[講故仔][歷史] 名言與其背後故事

支持支持！

17. 「飲食男，女人之大欲存焉。」

呢句名言原出自《禮記》：「飲食男女，人之大欲存焉。」意即喜愛美酒佳餚、雲雨之事係人之常情、人之天性也。換一換逗號嘅位置，就改變咗成個句子嘅意思；當中除咗引證中文博大精深之外，亦證明提呢句說話嘅民國女作家蘇青係何等才華橫溢、大膽創新。

民國時期思潮起伏，大批文人雅士投稿寫作，更不乏女性，所謂「巾幗不讓鬚眉」，當中有唔少作品都大受歡迎，因而聲名大噪嘅女作家亦屢見不鮮；其中張愛玲非獨佔鰲頭、都係數一數二嘅名作家。


．張愛玲與蘇青合照，攝於1945年。

兩位當時赫赫有名嘅「海派」作家，偏偏同時愛上一個風流成性嘅「漢奸」－為汪兆銘傀儡政權效力嘅文人胡蘭成。1944年某日，胡蘭成喺《天地》雜誌讀到張愛玲嘅小說《封鎖》，睇得津津有味；連連寫信予當其時嘅「知己」蘇青，追問張愛玲為何許人也。蘇青同張愛玲素來相識、深知女方高傲，便將其住址告知胡蘭成。得知張愛玲居於上海後，胡蘭成趕忙由南京出發會見佳人；一開始胡蘭成上門拜會時果然吃閉門羹、留低字條就悵然離去，點知第二日張愛玲就回電胡蘭成展開關係，後來兩人漸行漸近、互生情愫。

胡蘭成除咗「知己」無數，本身亦為已婚之人，加上，兩者年紀相差十四年；但張愛玲統統唔介意，佢並非甘心當姘頭、而係佢相信自己愛嘅係同胡蘭成相處時嘅感覺，而非其人。（呢種愛恨交織之情喺張愛玲嘅作品可窺一斑。）後來，兩人更秘密結婚。然而，胡蘭成重婚後生活依然唔檢點，到處勾搭異性；當張愛玲得知佢甚至同其好友蘇青都有一手時，終於明白自己癡心錯配。1947年，張愛玲寫信與胡蘭成一刀兩斷；亂世間一場「傾城之戀」轟轟烈烈地開始、草草了事地收場。


．張愛玲1943年所寫嘅名作《傾城之戀》中，女主角白流蘇同男主角范柳原因一通電話而令彼此魂牽夢縈；現實中張愛玲同胡蘭成亦因一通電話而令彼此墮入愛河。

「我已經不喜歡你了，你是早已經不喜歡我的了。這次的決心，是我經過一年半長時間考慮的。彼惟時以小吉故，不欲增加你的困難。你不要來尋我，即或寫信來，我亦是不看的了。」－《張愛玲致胡蘭成》／1947年6月16日

胡蘭成喺張愛玲嘅生命中就如其相識之契機《封鎖》入面嘅情節：「電車加足了速力前進，黃昏的人行道上，賣臭豆腐乾的歇下了擔子，一個人捧著文王神卦的匣子，閉著眼霍霍地搖。一個大個子的金髮女人，背上背著大草帽，露出大牙齒來向一個意大利水兵一笑，說了句玩笑話… 眼睛看到了他們，他們就活了，只活那麼一剎那。車往前當當地跑，他們一個個的死去了。 」－生命中遇到嘅每一個人都只係過客，能夠陪你走到人生盡頭嘅只有自己。1956年張愛玲同劇作家賴雅（Ferdinand Reyher）結婚；1967年丈夫過世後已無再嫁。1995年，獨居嘅張愛玲喺美國家中與世長辭，終年七十四歲。

