bedGeroge
2020-08-12 02:43:03
「我…我OK呀…無事呀…」晴晴眼簾低垂,臉上流露哀傷之色。
「唔洗扮無嘢,佳瑩乜都講曬俾我聽。放心啦,你一定無事嘅,正所謂希望在明天,只要樂觀啲面對,你實會捱得過呢關。」
Alex將準備好嘅安慰句子對晴晴講出,而晴晴聽見,莫名地「嘻」一聲笑出嚟。
「嗯?」Alex搲搲頭,心諗自己係咪講錯咩嘢,搞到對方喺度笑。
「哈,點解你講啲嘢咁似細個我喺學校圖書館,借嘅嗰啲《開解別人一百說話》、《如何安慰人》嘅書入面講嘅嘢,令我諗返起以前成日,摘書入面啲老土句子出嚟安慰我阿媽,估唔到今日竟然從你把口聽返,發覺原來都真係幾老土,哈哈!」晴晴展露笑顏。
「呢啲安慰人嘅說話邊有分老土唔老土架?」
「哈,老唔老土都好啦,好多謝你安慰我,其實我都唔知自己點架,都係睇上天點安排,可能好快好得返未定,又有可能聽日就瓜左又未定。」晴晴笑容變得苦澀。
「無事嘅,我對耳仔咁樣都好得返,我相信你都一定好得返,同埋嗰啲醫藥費你唔洗擔心,我會幫你俾,你可以安心喺度醫病。」
「你幫我俾?你咁大筆錢借我,我驚到時我還唔到,而且我地『冇啦冇掕』,你無必要借咁多錢幫我。」
「錢可以慢慢還,我唔介意你欠我一世,最緊要係你無事。」Alex伸手放喺晴晴一隻手上,眼神中帶著憐惜與愛意。
晴晴見對方咁樣掂自己隻手,塊面變得比頭先更加紅,心跳又再加速。
佢喺對方身上感受到之前從未有過嘅感覺。
係一種心意相通嘅感覺。
就喺呢個溫馨嘅時刻,晴晴卻突然病發,後背同小腹出現劇痛。
「晴晴你…你唔好嚇我…你無嘢呀嘛?」Alex驚恐不安。
晴晴痛到講唔到嘢,喺床上翻來覆去,表情相當痛苦。
「我…我即刻叫醫生…」Alex驚慌失措,成個人騰曬。
好彩呢個時候咁啱有姑娘經過,入到嚟見情況不妙,拿拿臨跑去揾醫生。
Alex望住晴晴痛不欲生咁喺病床上典嚟典去,而自己卻一啲手都幫唔到,個心難受到好似被刀割咁。
隨即晴晴痛到失去知覺,成個人昏迷過去。
「晴晴?晴晴?晴晴!」Alex嘗試叫醒晴晴。
同一時間,醫生、護士就趕到,立刻就將晴晴送去急救。
望住晴晴被送入冰冷陰森嘅急救病房,Alex心情一下子跌入谷底。
痛苦、絕望、悲傷等所有負面嘅情緒瞬間湧上心頭。
呢種感覺同佢七年前得知自己父母離世消息時一模一樣。
佢好驚自己仲未嚟得切捉緊,仲未好好愛過,就要永遠咁失去。
晴晴,求下你一定要撐住…
無奈呢刻嘅Alex咩都做唔到,只能喺病房出面等,佢內心焦慮不安,默默祈求對方能大步攬過。
半個鐘之後,急救病房房門打開,醫生慢慢行出嚟。
Alex行上前問:「醫生,晴晴佢點呀?」
「病人啱先病情突然惡化,心臟一度停止跳動,好彩經過我地一輪搶救,總算穩定返個情況,剛才我地幫病人打左鎮定劑,所以佢要隔一段時間先會醒返。」醫生同Alex講。
「一段時間即係幾耐度呀?」Alex問。
「我諗最快都要一日先醒。」
醫生話晴晴一日就會醒,結果過左三日晴晴都仲未醒。
Alex每日都守候在旁,只見晴晴一路未醒,心裡十分擔憂。
「醫生,你又話晴晴一日就會醒嘅,點解都過左三日佢都未醒?」Alex緊張咁問。
「我諗有可能係因為病人情況一直反反復復,令身體機能出現異常,所以導致依家休克嘅情況。」
「既然你都知佢身體有問題,咁你仲等咩?仲唔快諗辦法醫好佢?」
「問題係佢依家處於昏迷情況,唔適合做治療…」
「下?咩話?即係你要袖手旁觀咩都唔做,由得佢訓喺到,一直訓落去唔醒呀?」Alex情緒激動。
「無辦法,我地依家唯一可以做嘅,就係等佢醒左先,之後重新評估佢身體狀況,再安排治療。」
「有無搞錯?你係醫生嚟,你點可以由得個病人自身自滅?」
「對唔住,我地真係無辦法,能夠做嘅真係只有等。」醫生講完就離開病房。
灰心絕望嘅Alex,望住床上昏迷緊晴晴話:「快啲醒啦,唔好訓啦,啲醫藥費我俾曬架啦,未還曬之前你唔可以咁就走左去架…」
佢希望晴晴聽得到,然後可以快啲醒返。
晴晴訓左大約一個禮拜,終於喺某日清早,終於從漫長嘅昏迷之中甦醒過嚟。
佢睜開眼後,第一眼見到嘅,就係趴喺床側邊訓教嘅Alex,當下佢感到好驚訝,諗唔到對方竟然一直陪住自己。
跟住,佢慢慢訓起身,而Alex聽到有動靜,擘大眼望下,點知竟然見到晴晴醒左。
「我係咪嘈醒你…」晴晴細聲問。
Alex無講任何嘢,向前緊緊咁攬住晴晴。
晴晴被對方呢個舉動嚇親,呆左咁唔識反應。
幾秒之後,佢感覺到,個膊頭濕濕地,暖暖地。
Alex佢喊?