[偷得浮生半日閒]用8日獨遊西日本 (京都‧名古屋‧奈良‧廣島)

休息一陣就繼續上樓梯去彌山展望台
小姐你著和服上山會唔會有點兒那個




行多10分鐘就會見到舊大石
穿過佢過埋亂石陣就代表你已經到達彌山展望台




彌山展望台係個屋仔，行落一層有廁所同商店
1樓同2樓都係觀景台，但屋頂就有360度無死角海景，包括頭頂
感覺上呢度仲多人過獅子岩
可能啲人覺得搭得纜車上黎都唔差在行埋過黎



呢幅就係向冇北面方向270度全景
成個瀨戶內海同廣島市區睇哂


南面就係頭先行上黎既亂石陣


東面可以望番去獅子岩展望台，要用放大鏡先睇到


北面就望番宮島碼頭方向


Hea到3點就要準備落山
因為纜車只係開到4點半，預埋排隊時間都差唔多
途中見到個寫住24丁既石柱幾得意
Google完發現原來係差唔多100年前
當時仲係皇太子既昭和天皇企過係度視察，長知識了


如果行到興起想行落山既話，官方有3條路線
右邊嗰條沿紅葉谷川行番落紅葉谷公園
頭先由獅子岩行過黎會經過其中一段
中間嗰條就係經白糸川落大聖院，係我本來既預定路線
不過隻腳操勞過度要休息下，就唔行了
左邊就係大元路線，因為太遠基本上好少人行

最後我只係用左20分鐘就衝到落去




不出所料，係纜車站等左差唔多20分鐘先上到車
等緊既時候係窗望出去好似一幅幅畫咁
同天橋立以及足立美術館個觀景窗有異工同曲之妙





搭2次纜車再行番出海邊已經4點

雖然話17:13分先干潮，但其實已經行得落去鳥居

雖然干潮代表全日最低水位，但唔代表一切
樓市跌到最低位唔代表你入到貨，因為你唔夠錢買
干潮亦唔代表你行到過去鳥居，因為可能仲係水深及膝



行落鳥居有2個方法，千祈唔好係神社平舞台跳落黎
一係行海邊表参道側邊樓梯，一係好似我咁係神社出口既岸邊行落去



後面就係嚴島神社，前面就係大鳥居
大鳥居比你地想像中巨形，高16.5m，重60噸
有番咁上下重量先可以頂到咁耐，打風都唔會吹冧



左邊有個工作平台遮住影唔到鳥居全貌
不過唔好咁諗，論意義黎講呢個鳥居更勝一籌
因為鳥居幾十年先會大修一次，下次可能到個仔扶你過黎
而且整好左既話憑相人地未必知你幾時黎過呢度
但呢張相就只會出現係2022年10-11月
話俾人知你疫情開關冇耐就黎，型好多



呢日最低水位係108cm，所以應該唔會水退到可以行去背面影相
就算等到，天都黑乜都影唔到，係時候走

同啲巴打意見一樣，宮島鹿隻隻都西口西面
全部都想你快啲走咁，咁我走囉



不過走之前都要去買手信先可以交差
宮島黎講首選紅葉饅頭，有心思夠體面
雖然成條街都有好多間舖賣，有啲包裝仲幾靚
但我既首選就係上次幫趁過，對正表參道口既紅葉堂本店


紅葉堂 本店 [Tabelog評分：3.62]
我買手信通常都係買食得既野，因為食之無味棄不可惜
就算唔好食，擺到過期掉左佢都係理所當然
尤其鐘意買保質期極短既野，無防腐劑感覺天然啲
而且好快就到期，人地收到就要迫住即刻食
識我既人都話我係手信神手，個盒又靚啲料又好食
除左因為我有眼光之外，仲因為我真係會試食過先買
好食既就買俾熟人，唔好食既就送俾啲冇咁熟既

