關於620公投
國安法殺到，雖然好多人期待攬炒，但係唔代表我哋真心鍾意國安法。而最近抗爭氣氛好似卡住咗咁，所以不論學生定工會都想藉住呢個時機，用一個低成本嘅抗爭方法：投票。同時配合反對國安法嘅「行動」，就變成呢個罷工罷課公投。
今次的確係唔成功，過唔到目標，呢個係事實。有人話宣傳做得差，場地唔夠，安排太複雜，時期唔啱等等……結果唔好就係唔好，亦都唔想話搵藉口或者怪罪任何人。
但想講嘅係，工會或者三罷作爲一條戰線唔係一次定生死，同議會戰線也好、國際戰線也好、街頭戰也好、遊行集會也好，都係我哋把握每個機會反抗。直到「成功」光復香港之前，每一次抗爭都可以話係「失敗」，但唔代表我哋會放棄，亦都唔代表係無用
關於三罷
面對之前好多9叫三罷嘅問題，我哋先諗公投呢個方法，避免少數手足做condom，如果真係好多人都表明肯罷先至發動一場罷工，而公投個目標唔可以太低，亦都唔係話過就過，正正係因爲我哋唔想亂咁叫三罷。
公投失敗係咪代表工會戰線要收皮呢？我唔係咁睇。今次公投嘅結果只係證明宜家唔係發動三罷嘅時機，亦都有數得計，清清楚楚
三罷係咪無用呢？同樣嘅問題可以套用其他戰線：議會係咪無用呢？遊行係咪無用呢？
你會發現過去一年我哋做嘅正正係唔計較咁多「有無用」而去「盡做」
當然唔係無腦咁情緒勒索叫大家出嚟，我哋一樣要計算成本同效益，但係抗爭嘅意志千祈唔好消磨咗
關於工會戰線
成條工會戰線由一個連登post開始，其實好多嘢真係見步行步，我係舊年7月先參與人生第一次遊行，係一個素到無得再素嘅「政治素人」。由係連登開post到開tg channel到建立自己條team然後開始有人響應，再有四十幾個工會成立，慢慢去傾做啲咩……
[戰書] 致香港人：呢個係我俾大家嘅最後限期
- 分享自 LIHKG 討論區
https://lih.kg/1614957
係香港搞工會、搞罷工真係好難好難，有啲識得我嘅朋友甚至笑我咁多條戰線好打唔打就去搞三罷。但我其實無諗咁多，同大家一樣，總之覺得係應該做嘅嘢就去做，呢一年我哋都係咁樣走過嘅。
有人話三罷嘅時機已經錯過咗，亦有人話工會要再多啲時間去經營。但無論點都好，工會呢條戰線都會繼續打落去繼續努力
關於連登
我會話自己係「連登起家」， 無連登真係無宜家嘅我，所以我對連登真係有個微妙嘅情意結
之前連登嘅號召力真係好誇張，如果你個post寫得好，可以有幾千正評，然後share曬去ig、fb，幾個鐘內全香港可能有幾萬人睇過你嘅post。亦都因爲咁，好多人好努力係連登呢個平台去分析，去俾建議，去幫場運動
見到宜家連登變成今日咁，影響力大不如前，氣氛又咁差。雖然話上連登勿認真，但其實我係幾介意。奉勸大家唔好咁「戰鬥格」。大家都匿名，係連登，好容易就貼好多標籤「左膠」「五毛」「泛粉」「熱狗」「分化L」，但其實係現實生活上，大家明明唔係咁兇狠，只係普通人，希望大家對手足寬容啲、包容啲，唔洗吓吓屌曬老母
關於抗爭運動
嚟緊係初選，但希望大家唔好沉迷選舉遊戲，選舉只係支線，抗爭運動先係重點。我從來唔係一個樂觀嘅人，我嘅判斷最壞情況係國安法照過，國際線嘅手足俾人拉曬或者潛逃去外國，普通人佢就唔搞淨係攞震懾力。然後歐美大鬧少制裁，外交上繼續口頭駁火，但係依然互相試探。至於香港未來廿年都要活係白色恐怖之下，半死不活。
但係呢場抗爭唔會完結。係呢一年真係諗咗好多嘢。
以前香港人淨係會諗生活、搵錢、買樓、結婚
但宜家，我哋會諗公義、民主、自由
我真係好愛香港呢個地方，好在意香港人究竟過得好唔好，好有興趣去探索呢個城市嘅歷史
所以無論點，我都會堅持落去
前路，我相信會係DARK AGE，但係我會讓反抗成爲我嘅生命
2019只係抗爭元年，2020嘅今日唔係1週年，而係抗爭紀元嘅第二年
END GAME唔會發生，只有INFINITY WAR，應承我，繼續FIGHT落去！
sorry，唔覺唔覺寫到咁長，好欣賞真係睇曬嘅你
其實仲有好多好多諗法，不過宜家真係無之前咁有心機慢慢砌post
手足，加油！
