【I’m Afraid】《病港ＩＩ》（３５）

upb

文呢

「韓湘……」袁燊彷彿酒後吐真言，被拉走前更跟韓湘表示：「上我直昇機……我帶你飛……離開呢個地方……」

短暫的擾攘結束後，元帥把客人送到門口：「各位返去休息下，軍秘書你幫蕭梵打點下，研究點交個導彈俾佢。」

「遵循。」軍秘書向元帥敬禮，並詢問蕭梵：「蕭梵先生，你今晚要留宿西城薈嘛？」

蕭梵回他一句：「我會自己搵地方休息。」他真的不慣被人束縛。

「咁好，你自便，有任意疑問，你可以到附近本部大樓搵我，如非必要都唔好去摩星嶺一帶，嗰邊最近發生咗唔少意外。」

奔波忙碌一天的韓湘，一臉倦容的她穿過夜蘭人靜的街道，前往今天最後一個地點──廢車場。

久別三日，如像一年。

韓湘推開廢車場鐵閘，走入我平常躲藏休養的位置：「有人？」

把雙翼當成被子蓋住身體的我，裝成睡著一樣。

韓湘摘下電擊手套，伸手輕輕掀開羽翼，盡量不想打擾我醒來，然後默默看著我的臉孔好一陣子。

「都好返唔少。」韓湘會心一笑。

原本我想突然睜開眼睛，想嚇韓湘一跳，給她一個驚喜，因為這幾天實在悶得緊要。可是聽她語氣疲累，讓我無故想起一個久遠的承諾，於是暫且打消嚇人計劃。

見查看過我情況的韓湘準備悄然回去，我立即把她的手腕握住，她有些怔了一怔，大概沒想到我會倏地醒來。

「你想唔想飛。」

「吓？飛……飛咩飛……」韓湘表情一頓，後來皺眉。

「你之前喺大本營講過，話想要飛一次，體驗喺天空嘅感覺。」

「你仲記得……」

「所以，曾我仲飛到嗰陣……嚟一次？」

「但你啲傷點？」

「呢三日都自行復原咗唔少，仲重要嘅內臟細胞恢復得七七八八，係仲有啲外傷。」我轉臥為坐，再站起身。

「咁唔好冒險，你都係養好傷再講。」

我捉住韓湘的手，帶她行出廢車場，眺向澄明的宇宙星空。

「喂、你……你……認真？」韓湘似乎未反應到。

「嗯。」我牽住韓湘，快步行出沙灘。

「咁我要……」韓湘不知把手放在哪裡，一時摸腰一時搭膊：「騎住你？定攬住……」

我把韓湘雙手放到自己肩膀上：「捉穩。」我兩翼開始拍動，空氣開始掀風。

「你會唔會太突然啊。」

「蓬──」雙腳離地，朝天高飛。

韓湘捉得我緊一緊，發現自己真的飛在半空上。

剛起飛時，我盡量在海上低飛，到脫離西城薈視線範圍一帶，才慢慢飛上至天際，讓韓湘感受真正的自由。

「終於唔洗廢車場陣鏽味……」我深深吸一口氣。

「都係第一次咁近個月亮……」輕風讓韓湘披頭散髮，但掩不住那笑容。

微涼夜風，韓湘澄心滌慮，一天疲勞全都消除。