留名支持

[quote]16. 「世事洞明皆學問，人情練達即文章」

假若要數最代表所謂中華文化嘅書籍，有啲人可能會講《論語》、有啲人可能會講《詩經》、又有啲人可能會講《資治通鑑》；就我而言，必定係曹雪芹嘅《紅樓夢》。《紅樓夢》除咗係一本小說之外，入面有大量詩詞、對聯、金句，文學價值極高；而且，情節有人間嘅勾心鬥角、爾虞我詐、情愛故事；又，官場、家族等中國封建文化；更涉獵到前世今生、人生百態等宗教與哲學範疇，堪稱一本中華文化百科全書。文學大師白先勇曾云：「最偉大的五本書裡應該有《紅樓夢》，這是一本可以看一輩子的天書。」

所謂文學經典，就係喺人生唔同時間睇，會有唔同嘅得著。本人數幾句《紅樓夢》經典金句；即使未拜讀過此書，希望當中豐富細膩嘅名言能使各位彷似醍醐灌頂、有所得著。（註：以下有劇透成分，未睇過、或睇緊《紅樓夢》嘅巴打可能唔明白或者唔想明白）

「世事洞明皆學問，人情練達即文章」

此句出自第五回；當時年紀尚小嘅男主角賈寶玉睇到呢句對聯時相當不悅，未能理解當中嘅蘊含嘅大道理。呢句對聯意指：「要明瞭世間大小事物、樣樣都睇得仔細通透，當中有淵博嘅學問；要處理好人情世故，做到通情達理、八面玲瓏又係大有文章。」希望無論仲讀緊書嘅學生定啱啱投身社會嘅青年都能夠理解呢句說話－世事萬物都有佢嘅學問，唯有不恥下問、開卷有益；但係，與人交往、待人接物就讀再多書都唔能夠領略當中真諦，只有累積經驗方能老成練達。


．「世事洞明皆學問，人情練達即文章」書法。

「身後有餘忘縮手，眼前無路想回頭。」

此句出自第二回；當官嘅賈雨村因貪酷被革職，一日遊經智通寺見到門旁呢句對聯，不禁嘆喟：「文雖淺近，其意則深。」呢句對聯意指：「做人貪得無厭、欲壑難填，到走投無路就想回頭悔改，殊不知已經係恨錯難返、覆水難收。」「貪」，欲物也，佛教三毒、天主教七宗罪皆以「貪」為誡；若諸位相信佛家「因果報應」，要相信，「貪」後必然要「還」。


．「身後有餘忘縮手，眼前無路想回頭。」書法。

「任憑弱水三千，我只取一瓢飲。」

此句出自第九十一回；賈寶玉、林黛玉雖彼此相戀，但由於家族認為寶玉應娶薛寶釵，導致三人為感情互相拉扯、角力。一日，林黛玉為驗證賈寶玉對佢嘅愛意，便以今日嘅「港女」式口吻試探寶玉。

原文：

黛玉乘此機會，說道：「我便問你一句話，你如何回答？」寶玉盤著腿，合著手，閉著眼，噓著嘴，道：「講來。」黛玉道：「寶姐姐和你好，你怎麼樣？寶姐姐不和你好，你怎麼樣？寶姐姐前兒和你好，如今不和你好，你怎麼樣？今兒和你好，後來不和你好，你怎麼樣？你和她好，她偏不和你好，你怎麼樣？你不和她好，她偏要和你好，你怎麼樣？」寶玉呆了半晌，忽然大笑道：「任憑弱水三千，我只取一瓢飲。」黛玉道：「瓢之漂水奈何？」寶玉道：「非瓢漂水，水自流，瓢自漂耳！」黛玉道：「水止珠沉，奈何？」寶玉道：「禪心已作沾泥絮，莫向春風舞鷓鴣。」黛玉道：「禪門第一戒是不打誑語的。」寶玉道：「有如三寶。」

