[講故仔][歷史] 名言與其背後故事

夜啲再出，有冇人睇緊

留名+正評

4. 「七時初醒，濡滯不起，何以革命；八時起床，已成廢人矣，戒之。」

呢句說話摘錄自蔣介石日記；原本前段同後段唔係收錄於同一篇日記（前段節錄於1928年1月3日；後段節錄於1926年12月16日），我將其合組成一句說話。老實講，我初初接觸呢句說話時真係自慚形穢，「八時起床」都成廢人，相信我已成人渣爾。無論如何，呢句說話亦引證咗蔣中正係何等克己復禮、律己以嚴。


．喺史丹福大學胡佛研究所展出嘅蔣介石日記。

蔣中正寫呢兩句說話時正值國民軍北伐，通常軍閥嫖賭飲蕩吹樣樣齊，但蔣中正一生唔煙唔酒唔賭，更經常自我批判，每日喺日記記錄日程之餘，亦會自我評價、反省；早年批判自己最多在「色」（1919年11月7日，蔣介石日記：「欲立品，先戒色」），後來同宋美齡結婚後，一生已無再娶。除此之外，佢每日有四項必做活動：早起、靜坐、默思格言、讀書，直至晚年為止，從無間斷。蔣中正，字「介石」，出自《易．豫》，意指操守堅貞；從其表字，對其自我要求可見一斑。


．蔣中正廿四歲時於日本新潟縣高田市當兵，當地冬天天寒地凍；士兵要喺凜冽寒風下訓練、操兵。

《禮記．大學》有云：「修身、齊家、治國、平天下。」喺動盪不安嘅年代，仍能開創「南京十年」嘅風光；喺後世一片「剿匪無力」、「用人唯親」、「專制獨裁」嘅謾罵聲中，希望歷史能給予蔣中正一個公道、客觀嘅評價。

希望各位唔好吝嗇你哋嘅正皮同留言，呢啲係我寫文嘅動力嚟
聽日再續

自推

留名

推

推

皮已正
繼續巴打

繼續

5. 「我們存在的本身，就是潛在的死亡。」

呢句說話出自日本名作家三島由紀夫作品《豐饒之海》第四章《天人五衰》，而呢部亦係三島嘅遺作；喺當日佢交付原稿後，就發動震驚中外嘅「三島事件」，切腹自盡。三島嘅作品以陰沉、厭世、憂鬱嘅悲劇著稱，其中以1956年出版、以金閣寺縱火案為靈感嘅《金閣寺》最為著名。除此之外，佢嘅出身、經歷亦唔比佢嘅作品遜色。


．三島由紀夫

1925年出生，原名平岡公威嘅三島由紀夫自少就體弱多病、命途多舛，一歲就因為樓梯摔跤險入鬼門關；1945年，日本喺世界大戰已達強弩之末、當時正值弱冠之年嘅三島由紀夫被軍隊徵召入伍，點知三島身患支氣管炎、卻被軍醫誤診為肺結核而被遣送回鄉；原先三島隸屬嘅軍隊到菲律賓嘅戰場後則近乎全軍覆沒。屢次死裡逃生嘅三島，深諳「生死有命」嘅道理；同時，信奉日本武士道精神嘅三島，亦對呢件往事耿耿於懷。漸漸，佢建立咗與別不同嘅人生觀、政治觀；其後，以別樹一幟嘅風格喺文壇、影壇大放異彩，更三獲諾貝爾文學獎提名，惜屢失之交臂。


．三島由紀夫對「美」嘅追求近乎病態，而且相當自戀；呢一點除咗喺佢嘅作品顯現出嚟之外，佢對「肉體」嘅操練亦可見一斑。

1968至1969年，受鄰近國家中華人民共和國嘅文化大革命影響，日本極左思潮急速傳播；同紅衛兵相互呼應嘅「全学共闘会議」（簡稱全共鬥）學生運動席捲全日本嘅大學，其中尤以三島由紀夫母校嘅東京大學為甚。以「日本人」身份為傲、倡導武士道精神、民族意識極濃、政治立場偏右嘅三島由紀夫喺1969年5月重返母校同「全共鬥」辯論。以下係部分片段，本人摘錄並翻譯部分對話。

