第廿五章：風雨故人來
［獅子山恩仇記］
報紙用了這個標題講述了我與別離公子的故事，我如何從中環甲級辦公室，落難至菲律賓最惡劣的牢房；而同時以更大的篇章講述了別離公子的故事，失去父母後進到弧兒院，最後奮鬥成別離公子，向唐老板發動復仇。
「真係浮誇。」我把報紙扔到一邊，亞娜收好以免海風將其吹走，我們正在法老號上。
「…」別離公子一臉茫然。
「你有心事?」我說，「我以為你會開心D。」
「開心係開心啦。」他道，「但係硬係…好似唔係咁好。」
「有咩唔好?殺父之仇，你唔係唔報下嘩?」
「問題係…我十幾年黎其實都唔知道我係有仇人，我有殺父之仇。」他說，「依加即使報左仇都好似…多左件唔開心既事咁。」
「幸福即無知啊。」我道，「都有呢種睇法。」
「即使我地係搞到唐老板玩撚完，我都唔可以忘記自己屋企人係慘死係自己面前呢件事。」別離公子失去一向的活力。
風聲呼呼，別離公子一頓後再說:「即使報左仇，都無補於事，我都係孤兒，我既不幸引發更多不幸…好似無咩意義。」
然後，他嘆了一口氣。
印象中好像是第一次見到他這樣的消沉，我還以為大仇得報，還是殺父之仇得報他會欣喜若狂呢。
但是—
「講到你好似真係諗返起咁呀。」我冷笑。
法老號是遊艇。
遊艇有一個好處就是出了海說甚麼也不會有人知道。
「我…」
「定係你覺得自己俾假證供，你內疚，良心過意唔去?」
利景遙的調查，是結合了當年的各種間接證據，例如發現床上的別離公子那個警員，看到那架車子停過的證言等等，但因為年代久遠，始終沒有直接證供。
除非，別離公子親眼看著了一切的發生。
別離公子的失憶是真的，說明他真的看到了，經歷了極度恐佈的畫面而患上PＴＳＤ。
所以他看到「唐老板唐太殺死鐵哥」這件事——應該是真的。
這個證據應該是真，也應該存在，卻一直沒法找回來，甚麼醫生心理醫生也不管用。於是我找來了一個戲劇導師。
沒錯—不是甚麼醫者，而是戲子。
於是就有了那個心理醫生兼催眠師為別離公子治療，然後他突然「覺醒」，想起了當年的種種畫面這一幕，亦是這樣把唐老板定罪。
偽造本應存在的證據不算偽造吧。
「咁又唔係假證供…如果唔係親眼睇到殺人，我都唔會失憶啦。」洗腦挺成功。
「咁反正你都未真正諗返起，你頹咩啫，到你真正記返起個時先頹。」我倒酒給他，給自己，「依加你要享受既，係復仇既滋味。」
「我都覺呀，我應該係好開心好興奮先岩。」別離公子把大好佳釀變成了喝悶酒，有夠浪費。
這種傢伙想成大事?
「可能你對佢既仇恨唔夠深。」我道，「過去十幾年你都胡里胡塗咁以為自己係孤兒，亦唔記得自己既父母，所以即使係殺父大仇，你都覺得無關痛癢，所以依加即使成功復仇，都係一樣無關痛癢。」
「你呢，伯爵。」他說，「報紙話…你因為唐老板坐左十幾年監?」
「無錯。」我說。
「你好興奮好開心?」
我大笑:「嘿哈哈哈！咁當然！佢本來就係我地既共同敵人，成功搞到佢仆街我不知幾爽！」
「你憎左佢十幾年啊。」別離公子說，「而我憎佢…因為得幾個月，半年左右，我之前真係完全唔知…」
「所以分別就係呢度。」
「我可能寧願一直都唔知。」
「係？」我不解。
「你諗下…我報左呢個仇，其實都唔係話咁興奮咁高興。」別離公子說，「但係人腦無辦法主動去忘記一件事，我以後成世人都會記住父母慘死係自己面前既呢件事，同埋…做假證供害到唐老板坐監。」
「你想忘記?殺父之仇你都想忘記?小心俾雷劈喔。」
「我唔係咁既意義…我係話，如果我由頭到尾都唔知有呢個仇，我會唔會開心D？」別離公子其實挺有智慧。
「我以為你會多謝我幫你報呢個仇啊，咁落去我睇黎要向你道歉先得，搞到你無啦啦知道左當年既真相，嘁。」我冷冷地說，語氣中有點不悅。
當然，我只是在利用他罷了。
「唔唔唔係啦，其實問題都係我身上…對唔住，伯爵，呢排我經歷左太多野，痴痴地線哈哈…」這傢伙以笑遮醜，拿起紅酒喝了一口。
「…你俾時間自己沉澱下，Fiora今晚約左你？」他的工作還沒完成，作為一隻最有價值的棋子我可不準許他隨便自暴自棄。
「係…都差唔多夠鐘…約佢遲到會死…」
「我知，亞娜。」我向她招招手。
「係，依加去升錨開船，大約４５分鐘後返到尖沙咀碼頭。」她鞠躬走向艦橋。
「岩晒，我都約左人。」
「咩人?」
「嘛…兩個老朋友。」
我幽幽的看著海，海沒有終點，遠方的海上似乎有雨雲飄至。
