[偷得浮生半日閒]用8日獨遊西日本 (京都‧名古屋‧奈良‧廣島)

bookmark 先
晨早搭船去，1000左右落鳥居行，行完就睇餐廳開門時間 lunch time 前去排隊食蠔，食完再行神社

我係宮島先一樣睇到潮退

條橋拆左喇，只係11月做Final Check先限定開放
你幾多月去先，冬天10點應該係漲潮喎

我3月份去係零晨3點同下畫3點半

係官網搵呢D 資訊?

3月尾去

唔係睇咩季節，睇月亮



同一個月都可以唔同時間有漲退

大鳥居後面就係嚴島神社既主體建築
相傳係差唔多1500年前既飛鳥時代就建造完成
供奉傳說住係宮島既航海之神宗像三女神
女神住既地方自然係聖域，除左神職人員之外凡人不得隨意登島
所以祈求平安既船民當年只可以係海上遙望參拜
因為呢度景色優美，逐漸成為名勝吸引唔少人過黎參拜
島上亦開始有人定居，慢慢就發展成頭先既商店街
到17世紀就被稱為日本三大奇觀之一，亦姐係而家所講既日本三景
另外兩個就係京都北面既天橋立同仙台東北既松島



之前講過我旅行期間撞正七五三詣
每個神社都幾多和服人妻帶住細路過黎拜神，呢度都唔例外
不過冇圖，有都唔擺出黎
門口售票處會寫左當日潮汐時間，剩係睇干潮就得
通常都係一早一晚，各自相隔大約12個鐘
呢兩個時間代表你有機會行到去鳥居個淺灘度
點解我話有機會？因為你可能冇機會
我行落鳥居嗰部分先詳細講，吊下你地癮



離5點幾干潮仲有4個幾鐘，大把時間行



嚴島神社昇殿料300yen，宝物館拝観料300yen
去哂既話共通割引500yen



嚴島神社有三個重量級名銜 - 日本三景，日本國寶，世界文化遺產
無論係景觀，歷史定文化價值都絕對係實至名歸
如果神社門口加多個橫批"日本三景"，咁就一流喇

D鹿西口西面,同奈良完全唔同

神社大部分建築都係國寶，我就唔多介紹
唔同部分透過迴廊接駁，門口行入去既東迴廊景觀最好
左望五重塔，右望大鳥居




迴廊地板由長條木板舖成，部分木板之間既罅都幾闊
容許天文大潮或者打風既時候海水可以快速流走
所以記住揸穩啲財物，跌左落去就等退潮行番過黎攞啦
我踎低實測，真係夠位攝到部iPhone落去


神社既樁腳冇打落地底，而係座係地面就算
所以嚴格黎講個神社係浮係水上面


東迴廊最尾會連接一個露天平台
由平清盛係12世紀末將神社擴建既時候建成，所以叫平舞台
對正鳥居延伸出去呢段平台就叫做"火燒前"
最出面嗰個青銅燈籠以前夜晚會點燈指引參拜人士
係海上面睇就好似火球咁，因而得名



係火燒前望番轉頭好似擂台咁既就係高舞台
祭典既時候就會有類似神功戲咁既節目，跳雅樂俾神明睇


行完平舞台就行去西迴廊
前面呢條反橋別名勅使橋，勅使姐係欽差大臣
係隆重既場合先會開放俾尊貴人士專用


海邊就係能舞台，係日本唯一設係水上既能舞台
係祭典既時候會用黎表演能劇

https://youtu.be/3bGLDESF57M

行完能舞台就係出口，行番出岸邊可以睇哂成個平舞台

呢一代大鳥居由1875年落成之後多次大修
最近一次就係2019年6月開始既令和大修理
期間因為疫情同白蟻問題工程多次延遲
最終係2022年10月開始拆棚，令鳥居重見天日
係11月最終檢查期間可以經工程平台行去鳥居底影相
但我冇留意見學時間原來只係到中午，結果摸門釘
如果頭先冇食飯我絕對趕得切架，唯有近近地影張相
個工程平台已經係上年12月20號完全拆除，冇左架喇





之後就去豐國神社，沿嚴島神社後面條路行就到
途中會見到好靚既紅葉



鹿既天性見到野食都係想狗衝去搶


豐國神社係山坡上面，有東西兩個入口
我行西入口就可以一次過去埋五重塔
東入口就係嚴島神社門口隔離

五重塔係佛教既建築，神社係神道教既建築
眼前呢個豐國神社五重塔就係神佛共存既組合
而家睇落好奇怪，其實以前係好平常
係奈良時期天皇承認佛教開始，佛教已經逐漸本土化
民眾會視神道教既神同佛教既佛係同樣既野
所以神社入面有佛像，佛寺入面有鳥居，啲人都係溝埋一齊拜