以下為粵語俗譯：

寶玉大笑道：「任憑弱水三千，我只取一瓢飲。」
字面即：「任憑河水滔滔，我只拎一勺飲。」
意指：「儘管天下間有萬千美女，我只揀你一個。」；

黛玉道：「瓢之漂水奈何？」
字面即：「勺隨水漂流，怎算？」
意指：「你把持不住、隨波逐流，點算？」；

寶玉道：「非瓢漂水，水自流，瓢自漂耳！」
字面即：「非勺隨水漂流；水自流動、勺自漂流而已！」
意指：「我已下定決心，無人能夠左右我！」；

黛玉又道：「水止珠沉，奈何？」
字面即：「河水涸、寶珠沉，怎算？」
意指：「假如我過咗身，點算？」；

寶玉道：「禪心已作沾泥絮，莫向春風舞鷓鴣。」
字面即：「我的寡欲清心仿如柳沾了泥、再飄不起；亦不似鷓鴣隨風飄忽、思情想鄉。」
意指：「我就出家做和尚，脫離俗世。」；

黛玉道：「禪門第一戒是不打誑語的。」
字面即：「佛家不准人誇下海口。」
意指：「你唔准講大話。」；

寶玉道：「有如三寶。」
字面即：「佛寶、法寶和僧寶乃佛家至高無上之信仰。」
意指：「我對你嘅承諾皆千真萬確，有如佛家真理。」

希望現代男女打情罵俏時能夠學習寶玉、黛玉，詩情畫意得嚟更添情趣。之不過今時今日假如女方問你：「你愛唔愛我呀？」時你答：「任憑弱水三千，我只取一瓢飲。」」；相信女方呆了半晌，只會帶你去卡拉OK合唱一曲「弱水三千」，聊表心意。

呢篇正

推

學到野，少有高質post

呢幾日比較忙，未必出到文
但都希望大家中意睇嘅可以畀下吓正皮、推吓post

推 留名學嘢

lm

如無意外今晚出返文

18. 「博打をしないような男はろくな者じゃない。」
「不賭博的男人有夠不像樣。」

呢句說話出自第二次世界大戰期間最著名嘅「戰爭賭徒」山本五十六，佢係太平洋戰爭期間嘅日本海軍司令，主要戰役如珍珠港事變、中途島戰役都由佢策劃、指揮。1884年出生，原姓高野嘅山本五十六因父親五十六歲時老來得子而得此名；1901年加入日本海軍、參加過日俄戰爭，更被流彈炸斷左手食指與中指。除此之外，山本自少就好賭成性，樣樣賭博皆精，而且勝率相當之高，更有傳聞指由於山本五十六「賭得狠、贏得多」，被唔少賭場寫入黑名單。1919年，山本五十六喺美國哈佛大學留學，期間見識到美國嘅種種風土人情，深諳美國文化、軍事實力皆於日本之上；令佢往後形成「親美」、「反戰將軍」等矛盾心理。


．山本五十六。

自日本、納粹德國、意大利三國喺1940年9月27日簽定同盟條約、形成軸心後，美國就屢屢制裁日本，包括凍結日本在美資產、又實施石油、橡膠禁運，令日本萌生攻打美國嘅念頭。然而，山本五十六對此表示反對，因為佢認為日本戰勝美國嘅機會相當渺茫：「假若我哋（日本）真係同美國開戰，單單占領關島同菲律賓係唔夠嘅、甚至占領到夏威夷同三藩市都未足夠；我哋不得不需要直搗黃龍－攻入位於華盛頓嘅白宮。當代嘅政客有冇呢個鏖戰到底嘅自信同覺悟呢？＊」然而，日本國內主戰派、尤其是以東條英機為首嘅陸軍對山本五十六嘅勸諫嗤之以鼻，更剪走山本發言嘅最後一句並加以宣傳；令美國同日本之間陷入開戰邊緣、劍拔弩張。山本五十六未能以寡服眾，其信奉嘅武士道精神亦唔容許佢臨陣退縮－唯有以日本嘅命運作抵押，豪賭一場。

＊原文：「日米開戦に至らば己が目ざすところ、素よりグアム・フィリピンに非ず、はたまたハワイ・サンフランシスコに非ず、実にワシントン・ホワイトハウスの思ならざるべからず。当路の為政家果たして此本腰の覚悟と自信ありや。」

