【宋詞漫談】小二，黎一碗東坡肉！(多圖餓撚勿入)

見到咁多同道對各大中國文學議題有咁多精闢見解，真係搞到小弟好慚愧，自己愈讀愈sad成日一諗起畢咗業之後唔知點算就好驚，讀到好無力

樓主

我都係拋磚引玉，經由大家討論，令我都諗到更多唔同面向嘅嘢
會願意入中文系，本身都係對文學有股熱情，勿忘初心呀巴打！
雖然我都深知中文系有時係會磨滅熱情，但總會搵到可以行嘅方向
分享一句比你：

顏崑陽＜蒼鷹獨飛＞
中文系教了十幾年書，最怕學生問一個問題：「讀中文系有飯吃嗎？」然而，問這種問題的學生卻偏偏很多。唉！我只能告訴他們：「到現在為止，我還沒聽說有中文系畢業的學生餓死；但是，不管唸什麼系，鬧精神病或自殺的人卻不少！」
究竟是什麼原因，讓現代的年輕人這麼早熟，早熟到少年十五二十時就開始擔心吃飯的問題。在匱乏的年代，人們似乎還沒有如此害怕沒飯吃。為什麼在這樣富裕的時候，卻滿街栖栖遑遑如將餓死之人？
二十歲，應該是一個狂想的年齡，像羽毛初豐的雛鷹，憧憬著試翼千里的壯舉；怎會像一隻老頹的麻雀，只想跳兩步，就找到米粒吃呢？甚至，還害怕餓死在枝頭簷角哩！我在想，飯是必須吃飽的；但是，假如一群年輕人只知道圍著一鍋別人煮好的飯，去爭搶分配；而不肯靠自己的能力去另起爐灶，煮一鍋更香的飯分給別人吃，那才真的不免要圍在空鍋邊餓死哩！
假如，您認為自己只是一隻想揀食米粒的麻雀，那麼，請不要飛進文學的殿堂。這裡面太空闊、太冷清了，只適合蒼鷹孤獨、堅忍的長征。
當我選擇了這條文學之路，就已準備作一隻獨飛的蒼鷹了。

講得好好
不過其實都係源自近代社會一股急功近利既風氣，係大氣候既問題，而非個人意志問題，唔怪得D學生。
大家應該都覺得社會越來越講求效益?
一步一步朝著高效、高利潤既生活方式進發; 相反，需要時間去琢磨、難以帶來實質利益既範疇就趨向被淘汰，更被稱為「無用」。
希望多D人認清人生既意義，追求滿足物慾之餘，亦懂欣賞能提升精神內涵既東西

個事實就係，自古至今，文人都係唔受重視，所以先咁多時間叫春、發牢騷
一係就考極科舉都收皮，一係就堅守所謂原則最後搞到流放邊疆、鬱鬱不得志
最好都係隱沒江湖，但係又會畀人話痴線佬
唉

