［Capsule] Nespresso 用家交流（5）

就算一對波鞋唔同色都可以兩個價錢啦
人地出部機都未驚
市場無人買自然會收皮
初階版多人買d 好正常

無錯

係佢話唔知揀creatista 定lattissima pro好
我先建議creatista
跟住佢又話on8+1 又咩唔抵
睇唔透

每部都有唔同功能同容量
邊有得計

lattissima pro真係冇咩興趣
見到個奶盒都覺得煩
仲要無定向噴奶
同埋問過店員話淨係design for入牛奶喎
唔知入植物奶會有咩影響
唔飲得奶嘅人唔洗考慮

植物奶應該只係打泡效果差啲
我用aeroccino加燕麥奶都打到泡
不過好少泡咁解

之前喺酒店飲過呢隻
問專門店佢話得商用版
有冇巴絲介紹類似嘅比我試下？

專門店佢唔會賣呢隻，其實呢隻仲易收藏過capsule

我岩岩HKTV search mini,
見佢有兩個樣，一部寫C30, 一部 D30,
想請教下有咩分別？

想知有冇capsule類似呢隻味

我試晒市面上嘅soy同oat milk咁濟

用aeroccino起泡效果最好嘅有vitasoy for barista, 日本隻Bonsoy, 同埋califia farms barista blend oat milk

果次個sales好誇張架
講到lattissima你入植物奶壞左佢地唔會負責咁
唔知係佢個人問題定點

單純外型唔同
其他參數好似水箱容量完全一樣

未飲過pro版答你唔到

唔quote 了
我用咗半年creatista，打奶一定好過其實所有機
但同真嘅espresso 機仲有一段距離
我打奶果陣會拎起少少唔用sensor，覺得夠就手動停
但因為始終佢支棒個角度fix 死咗，同埋棒同水兜好近
你打奶洗角度係有限，所以好難打到近乎完美嘅奶
其他野冇投訴，capsule 機你仲想點

今日仲有？ 咁岩想買

好似八月中，不過你搵搵

即係未有折？

Thanks師兄
原來拎起打奶都得
用capsule機都係貪方便唔要求太多
不過creatista幾靚仔又易清洗咁
應該會換機試下

到八月中

新野

見呢排好多想入手既ching唔知點揀機好
我就約略寫少少個人見解出黎比大家參考下

留意番，雖然機款五花八門，但所有型號既沖咖啡功能差唔多完全一樣，差別只在於外觀，額外功能等等，唔存在越貴咖啡越純正呢個情況

另外我就唔放圖喇，想知架機咩樣就自己Google啦

黑咖啡機
只能夠沖齋啡，想打奶就要自己另外諗辦法，預設有40ml既細杯制同110ml既大杯制，可以自己改
入門款
Essenza mini - 入門款最搶手型號，全場最細架，水箱容量同capsule回收盒唔大，適合1至2人用，放響自己寫字樓辦公枱都夠位，C30同D30純粹係個殼同顏色唔同咁解，要用大杯就要拆走滴水盤，不過好易拆問題唔大

inssia, pixie - 兩架機外型操作都差唔多所以一齊講，經典款，一個塑膠款一個金屬款，體興大舊過mini少少，滴水盤就咁摺上就放得大杯，聽講噪音大過mini，手柄唔係用嚟拎起架機，太粗用好快斷
inssia 官網下左架好耐，剩返出面百貨公司or電器舖有貨尾

高檔款
CitiZ (&milk)- 除咗高身啲，放到高杯之外我諗唔到仲有咩特色屋企/辦公室有位又鐘意個款可以諗諗，另外有連埋Aeroccino奶泡機版本，奶泡機印象中係fix死左位置，底座拆唔走

Essenza plus - 最少人留意既一款，我都係打呢篇野先開始研究，外觀同mini一樣，不過大左一圈，水箱可調節左中右方向。功能比上面款色更多，多左個熱水出水口，可以唔經咖啡口出水，可以另外沖到兩種唔同份量既Americano，仲有藍芽連電話，不過用途只係提示你使唔使除鱗

