[偷得浮生半日閒]用8日獨遊西日本 (京都‧名古屋‧奈良‧廣島)

仲有3個鐘先開始辦理登機，我當然唔會on99坐到夠鐘啦
搵Locker放低行李就黎到日本最後一個行程 - RINKU PREMIUM OUTLETS
搭1個站JR或者南海電鐵到臨空城站，落車行5分鐘就到
兩邊車程同車費一樣，都係5分鐘370yen
搭JR既話就要上右邊嗰架關空快速，搭はるか會去番天王寺




去Outlet既話對住摩天輪行就得
黎到呢度開始有返家鄉既感覺，因為廣東話國語滿天飛




後面就係頭先搭車望到既臨空城大廈


RINKU PREMIUM OUTLETS係離關西機場最近既Outlet
如果去機場前諗唔到有乜做，黎呢度Kill Time一流
唔需要擔心冇野行，剩係眼前Main Side呢度已經有150間舖
而且經常都有特價，你驚唔夠錢行耐左好過



Main Side過多條橋就係2020年擴建完成既Sea Side
有超過100間舖，裝修當然靚好多啦





兩邊加埋有超過250間舖頭，大路牌子接近你講得出都有
我3個鐘剩係行2樓都行唔完，購物王黎呢度睇住時間

話到明Sea Side，出面就係一望無際既大阪灣
左邊係臨空公園石灘，右邊就係關西機場聯絡橋
呢度有位坐又可以紮營，如果我得閒既話
買杯野坐係度吹下海風𥄫下野都可以過1日






買完野就係食飯時間，本來想食嗰間まめ寅好多人排
橫掂呢度有Rinku Dining美食廣場，就係度搵食



IPPUDO RAMEN EXPRESS りんくうプレミアム・アウトレット店
[Tabelog評分：3.09]
最後因為想食拉麵而揀左一風堂，都幾多人排隊，收錢收唔切
為左加快流程，有個妹妹仔走出黎幫手落單
落完就講個取餐編號要你記住，去到收銀講編號就可以俾錢
咁做其實係防止啲客嫌排隊太耐而去左其他餐廳
如果落左單先你就唔會走，呢招絕
我用日文落單冇乜問題，但妹妹仔語速超級快
快到我聽唔到個編號就去左同後面個客落單
好在我聽到前面係順Number，最終俾啱錢

黎得呢度就唔係食味道，而係食環境
呢度有塊落地大玻璃對住關西機場人工島，景觀係真正既海天一色
係度食一風堂，感覺昇華到好似食緊高級百名店咁，講笑


博多流とんこつしょうゆラーメン <880yen>
Cセット (+ 白ごはん・唐揚げ 4個) <350yen>


醬油拉麵好多背脂，所以啲油浮哂係面
整體唔鹹醬油味唔重，食落亦冇想像咁油，普通味道
拉麵係細麵，麵質正常
特別要提下隻溏心味付玉子熟得啱啱好
炸雞脆得黎多汁，味道正常




海邊真係好靚，嗚呀
但係時候不早，要返機場了

車站前面個商場搞緊鐵道失物市場
低價售賣過左保存期限既車站失物，姐係夜冷野
老花眼鏡同遮我都明解，點解仲會有戒指，電熱水壺同喼既



臨空城站係JR同南海電鐵共用設施既車站
閘機共用，上到月台先分開



呢度搭車要打醒十二分精神
機場方向1號月台係南海電鐵專用，可以搭急行或者特急Rapi:t
特急就要補多100yen特急料金，正常唔會咁搭
2號月台就係JR專用，揸JR Pass就只可以搭呢個月台既列車
如果搭錯左點算？冇野既，補番原價車費370yen姐




返到機場塞番啲戰利品入喼就去搞登機
嗰陣仲要整個綠碼俾地勤睇先得，而家冇左我就唔提喇
結果總重量30.5kg，俾我過到骨
另外我孭住1個接近吉既大背囊同超大Handcarry袋上機
個地勤識講國語，綁緊行李Label既時候望住我講
：你很會喔，可以買很多東西呢喔
：當然啦


頭先都睇到關西機場冇乜國際線出發航班
所以全日班機都剩係用北翼登機口
於是剩係開北面出發口做安檢同過關，搞到排勁耐
我早3個鐘過關避哂登機繁忙時間，所以10分鐘就入到禁區

入到禁區有個水牌同你講有乜舖，但大部分都係冇開既
全部人集中係北翼，南翼完全係死場一樣
嗰陣連Family Mart都只係開到6點





而黑暗中唯一的光就係北翼無人列車出面既免稅店同手信舖
個個都由螢火蟲變成蝗蟲，凡所到之處皆清空
因為呢度係遊客唯一可以盡情消費既地方
尤其係冇黎咁耐，未計自己食都要預埋家人同事親戚看更一份
所以全部都失去理性，Shut up and take my money.gif
熱門手信例如Royce同地區限定Pocky
補貨唔夠1分鐘就會搶哂，我靠手長搶到2盒
連周街都有得買既明治朱古力同卡樂B，個架都吉吉地
之後排隊又係一個災難，對我呢啲獨撚十分蝕底
因為好多都係1個負責排隊，其他人負責睇實貨架，一補貨就搜刮過黎
於是搞到俾錢超級耐，排左成粒鐘先俾錢
我見唔少香港人掃左十幾盒白之戀人，佢地係咪唔知Donki有