去到江戶時期，德川幕府為左壓制天皇威信
故意尊崇佛教漠視神道教，令佛寺係資源同土地分配遠比神道教多
部分支持天皇或者反對幕府既人對此非常反感
去到王政復古，明治天皇正式取回權力
為左加強中央集權同管治威信，即位當年就推行神佛分離令
原意係想將佛教同天皇為首既神道教教義分離
並將神道教定為國教，以君權神授之名將天皇統治正當化
本來並不針對佛教，但執行政策既官員往往係神道教徒
出於私怨使出我佛你招數，針對佛寺希望削弱其影響力
同時亦因為佛寺失去靠山，一時間猶如羊牯任人宰割
結果民間盲目跟風，引發大規模廢佛毀釋運動
包括強迫僧人還俗，脅迫佛寺賤賣寺內土地同建築
甚至無理拆除寺廟，燒毁五重塔同摧毀文物
其中一個例子就係奈良興褔寺，你睇番#309範圍好似好細咁
實際上成個奈良公園以前都係興褔寺既領地
因為廢佛毀釋運動差啲搞到成個寺拆哂兼滅門，雖然後來復興番
但消失左既唔止土地，仲有曾經存在過千年既附屬建築同文物
係咪好似文革呢，果然人類總要重複同樣的錯誤

嚴島神社亦曾經被官員判斷屬於佛寺建築而需要燒毀
經過宮司上京解說之後得以悻免，但都需要拆除一部分建築
而宮島好多寺院都冇得留低，包括五重塔原屬既金剛院
呢間佛寺係神佛分離令下被廢寺
而五重塔就被編入隔離豐國神社成為其一部分
點解納入左神社就唔駛俾人拆？四個字，政治原因


豐國神社本身亦唔係神社，而係佛教既大經堂
戰國霸主豐臣秀吉為左祭祀征戰期間死去既士兵
就係度起左一個可以容納一千個僧人誦經既場所
但未起完佢就死左，之後就一直停工，天花板同牆壁都冇裝到
最後變埋祭祀豐臣秀吉既靈廟，成為豐國神社
由佛教既經堂轉變成為神社，可見以前宗教既寬容度極高
神佛分離令下成為嚴島神社既末社，受其管理

因為佛堂既面積大到可以放近千塊塌塌米
而1塊塌塌米叫1疊，所以就做千疊閣
實駛總樓面面積857疊，大約15000呎


天花放左唔同牌匾同奉納畫
唔講都唔知原來2009年係紅葉饅頭誕生100周年


除左畫之外，飯剷都係主要既奉納物品
作為宮島名物之一，作用係祈褔而唔係裝飯
係商店街有個全世界最大既木飯剷，上次睇左今次就唔去
想睇就追翻我以前既post



呢度有4個方向，東面望五重塔，南面望神社
西面北面望海，非常寫意



而家睇與其話佢係佛堂，不如話似個大涼亭
舒服到係度放空幾個鐘都冇問題

我去左兩次都冇上過嚟呢個位，原來呢度咁靚

唔記得左講，豐國神社係要除鞋先入得，不過任影
拝観料只係100yen，覺得攰上去休息下都係個唔錯既選擇

唔係好靚，係好撚靚，景觀一流
中間最遠仲睇到大聖院

好彩睇到你嘅遊記，真係做少啲 research 都唔掂。就咁睇宮島玩一日都係啱啱好

係放空既時候俾仆街同事叫我幫佢禁FoodPanda
因為用會員同優惠碼食Lunch會平好多，當堂冇哂mood
非業配，純粹呻下
呢個時候嚴島神社既水已經開始退緊，早啲上山就早啲返落黎


上山有2個方法，一係行，一係搭宮島纜車
本來我都想行，但係怕第二日連機場都行唔到就算數
頭先係嚴島神社出口行去豐國神社已經會見到指示牌
行番去嗰度轉入去行斜坡就得



斜坡前少少有個站可以搭免費Shuttle去纜車站
但班次好少，所以好多老人家排隊
我地啲後生行到就行啦



前面黎緊嗰架就係Shuttle，每次俾盡上得20個客
點解咁多人排隊上山都唔安排多啲班次，當然有佢既原因啦
你見到前面咁靚紅葉，就係想引你唔好搭車揀行過去
嗰度就係宮島另一個打卡點 - 紅葉谷公園



