[足球/穿越]重來一次的足球人生（2）

推

聽日有文

推

四十二、


“今日嘅中場……好似特別闊咁……”

司徒俊緯喘著氣，眉頭輕皺，臉上掛著略顯倦怠的神色，但陳召禧看出來了，那不是肉體上的疲累。

而是日本把中前場的空間利用得實在太過出色，他所面對的，是對精神及體能雙管齊下的壓力。

當岡部彰控球時，會指揮兩邊的閘位隊友大膽地疊瓦上去嘗試超負荷對方的邊路防守。由於日本隊4-3-3的陣式擁有翼鋒、邊中場以及邊後衛，只要他能牽制著港隊唯一的防中，兩邊便能很簡單地形成三打二的局面，兩名中堅必須抽出一人去兩邊補位，但這樣做便會讓中路的防守稍微變得薄弱。

最簡單的戰術走向就是，當日本轉邊時，兩名中堅一旦對盯防倉野尾一志的共識稍有偏差便足以致命。

所以即便是攻擊中場，蕭智堯也必須要頻繁回防以防止對手的戰術奏效，執行起來更像是平行4-4-2。只是這樣一來香港便失去了在中場附近的首要傳球目標，他也像被玩弄般需要不斷跑動補位。

“教練交帶落嘅任務係要拎到中場嘅控制權同踢一次有效嘅反擊，但而家莫講話控制中場……”蕭智肅與司徒俊緯的狀態差不了多少，不擅長逼搶的他也無法獨力改變這個局面。“兩隊個控球率應該係八二咁滯……”

「呢度！」岡部彰在中場線的支援實在過於靈活與巧妙，當司徒俊緯選擇緊貼時就會被拉出，讓禁區頂的關鍵區域暴露出空間，這時日本的其他球員便會不言自明地自動去利用這個空間大做文章。

若是稍為減輕施壓，他又會自由地組織不斷製造威脅，又不時地與隊友在Half Space來回走動迷惑他們的區域防守。

在半場哨聲響起之前，港隊即使已幾乎陷入全員回防的狀況，卻還是被日本隊創造出好幾次極具威脅的攻門，萬幸的是並沒有讓分差進一步擴大。

但這已足以讓場邊休息區的氣氛低落得一塌糊塗，彷彿每個人的臉上都寫著想要放棄比賽一樣。

眾人坐在木椅上張開雙腿用手肘頂住大腿，低下頭去不發一言，便是平日最為冷靜沉著的司徒俊緯也顯然是受到了打擊的樣子。

“對比起之前，日本隊確實實力上係進步咗好多。”陳召禧與助教拿著戰術板與一些文件及報告，看著這副光景，一時間也不知該如何開口。“得余仁海叫做心態正常少少，連蕭智堯同梁博豪都係迷迷茫茫咁……”

速度、體能、力量、技術、團隊合作、把握能力、精神力量……所有在足球這項運動上能作為實力參考的指標，港隊都明顯遜色一兩個層次；球隊向來的王牌前鋒在單對單對決中屢次被對方壓制，唯一能夠看到一丁點曙光的，便是目前的隊內神射手，新人余仁海似乎能佔據些許優勢。

所以球員們的心情，他也不是不能理解。

陳召禧輕聲地嘆了口氣，將手中的資料遞到助教手中，緩緩走到眾人面前蹲了下來。

「聽住，嗰啲咩『雖然輸緊三球但我哋踢得好好』呢種廢話我講唔出口，雖然我話過今次嚟關島嘅首要目標唔係贏波，但我想要嘅嘢，暫時呢個上半場仲未見到。」

陳召禧的語氣平和中帶點強硬，卻也能感受到帶有點餘地。

「我明白日本隊嘅強大，佢哋由基本功、體能、團隊合作、場上應變到精神力同我哋都唔係同一個層次，我明白你哋會覺得受到打擊，呢個係必然嘅事。」

「但呢個正正係我帶你哋嚟關島嘅目的同意義。」

眾人開始慢慢抬起頭，同幾乎平排的角度朝他看去。

「有人講過，足球係呢個世界上最公平嘅主流運動……我唔認同世人話香港足球成績咁差係因為天份同身體質素，已經有太多世界級球員證明過，瘦弱或者慢一樣可以喺高水平賽事度立足。」

「一直以嚟，我哋缺乏嘅係環境同經驗，係培養同鬥心，係勤奮同意志—話自己咩唔夠人撞唔夠人跑所以贏唔到人，呢啲只係我哋技不如人嘅藉口。」

「沙維小白好好撞咩？佢哋跑得好快咩？亞洲人喺身體質素上稍有輸蝕呢個係事實，但呢個差距唔係無辦法彌補，黃種人或者仲未有能力成為球王，但朴智星、香川真司、孫興民、久保建英呢班亞洲球員已經證明畀大家睇：我哋係有踏足世界一流賽事嘅資格，足球並唔係一項單純比拼體能嘅運動。」

