[偷得浮生半日閒]用8日獨遊西日本 (京都‧名古屋‧奈良‧廣島)

睇到都覺得chur

係

你睇翻我以前啲post再講

我都鍾意去多啲景點搭多啲車

你同行咁都嫌貴不如唔好去旅行
我上次入完去東大寺參觀
完全覺得超值
可惜唔夠時間去埋個博物館
因為仲要去埋若草山同春日大社

same
奈良日落又係靚撚到痴線

行左成粒鐘之後隻右腳情況越黎越嚴重，行動力得番50%
基本上要轉重心去左腳兼慢慢行先冇咁痛
但咁樣行法遲早搞到隻左腳都跛埋
所以唯有忍痛(物理既痛)取消餘下大部分奈良行程
包括東大寺周邊，春日大社同法隆寺
回程去埋興福寺就會去酒店check-in
其實離天黑仲有5個鐘，正常情況下我應該行得完

鹿鹿你做乜自含


鹿：DLLM收保護費


：咩話
鹿：冇野喇


呢個場面好溫馨，忍唔住要影低

正倉院係東大寺北面冇幾遠，遲東大寺少少建成
呢個倉庫本身就收藏獻俾東大寺大佛既寶物
之後就成為皇家倉庫收藏貢品同名貴珍品
唔知係位置比較偏遠定係個外觀過於平平無奇
就算奈良經歷過咁多劫難，東大寺都重建過兩次
隔離既興福寺仲多災多難，遲啲講
正倉院建築同裡面既文物居然可以完好無損度過超過1200年
文物種類同保存狀態之好實屬世界罕見
包括一大堆唐朝時期西域傳黎既古物同埋古工藝品
專家每年都會同啲文物做檢查同紀錄
選中既寶物就會係當年秋天係奈良國立博物館展出
是為正倉院展，今年已經係第74年搞
因為展期得2星期，裡面既展品都係世間少見
情況如你所見，平日1點鐘出面有幾百人排緊隊入場
雖然我好想睇，但排幾個鐘先入到去太唔值得，不了


志津香都仲排緊


志津香隔離就係冰室神社
以前冬天會有人係附近既吉城川起冰池同冰室製冰儲冰
到夏天就會攞出黎俾皇室消暑同儲藏食物
所以起左個神社祭祀冰神保佑夠冰同求季節順利交替
香港人可以過黎參拜求冰室杯凍飲唔好咁多冰


阿叔俾鹿圍攻，簡稱天下圍公

黎到奈良最後一個景點 - 興褔寺
係去近鐵奈良站條大路轉入去就係
佢同東大寺差唔多時間建成，所以都有超過1200年歷史
同時亦係名列世界遺產"古都奈良の文化財"既古建築


呢2座建築分別係興褔寺東金堂同埋五重塔，都係國寶
東金堂拝観料300yen，買埋國寶館共通券就900yen，平左100yen
都係嗰句，我去哂
東金堂裡面嚴禁拍攝，一眼睇哂有一堆佛像同木雕
不過全部來頭都唔惹少，大部分都係經歷過千年既國寶


東金堂對面就係國寶館，都係嚴禁拍攝
呢度就比東金堂大好多，亦多好多文物睇
部分展品既歷史可以追溯到公元七世紀既白鳳時代
另外啲佛像造工既精細程度完全唔覺得係千幾年前製成
呢個門票價錢睇到咁多國寶絕對超值


興褔寺五重塔高50.1m，係日本第二高木造五重塔
第一係東寺五重塔，第三係法觀寺八坂塔，全部Day4去左
初代係730年落成，但係呢700年黎火燭燒爛左5次
眼前呢個已經係第6代，建於1426年
所以你明白點解正倉院乜事都冇可以係奇聞


隔離就係中金堂，望落非常新淨
因為之前嗰代老化嚴重到就冧，所以就拆左再搵材料起過
前後用左18年時間，係2018年落成呢個第9代
本身都想俾500yen拝観料參觀，但呢日唔開放
咁唯有係出面打卡就算