https://www.youtube.com/watch?v=1PtPFkogIXo
三島由紀夫vs東大全共闘（字幕版） 1969年5月13日

取自3:47：
全共鬥：「冇日本就唔存在嘅人…」
三島：「嗰個人就係我。」
全共鬥：「係咩？之不過我啲祖先都係喺日本坐井觀天，咩都未見識過，目光如豆。雖然咁講，但唔代表我想做外國人，只係我都同其他人一樣想見識一下外國。好快就到廿一世紀，我哋會咁諗都係理所當然。…照你咁講，你係咪唔想擺脫『日本人』呢個身份所帶嚟嘅束縛？」
三島：「擺脫唔到都冇所謂呀。我係日本人，我好樂意生於日本、死於日本。我從來都冇諗過擺脫呢個『束縛』；喺你眼中，我呢個人係咪好可憐？」
全共鬥：「係呀，簡直可悲。」
三島：「但係我只有『日本人』呢個身份，別無其他。」


．信奉日本武士道精神、以日本為傲嘅三島由紀夫

－下續

5. 第二次世界大戰後，日本社會全盤西方化，同時主權亦受美國所制肘；三島由紀夫對此深惡痛絕，認為昔日遠東巨擘日本已成西方嘅傀儡。1970年11月25日，三島由紀夫聯同四位由自身創立嘅政治組織「楯會」成員，以「獻寶刀予司令鑑賞」為由，闖入日本陸上自衛隊東部總監部並脅持總監益田兼利；隨後，三島由紀夫向在場軍人發表演說，意圖煽動軍人發動政變。

https://www.youtube.com/watch?v=_oNMABlVRtM
三島由紀夫 最後の演説 1970年11月25日

取自0:59：
「…再咁落去，日本以後就再冇可能修改憲法架喇！亦都再冇可能將自衛隊改組成國軍…係咁嘅話當初嘅建軍已經毫無意義！呢個亦都係我最痛恨嘅一件事…當初成立自衛隊嘅意義係咩呀！？咩叫守護日本呀？所謂守護日本，就係應該以天皇為中心、恪守日本嘅歷史同文化傳統…」

「你哋同我留心啲聽！收聲！收聲！聽我講！依家一個男人本住條命同你哋講嘢呀！如果依家日本人仲唔企出嚟、自衛隊仲係唔願意奮起抗爭嘅話，以後就再冇可能修改憲法架喇！各位都會永遠成為美國人嘅軍隊架喇…」

取自2:45：
「我已經等咗四年喇…等緊自衛隊願意企出嚟反抗嘅日子…喺呢最後三十分鐘，我仲依然等緊。各位係武士嘛？各位係武士丫嘛！？係武士嘅話，點解要擁護否定自己嘅憲法呢？點解要屈服於否定自己嘅憲法呢？只要呢部憲法一日存在，各位都永遠無辦法自救。」

三島由紀夫戴著寫上「七生救國」嘅頭巾，聲嘶力竭咁演講，但只換嚟軍人嘅冷嘲熱諷。心灰意冷嘅三島由紀夫退入室內，決定遵循武士道嘅究極精神－切腹諫世。三島喺腹部綁上白毛巾，準備切腹。首先，一刀捅入側腹、再將短刀向橫一拉，腸臟隨即溢出；然而，原先負責介錯嘅「楯會」成員森田必勝就三次都唔能夠斬斷三島嘅頭顱，三島難忍劇痛，試圖咬舌自盡。最後，要另一位成員古賀浩靖操刀先完成介錯；一代大文豪三島由紀夫以最轟烈嘅方式與世長辭，終年四十五歲。


．戴上「七生救國」頭巾嘅三島由紀夫

綜觀日本文學史，大文豪如三島由紀夫、太宰治、芥川龍之介、川端康成都不約而同走上自殺一途，教人不勝唏噓；或者佢哋就如日本名作家林房雄為三島而寫嘅弔唁辭：「満開時を待つことなく自ら散った桜の花」—「等不到滿開就自己散落的櫻花」。


