[偷得浮生半日閒]用8日獨遊西日本 (京都‧名古屋‧奈良‧廣島)

Day 7

呢一日行程本來就係大阪市區Hea下就算
直至出發前幾星期見旅遊Post有人講大鳥居準備解封
橫掂上次拖住屋企人去唔哂啲景點，天氣又唔好
今次就趁開關冇耐人少少去多一次
為左可以去得切啲景點，我預先整好左個定製版乘換案內
配合我既步速盡量減少轉乘後既等車時間，將留係景點既時間最大化

前一晚靠殺龍巴斯同埋休息，隻右腳已經好番好多
雖然唔係完全復活，但最起碼行路唔會拐下拐下
為左早啲開始行程，5點幾天都未光就要出發，外面氣溫8度
我發誓我唔係落完Club先行出黎架


難波去廣島首先就要搭去新大阪站轉新幹線
最直接既方法就係搭地鐵御堂筋線，大約15分鐘就到
雖然附近有JR難波站，我可以憑周遊券免費搭JR過去
但係個站隔涉得黎班次又少得可憐，仲要轉乘幾次先到
地鐵就直達，我行落去地鐵月台都唔駛3分鐘
嗰280yen車費豪俾佢啦

日本啲地鐵站都會貼一個乘降位置案內既牌
話俾你知每個站去邊卡落車會快啲到扶手電梯，開車門方向等等
點解香港冇啲咁既野


到左新大阪站諗住用App買個M記早餐上車食
點知主菜薯餅居然冇貨，咁就唔食了
日本既M記早餐居然平過香港，美麗新香港


我嗰張關西&廣島地區周遊券正價15000yen
因為係日圓歷史低位係Klook購入兼用埋優惠碼，只需要港紙713.7
新大阪去廣島單程新幹線さくら指定席車費10420yen
來回已經回本有突，仲未計來回宮島既在來線同船錢，非常抵用
如果想留番張新幹線指定券留念既話
就唔好將佢連Pass隊埋入閘，否則你出閘會食埋張飛

新大阪站係東海道同山陽新幹線既分界站
雖然有始發同總站列車，但大部分班次都係直通運轉
來回方向既列車都係會繼續駛去東京或者博多方向
再提多一次揸JR西日本Pass唔包新大阪以北既新幹線
因為嗰邊屬JR東海營運，你搭左就要補全費
想去京都同米原要去在來線搭特急或者新快速過去

呢期成日睇旅遊Po都見到唔少新手對於Pass既使用範圍有疑問
我收錄幾個新手好易犯既買Pass謬誤，輕則破財重則鬧交：

1. 未諗行程先諗買邊張Pass
正常應該係定好左去邊度食乜野，計埋交通費先再諗用唔用到Pass慳錢
諗左Pass先諗行程係鐵膠先會做，因為佢地既行程就係搭車
同埋去旅行最重要係有目標，想去邊就去邊
唔好因為Pass既使用範圍綁死你唔去某啲想去既景點
更加唔好因為張Pass包而去埋啲奇怪地方同景點浪費時間
如果同朋友去，大家意見不合隨時開片都似

2. 買Pass會抵啲
經過我多年經驗，Pass要抵用需要做兩樣野，一係去得遠，一係停得多
但兩樣野此消彼長，去得遠交通時間長就自然唔會停得多
停得多去景點既時間長左，自然就唔會去得遠
遊客買Pass無非係為左車費封頂，搭多左都唔駛再俾錢
但以發行機構既利益出發，輕易回本就代表張Pass太平有加價空間
所以用Pass要回到本絕對需要plan行程慢慢計數，鳩用冇著數

3. 揸JR Pass係JR站上車，架列車一定係JR
未去過日本可能唔明，因為香港搭觀塘線唔會無啦啦搭左去荃灣線
而日本有直通運轉，唔同公司唔同路線都有機會駁通用同一架列車行駛
所以用Pass既時候要睇清楚有效區域同有效列車先好上車
關西呢邊其中一個例子就係スーパーはくと
呢架特急由京都開去倉吉，京都~上郡係JR區域自然唔駛補錢
但之後會經過上郡~智頭呢段智頭急行線
因為同JR直通運轉，搭起上黎其實唔係好覺係私鐵區間
揸全國Pass就要補呢段既乘車券加特急券，過左智頭又會變番JR區域
佢家下黃色衫，又變返著綠色衫，又變返著黃色衫
JR西日本同智頭急行關係密切，呢段路好多張Pass都包
唯獨係關西&廣島地區嗰張唔包，連智頭~鳥取都唔包
所以如果信左佢個名而買左呢張Pass
諗住可以玩哂廣島同鳥取既朋友，我真係恭喜你呀
搭呢架車去鳥取補錢仲甘過全國Pass，上郡~鳥取料金總共3100yen
寧願俾多2000yen買7日山陽&山陰地區，去埋博多同出雲都仲得
係度再次奉勸一句，唔識用Pass既一律建議唔好買

新大阪去廣島搭最快既のぞみ車程81分鐘
應該都仲快過平時由屯門去觀塘搭巴士返工
我就寧願搭停站多少少既さくら或者みずほ
因為佢既指定席1行得4個位，好闊落
のぞみ用同款車，但指定席同自由席一樣都係1行5個位
N700S就另計啦，今次冇機會搭到