紅葉谷公園故名思義，冇乜野多就係紅葉最多
之前查過紅葉情報話宮島見頃時間係我黎之後1星期
但我覺得早少少黎，睇轉緊色既紅葉仲靚
天氣咁好陽光又啱角度，點影都靚
以下多圖少字

正常由Shuttle站行過黎纜車站門口唔駛10分鐘
因為我慢慢行周圍影相，所以就用左15分鐘
搭Shuttle既話3分鐘就到，但條車路冇乜景睇
要去搭纜車就要再行多100級樓梯




宮島纜車票可以揀片道或者往復，視乎你行程
片道既話就剩係單程搭纜車上山，落山就行路
當然你可以行上山，之後係山頂個站買片道票搭纜車落山
往復就包哂來回纜車，但睇在我隻腳份上就買往復
而家加左價變左2000yen


宮島纜車分開左兩段
第一段紅葉谷線就好似衫碌拎咁循環式行駛
每架纜車最多可以坐8個人，但我目測6個已經好迫
雖然多人排，但唔駛5分鐘就有得上車



成架車計埋我有5個人，可能日本人比較見外
係上緊山前期大家一粒聲都冇出，好似好老尷咁
我前面對情侶就望海，隔離兩母女就望山
唯獨我拎住部iPhone喪影，因為我影相係冇聲既



之後佢地似乎意識到我係影緊出面啲相之後
佢地先夠膽拎部機出黎影相，仲互相すみません對方借開少少影相
全架車充滿住快門聲同快活既氣氛
車箱示意圖：
⠀⠀⠀

上到榧谷站就要落車上樓梯轉另一種纜車，又要排隊
你睇個女笑得幾開心



鹿：望咩望，排你既隊啦



第二段獅子岩線就係用往復式，兩邊車站各自對開過黎
雖然車箱一次可以裝好多人，但因為得2架所以班次唔密
排到我我既時候架纜車就滿左，要送車尾



唔知係咪太多人搭，雖然聲稱15分鐘先有1班
但其實對面駛過黎都只係5分鐘，清左客之後就可以上車
呢度向行車方向左邊望出去就係瀨戶內海

我喺函館嘆緊cafe 嘅時候都俾阿爸打黎叫我幫佢嗌大快活有8折

呢度係彌山既山腰，如果要上山頂就要行多最少30分鐘



出左站行一小段樓梯就係獅子岩展望台
呢度可以睇到東面同南面既無敵大海景
向北望就會望到纜車同廣島市區，神社嗰邊啱啱好俾個山遮住左



彌山山頂既展望台係邊度？係呢度
所以體能不足人士或者路痴要上去既話請自己衡量風險


係上彌山展望台之前首先就了解下點行去
呢度去彌山本堂大約0.6km，一半落斜一半上斜
我本身有係香港行開山，所以呢條路對我黎講等同食生菜




彌山因為係神山，絕大部分地區都未開發過
植物學家係呢度搵到唔少被認為絕種既物種
為左保育就將彌山原始林定為史蹟同天然紀念物


呢張相好靚一定要影低


因為大部分路段都有樹蔭，慢慢行上去既話唔會太辛苦
為保險起見，我左右腳腕都貼左殺龍巴斯如同上Buff




唔駛15分鐘就行到上山腰既彌山本堂

原來你早我一星期去

我係11月17號去，我2016年時行過上彌山山頂，今次就趕時間所以冇行到

其實我今次都算行得好急冇乜點Hea
結果係差大聖院去唔到，有啲可惜

新一年新開始，Day 7餘下部分一挙放送

日本因為山多，自古以黎都係山嶽信仰既追隨者
信眾會透過爬上靈山苦行達到吸收靈氣同修煉既效果
彌山係宮島海拔最高既山峰
作為神道教既神域，嚴島神社都只敢起係宮島岸邊
佛教冇呢個概念，剩係知宮島風水好靈氣自然勁
而日本佛教之中對山嶽最崇拜既就係真言宗
佢既創始人空海大師同時係彌山既開山祖師
本堂作為修驗道場係806年建成，連帶起埋個靈火堂
而裡面個火自1250年前就未熄滅過，非常誇張
1250年前姐係幾時？唐代詩人白居易寫下名作長恨歌嗰時

呢個不滅之火亦係廣島平和之火其中一個火種之一
火上面放左個鐵壺煲水，裡面既水聲稱能醫百病
我上網睇過圖，因為經過長年高溫殺菌消毒，飲應該冇事
但係水裡面充滿鐵壺既鐵離子，所以顏色係好濃既銹水色
雖然賣相好靚意頭好好，但我心領喇



取而代之就係去授與所買番支宮島天然水黎飲
250yen好似好貴，但人力搬上黎你估唔駛成本
係山腳買只係120yen