．三島由紀夫與川端康成，川端康成接到三島由紀夫嘅死訊之後悲傷不已；曾對學生表示：「被砍下腦袋的應該是我。」三島由紀夫自殺之後十七個月，喺1972年4月16日，川端康成以煤氣自殺，冇留低任何遺書。

延伸閱讀［慎入］：https://read01.com/RmoQKN.html
入面有好多三島由紀夫珍貴圖片，包括三島嘅屍體同頭顱嘅圖片。
文章亦有剖析三島由紀夫自殺嘅原因、同三島嘅性取向。

2. 「得之，我幸；失之，我命」

呢句說話改編自徐志摩《致梁啟超》一句：「我將於茫茫人海中訪我唯一靈魂之伴侶；得之，我幸；不得，我命，如此而已。」當初我接觸呢句說話時可謂怦然心動，心中暗自感嘆徐志摩果然係一代詩人，年僅廿五就能夠看破紅塵；一邊迷失在這場愛情遊戲之中、一邊欣然接受命運對佢嘅安排。咁究竟令看透世事嘅徐志摩都不惜一切去愛嘅女人係何許人也？實為詩人、建築師林徽因。


．徐志摩

1922年，徐志摩喺英國留學期間，邂逅林徽因；徐為追求林，更同元配張幼儀離婚。但係，「落花有意，流水無情」；當其時林徽因已有心上人，為梁啟超次子梁思成。事實上，梁啟超係徐志摩嘅老師；梁啟超得知此事，就寫信勸退徐志摩：「茲事蓋可遇而不可求」、「天下豈有圓滿之宇宙？」後來，徐志摩以《致梁啟超》回覆其師，盡訴其愛情觀；徐志摩雖一意孤行，但仍然唔能夠同林徽因開花結果。情場失意嘅徐志摩，喺1924年回國後又邂逅才女陸小曼。

陸小曼出身書香世家，自小受高等教育，琴棋書畫樣樣精，係民國一代才女；徐志摩出身富裕家庭，以「新月派」散文、新詩聞名於世，係民國一代才子。兩人可謂門當戶對、金童玉女；然而，陸小曼卻為已婚之人。

陸小曼與其丈夫王賡、徐志摩與其前妻張幼儀，都係按父母意願而結婚，其實彼此性格互不咬弦。由於陸小曼生性風流，中意遊山玩水、紙醉金迷；王賡為人老實勤奮，平生只愛讀書，所以叫其友人徐志摩陪伴佢老婆，結果兩人一拍即合、互生情愫，後來更係打得火熱。

淫人妻女嘅徐志摩、紅杏出牆嘅陸小曼、綠帽慘執嘅王賡，作為當其時有頭有面嘅三人，難免造成社會迴響；王賡為免他人閒言閒語，主動同陸小曼離婚；但思想開放嘅徐、陸二人就懶理世俗目光，決定結婚。徐志摩更邀請其老師梁啟超作其證婚人，梁啟超雖然反對二人結婚，但仍尊重學生決定出席婚禮，並半諷刺、半祝願二人為「最後一次結婚」。


．徐志摩與陸小曼

然而，二人婚後生活並唔如意：陸小曼本性難移，生活依舊奢華，甚至染上鴉片毒癮；徐志摩每個月都要花大筆金錢以滿足妻子嘅慾望。後來，水性楊花嘅陸小曼更勾搭上紈絝子弟翁端午；徐志摩當日撬人牆腳、今日老婆出軌，真係「因果報應，屢試不爽」。

1931年，心灰意冷嘅徐志摩，由南京搭飛機去北平出席昔日單戀成癡、今日各有家室嘅林徽因演講會；結果，飛機失事，徐志摩罹難，終年三十四歲。

徐志摩短短一生，經歷過刻骨銘心嘅愛情、撰寫過流芳百世嘅詩詞、開創過影響後世嘅文學。傳奇一生正如佢嘅名作《再別康橋》：「輕輕我我走了，正如我輕輕的來；我輕輕的招手， 作別西天的雲彩」、「悄悄的我走了，正如我悄悄的來；我揮一揮衣袖，不帶走一片雲彩」。