「原來你望到嘅事物……」韓湘俯視下方，若有所思：「係咁渺小。」

我刻意在空中任意翻轉，像過山車般俯衝，快要撞落海面之際又急速飛高，於水面上飛行，瞧那被月映照而波光粼粼的海面，傲遊整個香港的天空。

「你點解無諗過離開香港？如果我好似你咁有翼，會第一時間離開。」韓湘說。

「每次我一飛離香港太遠，個腦就會好似被某樣事物拉返過嚟……」我看那無盡頭的遠方：「就好似有道磁牆擋住我。」

「突破唔到？」

我搖一搖頭：「無辦法。」

「我哋以前海路派出去香港嘅軍人，全部都係離奇失蹤。」

「話唔定我哋呢一世，都注定喺末日中渡過。」

體驗完空中的刺激飛行，我開啟慢飛模式，像遊車河那樣，欣賞沿途風景。

「咁有冇見過其他地區嘅倖存者？」韓湘像個好奇的小孩子。

「當然有，不過見得多咗，但你唔洗特別好奇，都係個掙扎求存嘅人，有個聚居地咁，見得多就見怪不怪。」

「有冇咩地方特別熱鬧？」

「呃……元朗？嗰到有個「元朗國」，因為唔係市中心，又有唔少農地，嗰到生活都幾豐裕，唔憂柴米，係人同人嘅地盤鬥爭比較多。」

「咁得意，仲有冇？」

「九龍係病者重災區，地面上幾乎無咩活人。」

「嗰到市區咁密集，都應該。」

「係呢，雲梨佢點？」既然韓湘沒有死訊，那雲梨應該安全。

「佢無事，但係……」韓湘把那三天的經歷，都說給我聽。

「蕭梵想見我？」

「我唔知佢喺邊到拎到你嘅訊息，但佢情報能力似乎唔弱，而且有啲難以捉摸……你會唔會想見佢。」

「見下都無妨，雖然我未見過，亦好少聽聞佢事情。」我轉身返回西城薈：「你安排下。」

「咁首先要安排一齣你滿血復活嘅情節先。」

「就話我俾男病童搞到重度昏迷，自行用意志清醒返，我諗病者基因好快會消退……呢幾日復原速度已經明顯變慢。」

韓湘沉默半晌，看著快要回到的西城薈：「你會唔會有可能……依個狀態下，滅到西城薈全部人。」

「呢幾日其實我都有諗過……」

在將軍澳區那麼落後的地方，人人都差不多手握冷兵器，我或許還能大殺四方，但面對荷槍實彈的對手便不同。

「但一嚟我未完全康復，二嚟佢哋全部人有槍，就算擁有病者之力，都唔係完全無敵，只要我俾佢哋意外爆多幾次頭，感受多幾次嗰種深入腦髓嘅痛楚……肯定會喪失人性。」到時，會造就更可怕的怪物。

「都係……風險太大。」韓湘臉頰靠前，想望到我的眼睛：「你對翼會唔會突然間生返？」

「復原有分先後，最致命嘅位置例如腦部，身體會優先修復，再之後就係五臟六腑，而翼呢種唔係維持生命必須嘅事物……通常排到好後。對翼一切咗就應該唔會復原，我估聽朝病者基因就會抑制番……因為我已經有番少少身理上嘅感覺。」