紅葉堂係咁多間紅葉饅頭舖突圍而出
靠既唔止係老字號同味道，仲識玩Gimmick
商店街好多檔都係靠燒蠔吸人，佢就玩炸紅葉饅頭(揚げもみじ)
因為揚げもみじ註冊左商標所以冇人抄到佢
之前同屋企人黎，礙於矜持只係食左一舊
但頭先行左咁多路，大把Quota食野，我要哂


上次同屋企人黎得3隻味，今次就有6隻味
而且轉左用食券機收錢慳番啲人手
入左錢揀番要幾多件就會嘔張飛仔同找錢俾你
拎張飛仔同店員講要乜野味就得
就算唔識講，對住個牌仔This This This就得
不過又加左價，以前每舊180yen，而家要200yen



中華地區認知既饅頭係用麵粉搓成既蒸包
無論係冇餡既，酒樓圍餐食既壽桃定係唐記菜肉包，都算係饅頭既一種
但日本既饅頭(まんじゅう)就係和菓子
通常都係甜同有餡既，製法不限於蒸，仲可以炸焗燒煮
所以你地以為係有餡蛋糕既人形燒，甚至紅豆麵包都係歸類做日本饅頭
而我地認知既饅頭係日本叫饅(まん)或者中華饅(中華まん)
通常都只會出現係中華料理餐廳，例如551 Horai同崎陽軒
例如肉まん就係肉蒸包，最多都係便利店收銀隔離個蒸櫃見到
まん○就係第二樣野，小朋友唔好亂用

紅葉饅頭同人形燒既製法基本上一樣，只不過係紅葉形狀
我唔一次叫哂6隻味係有原因
一黎怕自己食唔哂，二黎擺耐左又會凍哂
所以我就逐舊逐舊咁叫，一定新鮮滾熱辣
紅葉饅頭全部都係咁既樣，我影1舊就算

舖入面有枱有櫈俾你坐低慢慢食
一次叫得多仲會俾個竹籃你裝攞去位度食
而且側邊仲有熱茶供應，非常貼心


首先就試豆沙餡，呢度有分こしあん同つぶあん兩種
味道冇太大分別我揀其中一隻味就算
前者係走紅豆皮既豆沙餡，好似栗子蓉咁細滑冇渣
後者就係一般紅豆餡，因為帶皮所以會比較有口感
こしあん係元祖味道所以就揀左佢
因為饅頭出面包左天婦羅麵糊去炸，所以外皮脆脆地
咬落去就係暖暖地既豆沙，不過偏甜，好彩有杯茶消下滯
雖然佢係油炸但唔吸油，整體都幾好味
日本人對於呢啲雞毛蒜皮既野總會分兩派爭一餐
好似明治朱古力既蘑菇山(きのこの山)同竹筍里(たけのこの里)咁
大家都係朱古力有乜好爭，梗係竹荀完勝啦好食咁多


之後就啪多2支吉士味同芝士味
吉士醬有奶味得黎少少流心，最好食
芝士醬可能凍左少少，做唔到拉絲效果，不過鹹鹹地都幾惹味




朱古力味就好普通好甜好滯，勝在佢夠熱辣辣


最後就係叫瀨戶內檸檬味，店員俾左個號碼令牌我
同我講即炸要等叫號，我就知道仆街喇
呢隻味一係好食到賣哂，一係就冇人食唔炸定，我諗點都唔會係前者
雖然唔係難食，但嗰種檸檬香香既清新味道令我聯想起洗潔精

食完就買番幾盒紅葉饅頭當手信
紅葉饅頭每舊只係100-120yen，炸就要200yen
食水好深，不過好食既話就抵俾既
可以自選唔同味道之後叫店員幫你入盒包靚靚
我就費事煩，直接買包裝定既盒裝就算
只需要確保冇瀨戶內檸檬味就可以了
保質期我冇記錯係唔超過14日，送禮請注意時間