係中金堂前面條路再行就係南円堂
佢係西國三十三所朝聖寺院之一，所以好多人黎拜神

南円堂隔離有條樓梯行落猿沢池
同近鐵奈良站只差1條商店街既距離
但行到黎呢度我隻右腳一用力就痛，基本上廢左
行動力得番唔夠30%
呢度有間Starbucks可以俾我坐低按下隻腳
為左解決呢個問題，當然就要打去搵痛症專家，我老母啦
即刻WhatsApp Call搵佢斟斟...
------------------------------------------------------------------------------
：喂老母，得唔得閒問個問題
：嗯你講丫
：我而家係奈良睇完鹿，想問下如果隻腳痛可以點搞
：衰仔叫左你唔好行咁多路架啦，(下刪一萬字)
：嗯嗯嗯嗯嗯嗯嗯，咁你之前點搞？搽藥膏定貼野？
：上次你去日本幫老豆買嗰隻膏貼都幾好既
：好，買番啲好野返黎俾你
：衰仔唔好玩咁癲呀，到時行唔到點算
：我聽日仲要行山呀，盡量啦
：你腳痛仲行山，(下刪一萬字)
：我要去食野喇拜拜 (Cut線)
------------------------------------------------------------------------------
找尋道具：殺龍巴斯

唔係個個對歷史野有興趣既
但又冇理由唔理人自己走入去睇

若草山上面勁多鹿，不過佢地純啲唔會搞你
大路同東大寺嗰班真係追住你又咬你

你同伯母啲對答好正

無上2月堂？
2月堂可以鳥瞰晒大半個奈良
正到爆

去之前我都唔識東大寺既歴史
但淨以觀光價值黎計入面座千年大佛同成座佛寺已經值回票價
cp值點都高過去清水寺

其實仲想行埋去正倉院同手向山八幡宮
但隻右腳真係行一下痛一下行唔到落去

中谷堂 [Tabelog評分：3.73]
如果話志津香釜飯係奈良正餐必食料理
中谷堂麻糬就係奈良小食名物
呢間小店因為摩打手打麻糬而聞名世界，但今日就睇唔到表演
之前黎咁多次都冇食過，今次就黎買黎試下
每舊麻糬明碼實價1舊150yen



我就買左1盒3舊，450yen
出面既黃豆粉好香，又有少少微甜
個皮比我想象中韌，都要啲牙力扯斷佢
裡面包左啲唔太甜既紅豆餡，食多舊都唔會滯
總括黎講味道非常好，如果多啲黃豆粉就好



係商店街間藥妝店買左殺龍巴斯之後
就係時候離開呢個地方返酒店了

站前面呢個銅像係行基
可以話係奈良時期佛教得而廣傳既祖師爺之一
以前日本以神道教為正統，禁止僧侶係寺廟外傳教
但佢無視法令舉行集會，仲因為救濟貧苦大眾而得到唔少人支持
朝廷怕佢帶民眾造反，結果被打壓同逐出京城
佢去到外面繼續濟世為懷，最後天皇改變決定承認佛教
回歸京城後籌建東大寺大佛，亦有份將佛寺由舊都遷移到平城京
所以就建立呢個佛像紀念佢對奈良既付出

まほろば大仏プリン本舗 近鉄奈良駅店 [Tabelog評分：3.22]
奈良除左有大佛殿，仲有大佛甸
呢款布甸係奈良打卡名物，今次終於記得過黎買
味道非常多，唔識揀既話跟本地女士叫通常冇死錯人
我跟左前面嗰幾個師奶咁買左4款黎試，每個大約400yen
大胃王可以試下左上角5倍大既原味布甸挑戰下