「即係？」

「我開始有少少眼訓。」我打個呵欠放鬆全身，像睡著般於空中墜落。

「哇……」韓湘緊緊抱住我，離心力雖然恐怖，但她卻忍住不叫：「你條友……」

約莫五秒過去，我重新拍翼飛動，最後安然降落至廢車場中。

落地後，韓湘利用各種手術刀替我切割羽翼，又替我磨掉利爪，讓我外表乍看之下，像個常人。

截翼磨甲的手術結束後，韓湘叮囑我：「咁到時見蕭梵嗰陣你自己小心，佢好善於隱藏殺氣。」韓湘在珍寶海鮮舫就領教過。

「嗯。」

平和的一晚，就此別過。

第二天一早，我從廢車場行出域多利道，裝成迷迷糊糊的跌撞到地上，讓路過巡邏的士兵把我救起，然後送去醫療室去。

「呢個……呢個係……」

「佢係顧問呀！」

「顧問！？佢未死啊？」

「救咗佢再講！」

就這樣，我被帶到西城薈的醫療室中，並給「偶爾」出現的韓湘進行身體檢查。

這樣子，其他軍醫便採集到我的數據樣本。

「佢意識點？失蹤咗四日先出現番……」基於韓湘上校的官階，其他軍醫只能在旁觀察，不得插手參與。

「已經過咗黃金救治時間，睇怕都凶多吉少。」軍醫甲說。

「佢醒返行去馬路俾人發現嗰陣，或者係迴光返照。」軍醫乙說。

「佢無食嘢飲水好耐……嚴重缺乏營養……」韓湘說些例行狀況，再刻意湊到耳前裝作檢查，低聲耳語：「俾啲想醒嘅跡象嚟睇下……」

她話剛說完，我指頭隨即微微一動。

「噫、噫我係咪睇錯……」軍醫丙留意到我手指郁動。

「做咩？」韓湘轉頭裝傻。

「我好似見到佢手指郁！」

我又刻意動一動指頭，這次大家都注意到了。

「顧問佢求生意志好頑強！」軍醫丁喊。

「你哋離開下先。」韓湘命令他們。

「知道，如果有需要幫忙請叫上我哋，上校。」

「我會，如果有。」

經過一番假裝治療後，我被送到病房去，繼續專心飾演病人角色，韓湘則去安排蕭梵跟我見面。

昨晚韓湘告訴我蕭梵經營著「狩獵場」和居住在「珍寶王國」的事情後，我對這個興趣加深不少，我有點好奇他有什麼目的。

正常來說，他能在港島南和病者國度之間的海灣行動，實力應該弱不到哪裡，這種直面坐立病者國度大門前的姿態，更讓我有些佩服。

對我而言，既然是病獵，那便是同行，我不會抱有太大敵意，即使他曾經犯下什麼過錯。

也許，他會是我想招攬的人物，等會兒且看什麼來頭。

一小時過去，韓湘重回醫院走廊外，後面跟著一名戴住兜帽風衣袍的男子，他刻意隱藏自己眼睛，只露出一張弧度邪魅的嘴，彷彿不怕天地世間任何事物。

坐在床上的我端正身子，收拾情緒重回認真，準備迎接他的到來。

「顧問，佢就係蕭梵。」韓湘介紹。

「你好。」我說。

蕭梵打量我全身，然後瞄了韓湘一眼。

我跟韓湘點一點頭，示意她讓我們單獨一會。

病房一眨眼剩下我們二人，但他還是未回應我那句問好。

「聽講你搵我有事？」我接續問。

「如果我同你講，係嚟殺你，你信唔信。」蕭梵笑意更深。

「……」我被他的直接搞得一片腦空白。

儘管如此，我身體還是本能地反應過來，被子下的雙手伸出兩指，做出閉日的手勢，隨時面對突如其來的危險。

「你似乎唔多鐘意病獵協會出身嘅人。」

「我討厭協會嘅義務同宗旨。『保護人類性命、財產、倖存區安全，使人類文明得以繼續發展』，但代價係病獵一個一個咁死去，但無換嚟城內人嘅尊重，當你喺圈外同怪物戰鬥緊嘅時候，商家腦滿腸肥、政客享受權力、市民歧視我哋，佢哋繼續喺自己嘅圈子內鬥消耗，但有冇諗過……社會應該係由病獵去主宰，某程度上佢哋可以舒適地大玩社會遊戲，係病獵協會一身造成，如果佢哋連最基本嘅安全都失去，佢哋自自然然會學識安份守己。」

「以上就係你脫離協會，成立叛獵組織嘅原因？」我理解他的想法。

「其一。」蕭梵舉起一根手指，隨後舉起第二根：「其二，我相信喺時代嘅洪流下，病獵會係香港最後剩下嘅一群。如果倖存區成為最大嘅狩獵場，應該可以快速挑選適合生存落去嘅人類。」

「我已經係隸屬西城薈。」

蕭梵笑一笑，像是聽到個幼稚的笑話：「你未死就證明大半年前雲梨向你開槍只係一場戲，佢為咗你陪合演出，欺騙本應同屬一方嘅天環人。」蕭梵在床邊踱步，說出自己推測：「雲梨千辛萬苦、不計生死咁陪嗰位上校嚟到搵我，應該都係得你先有資格落命令，否則佢哋一個東一個西，唔會突然一齊行動，加上咁多軍人死喺你間屋，成件事更加耐人尋味。」