買完野都搞到5點，天都就黑，要趕出去碼頭搭船
行過幾間卡通人物聯乘既舖頭
搞到我專登入去買左幾盒卡通紅葉饅頭黎氹細路




係日本三景之中，個人認為宮島係最靚既，冇之一



鹿s：又話走，得個講字
：係喇，走喇走喇



可能因為我毒撚樣俾鹿撚，人地型仔鬼佬就任影




走既時候繼續都係搭JR渡輪
今次就搭到船齡最新既ななうら丸3代目，2016年先落水
頭先嗰程船影夠，今次就坐係船艙望下日落景就算
呢架船好明顯比頭先嗰架靚啲舒適啲





廣電宮島口近鏡1張

頭先架船係滿哂咁送番啲人黎本州，但係搭JR走既人數極少
第一個原因就係JR車費貴啲，去廣島站要420yen
但搭廣電宮島線就只需要270yen，雖然車程耐但唔駛行咁遠搭車
另一個原因就係好多人都係自駕，係度揸番車走
所以得外國人會用JR Pass搭JR，遊客少所以都少人搭




山陽本線除左客運之外都會運貨
眼前呢架貨運列車後面都唔知拖左幾多卡


架車少人到我上車係有位坐既，不過費事影


去到廣島站6點幾，諗住劃指定席返新大阪點知超多人
座位闊啲既さくら同みずほ呢個鐘已經冇哂位
咁唯有劃のぞみ啦，停少啲站都好既



本身有諗過係呢度搵間廣島燒食，但食完返酒店好似太夜
突然又醒起成個旅程都仲未食過鐵路便當
咁就一於入閘去便利店買個便當係車食
頭先係宮島食左蠔，而家就試廣島另一種名物 - 穴子
上次黎食左活あなごめし，雖然好食但好細盒，性價比偏低
今次就試下夫婦あなごめし睇下有乜唔同




上到新幹線月台偶遇700系ひかりRail Star

檸檬香嘅清新味道令我聯想起洗潔精

咁應該真係檸檬嚟嘅...

係山陽地區包括廣島呢度，新幹線列車會有8卡同16卡
呢度就要講少少新幹線既小知識
鹿兒島中央~博多係九州新幹線，由JR九州管理
博多南~博多~新大阪係山陽新幹線，由JR西日本管理
新大阪~東京係東海道新幹線，由JR東海管理
呢3段新幹線路軌完全接駁，列車可以互相穿梭呢個區域
但由於呢3條路線駁埋實在太長，冇人會搭足全程
加上九州新幹線客量偏少，規格冇必要同另外兩條睇齊
於是就形成"山陽·九州新幹線"同"東海道·山陽新幹線"兩個直通運轉系統
當然3條新幹線各自都有行駛自己區間既列車營運
因為前者行8卡，後者行16卡，所以山陽新幹線地區就有齊呢2個組合
想搭自由席既話就要留意車卡位置，如果不幸排左16卡既頭卡
你跑去下架8卡列車既頭卡隨時要跑100m


另外講多少少，雖然以上3間公司都係JR字頭
但只因佢地都係由日本國有鐵路(JNR)民營化之後分拆出黎
雖然有合作，但全部都係獨立公司互不從屬
所以除左全國Pass或者合作周遊券之外
其他JR Pass係唔可以跨JR地區使用
而且因為歷史原因，新幹線係以路線而唔係地區劃分管理區域
造成新幹線車站完全深入他社管理既在來線範圍
對本地人黎講冇影響，但對用Pass既遊客就會極度混亂
最簡單既例子就係之前所講既新幹線京都站同米原站
另一常見例子就係小倉站，新幹線屬JR西日本管理
但在來線小倉站就係JR九州管理
所以揸全/北九州鐵路周遊券係唔搭得博多~小倉路段，最盡搭特急