カツ＆ポテトサンド <470yen>
旅茶房静岡茶 <134yen>
頭先係閘入面既DELiCA STATiON買左三文治同茶
薯仔沙律三文治表面睇個餡好多，但攞出黎睇側邊係冇餡既
薯仔沙律個醬有調過味，唔會過酸同過甜
再加左少少紅蘿蔔碎增加口感，味道唔錯
豬扒三文治超級厚，肉質軟嫩唔會好難咬，加埋啲燒汁個味好夾
靜岡茶係JR東海既出品，唔澀之餘仲有種焙茶既味道，好飲

去博多方向劃A席窗邊位望到瀨戶內海
可以望住個天由暗暗地到見到太陽


唔知係咪溫差太大，一出太陽就好似Silent Hill咁




特大荷物座席就係每卡指定席最後排座位既後面
以佢個說明黎睇，理論上只係訂左最後嗰行位先用得
藤原龍也我留意左你好耐，係新幹線老是常出現


90分鐘既車程就黎到廣島站，在晴朗的一天出發




上次落車迎接我既係宣傳山陽新幹線500系既吉祥物カンセンジャー
唔知係咪就快引退，好似搵唔返個紙牌
取而代之就係一架Mazda混能SUV CX-60，係精神既

個解釋好詳細，不過我估啲伸手黨都係唔會睇架啦，都係一嚟就買邊張Pass好

純粹有感而發姐，好多人冇睇清楚條款就上黎叫春
有時見得多呢類問題都唔想答

係，答到有啲燥

有機會都想去下Mazda Museum

有禮貌嘅話答下都冇乜所謂

同你買左同一張 仲諗住可以新大阪坐新幹線上京都

梅田出發既話大阪搭特急一程過VS搭1個站去新大阪轉新幹線

不過難波或其他地方出發要轉車就新幹線應該快啲

不過原來張pass唔包去京都果程新幹線

佢幅可使用區域圖係有啲取巧既
左邊係新幹線，過左新大阪站就轉左實色線JR
唔係批評啲乜，但我發覺個個新手都睇唔到下面啲字：

無法搭乘以下列車。
‐ 東海道新幹線（新大阪⇔東京）

我睇到 但唔知新大阪去東京係包埋指去京都

不過公道講句
唔熟鐵道係好易中招，唯有係錯誤中學習啦...

事不宜遲，一出站就衝去第一個景點原爆圓頂
廣島站南口可以搭廣島電鐵去
作為全日本最大既路面電車系統，佢有8條路線
如果唔想搭錯車，認住車頭寫住"原爆ドーム前"先好上車
我呢個交通魔童就搭先發既1號線過去，新手切勿模仿


繁忙時間啲電車排隊入站


車上面既廣告都提你廣島有2個世界文化遺產要去
今次當然就去哂啦


1號線因為會轉去本通，所以要係"紙屋町東"站落車
經地下商場行5分鐘去西8出口，一出就係紙鶴塔
如果搭2/6號線，過多2個站直接係"原爆ドーム前"落車就得




眼前呢幢危樓就係原爆圓頂，前身係廣島縣產業獎勵館
因為係磚同鋼筋混凝土混合結構，所以極度硬淨
廣島原子彈爆炸中心方圓幾公里建築大部分都夷為平地
但呢幢只係離爆心地160m既建築居然仲屹立不倒，被譽為奇蹟
遺跡保留與否既問題曾經被激烈討論
最終大家同意為左俾後代了解原爆既可怕，於是決議保留
亦因為呢個原因，係1996年成功列入世界遺產名錄

當年既爆心地就係離呢度唔遠既島病院
遺址變成後人營運既島內科醫院
當年原子彈就係呢度上空600m爆炸



原爆圓頂北面係橫跨元安川同本川既相生橋
呢條橋特別之處係會分叉去中間個島度，呈T字型
因為呢度接近廣島中心地帶，高空睇又成個靶咁
所以係原子彈既預定投放點同爆心地
只係當時大風吹左去東南面既島病院上空咁解



試想像係1945年8月6日，你係相生橋行緊
突然間見到天上面跌左舊野落黎，你會有乜野反應
無意中影到個太陽好似原子彈爆炸
重點係個方向都係啱既，發誓唔係改圖

係相生橋轉左去個島就係平和記念公園
可以係河對岸望番原爆圓頂同後面既紙鶴塔



沿著河邊行就係原爆之子像
為紀念一眾因原爆同核幅射而受害既小朋友
後面放左好多唔同學校既學生整既手工畫
而當中既共通點就係紙鶴，原因陣間講


原爆之子像前面就係一個長形既廣場
最後面打橫既長形建築就係平和紀念資料館
前面個火炬叫做平和之燈，呢個火唔簡單
係由全國唔同地方既寺廟同工業地區既火種集合而成
由1964年建立廣場開始就就一直冇熄過
象徵反核既精神永不熄滅



呢個廣場既方位係有特別設計過
資料館，石碑，火炬同原爆圓頂係成一中軸線
而塊石碑就係平和都市記念碑，碑上面寫住一段日文
「安らかに眠って下さい 過ちは 繰返しませぬから」
意思就係"請安息吧 錯誤不會再重演了"
碑入面裝住廣島原爆死難者名冊
上面馬鞍形既物體係遮雨亭，象徵受難者的靈魂唔會再被黑雨淋到
至於黑雨係乜，陣間講平和紀念資料館會提到



平和記念資料館入場費同5年前一樣，都係200yen
上次黎既時候本館裝修緊，所以收埋左好多展品
今次黎就可以足本睇哂

原爆ドーム唔被夷為平地除咗佢用鋼筋水泥起夠硬淨之外，另外因為粒原子彈喺空中爆炸，而原爆ドーム喺正下面就食唔哂最大破壞力嘅橫向衝擊波