實淨，中間部分都冇乜凹陷
撕開既時候要俾啲力先扯得開
口感煙韌得黎又冇乜碎跌出黎，加分
小倉多士既小倉唔係地方名，而係指半豆半蓉既狀態既紅豆蓉
所以食落同時會有蓉既幼滑同一粒粒既口感
撈埋牛油同忌廉一齊食味道香甜幼滑兼帶有少少鹹味
味道豐富，絕非坊間麵包舖能夠整得出既質素

食完就出發去名古屋城
係名古屋站出發官網教你搭地鐵或者搭基幹2號巴士
去到市役所再行過去東門入口
但我就搭名駅14號巴士行去正門，咁就唔駛行回頭路
名古屋搭巴士既方法同香港一樣，前門上車俾錢後門落車
搭一日券既插張飛去司機位隔離部機就得
原來司機揸得太快早左到站，要停到夠鐘先可以開車


係名城病院行10分鐘就會到名古屋城正門
沿途好多紅葉同銀杏樹




我黎到先知名古屋城天守閣閉鎖中
但一場黎到就去埋啦，橫掂冇野做


憑名古屋市區既交通一日券，入場券可以減100yen
但張入場券變左紅色，正價飛就係金色既

諗住一開門就入場就會少人啲
點知又係有一堆修學旅行團


咁啱撞正菊花大會，有大量獲獎菊花野外露出
非常適合同志們前來觀賞




呢張菊花圖好似Mirror其中一張Poster

正門對住天守閣左邊就係西の丸御藏城寶館



西の丸以前係名古屋城既糧倉
為左慶祝開館一周年就送儲備糧俾入場人士
滿心歡喜諗住係啲乜野糧，一反轉黎睇
DLLM派過期野，雖然都食得但感覺並不太好
攞到返香港繼續放佢係度做儲備糧



裡面既展板主要講述名古屋城既發展
睇唔明但有興趣既人可以掃描主題旁邊既QR Code
佢會轉去一個網頁翻譯中文俾你睇，都幾貼心




名古屋城有樣野好出名，就係多金
天守閣屋頂兩端都會有隻金鯱
而每一塊既鱗片都大過我隻手，可想而知有幾名貴

既然入唔到名古屋城，唯有繞場一周
係西面同北面睇都冇乜野
東面個升降機塔完全降低左呢個名勝既歷史價值
原本既木造天守係二戰末期名古屋大空襲燒毁
係1958年先用鋼筋混凝土重建成而家咁既樣
到2016年因為耐震性低下而要封閉整修
而家傾緊緊會唔會拆左佢用木起番





隔離無啦啦有隻天空之城機械人兵訓左係度
仲要碎屍萬段咁，嚇死人咩


隕石？


名古屋城本丸有3個主要建築
右邊係天守閣，中間係小天守閣
左邊最近我既就係本丸御殿，可以入去參觀


同天守閣一樣，原本既本丸御殿都因為空襲燒哂
去到2009年先開始根據史料修復，到2013年開放第一期
到而家其實都未全部完成，不過都夠你睇
雖然佢唔係國寶，但都要係門口除鞋

入到黎就俾一大堆金色既壁畫同絲柏所包圍
呢種金碧輝煌既感覺係日本都好少有
因為呢個城係由首任幕府將軍德川家康下令修建
當時幕府建立冇耐，家康為左測試大名既忠誠度
號召佢地派人同物資過黎名古屋築城，是為"天下普請"
：邊個唔過黎幫我起城，邊個就唔俾面，打佢老母
而大名礙於幕府既淫威之下唯有服從
作為家康第9個仔義直係尾張藩既城池，自然起到好靚
間接削弱左唔同大名既人力同財力，無力出兵造反
同時家康就免費獲得一座堅固既城池增強自己勢力，一舉兩得

本丸御殿係藩主住既地方，建於1615年
奢華程度同將軍擁有既京都二条城有得揮
又因為嗰陣保持得非常完好，被列為當年既日本國寶第一號
係呢度不得不佩服日本人做事認真既態度
當年佢地對本丸御殿做左好多測量同拍攝工作
留低左大量準確同詳細既圖紙同紀錄
大部分障壁畫係二戰末期大空襲前轉移到安全既地方
所以修復既時候專家同職人唔駛大傷腦筋
跟番史料用番相同既方法同物料重建本丸御殿建築同翻新障壁畫
而家睇到既景象基本上完美重現當年既風采

除左野外，室內都有得賞菊




Edan以前個髮型既概念原來出自呢度



之前提過名古屋城而家要整修
有團體就積極推動拆左佢重建為木造天守
個募款箱都整得幾精緻，呢啲就係職人既功力


好似冇乜人想賞菊咁喎


男廁原來係人都入得，好平權