雖然山陽新幹線既班次冇東海道新幹線咁密
但都可以做到4分鐘一班
我嗰班のぞみ56雖然比前面班車停多1個站
但係總車程就快1分鐘，85分鐘就到新大阪站，耐人尋味


阿叔你咁樣踩前座好似唔係幾好喎

雖然眼前既畫面有啲不雅，但飯都係要食既
夫婦あなごめし姐係夫婦穴子飯，飯面放左穴子兩公婆
因為刀功太精細所以我分唔到邊條係公邊條係乸
我估係男左女右，所以就食右邊嗰條先



穴子姐係海鰻，本身冇乜油魚味比較淡
所以本身已經用醬汁調過味，外觀帶少少啡色
但佢附送多一包醬汁，我就落哂佢
食落啲魚肉比想象中嫩同帶少少香甜，而且唔腥
啲飯原來都調過味，所以味道好濃郁



平時啲便當配菜我通常都唔食，尤其係漬物
因為通常一係好酸一係好鹹，我麻麻地
但左邊個配菜広島菜油炒め又幾好食喎
食落係微鹹既雪菜味道，非常惹味
右邊就係炸穴子骨，脆到好似薯片咁

搭埋地鐵返到酒店都差唔多9點
諗住去蟹道樂買多次蟹肉雪糕
點知出面個檔口咁早就收左皮，而家星期五晚喎


既然係咁就係附近兜下
帶大家睇下11月既道頓堀係乜野樣



河邊間Donki冇開，得番隔離好細間好似執笠倉咁既規模



河邊間一蘭都冇開，叫你去千日前嗰間別館



因為食宵夜既地方執得七七八八，一係唔開
所以一蘭隔離間あっちち本舗章魚燒排到痴哂線
由橋中間排到落樓梯再轉番上去
本身都想食，但咁排法1粒鐘都未必有得食


心齋橋同戎橋都係多人既
但只要行去道頓堀遠少少，啲舖就已經落哂閘又冇人



如果想行Donki可以行御堂筋嗰間
但係個廣告就

番到去就開始執行李，先醒起雪櫃仲有2個布甸未食
咁就啱喇，唔駛專登落便利店買

カプチーノ <410yen>
呢個布甸質感似芝士味，都係入口即溶咁
朱古力味好香濃，個底既朱古力醬都唔會好甜



さくらプリン <420yen>
繼頭先瀨戶內檸檬洗潔精味紅葉饅頭之後
呢個一揭開就係櫻花味柔順劑，即刻諗起要洗衫
味道其實有冇乜野，有奶味同埋硬身啲似原味既質地
但香精感好重好似食緊番梘咁



咁啱NHK播緊鉄オタ選手権講近鐵，出乎意料地好好睇
除左同搞笑藝人行下車廠，睇下列車講下業內知識之外
佢地仲同員工玩問答遊戲，啲問題難到鐵膠都未必識
"請問平日始發至夜晚8點，總共有幾多班Urban Liner經過中川デルタ呢？"
中川デルタ係指三重縣伊勢中川站以北既一個近鐵路軌交匯處
由大阪，名古屋同松阪開出既列車可以駛去另外兩邊既方向
https://www.asahi.com/articles/photo/AS20220125002336.html
答案我唔記得左，但對個PA係嗰邊數左十幾個鐘頭車好深刻
啲嘉賓反應真係笑死我，唔識聽都覺得勁好睇



我今次又咁啱得咁橋影到中川デルタ


播完近鐵就播南海電鐵
果然日本既鐵膠係國家俾錢培養既


Day 7 完番到去就開始執行李，先醒起雪櫃仲有2個布甸未食
咁就啱喇，唔駛專登落便利店買

カプチーノ <410yen>
呢個布甸質感似芝士味，都係入口即溶咁
朱古力味好香濃，個底既朱古力醬都唔會好甜



さくらプリン <420yen>
繼頭先瀨戶內檸檬洗潔精味紅葉饅頭之後
呢個一揭開就係櫻花味柔順劑，即刻諗起要洗衫
味道其實有冇乜野，有奶味同埋硬身啲似原味既質地
但香精感好重好似食緊番梘咁