「而所有球員嘅技術同判斷，都係經過一場場嘅戰鬥同挫折，練習同汗水累積返嚟……」

「我哋見到嘅係佢哋喺球場上用技術玩弄對手，擊敗對手，但比賽之外，佢哋落嘅苦功大家又見到幾多？」

「日本人天生體質並唔會比香港人差，今日你哋今日喺度俾人數，俾人蹂躪，係任何世界級球員都經歷過嘅嘢，甚至對面嗰班對手都經歷過唔少次，但如果你唔去克服佢，你就會一世都只係出面班人口中『出到去點夠人跑點夠人撞』『香港地環境係咁點踢都唔會勁』所以無辦法踢出成績嘅嗰種球員。」

「今日大家對住日本俾人技術性壓制，係一種經驗，而他日我哋面對亞洲體能最強嘅伊朗同韓國，俾人體能壓制嗰陣，又會係另一種經驗。」

「點樣接受自己嘅技不如人，同時要全力以赴唔認輸唔放棄，不斷精進自己－呢個先至係真正嘅體育精神。」

「本身我同黃Sir整理咗少少嘢想去調整，但我認為今場比賽到目前為止，要解決嘅首要問題並唔係戰術上嘅嘢。」

「呢次中場休息我唔會安排任何調動，你哋有十分鐘去冷靜咁思考一下，你哋入港隊，嚟關島呢度，為嘅係咩。」

「最重要嘅係，呢場波贏輸都好，我都希望大家可以有一個咁樣嘅觀念……」

「『由呢一刻開始，我哋就係改變香港足球嘅起點。』」

「你哋絕對唔係無能力踢贏呢場比賽。」

……

「……你諗住等佢喺比賽入面自己領悟出嚟？」方功庭皺了皺眉。

「可以咁講，」陳召禧嘴角微揚。「有時候有啲嘢係要佢自己切身體會先會明白個重要性，佢係個聰明人，等佢用另一種角度去閱讀球賽，對佢嘅成長會有好大幫助。」

「但咁做代價可能會係……輸呢場比賽。」

「其實我嚟呢度本嚟就對輸贏唔太重視，足總亦無預我哋要拎咩成績返去，」陳召禧笑道。「重點係，我要令呢支U-13嘅港隊快速成型－我敢肯定佢哋日後會係港隊一隊嘅核心。」

「都係……」方功庭點頭表示認同。「即係呢場你預咗會輸？唔似你性格喎。」

「雖然我無預話一定要贏，但唔代表我預咗會輸呢場波，」陳召禧笑道。「港隊嘅顏面喺我心目中依然重要。」

「咁你諗住……？」

「你離開咗香港咁耐，有無咩嘢食會比較掛住？」陳召禧突然把話題一轉，讓方功庭有點跟不上。

「吓？嗯……都係蛋撻、車仔麵、燒……」

方功庭停了下來，目光移到桌子旁邊的手提電腦上，雖然角度稍為偏斜，但仍能看到那上面是一張菱形4-4-2的陣型圖，以及大體上的進攻脈絡。

「日本拉麵啲叉燒又薄又柴，我都係鍾意港式嘅蜜汁叉燒。」

陳召禧胸有成竹地看著他，輕輕笑道。

「我諗住請日本人，食一餐純正嘅港式燒味。」

……

陳召禧如他所言，只用了一兩分鐘再覆述一次前一天晚上自己安排的戰術部署，讓大家自己去考慮如何在下半場踢出來，然後便與助教走到一邊，沒再給予他們壓力。

而中場休息的時間還剩下十分鐘。

「啱先教練無講，咁我講一下自己所見到嘅一啲問題。」司徒俊緯緩緩走到眾人面前，像剛才陳召禧那樣蹲了一下來，用一個與大家視線平排的角度去說話。「首先係我哋嘅左路，對面似乎比較針對呢邊去踢轉邊，上半場佢哋由右路斬去左邊製造威脅嘅次數非常多，我覺得智堯你可以更側重於幫多啲左邊。」

「好。」

「仲有就係……」


本來失落得一片死寂的後備席此刻似乎有了一點生機氣息，助教遠遠看去，露出滿意的微笑：「明明佢應該係呢場比賽入邊最受打擊嗰個……」

「有啲人係天生嘅王牌，而俊緯，就係天生嘅領袖。」陳召禧滿意地點點頭。「如果你問我，邊個係呢一屆港隊最重要嘅人物，可能好多人會覺得係梁博豪、余仁海或者蕭智堯……」

「但我，會答係司徒俊緯。」
____________________

Live

Live

好正

Live 左

「我諗住請日本人，食一餐純正嘅港式燒味。」

推

仲要蔗渣價錢食出燒鵝味道

之前梁博豪好似唔中意司徒俊緯 要佢交返隊長臂章? 佢哋而家係好返定點?

有文 jeng

余仁海重有一球

準備講

下一隊入球 香港隊 6.50 100

唔係唔gur 老魚咋咩