買完布甸就落月台搭車返難波，咁啱就搭到架阪神車
用呢幅路線圖就正好用黎解釋"直通運轉"呢樣野
係香港既鐵路，1架列車只會行駛1條鐵路線
如果要搭去另一條路線就要去轉乘站落車，再去另一月台轉車
但係日本呢個以人為本既地方，要乘客轉車已經係麻煩
所以會出現同一架列車可以行駛多於一條路線，就係"直通運轉"
只要線路駁通，唔同列車就可以行駛去其他鐵路線區間
而呢樣野不限於單一公司，而係可以多間公司多條路線
呢幅路線圖會睇到近鐵奈良線會同阪神電鐵同山陽電鐵直通運轉
我搭緊呢架快速急行唔止去近鐵奈良線既總站大阪難波站
而係會繼續行駛，經阪神難波線去到神戶三宮站先回送
唔出閘再轉車仲可以搭直通特急去埋山陽姬路站
不過咁搭法全程2個幾鐘，搭到訓著
除左以上路線，近鐵奈良線仲會同京都地鐵烏丸線直通運轉
所以會出現地鐵同近鐵既京都站都可以搭到過黎近鐵奈良站
不過因為拆帳問題，全程搭近鐵車費點都會平啲


新大宮站至大和西大寺站中間一段鐵路會穿過平城京遺址
呢個平城宮正門朱雀門當然就唔係乜野歷史遺物
而係依古書描述係近代完成復修，但人工味太重
因為呢度同東大寺興褔寺一樣名列世界遺產
為左更好保護同進行考古，近鐵決定將奈良線改道
不過最快2060年完工，個孫出埋世先睇到

係大阪難波站攞完行李行幾分鐘就到最後兩晚會住既酒店
Vessel Inn Namba，2022年3月25日開業
每晚300蚊，價錢不過不失但地點超方便
大堂係2樓要搭𨋢上去，其他樓層要拍房卡先上到去



之前住過幾次難波，都冇邊間酒店既單人房大間
呢間都唔例外，但好新淨，麻雀雖小五臟俱全
張床既大細同前幾晚住既一樣大
旁邊空間都足夠我開喼執野，唔駛擺上床
廁所一般發揮，同京都嗰間差唔多大




係休息兼貼緊殺龍巴斯既同時睇左陣新聞
日本當時準備爆第8波疫情，而家好似都未完全減退

啲鎮痛貼都幾有效，15分鐘就可以提升行動力至80%
應該就係行得太多筋腱炎而唔係扭親，好彩
跟住就走去食個好早既晚飯再行多陣難波
酒店同道頓堀係同一條街，中間只係隔左條御堂筋
過馬路行過去就係蟹道樂同固力果招牌嗰個位
隔離就係地鐵站口，去到哂地鐵近鐵JR同南海電鐵站
呢個咁靚既地段，間房細啲又有乜所謂




係戎橋筋商店街我又重遇551 Horai
之前係京都站同大阪站都見到極度誇張既排隊人龍
就算呢一刻係平日既4點幾都係打哂蛇餅
而大部分幫趁既都係女性，究竟有乜野魔力
係XX，我加左XX


陣間食飯既地方係EDION難波本店9樓
成層都係拉麵店，總有一款啱你口味

らーめん専門 和海 なんば店 [Tabelog評分：3.63]
和海自2016年拉麵百名店創榜以黎就名列前矛
2020年開始仲攞埋西日本第一
本店呢一刻評分係3.86，高分過好多名店
原定計劃我由名古屋過黎之後就放低行李
跟住就出發，早1個鐘係本店外面排隊
食完就搭番去奈良行景點，來回預3個鐘
既然附近有分店，我可以提早去奈良行多幾個景點
Lunch又食到志津香，返黎又食到和海，一舉三得
但估唔到隻腳廢左搞到要提早離場