你同我講Yen平要掃貨有乜用姐，呢度乜鳩都冇
連手信都俾人掃哂呀DLLM
之後見Pocky補貨，又走左去買，排左半個鐘


排左2次隊都消耗左我個半鐘，時間過得十分充實
個個都攞住一大袋戰利品滿足地搭無人列車去登機口，包括我



見仲有少少時間就用埋啲神沙，首選Family Mart
因為貨品種類多價錢多樣化，容易砌啱個尾數
結果一去到嗰度就見到排隊人數同頭先手信舖有得揮
嗰度9成都係香港人，因為UO CX HX都係嗰個時段登機
相信大家都體會過係香港便利店排隊買野等俾錢既痛苦
總有人去到俾錢嗰刻先慢慢攞個銀包出黎搵散銀
而呢度情況嚴重10萬倍，因為香港人對日本神沙唔熟悉
去到要店員幫手慢慢數，用唔哂就叫朋友攞多個飯團補到夠數為止
結果前面排緊10個人，有3個店員收錢，15分鐘先輪到我
我剩係買2盒蘋果汁，攞定錢出黎10秒都唔駛就搞掂哂
之後就急急腳走番去登機口，啱啱好叫緊人排隊登機

因為我係U-First所以又可以排前面
但係登機口等左成半個鐘都未上到機
剩係見到啲地勤走黎走去又Say Sorry咁
最前面啲師奶偷聽到機入面啲空姐講電話
話係寄艙行李Label同實際行李數目不符，要派人周圍搵
最後見地勤推左幾件有Label既細喼上機之後就可以登機
成件事非常耐人尋味，復常初期都幾多甩漏
好彩冇出現保安系統故障呢啲咁嚴重既事故




班機入座率只係得8成，隔離有幾排都係冇人坐
所以走左過去坐，順便係機窗影埋日本最後既黃昏
因為頭先搞一搞，過哂鐘架機都仲未開
最後特別遲上機既係一對情侶，空姐隨即關上機門
佢地坐得後，所以就俾全機人啤住好似遊街示眾咁
佢兩個住行都真係幾趣緻



我班機做出史上最快時間，3小時33分鐘就降落香港機場
但係快又有乜野用，嗰陣仲要排隊檢測，排左成20分鐘
唔知係咪怕你會係機場匿埋，檢完就派左張有Barcode既綠卡俾你戴住
去到過關先收番，痴撚線




因為檢測拖一拖，又冇機降落
一去到行李帶啲行李已經到哂，直出機場
唉，話咁快又返到呢個勞碌既地方


[偷得浮生半日閒]用8日獨遊西日本 (京都‧名古屋‧奈良‧廣島) 完

我放棄咗冇抹過

原來はるか已經換緊車以為今年先開始換

後記

作為身邊第一批返鄉下既香港人
真正感受到冇乜外國遊客觀光既日本係幾咁舒服
景點冇乜人可以慢慢行，影相冇人擋可以影到好為止
雖然我既慢慢行都係好快
仲要咁啱撞正Yen低水，所有野相等於以前既8折
所以駛錢鬆手左好多，我去程8kg到回程30kg打爆就知乜料
因為少左人食好西，無論係要訂或者要排隊既餐廳都好易食到
對於我呢啲精密控制時間既人黎講絕對係好事
多左時間可以攝多幾個景點，正所謂去旅行去到盡

最感動就係天氣真係好好，99%時間都係萬里無雲
仲可以睇到轉緊色既紅葉，影到好多靚相留為紀念
如果遲多1個月出發，隨時俾人cut機去唔到
總括黎講應該係我人生中最享受既旅行，冇之一
去完之後無論係家人朋友定同事都對我報以羨慕既眼光
因為有人遲我1個月去已經話周街廣東話同埋要搶藥

つつく
依家嘅旅遊台真係好撚痴線

又飛

幫幫手，呢2個月出埋佢，我睇下我3月尾個行程有冇嘢可以參考下

預告一下，請問有冇絕景？或者絕景推薦？手持全國 pass，去完廣島出雲岡山關西，朝早7點喺東京落Sunrise餘下3日唔知去邊好，完咗 pass 就環富士山3日自駕。旅伴要求絕境，但係立山黑部未開，藏王樹冰又好似溶溶地，唔知點算

「絕景」，唔係「絕境」

香港白之戀人好貴

其實天氣唔同都好難做對比，我冬天你春天
3月尾睇櫻花應該好靚，但我冇留意邊度睇會靚
或者去偕樂園睇梅花都得，順便去日立睇日落

當地買平一半，上次去貨源非常充足

所以我喺關空都買咗兩個

屌你又飛

睇到最尾 原來又飛

Rinku town站內locker 800yen一格（上次要兩格先放得曬啲行李），行去outlet途中嘅鋪頭好似500yen 放一件行李

機場都係800yen，臨空城行去outlet途中有啲locker都係500yen

如果去機場 check in 托行李之後再搭去臨空城有冇得諗？不過就要帶上機

應該趕唔切，Checkin完最多得番2個半鐘
預時間搭車，過安檢，行去登機口，俾到盡得1個鐘多少少
你行1間舖排隊俾錢可能都過左時

巴打嘅遊記好好睇呀
寫得好詳細超級有用
雖然你個行程好 chur 但睇落幾正
斷斷續續追左兩個月 po 終於追完
有啲地方本身完全唔識同冇打算去
但睇完你個遊記好想即刻就出發
出新 po 都會繼續追