[講故仔][歷史] 名言與其背後故事

6. 「滄海一聲笑，笑傲江湖一名士；忘盡心中情，情牽當年每段詞。」

呢句係顧嘉煇為黃霑所寫嘅輓聯，當中引用黃霑兩首傳頌千古嘅名作《滄海一聲笑》同《忘盡心中情》，以紀念黃霑波瀾壯闊嘅一生、放蕩不羈嘅性格、扣人心弦嘅詞曲。

原名黃湛森嘅黃霑可謂「百足咁多爪」，一生涉獵過廣告、口琴演奏、唱歌、填詞、作曲、寫書、寫論文、電視主持、電影編劇、導演、演員，憑佢出類拔萃嘅中文同音樂造詣，創作逾百首膾炙人口嘅名曲；同時嬉笑怒罵嘅性格令佢不避嫌咁寫作《不文集》，大談粵語粗口、兩性文化，堪稱創作鬼才。


．顧家煇與黃霑

一九四九年，國共戰爭大局已定；親國民黨嘅黃家逃難至香港，喺深水埗區定居。一九五三年聖誕節，石硤尾發生大火、近五萬八千人無家可歸；黃家咁啱就喺火場邊緣倖免於難。後來，一九五六年右派喺深水埗李鄭屋徙置區首先爆發「雙十暴動」、一九六七年左派喺香港爆發「六七暴動」；自小就親身經歷過呢啲風風雨雨嘅黃霑，成為佢後來創作唔少貼近社會時事歌曲嘅契機，例如《獅子山下》。

喺香港大學中文系畢業嘅黃霑，文學根底深厚，能夠將唐詩宋詞同音樂融會貫通，例如《滄海一聲笑》、《楚留香》；同時，對粵語文化推崇備至嘅黃霑，亦會將通俗廣東話口語寫入歌詞，予人親切感之餘又別樹一幟，例如《問我》、《鬼叫你窮》。除此之外，鑽研過佛學嘅黃霑亦將唔少浮生百態、人生哲理寫入歌詞，例如《家變》。


．黃霑與張國榮喺樂壇可謂合作無間、譜出無數名曲；同時二人亦私交甚篤。每當聽到《明星》，都不禁「輕輕淒然歎喟，懷念他們在我心中照耀過。」

黃霑終其一生對粵語流行曲可謂貢獻良多、厥功至偉，甚至晚年博士論文《粵語流行曲的發展與興衰：香港流行音樂研究（1949－1997）》都以粵語流行曲為題。最後，送上我最中意嘅一句黃霑名詞：「道人道、道神道，自求人間道！」

https://www.youtube.com/watch?v=Grd7B0OtVSA
張學友 - 人間道 (粵語版)

https://www.youtube.com/watch?v=y5HS3WY3D2s
明星 - 唱：張國榮 詞／曲：黃霑

pish

推

Lm

留名學野

留名

絕憐高處多風雨，莫到瓊樓最上層

世間安得雙全法 不負如來不負卿

高質

8. 「問君能有幾多愁？恰是一江春水向東流！」

呢句摘錄自南唐後主李煜一首《虞美人》詞。數歷代皇帝，李煜政績雖百無一是；但其詩詞歌賦、文學造詣就首屈一指，無出其右。

五代十國，烽火連天；宋太祖趙匡胤接連掃除強敵一統天下，南唐政權日暮途窮，身為皇帝嘅李煜喺國家存亡之秋依然縱情聲色，結果國家不保之餘、自己甚至被宋軍所俘。而《虞美人》正係李煜嘅絕命詩；傳聞詩詞嘅思國情緒激嬲咗宋太祖，李煜冇幾耐就被投毒殺害。


．李煜畫像。

李後主嘅詩詞可分為前、後兩個時期：前期指李煜依然大權在握、沉醉於聲色犬馬時所作嘅詩，內容大多有關花天酒地、佢風花雪月嘅麋爛日子；後期指李煜痛失國家、淪為階下囚時所作嘅詩，內容大多有關國仇家恨、佢悔不當初嘅凄涼日子。

最後送上一首李後主晚年所寫嘅《破陣子》：
「四十年來家國，三千里地山河。鳳閣龍樓連霄漢，玉樹瓊枝作煙蘿。幾曾識干戈？
　一旦歸為臣虜，沈腰潘鬢消磨。最是倉皇辭廟日，教坊猶奏別離歌。揮淚對宮娥。」

譯文：
「南唐四十年、幅員三千里。數瓊樓玉宇、高聳入雲，花團錦簇、繁盛茂密；豈知戰爭為何物？
　今當為俘虜、腰瘦鬚鬢白。今國破家亡、辭別祖先，樂隊猶在、演奏驪歌；不禁對宮女灑淚。」


．《破陣子》書法。

《虞美人》全詩：
「春花秋月何時了？往事知多少！小樓昨夜又東風，故國不堪回首月明中！
　雕欄玉砌應猶在，只是朱顏改。問君能有幾多愁？恰似一江春水向東流！」

9. 「圍在城裏的想逃出去，城外的人想衝進去。對婚姻也罷，對職業也罷，人生的願望大都如此。」

呢句說話出自中國名作家楊絳，改編自其丈夫錢鍾書名作《圍城》中引用嘅一句法國諺語：「婚姻是一座圍城，沒有結婚的人，拚命想擠進去，結了婚的人卻拚命想向外爬。」《圍城》主角方鴻漸正正就係一個受圍城所困嘅人，學業、愛情、事業、家庭統統都一塌糊塗；渴望衝出圍城，卻又走入另一座圍城。我覺得方鴻漸就好似《紅樓夢》入面嘅賈寶玉，平生一事無成，只愛「溝女」；如同《圍城》書中人物趙辛楣對方鴻漸嘅評價：「你不討厭，可是全無用處。」－或者各位可能同我一樣對呢句說話有所共鳴。


．年青時侯嘅錢鍾書與楊絳。

我覺得《圍城》係一本令人發人深省嘅書，除咗情節引人入勝外（我最中意頭四章嘅愛恨交織）；錢鍾書幽默嘅筆風、創新嘅比喻、警世嘅金句亦令人睇得津津有味。

譬如「忠厚老實人的惡毒，像飯里的砂礫或魚片裡未淨的刺，給人一種不期待的傷痛」；「天下只有兩種人。比如一串葡萄到手，一種人挑最好的先吃，另一種人把最好的留到最後吃。照例第一種人應該樂觀，因為他每吃一顆都是吃剩的葡萄里最好的；第二種人應該悲觀，因為他每吃一顆都是吃剩的葡萄里最壞的。不過事實卻適得其反，緣故是第二種人還有希望，第一種人只有回憶」；「一個人的缺點正像猴子的尾巴，在地面的時候，尾巴是看不見的，直到他向樹上爬，就把後部供大眾瞻仰，可是這紅臀長尾巴本來就有，並非地位爬高了的新標識。」

好多原有諺語、成語所表達嘅道理，錢鍾書就用生動嘅文字去將其活靈活現，盡顯功架。


．老年時候嘅錢鍾書同楊絳。二人1935年共諧連理、白頭到老。二人喺文化大革命被下放期間，冒住被舉報、批鬥嘅情況下仍然經常偷偷會面。

今日出住一篇先，因為存貨唔多
希望大家仲有睇緊嘅可以正下皮、留下言、推吓post，不勝感激