呢幾年睇多D書，越來越有出世feel
btw聽朝要早起身返工

對東坡略有研究 睇完巴打個po又學多左
另外都好鐘意同東坡有密切關係既清照

蘇軾寫完水調高頭，令中國文壇幾多人從此唔敢寫詠月作品🌝

留名

對東坡略有研究 睇完巴打個po又學多左
另外都好鐘意同東坡有密切關係既清照

巴打真識貨
李清照都好大機會講埋
風格同東坡又勁唔同，但又寫得勁好

呢幾年睇多D書，越來越有出世feel
btw聽朝要早起身返工

張巴打慢慢黎，可能睇到有一日會有咩改變呢
香港太入世，九成九都會過得痛苦
出世嘅精神有助似東坡咁得閒開心吓

講返唐宋
其實小弟覺得陳子昂以至韓柳發起古文運動真係好重要
如果唔係個文學道統可能會斷
跟住歐陽修、蘇家三父子、曾鞏再一路落

其實文學發展都係一個鐘擺
任何一種風格/文體都會盛極而衰
宮體詩如是 駢文如是

絲打嘅講法正係周作人嘅主張
其實套入世界各地，都大體如此
實事到抽象，抽象又回到實事

巴打果然挑通眼眉
周作人嘅文學史觀影響我好深

周作人文學史觀影響到成個學術界發展好深遠
我好記得佢用張圖講中國文學發展，一條好長波浪嘅曲線
同埋我都幾鍾意睇佢嘅散文

佢嘅散文好睇 亦好難睇
只適宜極清醒嘅時候讀

對東坡略有研究 睇完巴打個po又學多左
另外都好鐘意同東坡有密切關係既清照

巴打真識貨
李清照都好大機會講埋
風格同東坡又勁唔同，但又寫得勁好

東坡有好多風格既詞 但清照對花對境對天氣寫得好仔細 融情入景 睇佢詞會成個畫面出晒黎

講返唐宋
其實小弟覺得陳子昂以至韓柳發起古文運動真係好重要
如果唔係個文學道統可能會斷
跟住歐陽修、蘇家三父子、曾鞏再一路落

其實文學發展都係一個鐘擺
任何一種風格/文體都會盛極而衰
宮體詩如是 駢文如是

絲打嘅講法正係周作人嘅主張
其實套入世界各地，都大體如此
實事到抽象，抽象又回到實事

巴打果然挑通眼眉
周作人嘅文學史觀影響我好深

周作人文學史觀影響到成個學術界發展好深遠
我好記得佢用張圖講中國文學發展，一條好長波浪嘅曲線
同埋我都幾鍾意睇佢嘅散文

佢嘅散文好睇 亦好難睇
只適宜極清醒嘅時候讀

周作人有咩入門作品易讀又有意義?
之前睇過少少覺得好悶

呢排空餘時間趕住睇半生緣
之後幾日追返另外兩po

呢排空餘時間趕住睇半生緣
之後幾日追返另外兩po

唔急啦
睇古代文學都要睇現代文學
古今兼得，先係好讀者

應該好難，始終係魚與熊掌，我有位朋友古典文學勁到爆但唔太識現代文學。
我自己對現代文學都無咩認識。

lm

人生四問：情理交至的完美呈現
細讀東坡水調歌頭(丙辰中秋，歡飲達旦，大醉，作此篇，兼懷子由。)

正文第十章

本文請配樂閱讀
https://m.youtube.com/watch?v=wCREDfUEd3Y

水調歌頭(丙辰中秋，歡飲達旦，大醉，作此篇，兼懷子由。)

明月幾時有？ 把酒問青天。不知天上宮闕， 今夕是何年？我欲乘風歸去，又恐瓊樓玉宇，高處不勝寒。 起舞弄清影，何似在人間？

轉朱閣，低綺戶，照無眠。 不應有恨，何事長向別時圓？ 人有悲歡離合，月有陰晴圓缺，此事古難全。 但願人長久，千里共嬋娟。

上回講到：
東坡係密州做太守
希望同子由將來老去歸隱後「夜雨對床」
東坡願意由繁華嘅杭州去偏僻嘅密州
最大目的係為左方便同子由見面

今日講嘅呢首詞，相信識得背嘅人都唔少
教科書教過，鄧麗君唱過
可以話係香港人中文堂嘅集體記憶
都咪話唔勁，萬中挑一

呢一首詞就係東坡係密州時寫嘅
寫作嘅背景已經交代得好清楚：
丙辰中秋，歡飲達旦，大醉，作此篇，兼懷子由
中秋開P，東坡好酒但唔飲得
醉後寫詞，抒發思念子由之情

提外話講少少：
呢首詞曾被前人解釋為「忠君愛國」
話天上宮闕係國都開封
又話乘風歸去係朝見天子嘅渴望
董子遠《續詞選》：忠愛之言， 側然動人
黃蓼園《蓼園詞選》：前闋是見月思君，言天上宮闕，高不勝寒，但彷彿神魂歸去，幾不知身在人間乎？
以上解詞，都話比我地知古人有時真係好白痴嘅


明月幾時有？ 把酒問青天。不知天上宮闕， 今夕是何年？我欲乘風歸去，又恐瓊樓玉宇，高處不勝寒。 起舞弄清影，何似在人間？

上半片寫「丙辰中秋，歡飲達旦，大醉」嘅情況
文學作品入面，問句係好重要，有時更係解讀嘅關鍵
東坡係呢到用三問呈現人生嘅哲思
每一問都有頓挫、答問嘅張力對比
詮釋即提問，答案入須藉問題才能發見

詞人首問，「明月幾時有？」
東坡對月亮嘅存在發出疑問
其實都代表詞人借此一問：萬物係邊到黎架？
有雞先，定有雞蛋先？
無限加一仲係咪無限？
我地都知東坡唔係哲學家
呢一問只係一刻間嘅感嘆，既無答案
唯有「把酒問青天」，將個波射返比上天

二問，「今夕是何年？」
呢個唔係時間數字嘅詢問，而係問具體嘅存在
呢一個到底係咩年代呀？
「天上」嘅仙境，係相對於人間嘅俗世
仙境嘅環境，係咪好過人間嘅環境呢？
東坡好奇天上境況嘅變化，渴望離開俗世
因為天上代表理想嘅世界，長生不老
人間係庸俗不堪，生老病死，充斥恩怨是非、悲歡離合嘅現實世界

