［RDR2］呢隻game個通緝系統......

同埋支線既獎勵太雞肋
變相除左劇情 冇乜動力另玩家想解支線

山長水遠幫你殺條友 你比幾十蚊當我乞衣咩

有時玩2 3個鐘 解幾個支線 但好似乜都冇做過咁

哥仔，宜家玩辯論咩。
我再講白d，我意思係我覺得唔只支線玩法重複，主線一樣玩法重複。而rockstar個設計思路同重心係為咗敘事，之後係對敘事嘅補充。當然唔同玩家對呢一套受唔受落係另一回事。

至於騎馬騎到頂唔順，呢個咪就係前期一玩就要玩夠三四粒鐘嘅原因之一囉另一個post有位巴打講好幾岩，玩巫師3我玩兩個鐘真係玩咗兩個鐘，玩rdr2可能只係騎咗一圈馬殺咗兩隻鹿。

最後，雖然宜家嘅遊戲分類唔似以前咁明確，但始終都係一個大類再加其他元素落去。動作冒險嘅底同角色扮演遊戲嘅底係唔同架。
角色扮演遊戲大多數有好明確嘅角色成長系統，比如巫師3、ds系列，有lv有裝備，兩者對角色能力影響好大，你技術練到再好，都未必夠升多兩lv嘅提升大。
動作冒險遊戲，比如生化危機、隻狼、rdr、gta、起源之前嘅ac，相當就冇咩多角色成長系統，隨遊戲進度解鎖嘅通常只係技能或者裝備。比如你玩生化危機2remake會唔會diu隻game一路玩落去，除咗多咗槍、多咗配件，leon呢個角色冇成長過吖?唔係死眼當解鎖能力成長，而係呢類game通常都只係咁設計。

至於岩唔岩所有人玩，冇一隻game係岩所有人玩架鍾意咪玩，唔鍾意咪下一隻，反正大把game。
唔單只game冇得勉強，觀點都冇得勉強小弟單純分享自己睇法，r水吹架渣

所以如果本身唔享受「敘事」本身，都真係幾難玩落去相信呢個都係rdr2評價咁兩極分化嘅原因

Resident evil 起碼支槍會勁左幾個檔次

但rdr2 由頭到尾都係秒殺人

想問下online 版用咩方法儲金條最快？
啱啱由PS4 轉去PC 發覺賞金獵人執照要15金條先有

巴打你幾好彩，上個星期人人DIU嘅更新好啱你。
做搶劫前置任務嘅鐵路合約第三部分，殺咗個董事拎完佢身上嘅資本票之後換戰局就可以再接過，一次三張，夠數就開搶寶石，掛夠時間有等同傳奇賞金嘅金條(0.48)。咁樣應該最快。

Thx , 搶劫任即係blood money 既新任而唔係主線任？
而且可以不停重複做？

係，Blood money。不過其實就有冷卻嘅，殺咗個目標任務失敗，然後搜刮完三張券之後換戰局可以再接係bug黎。

Thx , 今晚即刷！

只要爆頭就係一槍死，槍夠唔夠力應該唔影響低難度嘅PVE太多，反正火車上面有咁多掩體

講開又講，我已經冇咩動力開rd online，線上悶過故事模式好多。而且全成就咗感覺好似畢咗業咁。
呢幾日已經爆咗mafia 1，然後玩緊Metro Exodus

Online玩左300幾個鐘了，其實我每日都係9流流打下日任又重玩下個幾個故事見下人，都試過轉玩Witcher 3同TLOU 1，但玩左半個鐘就轉返rdr

Story + online 應該玩左600幾個鐘了，特價好似25折定2折買呢隻game真係抵到爛

我係四月中果陣原價購入不過都好抵。早有聽聞RDR2個大名，但果陣對西部題材冇咩興趣。點知一玩就

佢出果陣無買
去到而家 比生活折磨完
再去玩
就好有感覺

個通緝系統好多變化好人性
唔似gta咁一粒就一粒星 幾多星就幾多係追你
你可以犯小事可以撒個冧就冇事 拉都唔拉你
報串友又唔一定要殺左佢先冇事 可以嚇佢兩嘢就當冇件事 好有血有肉

有d目擊者你恐嚇佢，佢會拔槍射你。
只能講，茅廁裡挑燈

我好似試過阻止佢都繼續報綁住佢掉到河邊 再鬆綁 即刻嚇到唔敢報串
btw爆左機都兩年幾 再玩返仲有大片地圖未開發 再玩玩下發覺仲有大把嘢未玩 真心cls而家收集緊啲帽面具隱藏武器果啲

如果你做動物獎杯，基本上所有事件都會觸發晒。真係上天落地

唔衝獎杯啦 呢隻game白金應該難到痴線 玩得幾多得幾多咋都係同埋隻game爆左用john都唔知仲有咩任務未做晒

其實唔難，只係煩，連埋線上大概三百個鐘左右。
主線同榮譽任務(重要支線)有冇做齊可以上ROCKSTAR官網CHECK，不過一般嘅陌生人任務就只可以GOOGLE攻略先CHECK到。
其實仲有部分尾聲劇情係冇提示亦唔係任務黎，比如夏綠蒂，如果arthur果陣有教識佢開槍兩次，佢就唔會死，john去搵佢會有一小段劇情。
然後幾個有存活嘅幫派角色同埋猶長都可以遇返

犀利 tw即係夏綠蒂死左要重玩先解到個成就？
我唔知佢有冇死 唔記得咗
線上模式啲成就難唔難解 我對線上冇乜興趣 難解就唔解了

john去搵夏綠蒂唔係成就黎，純粹睇下劇情，算尾聲彩蛋。但夏綠蒂果個好似係榮譽任務黎，有一個成就係要解晒所有榮譽任務。
線上堆成就，對比起故事模式，基本上係肯玩就會解到，除咗「不擇手段」之外。「不擇手段」要截糊其他玩家嘅陌生人任務，宜家pc版幾可有人開陌生人任務吖，基本上得新人會玩下，仲要未必遇得上，中途仲可能有外掛亂入我解果陣係同人互解。

想問下普通/困難既祖母綠 有咩分別，我琴晚過咗普通難度但唔記得俾幾多黃金我

成隻game最on9嘅地方黎啦。黃金獎勵同難度無關，只同時間有關。你去到交貨地點前掛機掛夠三十分鐘(由你可以自由操作角色開始計)，就會拎到0.48金條，咩難度都一樣。

不過殘酷難度第一次爆機會有0.6金條獎勵。