．位於劍橋大學、刻上《再別康橋》詩詞嘅石頭
圖片來源：<a href="http://lydiasvie.pixnet.net/blog/post/50648227-%5B%E8%8B%B1%E5%9C%8B%5D-%E5%86%8D%E5%88%A5%E5%BA%B7%E6%A9%8B~
" target="_blank">http://lydiasvie.pixnet.net/blog/post/50648227-%5B%E8%8B%B1%E5%9C%8B%5D-%E5%86%8D%E5%88%A5%E5%BA%B7%E6%A9%8B~
</a>

《致梁啟超》全文：
「我之甘冒世之不韙，竭全力以鬥者，非特求免兇慘之苦痛，實求良心之安頓，求人格之確立，求靈魂之救度耳。人誰不求庸德？人誰不安現成？人誰不畏艱難？然且有突圍而出者，大豈得已而然哉？

我將於茫茫人海中訪我唯一靈魂之伴侶；得之，我幸；不得，我命，如此而已。

嗟夫吾師！我嘗奮我靈魂之精髓，以凝成一理想之明珠，涵之以熱滿之心血，明照我深奧之靈府。而庸俗忌之嫉之，輒欲麻木其靈魂，搗碎其理想，殺滅其希望，污毀其純潔！我之不流入墮落，流入庸懦，流入卑污，其幾亦微矣！」

笑左 原來佢先係男主角

留名

留名

留名
好正

留名

6. 「滄海一聲笑，笑傲江湖一名士；忘盡心中情，情牽當年每段詞。」

呢句係顧嘉煇為黃霑所寫嘅輓聯，當中引用黃霑兩首傳頌千古嘅名作《滄海一聲笑》同《忘盡心中情》，以紀念黃霑波瀾壯闊嘅一生、放蕩不羈嘅性格、扣人心弦嘅詞曲。

原名黃湛森嘅黃霑可謂「百足咁多爪」，一生涉獵過廣告、口琴演奏、唱歌、填詞、作曲、寫書、寫論文、電視主持、電影編劇、導演、演員，憑佢出類拔萃嘅中文同音樂造詣，創作逾百首膾炙人口嘅名曲；同時嬉笑怒罵嘅性格令佢不避嫌咁寫作《不文集》，大談粵語粗口、兩性文化，堪稱創作鬼才。


．顧家煇與黃霑

一九四九年，國共戰爭大局已定；親國民黨嘅黃家逃難至香港，喺深水埗區定居。一九五三年聖誕節，石硤尾發生大火、近五萬八千人無家可歸；黃家咁啱就喺火場邊緣倖免於難。後來，一九五六年右派喺深水埗李鄭屋徙置區首先爆發「雙十暴動」、一九六七年左派喺香港爆發「六七暴動」；自小就親身經歷過呢啲風風雨雨嘅黃霑，成為佢後來創作唔少貼近社會時事歌曲嘅契機，例如《獅子山下》。

喺香港大學中文系畢業嘅黃霑，文學根底深厚，能夠將唐詩宋詞同音樂融會貫通，例如《滄海一聲笑》、《楚留香》；同時，對粵語文化推崇備至嘅黃霑，亦會將通俗廣東話口語寫入歌詞，予人親切感之餘又別樹一幟，例如《問我》、《鬼叫你窮》。除此之外，鑽研過佛學嘅黃霑亦將唔少浮生百態、人生哲理寫入歌詞，例如《家變》。


．黃霑與張國榮喺樂壇可謂合作無間、譜出無數名曲；同時二人亦私交甚篤。每當聽到《明星》，都不禁「輕輕淒然歎喟，懷念他們在我心中照耀過。」

黃霑終其一生對粵語流行曲可謂貢獻良多、厥功至偉，甚至晚年博士論文《粵語流行曲的發展與興衰：香港流行音樂研究（1949－1997）》都以粵語流行曲為題。最後，送上我最中意嘅一句黃霑名詞：「道人道、道神道，自求人間道！」

https://www.youtube.com/watch?v=Grd7B0OtVSA
張學友 - 人間道 (粵語版)