早幾日喺YouTube聽歌，喺留言見到一句說話幾有意思（可能有啲人覺得係無病呻吟
）。原文係「僕が今日無為に過ごした1日は誰かにとって一番最後の日だった」，意思大概係「我無所事事所渡過的一天、亦是某人生命裡的最後一天。」呢句說話雖然講唔出咩大道理，但係我睇完之後覺得非常之有親切感
為咗令自己嘅「一日」過得有意義少少，我決定同各位巴打分享吓一啲名言名句，再講吓其背後故事，希望大家當故仔睇吓、同時從中領悟到少少嘢
1. 「大海有真能容之量，明月以不常滿為心」
由台灣著名竹雕藝術家李佑增所寫嘅書法
1940年，中日戰爭期間，日本人喺南京扶植咗一個以汪兆銘為首嘅政權。而呢句說話，係汪兆銘政權時期嘅立法院院長陳公博，喺1945年日本投降後以漢奸罪被判死刑後，行刑前應典獄長之邀即席揮毫寫低嘅一副對聯。據聞，陳公博寫到最後三個字果陣，發現身後有幾個法警，心知時辰已到。「請勞駕再等幾分鐘，讓我把這對聯寫完吧。」佢講完呢句說話後淡淡然咁寫埋「滿為心」三個字，先至從容赴死。
呢句說話指做人胸襟應該寬如大海，能夠「海納百川，有容乃大」、亦應緊記做人運勢如月有陰晴圓缺、人有高山低谷，「月盈則虧，水滿則溢」；做人做事豈能盡如人意，但求無愧於心。
「漢奸」之名，係後世對陳公博扣上嘅一個罪名。然而，從蘆溝橋事變到太平洋戰爭期間，國民軍隊對日軍可謂節節敗退，北平、上海、南京等大城市接連失守，國民政府狗急跳牆不惜炸毀黃河實施焦土政策、又被逼遷都重慶。國家正值存亡之秋，眼見中日實力懸殊，一班「主和派」為令國土「保得一吋得一吋」，不惜投靠日本主動乞和、仰人鼻息都要「和平救國」，其實相當可悲。
明知人民會唾罵、歷史會讉責，一眾「主和派」如汪兆銘、周佛海、陳公博冒住「漢奸」之名仍向日本媾和，為嘅只係救萬民於水深火熱之中。「知我罪我，其惟春秋」；「漢奸」定「英雄」，其實只係一線之差。
汪精衛（前排中）同「偽國民政府」高官合影。後排右二為陳公博。