咁啱NHK播緊鉄オタ選手権講近鐵，出乎意料地好好睇
除左同搞笑藝人行下車廠，睇下列車講下業內知識之外
佢地仲同員工玩問答遊戲，啲問題難到鐵膠都未必識
"請問平日始發至夜晚8點，總共有幾多班Urban Liner經過中川デルタ呢？"
中川デルタ係指三重縣伊勢中川站以北既一個近鐵路軌交匯處
由大阪，名古屋同松阪開出既列車可以駛去另外兩邊既方向
https://www.asahi.com/articles/photo/AS20220125002336.html
答案我唔記得左，但對個PA係嗰邊數左十幾個鐘頭車好深刻
啲嘉賓反應真係笑死我，唔識聽都覺得勁好睇



我今次又咁啱得咁橋影到中川デルタ


播完近鐵就播南海電鐵
果然日本既鐵膠係國家俾錢培養既


Day 7 完

娘子啊娘子，出嚟睇遊記大結局喇

唔知點解覺得個味有啲假
唔係天然味道，似係落精油咁

可能因為Nozomi 182 俾前面架kodama 182 塞住所以停少個站都慢啲

祝樓主同大家

身體健康
出入平安

支持遊記

睇完樓主咁大篇文後已經決定好我過幾個月去邊度旅行
我愛樓主

你唔算急啦，我10點到3點就走，搭咗纜車去到獅子岩但冇上彌山

同埋我著白色波鞋落去影大鳥居…

咁你對波鞋實戰損喎，我返酒店抹極都有漬

萬眾期待Day 8一挙放送

Day 8 Last Day

關西充實之旅黎到最後一日，其實就冇乜行程
雖然回程係晚機，理論上仲有大半日可以玩
但以前實在聽到太多人遲到趕唔切check-in既經歷
再加上EGL之前都出過FB post講關西機場安檢要排好耐
作為宇宙無敵超級穩陣派成員，早啲到機場點都好啲既
而且搭星期六機，理論上蝕左1日假期
你估我唔想玩多日，但事實係窮呀DLKH
廉航睇穿左你地味野，星期日機票係貴千幾蚊
如果要5000蚊飛廉航我唔差在加少少搭ANA或者JAL
但係啲時間就冇咁靚，計過度過寧願玩少日慳好多
因航就算啦，唔係用Asia Miles換都唔搭

我張JR Pass仲未過期冇理由蝕俾佢
用到佢盡就一定係搭はるか指定席去機場
不過我都係唔會行去JR難波轉車過去，因為又遠又少班次
所以唯一既選擇就係去新大阪站或者天王寺站搭
我揀後者，因為難波搭地鐵去只係6分鐘
為左免卻要返酒店攞行李再係繁忙時間搭地鐵既麻煩
我選擇一早check-out，掟哂啲行李去天王寺站Locker先開始行程
到時行完就過番黎直接拎行李上車走人，爽！

落到地鐵站就見到個醉到訓著左既怪叔叔
大阪既小朋友睇黎見慣見熟，直接無視行過


天王寺本身係大站，所以極多Locker
而且大部分都轉哂用電子鎖，用IC Card就可以鎖櫃同解鎖
唔駛煩要唱一堆100yen銀仔同埋袋鎖匙
因為都幾多行李，所以攞左個大櫃，要700yen


晨早流流7點幾JR神戶線就壞車遲延，唔會影響到我掛

放好行李就開始今日第一個行程 - 木津市場
搭地鐵御堂筋線搭2個站去大國町站，再行5分鐘就到
如果係難波出發又想慳錢既，行過去都係20分鐘


去之前聽朋友講黑門市場啲野好貴，木津市場少人啲又正好多
所以今次就專登揀正有朝市嗰日過黎，結果真係冇乜人
唔通冇開朝市？又唔係呀，有直幡棟係度架喎


門口左邊係市場，裡面有啲似以前築地場內市場既感覺
有好多細檔口賣緊魚，裡面全部都係本地人係度採購
好少有切好左既刺身賣，唔似係黑門咁擺哂出黎俾你揀
行到後面有幾間生果舖，啲生果望落好靚
但係冇人圍觀底下怕俾人劏，唔買住