蕭梵的思維細密，正常人很少會想到那麼深入。

「所以你意思係？」我望著他。

「你係間諜。」話畢，病房陷入沉靜。

我面不改色，平淡依然：「你要告發我？就憑上述嘅推測。」

「真相得你知，上校知。」蕭梵靠住牆壁，抱臂翹站：「今次只係單純想會一會你，如果我有估中，你唔需要擔心。」

「你應該更重要嘅事想講。」

「如果世界再無容身之所，亦或已經厭倦一切，不妨過嚟南面。」

「……」

身上籠罩重重謎團的蕭梵留下一句意味悠長的說話，便徐徐離去，不帶一點雲彩。

蕭梵出去，韓湘進來，她見我呆怔好一陣子，想知道蕭梵說了些什麼。

「佢講咗啲咩？ 」

「叫我去南面，講咗啲自己對世人嘅見解……」我回憶著他的說話：「大概係咁。」

「話語權似乎落哂喺佢身上。」韓湘見我有點迷茫。

「嗯，連招安佢嘅機會都無，或者遲啲睇下點。」

「咁你自己休息……」韓湘用力撫摸我的頭，弄得非常凌亂：「我去睇睇我家人。」

「你琴晚好似話，佢哋仲未醒？」

「係……而且心律有啲唔正常，好似發緊惡夢咁，而且營養輸得番一日左右，之後就再送唔到營養俾佢哋。」

「惡夢……佢哋應該聽到男病童嘅喊聲，咁就麻煩。」

「咩意思。」

「病童嘅腦波分兩種，第一種係唱歌，第二種係哭泣，前者具有洗腦效果，令人願意服從，後者就係精神折磨，會令人精神崩潰，如果唔盡快醒返，恐怕……」

韓湘目光流露出憂傷，她難以想像：「咁……」

「都唔係無辦法，要先入到佢哋精神世界。」我低下頭，有些難以啟齒：「但如果要咁做，亦需要病童。」

我曾經在犬學派總部營救瑜小六時，見過關於病童的實驗裝置，是用耳機接駁的形式。病童的腦波就像中樞器，我們見到的幻覺，都由她敏感的大腦中發出，在某種特定形式下，我或者能夠侵入夢境，當時犬學派大概是研究相關的實驗。

「病童要去搵搵……」

「陸地表面基本上已經無哂病童，就算搵到都好難帶返嚟，沿路病童會一直影響你大腦，係件好危險嘅事，佢不知不覺咁引導你去危險嘅地方都話唔定，正常人好難察覺。金鐘區地下鐵係有一批……但無人會有足夠嘅精神力，抵擋嗰班病童嘅腦波攻擊。」我給韓湘分析。

韓湘茫然地坐下，雙手把頭髮梳後，凝視住地板：「有個最簡單直接嘅方法……」

我點頭：「除非，你強行轉化一個細路，令佢病變成病童，而且係女性。」

韓湘苦惱地搖頭：「唔可以咁。」

當我們陷入苦思之際，一名軍人敲門來到病房。

「顧問好，上校好。」軍人敬禮，然後轉身向我說：「顧問，需要你跟我哋去審問室一趟。」

「……審問室？」

「無錯。」

「審問室……」韓湘一怔，緩緩望向我：「係專門拷問犯罪者嘅地方。」

難道，朴喬夫的事情……

被他們查到什麼了……

但所有證據都應該如韓湘所說，給炸毀了才是。

補800正評

愛墨b

原本我想突然睜開眼睛，想嚇韓湘一跳，給她一個驚喜，因為這幾天實在悶得緊要。

元朗國

Lucky time <3

push

女病童 元帥個女

唔知仲有冇 更多唔同地區

蕭梵會唔會係想好似萊納咁整爆圍牆

A whole new world~

Push

每日一推