電動滑蓋款
Nespresso U (&milk)- 官網早已下架，第一款玩電動蓋，放入capsule關蓋後佢會自動裝好capsule，除咗espresso 同lungo 仲有個制出25ml 既ristretto ，水箱同打奶器（&milk)可以調節方向。因為設計問題故障多多，網上好多用後感都話電動蓋好易壞，不過就算冇壞都唔用得副廠capsule。部分電器舖同百貨公司有貨尾賣。

Expert (&milk) - 今次個滑蓋好似正常番，體積大，橫向發展令佢可以打橫貼埋牆，除咗3款標準量咖啡，一樣有單獨熱水出水口沖到Americano，今次連咖啡溫度都有得改（當然冇凍啦）。另外藍芽連接功能好用咗，可以直接用app更改咖啡份量同出啡，想改啡量唔使下下自己用量杯度。前排誠哥大特價賣到斷貨，官網都暫時下左架。

Lattissima 系列
款款都咁上下功能同外觀，Group埋一齊講喇
差別主要在於奶盒/水箱/食譜
主打無腦操作，㩒個制就整到杯cappuccino
價錢越貴，奶盒容量越大，可制作花式咖啡款色越多
除咗lattissima one，其餘機型全部都有奶盒噴嘴清洗功能，沖完有奶剩可以放落雪櫃下次用

唔建議懶人買呢款，因為奶盒要成日洗，唔洗好快臭
https://youtu.be/pv8dm2IR3U0
自己諗

Creatista 系列
呢個系列其實有3款，不過香港淨係得plus上市，其他款要靠網購
備有蒸氣噴嘴同不銹鋼奶壺，可以好似出面espresso machine咁用蒸氣打奶同玩拉花，本身預設左唔同花式咖啡既奶泡質量，同lattissima 一樣可以無腦沖花式咖啡，爭在要自己倒奶落咖啡到。另外當然可以自己改參數，比起lattissima 限死制作方法有好高自由度

打奶器
原理係將啲奶係咁攪到起泡，同蒸氣打奶比係差啲，拉花難度極高，當然有高手用佢打既奶拉到花

Aeroccino 3 - 基本款，可以打冷熱奶泡，備有兩款攪拌頭，一款專攪奶泡，一款純攪拌冇咩泡。所有&milk咖啡機附既打奶器都係呢隻

Aeroccino 4 - 升級款，多左個手柄，壺嘴整尖左，倒奶容易啲，預設唔同頻率攪拌速度，打到唔同花式咖啡既奶泡質地。另外防水效果店員話好第3代少少

Barista - 萬用款，可以直接當攪拌機用，除左打到各種質地冷熱奶泡，甚至加冰攪杯凍啡都得。透過藍芽連落app有更多食譜選擇

會員迎新
冇話抵唔抵，若果隨機附送既14粒試完都未揀到邊隻味啱心水，又對佢啲杯或展示盒有興趣既可以買份。否則散買穩陣

副廠capsule
除咗原廠，好多唔同既咖啡廠商都出左compatible capsule，大型超市/HKTVMALL 有賣，出名既牌子有Starbucks, 英國馬莎, Lavazza, Lor等等，記得睇清楚係for nespresso ，買錯dolce gusto幫你唔到

副廠capsule有唔同質地，一般平價貨都係塑膠，馬莎就鋁，共通點係size未必百分百貼合咖啡機。Starbucks 特別少少，capsule 製造商其實係nespresso 原廠，所以外觀包裝同原廠差唔多一樣，可以同原廠capsule一齊回收

留意番，Starbucks 既capsule係雀巢自營，同美心冇關係，Starbucks 門店唔會有賣

電動滑蓋版除咗Starbucks 唔用得其他副廠，因為size唔啱機器會裝唔到粒capsule

手動版可以透過用手指調整角度或者蠻力壓落手柄裝capsule ，不過都有機會出問題，好似我架mini用親副廠，無論塑膠定鋁，頭2秒會出清水，再出咖啡。最緊要既味道就見仁見智啦，有啲真係ok既

循環再用capsule
個人唔睇好，如果真係要玩咖啡豆/粉何必格硬用capsule，Delonghi入門espresso machine都係千幾蚊姐。用得capsule 都係求方便，無謂本末倒置啦