右邊就係食品業務超市，全部包裝份量都超大
例如1公斤沙律醬，2升醬油，1公斤七味粉等等








出面就係連登Post講過要排既海鮮丼
現場所見都係日本人黎既，味道應該信得過既

去完木津市場，就出發去市區最後一個景點 - 黑門市場
本身諗住直接行過去，但為隻腳著想，都係搭地鐵


疫情前黎黑門市場，8點幾都已經好墟陷
今次我差唔多時間黎，少人到我以為去錯地方
由頭行到尾都冇幾多間舖開，睇黎生意都幾難做






高橋食品 支店 [Tabelog評分：3.13]
我每次黎黑門市場都會先幫趁呢間舖既豆漿，今次都唔例外
呢支豆乳大約500ml只係賣210yen
飲落去同飲豆腐冇分別，杰過芝麻糊，完全漿住個口
因為係無糖所以飲到非常濃既豆味，但又十分順滑
因為濃到咁，所以飲幾啖就已經覺得飽


黑門中川係其中一間最旺既舖頭，今日黎到變左死場
呢個炸豬扒便當加多2舊炸雞，連稅400yen有找，會唔會平左啲



一場黎到諗住黎掃街當食早餐，點知開左舖有野食既加埋都冇10間
見有間壽司店開左有人食緊就入去試下
已經唔記得左間野叫乜野名
係舖出面個凍櫃買完壽司就可以入去堂食
我就要左帆立貝壽司同鰻魚壽司，總共2300yen
味道同厚度只係Aeon壽司部級數，唔係咁滿足
好彩yen低水都唔係太貴




好掛住黑門三平既大拖同鰻魚，唉

結果行完黑門市場都係9點幾，仲係好早
早知啲行李就放係酒店先，而家蝕左700yen Locker錢
咁就早啲去天王寺攞行李出發去機場
搭地鐵堺筋線既時候咁啱搭到阪急列車
呢個時候你應該意識到呢條地鐵線係同阪急直通運轉既
夾啱班次既話，係京都河原町站可以直達日本橋站
唔駛專登轉車去京都站搭JR再轉地鐵先黎到，車費只需要630yen
阪急係1951年開始就用栗色作為列車車身顏色，非常易認
內部都係以木質系為主，感覺好溫暖
不過佢個座位開左加熱，坐得都幾辛苦



唔撚係掛，頭先JR西日本派彩
今次輪到阪急人身事故，乜咁唔想我走呀


黎到天王寺站，睇黎頭先JR神戶線架壞車未搞掂
兩個鐘後仲將影響範圍擴展到東西線同京都線等直通運轉既路線
呢樣野就睇到直通運轉既致命弱點，就係一Delay就大家攬炒
連JR京阪神大動脈都跪低唔捨得我
本身諗住行陣四天王寺，而家咁搞更加令我覺得唔走唔得
咁啱仲有半個鐘就有はるか，去售票機禁番張指定席先



以前離開大阪之前都會買番個蛋糕返香港食
前幾次買過PABLO，但今次因為時間問題買唔到
咁啱天王寺站中央改札就有りくろーおじさんの店
呢間野係大阪芝士蛋糕老字號，成日碌IG見到有人講
招牌就係焼きたてチーズケーキ <865yen>，唔貴
因為係即製即焗，我買完摸個蛋糕盒底都係暖暖地，夠哂新鮮
攞到番香港攞起佢都仲係彈下彈下咁，非常鬆軟
雪凍食好好味，外表唔乾得黎裡面都好濕潤，口感綿密
芝士味好濃但唔會太甜，唯一敗筆係糕底放左我最憎既提子乾