「正面交戰，必敗無疑。」即使山本五十六決定同美國開戰，佢嘅想法始終不變。因此，佢決定先下手為強，奇襲美國；但到底，如佢所講，即使偷襲成功，日本仍然冇可能徹底打敗美國，所以佢嘅最終目的都係「求和」。懷著滿腹嘅顧慮同疑惑，1941年12月7日凌晨，山本指揮日軍偷襲珍珠港。

當其時正值聖誕時分，美國軍人沉醉於安逸之間，突然砲聲隆隆，轟醒佢哋嘅酣夢。日本分兩波攻勢進攻、更出動到六艘航空母艦對珍珠港嘅海軍基地窮追猛打；美軍一時應接不暇，兵敗如山倒。經過連番轟炸，日本獲得決定性勝利，凱旋歸國。

接到報捷嘅喜訊，日本士氣達到頂峰、一時無兩。然而，山本五十六雖賭贏一局，但卻毫無愉悅之情，反而對未來更添憂慮；開戰前佢曾預計對美開戰嘅頭半年至一年可以順利進攻，但去到第二年、第三年，佢就再無把握。偷襲珍珠港表面上雖然獲勝，但當地嘅油庫、發電站、維修設備均毫髮無傷，加上，美軍一艘航空母艦都無參戰；鋌而走險但收穫卻未成正比，令山本對未來局勢憂心忡忡。


．珍珠港戰役司令南雲忠一。由於戰爭得利而自傲，因而未徹底摧毀美軍基地，令美國有喘息空間，靜候反擊。

－下續

18. 大平洋戰爭開始後，日本接連攻占香港、新加坡、馬來亞；幾乎整個東亞都落入日本手中。當日本沉浸於稱霸遠東嘅勝利起悅之中，山本始終認為美國先係心腹大患；視戰爭如賭博嘅山本，為免夜長夢多，山本決定放手一搏、「盡地一煲」。喺山本極力堅持、力排眾議下，日本放棄向西南太平洋推進，將槍頭對準美國。

1942年6月4日，日本空襲中途島拉開戰幔；美國經過珍珠港一役後不再輕敵，全力還擊，以三艘航空母艦對上日方四艘航空母艦。雖然航空母艦數量稍遜一籌，但美國事前已經破解咗日本嘅通訊密碼，對日本戰術瞭如指掌。雙方正面互撼，但日軍屢屢遭美軍埋伏成功，處於下風。經過超過一日嘅轟炸，6月5日，日本航空母艦蒼龍號被擊沉、赤城號及加賀號遭狂轟濫炸嚴重受損；縱然日軍節節敗退，但仍絕地反擊擊沉美方約克鎮號，亦為是次戰役唯一收穫。6月6日，日本最後一艘參戰航空母艦飛龍號都被擊沉。美軍大敗日軍、日本元氣大傷，中途島戰役因而成為太平洋戰爭嘅轉捩點。


．描繪中途島戰役期間，遭到美軍狂轟濫炸嘅加賀號畫像；加賀號於6月6日被擊沉。

日本面對中途島戰役嘅挫敗後，主導權落入美國手中；雖未一敗塗地，但已經係強弩之末。1943年，美國截獲並破解一封日本通訊，得知山本五十六將於4月18日到所羅門群島視察戰事，美國總統羅斯福暗令部下刺殺山本。當日山本嘅戰機果然喺六架零式戰鬥機簇擁下飛往所羅門群島；美軍眼見機不可失，以十六架美軍P-38戰鬥機從旁攔截，並肆機擊落山本所乘坐嘅戰機。雙方會戰後，日軍喺鄰近搜索，終於喺布因島發現墜毀嘅戰機，同山本五十六嘅屍體。一代海軍大將命喪戰場，終年五十九歲。

一生嗜賭如命嘅山本五十六，啤牌、麻將、橋牌、將棋無一不賭、無一不精；身為海軍上將，甚至視戰爭如賭博，一係大輸、一係大贏；最終，賭上佢嘅性命。


．遭擊沉嘅山本五十六坐駕。由於怕影響士氣，山本嘅死訊被隱瞞到同年5月21日先公諸於世。