塩ミックス <1150yen>
ふわ玉丼 <390yen>


我第一次黎食，自然就叫番招牌既鹽味拉麵
叉燒有6塊，分別係雞胸肉雞脾肉同五花腩
白啲嗰2塊就係雞胸肉，又滑又多汁又唔鞋，最出色
紅紅地就係雞脾肉，嫩得黎幾彈牙，但有少少雞腥味扣左分
最下面浸住既五花腩用火槍燒過，入口即溶但冇乜特別
嗰2舊好似通窿法包咁既野係麵筋，主要用黎索湯


拉麵黎講除左叉燒呢啲Topping之外，湯底同麵底都好重要
但唔少拉麵店會過於追求湯既質素而忽視左個麵
例如今次食過既高安同猪一，湯底味道非常出色
但係你問我對個麵有乜感覺，我食完都真係唔記得
呢度就做到叉燒湯底麵底都令我印象深刻
以前食過函館既味彩塩拉麺，個湯底一入口就擔心個腎
呢度都係鹽味湯底，但飲落去出乎意料地唔鹹
清雞湯加魚介呢個組合味道非常清雅，毫無負擔
麵底係用全麥粉製成既中太麵，浸得耐都唔會越食越淋
加上佢煮得偏硬，麵條既麥香同柔和既湯底夾得非常好
Topping湯底麵底三樣野缺一不可，但相輔相成，越食越好味
抵佢成為西日本排名第一拉麵


除左拉麵，佢個滑蛋飯無論賣相定味道都十分出色
滑蛋唔會太生之餘仲有蛋汁，蛋味好濃
滑蛋下面放左切碎既蔥同用火槍燒過既叉燒，勁香口
配埋甜甜地既醬油撈飯一齊食，非常惹味

食完就行左陣EDION同附近啲商店街
11月平日夜晚比我想象中冷清
人少得黎都幾多吉舖，松本清都冇開到門



不過鳩龍拉麵疫情期間居然仲屹立不倒
陣味一樣都係咁濃烈，小弟佩服


蟹道樂以前客似雲來，堂食預約又爆收錢都收唔切
而家居然要係門口開檔賣蟹肉食品
有人叫我一定要試食佢新出既500yen雪糕，買左一個陣間探伏



夜晚既戎橋係咪都少人到嚇死我
要影到冇人阻住既固力果廣告牌一啲困難都冇


御堂筋周圍都掛滿燈飾準備聖誕

中谷堂麻糬好撚好食

頭先買完雪糕之後因為行左去難波Animate
返到酒店已經隔左差唔多1個鐘，個雪糕溶哂咁滯
不過咁樣食法有個意外收獲
就係我可以係雪糕中間挖一大舊蟹肉出黎一啖啪落口
鮮甜多汁得黎仲一啲都唔腥，並冇大家諗到咁伏
雪糕係牛奶味，因為有蟹汁所以有埋鹹香味，感覺唔差
又咁講，蟹呢類海鮮同奶本身都係好夾味
蟹肉可樂餅同周打海鮮湯都有蟹同奶，只不過係熱食咁解
鹽味雪糕本身又唔係難食既野
蟹道樂咁樣Crossover都幾有諗頭


食完蟹雪糕就食係奈良買既大佛布甸s

我總共買左4個味，呢晚食原味同芝士味，因為第二日過期


カスタード <400yen>
原味就係吉士味，一開蓋就超香奶味
口感同慕斯差唔多，唔會好似出面落啫喱粉彈下彈下咁
如果就咁了個面黎食都幾滯，因為幾重奶味
但加埋底下微甘既焦糖醬一齊食就啱啱好



レアチーズ <430yen>
芝士味既口感明顯比原味削好多，入口即溶咁
芝士味好濃，好似食緊半固態狀既芝士蛋糕
雖然幾好味，但唯一要彈就係好似酸左少少



有乜野幸褔得過臨訓前食住甜品睇飲食番



Day 6 完

Bookmark間和海先好似幾正

近鐵全線1840YEN,平得好緊要