「我欲乘風歸去，又恐瓊樓玉宇，高處不勝寒」
東坡想乘風離開俗世，但突然又諗：
哇，廣寒宮咁高咁遠，咁咪好寂寞
李商隱詩云：
「碧海青天夜夜心」
東坡咁鍾意熱鬧，緊係唔肯啦
而且呢個世界仲有佢掛住嘅人，例如子由
呢一種內心嘅矛盾衝突，化作抑揚頓挫嘅句子

「起舞弄清影」
其實係中秋起舞，與友共歡大醉
未嘗唔係人世間嘅仙境
因此第三問，「何似在人間？」
隨即轉為東坡嘅反問，自答上面嘅矛盾
東坡知道桃花源本在心靈，人間自有仙境所無嘅溫情歡樂
同埋仙境邊有子由呢位好兄弟
既然係咁，又點需要乘風歸去呢？


轉朱閣，低綺戶，照無眠。不應有恨，何事長向別時圓？ 人有悲歡離合，月有陰晴圓缺，此事古難全。 但願人長久，千里共嬋娟。

下半片著筆抒發「懷子由」嘅心情
歡宴既散，明月流轉，西斜低照
照出了東坡一夜無眠
照出了詞人的思念之情
歡樂之後總是最寂寞，最易發出悲情
但東坡卻並不如此

第四問，「何事長向別時圓？ 」
東坡係答緊自己嘅寂寞，點解我要強求圓滿呢？
天行有常，自然變化，自有圓，自有缺
既然無法自主，在聚時盡歡，在散時知足，已經夠啦

「人有悲歡離合，月有陰晴圓缺，此事古難全」
東坡由情入理，理中顯情
人嘅悲歡離合，正如大自然嘅變化一樣
人不過都係自然之一，有圓有缺
咁樣睇，一切唔係都好合情合理咩？
古人對「命」之解脫，講順、達、安
都係知道生命有不能自主嘅限制
唯有好好咁接受呢種現實，好好咁活在當下

「但願人長久，千里共嬋娟」
《易經》最後兩封：
六十三卦既濟
六十四卦未濟
圓缺循環不休，吉凶禍福相生
呢一種古人普遍對人世宇宙嘅觀念
東坡由四問表達情理交至嘅完美呈現
情深而見理，見理而豁達
所以其情不流於自傷而能發之成願

呢一種祝福祈求，成為千百年來至今
一代又一代流離失所，遠在異鄉嘅人之願望
千里係無法改變嘅事實
但我地仍然可以長久安穩地睇住同一個月亮
咁樣，唔係已經足夠啦咩？

少少個人意見。
〈水調歌頭〉最後一句「千里共嬋娟」，來自謝莊〈月賦〉：「隔千里兮共明月」，呢點唔少學者、注本都提過，例如夏承燾。不過佢點樣化用，就無咩人點講。

〈月賦〉：
美人邁兮音塵缺，
隔千里兮共明月。
臨風嘆兮將焉歇，
川路長兮不可越。
…
月既末兮露欲晞，
歲方晏兮無與歸。
佳期可以還，
微霜沾人衣。

先解釋點解佢唔係獨創。
「千里共嬋娟」，嬋娟即嫦娥，呢度代指明月。
咁其實成句不過係「千里共明月」，自然係由「隔千里兮共明月」而嚟。
但點解人人都只係記得呢句，唔記得謝莊句嘢呢?
原因在於蘇軾係截取其意，而非引申、補充。
有時候化用前人詩句好，唔一定係「補充」、「濃縮」，「截取」都好。
細味〈月賦〉，畢竟講嘅係無奈、講嘅係世情，直譯如下：

美人遙遠啊音訊全缺
隔著千里啊共看明月
隨風只能嘆其將停歇
川路長得不可能穿越

先講共明月，後講不可越，重在不可越、難越，重在「止」。
但當然，後四句講嘅係「規勸」，意指珍惜當下。
蘇軾則先講「不可越」，後講「共明月」，意思無補充過
—甚至唔夠〈月賦〉豐富。
但成首詞就活起上嚟。原因係呢首詞係述人情、兄弟之情，唔係規勸。
所以又寫咗前後赤壁賦，算係和〈月賦〉餘音之嬝嬝，所以一定要並讀。
當然，將七字濃縮成五字，某程度上都係更進一步。

如果將呢部分改改：

月既末兮露欲晞，
歲方晏兮無與歸。
臨風嘆兮將焉歇，
川路長兮不可越。
美人邁兮音塵缺，
隔千里兮共明月。

至於點解世人記得〈水調歌頭〉唔記得〈月賦〉，因為〈月賦〉產自六朝。