買完就攞埋行李入閘落月台等車
俾著係平時既我，就會直接舉起啲喼同Handcarry落樓梯
但今次拎住個蛋糕同30+個蘋果，隻腳又殘左
所以穩陣啲兜個大圈去東改礼口先有𨋢落月台
搞左10分鐘先到，好彩早左入閘

関空特急はるか，係JR來往京阪地區同關西機場既皇牌列車
2019年開始導入無嘴賤畜蝦撈拮替外裝
因為估算東京奧運同2025大阪萬博會有大量遊客到訪
JR西日本預期6卡編成既281系列車將會不敷應用
加上已經用左25年要準備換車，所以就開發271系
之後撞正疫情，海內外到訪旅客劇減，はるか減班變左通勤特急
將其中4班額外編成3卡271系，連結原本既6卡281系列車
我今次咁啱就搭到增結編成既はるか15
頭3卡係271系，後面先係281系，留意下車頭係唔同既
今年3月大阪站地下月台將會啟用，採用世界首創可動式幕門
はるか亦會加停此站，到時由機場去梅田地區唔駛轉車
車程只需47分鐘，應該多左好多人搭



天王寺下一站已經係關西機場站，但成卡車計埋我得4個人
我前面個阿叔幾識歎，直接調轉前排張凳掠腳


既然冇乜人我就周圍望下，果然好多嗰隻野
車箱門採用雙門設計，感覺上走廊闊過281系
行李架由3層變成2層，理論上可以放到更大既行李
但深度同闊度唔覺有太大改變，未必放多左行李





281系張絨毛凳成日覺得佢好污糟好多塵咁
271系嗰張新淨啲，但我覺得用耐左應該都係一樣


增結編成同原先281系6卡車中間互不相通
所以搭7-9號車既人請提早去月台等車


報站系統唔再係顯示單行既大粒LED裝置
換左同N'EX類近既LCD大型雙屏幕多語報站，清楚左好多


遠處一碌柱嗰幢大廈就係臨空門大廈
呢一刻係日本第三高大廈，僅次於阿倍野Harukas同橫濱地標大廈
遲啲到東京既麻布台Hills起好之後，就會跌落第四

日根野站係JR阪和線同關西空港線既分歧站
如果搭関空快速去機場既人要極度留意有冇坐錯車卡
因為大部分班次會同紀州路快速併結，並且係呢度做分割
行駛方向頭4卡會作為関空快速，首先離站去機場
後4卡就係紀州路快速，等多陣再駛去和歌山
雖然列車有齊N語廣播同埋指示
但都總有盲毛聾耳陳搭左去和歌山之後叫救命
如果唔想發生慘劇可以點做？搭はるか啦，飛站直達機場


過左日根野站之後就會轉線向右駛去臨空門大廈方向
然後跨過南海電鐵本線軌道，係臨空城站同南海空港線接駁
最後合併成同一條路軌經聯絡橋去關西機場站




由天王寺站出發，搭はるか只需要33分鐘就到關西機場站
亦代表今次既行程即將步入尾聲



當時既關西機場航班量好似仲慘淡過香港
全日國際線起飛得大約50班，佔3分1都係去泡菜
唔怪得今次感覺上多左咁多韓國人啦
排第2係台灣，排第3就已經係有6班回程機既香港


因為預計會買好多野返香港，所以回程我買左30kg行李
而且廉航有樣野好，只睇重量唔限件數
所以去程拖細喼裝住幾個Handcarry袋，回程先塞滿佢寄艙
唔駛為左就件數而拎大喼，換酒店搭車既時候拖黎拖去
我每次搭UO明明冇就住買野又冇帶秤
但次次過磅都係啱啱好，今次只係差0.6kg
呢度至少有4分1重量係來自頭先買既蘋果



當時11點幾，安檢條隊打哂蛇餅排到去隔離出發口
而家唔知仲係咪咁


走既時候成個客運大樓都仲係冇乜人